Read Tshiluba Balombodi 3 Bible Online

Balombodi 3 - Tshiluba bible

Balombodi 3

¹Maweja-Nangila kushiya bisamba ebi mu ditunga amu, bua kuteta nabi bena Izrayele bavua kabayi baluangana mvita pamue ne bakuabu, bua kukuata ditunga dia Kenaane.

²Uvua musue bua ndelanganyi mipiamipia ya bena Izrayele, nangananga ivua kayiyi mianji kuluangana mvita, ilonge mua kuluangana.

³Bantu bavua Maweja-Nangila mushiye mu ditunga, ke bena makalenga atanu a bena Peleshete, bena Kenaane bonsu, bena Sidone, ne bena Ivi bavua base mu mikuna ya Lebanone, biangatshile ku mukuna wa Baale-Ermone, too ne ku Lebo-Amate.

⁴Maweja-Nangila uvua mushiye bisamba ebi, bua kujadika nabi ne: bena Izrayele nebakumbaje mikenji, inwua mupeshe Moshe bua kumanyishaye bankambua babu anyi?

⁵Ke pavua bena Izrayele base munkatshi mua bena Kenaane, bene Iti, bena Amore, bena Perizi, bena Ivi, ne bena Yebusa.

⁶Bena Izrayele kusela bakaji ba mu bisamba ebi, kubaselesha bana babu ba bakaji, kutendelela ne mvidie yabu.

⁷Bena Izrayele kuenza malu mabi avua Mvidi Mukulu wabu mubenge. Kupuabu Maweja-Nangila muoyi. Kutendelelabu mvidie Baale ne Ashera.[14]

⁸Maweja-Nangila kufikila bena Izrayele munda. Kubafilaye mu bianza bia Kushane-Rishatayime, mukalenga wa Mezopotamiya. Bena Izrayele kushala ku bumfumu buende bidimu muanda mukulu.

⁹Bena Izrayele kudila, kubikila Maweja-Nangila bua abambuluishe. Maweja-Nangila kubatumina Otniyele, muana wa Kenaze (Kenaze mmuakunyi wa Kalebe), bua abasungidile.

¹⁰Mueyelu wa Maweja-Nangila kutulukila Otniyele. Kushalaye mulombodi wa bena Izrayele. Kuyaye kuluangana mvita. Maweja-Nangila kumupesha bukole bua kutshimunaye mukalenga Kushane-Rishatayime.

¹¹Ditunga dijima kupeta ditalala bidimu makumi anayi. Pashishe Otniyele, muana wa Kenaze, kufua.

¹²Bena Izrayele kuenza kabidi malu mabi avua Maweja-Nangila mubenga. Nanku Maweja-Nangila kubatumina Eglone, mukalenga wa bena Mowabe,[15] bua abaluishe.

¹³Mukalenga Eglone kumyuangana ne bena Amone, kabidi ne bena Amaleke.[16] Kuluishabu bena Izrayele, kukuata tshimenga tshia Yeriko.

¹⁴Bena Izrayele kushala ku bumfumu bua mukalenga Eglone bidimu dikumi ne muanda mukulu.

¹⁵Ke bena Izrayele kudila, kubikila Maweja-Nangila bua abambuluishe. Maweja-Nangila kubatumina musungidi. Ke Ekude, muana wa Ngera, wa mu tshisamba tshia Binyamine, uvua ne luboku. Bena Izrayele kutuma Ekude kudi Eglone, mukalenga wa bena Mowabe, bua afile milambu yabu kudiye.

¹⁶Kadi Ekude kuenzeja muele wa mvita wa nkanza, wa bule bua santimetre makumi atanu. Kuusokokaye muinshi mua bilamba biende, ku tshibelu tshiende tshia lua balume.

¹⁷Pashishe Ekude kuya bua kulambula mukalenga Eglone bintu abi. Mukalenga Eglone uvua muntu wa mubidi munene.

¹⁸Ekude mumane kufila bintu abi, kumukaye ne bantu bavua bambula bintu.

¹⁹Ufika pabuipi ne Ngilgale[17] muaba uvua mpingu ya mabue ya kutendelela mvidie, kupinganaye kudi mukalenga Eglone. Kumuambilaye ne: — Mukalenga, ndi ne bualu bua mu musokoku bua kukuambila! Nanku mukalenga kutuma diyi bua bena mudimu bende bapatuke. Bantu bonsu kupatuka.

²⁰Mukalenga Eglone uvua musombe mu nzubu wende wa tshilala kulu, muaba mutalale. Ekude kusemena pabuipi, kumuamba ne: — Bualu bundi ne bua kukuambila mbua kudi Mvidi Mukulu. Mukalenga Eglone kujuka mu nkuasa.

²¹Ekude kupatula ne tshianza tshia luboku muele uvuaye muase ku mikaba ku tshibelu tshia lua balume. Kutuaye mukalenga Eglone muele awu mu difu.

²²Muele kubuela onsu ne tshilabi. Mafuta kujibikila muele, bualu Ekude kavua mupatule muele to.[18]

²³Ekude mumane kuinjila biibi bia ku nzubu, mukange ne nsapi, kupatukaye ku mfundu.[19]

²⁴Yeye mumane kuya, bena mudimu kubuela. Kumonabu ne: biibi mbikange. Kuelabu meji ne: mukalenga udi mua kuikala ku nkumba.

²⁵Kushalabu bindile; kubatondabi. Kadi mukalenga kavua munzulule biibi bia ku nzubu to. Ke bena mudimu kuangata nsapi, kudikanguila ku nzubu nkayabu. Kusanganabu mukalenga wabu mutandabale panshi, mulue!

²⁶Patshi wa bena mudimu bajingakana apu, Ekude mmumane kunyema. Kupitaye muaba uvua mpingu ya mabue, kuyaye kusokoma ku Seyira.[20]

²⁷Mumane kufika muaba awu, kuelaye mpungi bua kubikila bena Izrayele ba mu buloba bua mikuna bua bena Efrayime.[21] Pashishe kupitaye kumpala kuabu bua kupueka nabu ku mukuna, ubambila ne:

²⁸— Ndondayi panyima, bualu Maweja-Nangila mmumane kufila baluishi benu bena Mowabe mu bianza bienu. Bena Izrayele kulonda Ekude mu nyima, kunyenga bena Mowabe bisabu bia ku Yardene. Muntu nansha umue kavua mua kusabuka kabidi to.

²⁹Dituku adi, bena Izrayele kushipa bena Mowabe bu binunu dikumi, bonsu bantu ba mukitshi, ba muoyi mukole. Kakuvua kushala muntu nansha umue ne muoyi to.

³⁰Kutuadija tshikondu atshi, bena Mowabe kushala ku bumfumu bua bena Izrayele. Ditunga kupeta ditalala bidimu makumi muanda mukulu.

³¹Mulombodi uvua ulonda Ekude, ke Shamgare, muana wa Anate. Kushipaye bena Peleshete nkama isambombu anu ne mutshi wa kusaka nawu ngombe,[22] bua kusungidila bena Izrayele.