Read Tshiluba 2 Petro 3 Bible Online

2 Petro 3 - Tshiluba bible

2 Petro 3

¹Bana hetu basuibue, ke mukanda muibidi undi nnufundila ewu. Mu mikanda yonsu ibidi, mvua musue kunutabuluja, bua nupete meji makane ku malongesha andi nnuvuluija.

²Ndi musue bua nuvuluke miaku ivua bambi ba tshijila banulongeshe kale, kabidi ne mikenji ya kudi Mfumu ne Musungidi, ivua bapostolu benu banumanyishe.

³Bangabanga numanye ne: matuku a nshikidilu nekupatuke bantu badi balonda amu majinga abu. Nebanuseke, banuebeja ne:

⁴“Kavua munulaye bua kupingana anyi? Kadi udi penyi? Batatu[13] hetu mbamane kufua. Kadi bionsu bidi amu bitungunuka, muvuabi bituadije katshia bafuka buloba!”

⁵mBapue muoyi ku bukole muvua Mvidi Mukulu muakule ku kale, mufuke diulu ne buloba ku muaku wende. Bavua bapatule buloba mu mayi; mpindiewu budi bulelemapu.

⁶Kabidi ku mayi a mvula wa tshipupu, ke kuvuabu babutule buloba bua kumpala abu.[14]

⁷Kadi diulu ne buloba bia lelu bitshidiku, bualu Mvidi Mukulu mmubilame ku muaku wende awu. Kadi dituku didiye ulumbuluisha bantu, nebibutuke mu kapia, pamue ne bena buenzavi.

⁸Bana hetu basuibue, kudi bualu bumue bunudi kanuyi mua kupua muoyi. Kudi Mfumu dituku dimue didi bu bidimu tshinunu, bidimu tshinunu bidi bu dituku dimue.[15]

⁹Bamue bantu badi bela meji ne: Mfumu udi ujingakana bua kukumbaja bivuaye mulaye. Kadi kabiena nanku nansha. Udi ne lutuulu lua bungi bualu buenu. Bualu udi musue bua muntu nansha umue kajiminyi, kadi bua bonsu bapete diba dia kubenga malu mabi.

¹⁰Kadi dituku dia Mfumu nedifike bu muivi. Dituku adi diulu nedibutuke ne mutoyi mukole. Kapia nekoshe bia mulu bionsu. Buloba ne bidipu bionsu nebijimine.[16]

¹¹Bu mudi bionsu ne bua kubutuka nanku, nudi bumvue munudi ne bua kusomba panu. Nudi ne bua kuikala bantu ba tshijila, badi benza bidi Mvidi Mukulu musue.

¹²Nuindile dituku dia Mvidi Mukulu. Nuenze muenu muonsu bua difike lukasa. Bushuwa dituku adi kapia nekoshe diulu. Bia mulu nebienguluke ku ndimi ya kapia.

¹³Kadi tuetu tudi tutekemena bidi Mvidi Mukulu mulaye: ke diulu dipiadipia ne buloba bupiabupia,[17] muaba wasomba bantu bua kuenza amu tshidi Mvidi Mukulu musue. Ke tshitudi bindile atshi.

¹⁴Bana hetu basuibue, panutshidi bindile dituku edi, enzayi muenu muonsu bua nuikale kanuyi katoba, kanuyi ne bubi, ku mesu kua Mvidi Mukulu. Nusombe kabidi nende mu ditalala.

¹⁵Nuvuluke ne: padi Mfumu munulamine lutuulu, mmusue bua nupete mushindu wa kupanda. Ke bivua muanetu musuibue Polu munufundile ne meji mavule avua Mvidi Mukulu mumupe.

¹⁶Ke bidiye mufunde mu mikanda yende yonsu, padiye umvuija malu a nanku. Mu mikanda yende mudi malongesha makole adi muntu kayi mua kujingulula lukasa. Bantu badi bapange mikanda, kabayi bashindame, badi bumvuija malongesha aa mushindu mubi. Ke mudibu benza kabidi ne miaku mikuabu ya mu Mikanda ya tshijila, badikebela nanku kabutu kabu.

¹⁷Bana hetu basuibue, mpindiewu nkadi mumane kunubela. Nanku nudimuke! Kanuanyishi bua bantu babi aba bena dishima banupambule, banumushe ku tshitaku tshinudi bashindame.

¹⁸Kadi nuidikije mua kuya kumpala mu dinanga, ne mu dimanya dia Mfumu wetu ne Musungidi Yezu Kristu. Yeye mene udi ne butumbi mpindiewu ne tshiendelele! Amene.