Read Tshiluba Balombodi 20 Bible Online

Balombodi 20 - Tshiluba bible

Balombodi 20

¹Bena Izrayele bonsu kumvuangana ne muoyi umue, kudisangisha ku Mispa, muaba udi Maweja-Nangila. Bivua bafume ku nseke yonsu, biangatshile ku Dane, ku mutu mu ditunga, too ne ku Bersheba, kuinshi mu ditunga. Bakuabu bavua bafume kabidi ku ditunga dia Ngilaade, didi luseke ludi diba dipatukila[129] lua Yardene.

²Bamfumu bonsu, ne bantu ba mu bisamba bionsu bia bena Izrayele, bavua mu tshisangilu etshi tshia bantu ba Mvidi Mukulu. Kuvua bena mvita bavua benda ku makasa, bamanye bimpe mua kuluangana ne miele, binunu nkama inayi.

³Bena Binyamine kumvua lumu ne: bisamba bionsu bia bena Izrayele mbidisange ku Mispa. Bena Izrayele kukonka muena Levi awu ne: — Utuambile mushindu udi bualu ebu bubi buenzeka.

⁴Muena Levi, bayende wa mukaji uvuabu bashipe, kuandamuna ne: — Meme ne mukajanyi mukuabu, tuvua bafike mu Ngibeya,[130] mu buloba bua bena Binyamine bua kulala.

⁵Bena Ngibeya kufika butuku bua kungenzela bibi. Kunyungululabu nzubu umvua awu. Bivua basue kunshipa. Kadi kuangatabu mukajanyi, kushala nende too pakafuaye.

⁶Pashishe meme kuambula tshitalu tshia muena kuanyi, kutshikosa mu mabulu andi mutumine tshisamba ne tshisamba tshia bena Izrayele. Bualu bantu aba mbenze bualu bubi budi bufuisha tshisamba tshia bena Izrayele bundu.

⁷Nanku mpindiewu, bu mudi bena Izrayele bonsu bamane kutuilangana, nuebejangane bualu ebu, nukebe tshinudi mua kuenza.

⁸Bantu bonsu bamane kumvuangana, kuimanabu kulu, bamba ne: — Muntu nansha umue wa munkatshi muetu, kena mua kupingana kuende, mu mitanda yende, nansha ku nzubu kuende.

⁹Tshitudi basue kuenzela bena Ngibeya tshidi nunku: netutshinke,

¹⁰netusungule muntu umue ku bantu dikumi ba mu tshisamba tshionsu tshia bena Izrayele, bua bikale ne mudimu wa kuambula biakudia bia bena mvita badi baya kuluisha bena Ngibeya,[131] bua kubanyoka bua bualu ebu bubi budibu benze mu Izrayele.

¹¹Ke bena Izrayele bonsu kumvuangana, kudisangisha ne muoyi umue bua kuluisha bena Ngibeya.

¹²Bisamba bia bena Izrayele kutuma bantu mu buloba bua bena Binyamine bua kubakonka ne: — Mbishi muvuabu benze bualu ebu bubi bua bundu mu ditunga dienu?

¹³Nanku mpindiewu, nutupe bena tshibawu abu, bena buenzayi ba bena Ngibeya abu. Netubashipe bua kujikija bubi ebu munkatshi mua tshisamba tshia bena Izrayele. Kadi bena Binyamine kabavua basue kuteleja bana babu bena Izrayele to.

¹⁴Bena Binyamine ba miaba mishilangane, kudisangisha ku Ngibeya bua kuluisha bena Izrayele.

¹⁵Dituku adi, kubikilabu bantu binunu makumi abidi ne bisambombu, bafume ku misoku yabu yonsu bua kubabueja mu mudimu wa bena mvita. Bena Ngibeya kusangisha kabidi bantu babu bena mvita nkama muanda mutekete, bavua bamanye mvita bikole.

