Read Tshiluba 1 Yowanane 4 Bible Online

1 Yowanane 4 - Tshiluba bible

1 Yowanane 4

¹Balunda banyi, kanulondi bonsu badi badiamba ne: tudi ne Mueyelu. Kadi nubatete bua kujadika ne: Mueyelu udibu nawu ngwa Mvidi Mukulu anyi?[21] Bualu bambi ba dishima bavule badi batampakane mu bantu.

²Munudi mua kumanya ne: Mueyelu ewu ngwa Mvidi Mukulu, mudi nenku: muntu yonsu udi ujikula patoke ne: Yezu Kristu mmudienze muntu menemene, udi ne Mueyelu wa Mvidi Mukulu.

³Kadi muntu yonsu udi ubenga kujikula patoke bualu ebu, kena ne Mueyelu wa Mvidi Mukulu to. Mueyelu udiye nawu ngwa Muluishi wa Kristu. Nudi bamanye ne: Muluishi awu uvua ne bua kufika. Mpindiewu ukadi munkatshi mua bantu.

⁴Kadi nuenu, bana banyi, nudi bantu ba Mvidi Mukulu. Nukadi batshimune bambi ba dishima. Bualu Mueyelu udi munda muenu udi ne bukole bupite bua mueyelu udi munda mua bena panu.

⁵Bambi ba dishima badi bakula bua bia panu. Ke padi bena panu babateleja, bualu bambi aba mba panu.

⁶Kadi tuetu tudi bantu ba Mvidi Mukulu. Muntu udi kayi wa Mvidi Mukulu, kena ututeleja to. Muntu udi mumanye Mvidi Mukulu, udi ututeleja. Ke mutudi mua kusunguluja Mueyelu wa bulelela ne mueyelu wa ntupakanyi.

⁷Balunda banyi, tunangangane, bualu dinanga didi difume kudi Mvidi Mukulu. Muntu yonsu udi unanga, udi muana wa Mvidi Mukulu, kabidi mmumanye Mvidi Mukulu.

⁸Muntu udi kayi unanga, kena mumanye Mvidi Mukulu, bualu Mvidi Mukulu udi dinanga.

⁹Mvidi Mukulu uvua mutuleje dinanga diende nenku: wakatuma Muanende umuepele mu bantu, bua tupetele muoyi kudiye.[22]

¹⁰Dinanga didi nenku: ki ntuetu bavua banange Mvidi Mukulu to. Kadi Yeye ke uvua mutunange, mufume Muanende bua adilambule bualu buetu, bua kutujimijila mibi yetu.[23]

¹¹Balunda banyi, padi Mvidi Mukulu mutunange nanku, tuetu kabidi tudi ne bua kunangangana.

¹²Muntu nansha umue kena muanji kumona Mvidi Mukulu.[24] Tuetu banangangane, Mvidi Mukulu udi ushala munda muetu. Nanku dinanga diende nedimueneke menemene munda muetu.

¹³Tuetu tudi bamanye ne: Mvidi Mukulu udi ushala munda muetu, ne tuetu kabidi tudi tushala munda muende, mushindu ewu: Mvidi Mukulu mmutupe Mueyelu wende.

¹⁴Tuvua bamone, ke patudi tujadika ne: Tatu uvua mufume Muanende, bua kuikalaye Musungidi wa bantu.[25]

¹⁵Padi muntu ujikula ne: Yezu udi Muana wa Mvidi Mukulu, Mvidi Mukulu udi ushala munda muende, yeye kabidi udi ushala munda mua Mvidi Mukulu.

¹⁶Tuetu tudi bamanye, bitabe kabidi dinanga didi Mvidi Mukulu mutunange nadi. Mvidi Mukulu udi dinanga. Muntu udi unanukila mu dinanga, udi ushala munda mua Mvidi Mukulu, Mvidi Mukulu kabidi udi ushala munda muende.

¹⁷Pikala dinanga dimueneka menemene munda muetu, netuikale ne dikima dituku dia Tshilumbuluilu. Bualu nsombelu wetu wa panu mmufuanangane ne wa Yezu Kristu.

¹⁸Mu dinanga kamuena bowa. Dinanga dia menemene didi diumusha bowa. Nanku muntu udi ne bowa, kena ne dinanga dia menemene. Bualu udi ne bowa, udi utshina dinyoka.

¹⁹Kadi tuetu tudi tunangangana, bualu Mvidi Mukulu uvua mudianze kutunanga.

²⁰Muntu udi wamba ne: “Ndi munange Mvidi Mukulu,” kadi ukina muanabu, mmuena dishima. Bualu kena mua kunanga Mvidi Mukulu udiye kayi umona, padiye ukina muanabu udiye umona.

²¹Mukenji uvua Kristu mutuambile udi nenku: muntu udi unanga Mvidi Mukulu, udi ne bua kunanga kabidi muanabu.[26]