Read Tshiluba Balombodi 11 Bible Online

Balombodi 11 - Tshiluba bible

Balombodi 11

¹Yefete, tshilobu tshia mvita, uvua muana wa mukaji mudisombele. Dina dia tatuende divua Ngilaade.

²Mukaji wa Ngilaade wa ku nzubu, uvua mumulelele pende bana ba balume. Bana abu bamane kukola, kuipatabu Yefete, bamuamba ne: — Wewe kuena mua kupiana bintu bia tatu to, bualu udi muana wa mukaji mukuabu.

³Nanku Yefete kunyema bana babu, kuya kule. Kuasaye mu buloba bua Tobe.[84] Bantu bena buenzayi kudisangisha ne Yefete, kumulonda mu bionsu bivuaye wenza.

⁴Matuku mamane kupita, bena Amone kuluisha bena Izrayele.

⁵Nanku bu muvuabu batuadija kuluangana, bakulu ba mu Ngilaade kuya kukeba Yefete mu buloba bua Tobe.

⁶Kuambilabu Yefete ne: — Luaku, wikale mulombodi wa bena mvita betu, bua tumone mua kuluangana ne bena Amone.

⁷Kadi Yefete kubakonka ne: — Nuenu ke bavua bangipata mu nzubu mua tatu wanyi. Nanku kanuena baluishi banyi anyi? Nudi numbikila mpindiewu panudi mu dikenga bua tshinyi?

⁸Bakulu kumuambila kabidi ne: — Bushiwa, tudi bapingane kuudi mpindiewu, bua tudisange nebe bua kuluisha bena Amone. Kabidi bua wikale mulombodi wetu, ne wa bena Ngilaade bonsu.

⁹Yefete kubambila ne: — Patuikala baye nenu bua kuluisha bena Amone, kabidi pikala Maweja-Nangila mubafile mu bianza bianyi, nengikale mulombodi wenu bushuwa!

¹⁰Bakulu ba mu Ngilaade kuambila Yefete ne: — Maweja-Nangila ikale mujadiki wa dilaya ditudi tulaya dia kukumbaja tshiudi musue.

¹¹Ke Yefete kuya ne bakulu ba mu Ngilaade abu. Bena Izrayele kumuteka mulombodi wa bena mvita. Nanku Yefete kujadika diumvuangana diabu ne bakulu abu ku Mispa,[85] muaba uvua Maweja-Nangila.

¹²Yefete kutuma bantu kudi mukalenga wa bena Amone, bua kumukonka ne: — Paudi uluisha bena ditunga dianyi, tudi tufuila nebe tshinyi?

¹³Mukalenga wa bena Amone kuandamuna Yefete ne: — Nudi bamanye tshitudi tufuila nebe. Bualu pavua bena Izrayele bapatuka mu Ejipitu, bavua bakuata ditunga dianyi, biangatshile ku tshibandabanda tshia musulu wa Amone, too ne ku musulu wa Yaboke, ne ku tshibandabanda tshia musulu wa Yardene. Utupingajile maloba aa mpindiewu ne disanka.

¹⁴Yefete kutuma kabidi bantu kudi mukalenga wa bena Amone,

¹⁵bua bamuambile ne: — Bena Izrayele kabena bakuata buloba bua bena Mowabe, nansha bua bena Amone to.

¹⁶Bualu pavua bena Izrayele bapatuka mu Ejipitu, kupitshilabu mu tshipela too ne ku Mayi manene makunze. Pashishe kufikabu ku Kadeshe.

¹⁷Pavua bena Izrayele mu Kadeshe amu, kutumabu bantu kudi mukalenga wa bena Edome, bua kumulomba dianyisha dia kupitshila mu buloba buende. Kadi mukalenga awu kubenga. Bena Izrayele kulomba anu mushindu umue kudi mukalenga wa bena Mowabe. Awu kubenga kabidi. Nanku bena Izrayele kushala anu mu Kadeshe.

¹⁸Pashishe kutuadijabu luendu mu tshipela. Kunyungulukabu buloba bua bena Edome, ne bua bena Mowabe. Kufikabu ku buloba budi luseke ludi diba dipatukila lua buloba bua Mowabe. Kuasabu mitanda yabu dishiya dia musulu wa Amone. Kabena babuela mu buloba bua bena Mowabe to, bualu musulu wa Amone ke udi mukalu. Nanku kabena bausabuka to.

¹⁹Pavua bena Izrayele muaba awu, kutumabu bantu kudi mukalenga Sihone, muena Amore, uvua mukalenga mu Eshebone. Kumulombabu dianyisha dia kupitshila mu buloba buende, bua bamone mua kuya mu ditunga diabu divuabu ne bua kupeta.

²⁰Kadi Sihone kubenga. Kusangishaye bena mvita bende bonsu. Kudilongololabu ku Yakase bua kuluangana mvita. Kuluishabu bena Izrayele.