¹⁶Mu tshiluilu atshi muvua bena mvita nkama muanda mutekete, bavua bamanye mvita bikole, bikale ne luboku. Muntu yonsu wa ku bantu aba, yeye muele lusoka ne ndundu, uludikila nansha ku lusuki, kavua mua kulupanga to.

¹⁷Kadi bisamba bikuabu bia bena Izrayele bivua Nsangisha bena mvita binunu nkama inayi, bavuabu bamane kulongesha mua kuluangana mvita.

¹⁸Bena Izrayele kuya ku Betele,[132] kuebeja Mvidi Mukulu bua kumanya tshisamba tshia ku bisamba biabu tshivua mua kudianjila kuya kuluisha bena Binyamine. Maweja-Nangila kuleja tshisamba tshia Yuda.

¹⁹Butshia dinda, bena Izrayele kuya kuasa mitanda pabuipi ne Ngibeya.

²⁰Pashishe kusemenabu bua kuluisha bena Binyamine. Kuelabu mualu wa mvita, balulamangane ne Ngibeya.

²¹Dituku adi bena Binyamine kupatuka mu tshimenga, kushipa bena Izrayele binunu makumi abidi ne bibidi.

²²Bena Izrayele kuya kudila kumpala kua Maweja-Nangila too ne ku dilolu. Kumuebejabu ne: tudi mua kuya kuluangana kabidi ne bana betu bena Binyamine anyi?

²³Maweja-Nangila kuitaba bua baye kuluangana. Nanku bena mvita ba bena Izrayele kupeta bukole. Kuelabu mualu wa mvita, anu muaba uvuabu bimanyine dituku dikuabu.

²⁴Dituku dibidi kuluishabu kabidi bena Binyamine.

²⁵Dituku dibidi dia mvita adi, bena Binyamine kupatuka tshiakabidi mu Ngibeya, kushipa bena mvita ba bena Izrayele binunu dikumi ne muanda mukulu, anu bantu bavua bamanye bimpe mua kuluangana.

²⁶Ke bena Izrayele bonsu kuya ku Betele. Bantu kusomba muaba uvua Maweja-Nangila, bua kudila. Dituku adi kujilabu biakudia too ne ku dilolu. Kulambulabu Maweja-Nangila milambu ya kuosha, ne ya bobumue.

²⁷Tshikondu atshi, mushete wa tshijila wa Mvidi Mukulu uvua ku Betele.

²⁸Pinase, muana wa balume wa Elazare (Elazare uvua muana wa Arone), ke uvua mulame mushete awu. Bena Izrayele kuebeja Maweja-Nangila bua kumanya ne: tudi mua kuya kuluisha kabidi bana betu bena Binyamine, anyi katuena mua kuya. Maweja-Nangila kubambila ne: — Nuye kubaluisha. Malaba nembafile mu bianza bienu.

²⁹Bena Izrayele kusokoka bena mvita babu, banyungulule tshimenga tshia Ngibeya.

³⁰Pashishe kuyabu kuluisha bena Binyamine musangu muisatu, anu bu muvuabu babaluisha kabidi. Kuelabu mualu wa mvita, balulamangane ne tshimenga tshia Ngibeya.

³¹Bena Binyamine kupatuka bua kuluisha bena Izrayele. Kadi bena Izrayele kuenza bu badi banyema bena Ngibeya. Nanku bena Ngibeya kutuadija kushipa bena mvita ba bena Izrayele, bu muvuabu babashipa misangu mikuabu. Bena Ngibeya kushipa bena Izrayele makumi asatu. Bivua babashipela mu mpata, mu njila wa ku Betele, ne wa ku Ngibeya.

³²Bena Ngibeya bavua bela meji ne: tuatshimunyi bena Izrayele, bu mutuvua babatshimune kumpala. Kadi bena Izrayele bavua bamane kumvuangana bua kunyema bena Binyamine, bua bena Binyamine babalonde mu njila ivua mu mpata, mutantshi mule ne Ngibeya.

