Read Tshiluba Balombodi 10 Bible Online

Balombodi 10 - Tshiluba bible

Balombodi 10

¹Abimeleke mumane kufua, Tola, muana wa Puwa, kabidi ne muikulu wa Dodo, kusungidila bena Izrayele. Tola uvua muena tshisamba tshia Isakare, kadi uvua musombe mu Shamire,[79] mu buloba bua mikuna bua Efrayime.

²Kulombolaye bena Izrayele bidimu makumi abidi ne bisatu. Pashishe kufuaye. Kumujikabu mu Shamire.

³Yayire, muena Ngilaade, kupingana muaba wa Tola. Kushalaye mulombodi wa bena Izrayele bidimu makumi abidi ne bibidi.

⁴Uvua ne bana ba balume makumi asatu. Bana abu bavua babanda pa nyama ya mpunde makumi asatu.[80] Bavua ne misoku makumi asatu mu buloba bua Ngilaade. Too ne mpindiewu, badi binyika miaba eyi ne: mmisoku ya Yayire.

⁵Yayire kufua. Kumujikabu mu Kamone.[81]

⁶Bena Izrayele kuenza kabidi malu mabi adi Maweja-Nangila ubenga. Kutendelelabu mvidie mulume Baale, ne mvidie mukaji Astarte,[82] kabidi ne mvidie ya bena Arame, ya bena Sidone, ya bena Mowabe, ya bena Amone ne ya bena Peleshete. Kulekelabu Maweja-Nangila, kabayi bamutendelela kabidi to.

⁷Nanku Maweja-Nangila kufikila bena Izrayele munda. Kubafilaye mu bianza bia bena Peleshete ne bena Amone.

⁸Kutuadija tshikondu atshi too ne bidimu dikumi ne muanda mukulu, bena bisamba ebi kukengesha, kutatshisha kabidi bena Izrayele bavua basombele mu Ngilaade, buloba bua bena Amone buvua luseke ludi diba dipatukila lua Yardene.

⁹Bena Amone kusabuka mene Yardene, bua kuluisha bena tshisamba tshia Yuda, tshia Binyamine, ne tshia Efrayime. Nanku bena Izrayele kubuela mu dikenga dikole.

¹⁰Kubikilabu Maweja-Nangila bua abambuluishe, bamuambila ne: — Tudi bakuenzele bibi. Bualu tudi bakulekele wewe Mvidi Mukulu wetu, bua kutendelela mvidie Baale.

¹¹Maweja-Nangila kubakonka ne: — Pa wabu banukengesha kudi bena Ejipitu, bena Amore, bena Amone, bena Peleshete,

¹²bena Sidone, bena Amaleke ne bena Mayone, nuvua bambikile bua meme kunuambuluisha. Tshiena munumushe mu bianza biabu anyi?

¹³Kadi nuenu kumbenga, kutendelela anu mvidie mikuabu. Nanku tshiena musue kunusungidila kabidi to.

¹⁴Nubikile anu mvidie inuvua basungule bua inuambuluishe. Anu mvidie ayi ke idi mua kunusungidila panudi mu dikenga.

¹⁵Ke bena Izrayele kuamba kabidi ne: — Maweja-Nangila, tudi bamane kuenza bibi. Utuenzele muudi musue. Kadi utusungidile kabidi lelu.

¹⁶Ke bena Izrayele kumusha mvidie ya bantu benyi ivuabu batendelela. Kutendelelabu tshiakabidi Maweja-Nangila. Nanku Maweja-Nangila kavua kabidi ne disanka bua kumona dikenga dia bena Izrayele to.

¹⁷Bena Amone kudisangisha bonsu. Kuasabu mitanda mu buloba bua Ngilaade. Bena Izrayele bavua base yabu mitanda mu Mispa.[83]

¹⁸Pashishe bisamba bivua biase mu Ngilaade, ne bamfumu babu, kukonkanganabu ne: — Udi mua kutuadija mvita ne bena Amone nnganyi? Muntu watuadija mvita ne bena Amone, neikale mulombodi wa bonsu badi basomba mu buloba bua Ngilaade.