Read Tshiluba Balombodi 13 Bible Online

Balombodi 13 - Tshiluba bible

Balombodi 13

¹Bena Izrayele kuenza kabidi malu mabi avua Maweja-Nangila ubenga. Nanku Maweja-Nangila kubafila mu bianza bia bena Peleshete bidimu makumi anayi.

²Mu tshimenga tshia Sora,[93] muvua muntu uvuabu binyika ne: Manowa. Uvua wa mu tshisamba tshia Dane. Mukajende kavua mulele muana nansha umue to.

³Dituku dikuabu, mutumibue wa Maweja-Nangila kumuenekela mukaji awu, umuambila ne: — Ndi mumanye ne: kuena mulele, udi nkumba. Kadi newimite difu, neulele muana wa balume.

⁴Bituadije mpindiewu, udilame bimpe. Kunu maluvu a mvinyo, nansha ma-luvu makole makuabu. Kudi tshintu tshidi ne mikiya.

⁵Bualu newimite difu, neulele muana wa balume. Nsongalume ewu, kabena mua kumukosa nsuki to. Bualu yeye kayi muanji kuledibua, mmumane kujidila kudi Mvidi Mukulu.[94] Yeye ke watuadija kusungila bena Izrayele mu bianza bia bena Peleshete.

⁶Mukaji uya kuende, kuambilaye bayende ne: — Muntu wa Mvidi Mukulu mmummuenekele. Uvua bu mutumibue wa Mvidi Mukulu, bualu uvua mukuate bowa bua kumutangila. Tshiena mumukonke muaba udiye ufuma. Kena mungambile dina diende to.

⁷Uvua mungambile ne: newimite difu, neulele muana wa balume. Mmumane kunkandika maluvu a mvinyo, maluvu makole makuabu, nansha biakudia bidi ne mikiya. Bualu nsongalume awu, kayi muanji kuledibua too ne muafuaye, neikale muntu mujidila kudi Mvidi Mukulu.

⁸Manowa kulomba Maweja-Nangila, wamba ne: — Maweja-Nangila, ndi nkusengelela, ututumine kabidi muntu wa Mvidi Mukulu uuvua mumane kututumina, bua atulongeshe mushindu utudi mua kukolesha muana waledibua awu.

⁹Mvidi Mukulu kuitaba dilomba dia Manowa. Mutumibue wa Mvidi Mukulu kumuenekela kabidi mukaji mu budimi. Bayende wa mukaji kavuapu to.

¹⁰Mukaji kuya lubilu bua kuambila bayende ne: — Teleja, muntu uvua mummuenekele dituku dikuabu awu, mmumuenekele kabidi lelu!

¹¹Manowa kuya ne mukajende lukasa. Usemena pamue ne muntu awu, kumukonkaye ne: — Wewe ke uvua muyukile ne muena kuanyi anyi? Muntu awu kuandamuna ne: — Eyowa, mmeme.

¹²Manowa kumuambila kabidi ne: — Pikala malu onsu audi wamba awu makumbane, mmikenji kaayi itudi mua kulonda bua kukolesha muana awu? Netumuenzele tshinyi?

¹³Mutumibue wa Maweja-Nangila kuambila Manowa ne: — Mukajebe ajile bionsu bindi mumuambile:

¹⁴kena mua kulabula bintu bidi bifuma ku mutshi wa mvinyo. Kena mua kunua maluvu makole, nansha a mvinyo mene. Kena mua kudia tshintu tshidi ne mikiya. Mukajebe akumbaje bionsu bindi muambe abi bimpe.

¹⁵Manowa kuambila mutumibue ne: — Bu wewe musue, unsombeshe katupa. Netukulambile muana mbuji.

¹⁶Mutumibue kuandamuna ne: — Nansha meme musombe, tshiakudia biakudia binuampesha to. Kadi, pawikala musue, ulongolole mulambu wa kuosha, uulambule Maweja-Nangila. Manowa kavua muanji kumvua ne: mmutumibue menemene wa Maweja-Nangila to.

¹⁷Nanku kumuambilaye ne: — Utuambile dina diebe bua tuetu kukunemeka, padi bionsu biudi utuambila bikumbana.

¹⁸Mutumibue kubenga, umukonka ne: — Udi musue kumanya dina dianyi bua tshinyi? Dina dianyi didi dia dikema.[95]

¹⁹Manowa kushipa muana mbuji, kulongolola mulambu wa bintu bia mu madimi. Kuutekaye pa lubuebue bua kulambula Maweja-Nangila udi wenza malu adi a dikema.[96] Pavua Manowa ne mukajende batangile

²⁰ndimi ya kapia, muinshi mua mulambu uvua ubanda ku tshilambuilu, uya mulu. Manowa ne mukajende kumona mutumibue wa Maweja-Nangila ubanda munkatshi mua muinshi. Pashishe Manowa ne mukajende kudiela mpala panshi.

²¹Manowa kujadika ne: muntu ewu uvua mutumibue wa Maweja-Nangila. Kadi mutumibue kena mubamuenekele musangu mukuabu to. Kuyaye kashidi.

²²Manowa kuambila mukajende ne: — Bulelela netufue, bualu tudi bamone Mvidi Mukulu.

²³Mukajende kumuandamuna ne: — Bu Maweja-Nangila musue kutushipa, kavua mua kuanyisha mulambu wetu wa kuosha, ne wa bintu bia mu madimi. Kavua mua kutuleja bionsu bitudi bamone ebi. Kavua mua kutuambila mikenji yonsu itudi bumvue eyi.

²⁴Ke mukaji wa Manowa kulela muana wa balume, kumuinyika Shimeshone. Nsongalume kukola, Maweja-Nangila kumuela lupemba.

²⁵Muana awu, uvua mu mitanda ya Dane, pankatshi pa Sora ne Eshetayole, tshikondu tshivua Mueyelu wa Maweja-Nangila mutuadije kumuenzeja malu a dikema musangu wa kumpala.