³³Pashishe bena mvita bakuabu ba bena Izrayele, kupatuka miaba ivuabu basokome. Kudisangishabu ku Baale-Tamare. Bena mvita bakuabu ba bena Izrayele bavua basokome pabuipi ne tshimenga tshia Ngibeya, kupatuka diakamue ku luseke lua ku mpata wa Ngeba.[133]

³⁴Nanku bena mvita binunu dikumi, bavua bamanye mvita bikole, ba mu bisamba bionsu bia bena Izrayele, kufika balulamangane ne tshimenga tshia Ngibeya. Kuluanganabu mvita mikole. Kadi bena Binyamine kabavua bamanye ne: netukenge bikole!

³⁵Maweja-Nangila kunyemesha bena Binyamine kumpala kua bena Izrayele. Dituku adi bena Izrayele kushipa bena mvita ba bena Binyamine binunu makumi abidi ne bitanu ne lukama.

³⁶Bena Binyamine kujadika ne: mbatubunde. Bena Izrayele bavua benda banyema bena Binyamine, bualu bavua batekemena anu bena mvita babu bavua basokome, banyungulule tshimenga tshia Ngibeya.

³⁷Bena mvita ba bena Izrayele bavua basokome abu, kusemena lukasa mu Ngibeya, kubuelamu ne mvita, kushipa bena tshimenga atshi.

³⁸Nanku, bavua bamane kumvuangana ne bena Izrayele bakuabu, babapesha tshimanyinu tshia ne: padi muinshi ubanda mulu mu Ngibeya, tudi bamane kutshikuata.

³⁹Bena mvita ba bena Izrayele, kuenza bu badi banyema mvita. Bena Binyamine kushipa bena Izrayele bu makumi asatu, bela meji ne: netubatshimune, bu mutuvua babatshimune kumpala.

⁴⁰Kadi diba adi, muinshi wa tshimanyinu kumueneka mu Ngibeya. Bena Binyamine batangile panyima, kumona muinshi ne ndimi ya kapia mulu mu tshimenga tshiabu tshijima.

⁴¹Bena Izrayele kukudimukila bena Binyamine bua kubaluisha. Bena Binyamine kukuatshika bowa, bualu bavua bamone ne: tudi mu dikenga dikole!

⁴²Kunyemabu bena Izrayele, kuyabu luseke lua ku tshipela. Kadi kubaluishabu nseke yonsu, luseke kudi tshiluilu tshinene tshia bena Izrayele, kabidi luseke kudi bena mvita bakuabu bavua batumina ku Ngibeya. Bena Izrayele kushipa bena Binyamine.[134]

⁴³Bena Izrayele kuela bena Binyamine munkatshi. Kubalondakajabu, benda babashipela mu njila, kabayi mua kubashila muaba,[135] too ne ku muaba mukuabu uvua luseke lua kudi diba dipatukila lua Ngibeya.

⁴⁴Nanku, bena mvita ba bena Binyamine kufua binunu dikumi ne muanda mukulu, bikale bonsu bantu ba bukitu.

⁴⁵Bena Binyamine bakuabu, kunyemena luseke lua ku tshipela, kuvua lubuebue lua Rimone. Kadi bantu ba munkatshi muabu binunu bitanu kubashipelabu mu njila. Pashishe kulondakajabu bavua bashale too ne ku Ngidome. Kushipabu kabidi bantu bakuabu binunu bibidi.[136]

⁴⁶Dituku adi, bena mvita ba bena Binyamine bavuabu bashipe bavua binunu makumi abidi ne bitanu, bonsu bantu bavua ne bukitu.

⁴⁷Kadi bena mvita ba bena Binyamine nkama isambombu, bavuabanyemena luseke luaku tshipela, kabavua bafue to. Kufikabu ku lubuebue lua Rimone. Kushalabu muaba awu ngondu inayi.

⁴⁸Bena Izrayele kutuadija kuluisha bena Binyamine bavua bashale. Kubashipabu, bapitshile ku tshimenga ne ku tshimenga. Kushipabu bantu balume bonsu, too ne bimuna.[137] Pashishe kuoshabu miaba yonsu ya buloba abu.