²¹Maweja-Nangila Mvidi Mukulu wa bena Izrayele, kufila Sihone ne bena mvita bende mu bianza bia bena Izrayele. Bena Izrayele kutshimuna Sihone. Kukuatabu buloba buonsu buvuabu basomba kudi bena Amore,

²²biangatshile ku tshibandabanda tshia musulu wa Amone too ne ku musulu wa Yaboke, biangatshile kabidi ku tshipela tshidi luseke ludi diba dipatukila lua ditunga too ne ku Yardene.

²³Nanku anu Maweja-Nangila Mvidi Mukulu wa bena Izrayele, ke uvua muanyishe bua tuetu, bantu bende, tukuate buloba bua bena Amore. Kadi wewe udi musue kutunyengabu anyi?

²⁴Kuena ne buebe buloba buvua mvidie webe Kemoshe mukupe anyi? Nanku tuetu kabidi, tudi ne buetu buloba, buvua Maweja-Nangila muanyishe bua tuetu kubukuata.

²⁵Udi wela meji ne: udi ne makanda mupite Balake, muana wa Sipore, mukalenga wa bena Mowabe anyi? Balake mene kavua mubunde bena Izrayele, nansha mubaluishe to.

²⁶Bidimu nkama isatu, bena Izrayele bavua anu base mu bimenga bia Eshebone ne Aroyere, kabidi mu misoku ivua nabi mutumba, ne mu bimenga bionsu bivua ku muelelu wa musulu wa Amone. Bidimu bionsu ebi, kuvua mubanyenge buloba ebu bua tshinyi?

²⁷Meme tshiena mukuenzele bibi to. Wewe ke udi mungenzele bibi, bualu udi unduisha. Anu Maweja-Nangila, mulumbuluishi wa bantu, akose lelu tshilumbu tshidi pankatshi pa bena Izrayele ne bena Amone!

²⁸Kadi bionsu bivua Yefete muambe, mukalenga wa bena Amone kena mubiangate ne mushinga to.

²⁹Mueyelu wa Maweja-Nangila kutulukila Yefete. Kuendakanaye mu buloba bua Ngilaade ne bua Menashe. Kupitshilaye ku Mispa mu Ngilaade, bua kufika mu buloba bua bena Amone.

³⁰Yefete kuditshipa kudi Maweja-Nangila, wamba ne: — Wewe mufile bena Amone mu bianza bianyi,

³¹meme muye kutshimuna bena Amone, mupingane amu bimpe, muntu wadianjila kupatuka mu nzubu muanyi bua kungakidila, nenkupe muntu awu. Nenkulambuleye bu mulambu wa kuosha.

³²Nanku Yefete kusambuka mukalu, bua kuya kuluisha bena Amone. Maweja-Nangila kubafila mu bianza biende.

³³Yefete kubatshimuna anu musangu umue. Kukuataye misoku makumi abidi ivua pankatshi pa Aroyere, Minite ne Abele-Keramine.[86] Ke bena Amone kushala ku bumfumu bua bena Izrayele.

³⁴Pavua Yefete upingana kuende ku Mispa, muanende wa bakaji kupatuka bua kumuakidila. Uvua wenda wimba makasa, uja ne maja. Yefete uvua anu ne muana umue wa bakaji awu. Kavua mulele bakuabu to.

³⁵Yefete umona amu muanende awu, kudipandaye bilamba bua kuleja kanyinganyinga, udila wamba ne: — Akia! Muananyi wa bakaji, wakumbueja mu dikenga! Anu wewe wakunkebela kanyinganyinga bua tshinyi? Mvua mumane kuditshipa kudi Maweja-Nangila. Ndi anu ne bua kukumbaja mitshipu yanyi.

³⁶Muana wa bakaji kuandamuna ne: — Pawikala mumane kuditshipa kudi Maweja-Nangila, ungenzele anu muuvua mulaye Maweja-Nangila. Bualu Maweja-Nangila uvua mukuambuluishe bua wewe kusombuela baluishi bebe bena Amone.

³⁷Kadi undekele ngondu ibidi. Nenye ku mikuna ne bansongakaji nanyi, bua meme kudidilaku bua pandi mfua, tshiyi muanji kuya ku dibaka.

³⁸Yefete kuitaba bua nsongakaji aye bua ngondu ibidi. Nsongakaji kuya ku mikuna ne bansongakaji nende. Kudidilayeku, bua pawaye ufua, kayi muanji kuya ku dibaka.

³⁹Ngondu ibidi mimane kukumbana, nsongakaji kupingana kudi tatuende. Tatuende kumuenzela bu muvuaye mulaye. Nsongakaji kufua, kayi muanji kumanya balume to. Kutuadija tshikondu atshi, tshilele etshi kushala kudi bena Izrayele:

⁴⁰ku tshidimu tshionsu, bansongakaji ba bena Izrayele badi baya kudila matuku anayi, bajinga muana wa bakaji wa Yefete, muena mu Ngilaade.