Read Tshiluba Balombodi 7 Bible Online

Balombodi 7 - Tshiluba bible

Balombodi 7

¹Butshia dinda, Ngideyone, uvuabu binyika kabidi ne: Yerubaale, kutuadija luendu ne bena mvita bende. Kuyabu kuasa mitanda pabuipi ne mpokolu wa mayi wa Arode. Mitanda ya bena Madiyane ivua ku mutu kakese, mu mpata, ku luseke lua mukuna wa More.[51]

²Maweja-Nangila kuambila Ngideyone ne: — Bena mvita bebe mbapite bungi. Tshiena mua kubambuluisha bua batshimune bena Madiyane. Bualu bena Izrayele badi mua kuditambisha ne: tudi batshimune ku bukole buetu. Nanku bena Izrayele badi mua kudiangatshila butumbi budi buanyi.

³Uye kuambila bena mvita bebe ne: “Bena mvita bonsu badi ne bowa, bazakala,[52] bumuke ku mukuna wa Ngilaade, bapingane kuabu.” Bena mvita binunu makumi abidi ne bibidi kupingana. Bena mvita kushala binunu dikumi.

⁴Maweja-Nangila kuambila Ngideyone ne: — Bena mvita batshidi anu ba bungi. Pueka nabu ku muelelu wa musulu, bua meme kukusungulujilabu. Nenkuambile bena mvita badi ne bua kuya nebe, ne badi ne bua kushala.

⁵Ngideyone kupueka ne bena mvita bende ku muelelu wa musulu. Pashishe Maweja-Nangila kumuambila ne: — Bantu bonsu bikale balaka mayi ne ludimi bu mbua, ubateke bashilangane ne badi batua binu bua kunua mayi.

⁶Bantu nkama isatu kunua mayi ne tshianza, balaka. Kadi bakuabu bonsu kutua binu panshi bua kunua mayi.

⁷Maweja-Nangila kuambila Ngideyone ne: — Uye ne bantu aba nkama isatu badi balaka mayi. Kadi bantu bakuabu bonsu bapingane kuabu.

⁸Ngideyone kushala anu ne bantu nkama isatu. Kupingajaye bena Izrayele bakuabu bonsu kuabu. Kadi kushalabu ne biakudia, kabidi ne mpungi, bia bavua bumuke. Mitanda ya bena Madiyane ivua mu mpata, kuinshi menemene mu tshibanda.

⁹Butuku abu, Maweja-Nangila kuambila Ngideyone ne: — Juka, uye kubunda bena Madiyane badi mu mitanda yabu. Bualu meme ndi nkupeshabu.

¹⁰Kadi pawikala ne bowa, nudianjile kuya kumona mitanda, pamue ne Pura udi ubambuluisha awu.

¹¹Neunwue bionsu bidibu bamba. Pashishe, newikale ne dikima dia kubaluisha. Ngideyone ne Pura kupueka too ne ku mpenga kua mitanda.

¹²Bena Madiyane, bena Amaleke, ne bantu balalakanyi bavua bafuma luseke ludi diba dipatukila, bavua bapasalala mu mpata bungi bu mpasu. Bivua ne tumelu tupite bungi, bu lusenga ludi ku muelelu wa mayi manene.

¹³Ngideyone ufika, kusangana muntu wawila mulunda wende tshilota ne: — Ndi mulote tshilota, meme kumona diampa, dienza ne bukula bua orje, dibulunga mu mitanda yetu. Kudikumadi ku ntenta. Ntenta awu kupuka, mutue mutu panshi.[53]

¹⁴Mulunda wende kumuandamuna ne: — Tshilota etshi katshiena tshileja bualu bukuabu to, tshidi tshileja anu muele wa mvita wa Ngideyone, muena Izrayele, muana wa Yowashe. Mvidi Mukulu mmumane kujadika bua kutufila mu bianza biende ne mitanda yetu yonsu.

¹⁵Ngideyone umvua amu tshilota atshi, ne dijingulula diatshi, kuinyikaye mutu panshi bua kuela Mvidi Mukulu tuasakidila. Pashishe kupinganaye mu mitanda ya bena Izrayele, wela mbila ne: — Jukayi, Maweja-Nangila mmumane kunupa mitanda ya bena Madiyane!

¹⁶Ngideyone kutapulula bena mvita nkama isatu ayi mu bisumbu bisatu. Kupeshaye muntu yonsu mpungi, mulondu wa munda mutupu, ne tshimunyi tshia kuteka munda mua mulondu amu.

¹⁷Pashishe kubambilaye ne: — Nuikale bantangile anu meme. Nuenze bionsu bindi ngenza, pangikala mufike ku mpenga kua mitanda yabu.

¹⁸Patuela mpungi, meme ne bantu bonsu bandi nabu, nenuele bienu mpungi nseke yonsu ya mitanda. Nenuele kabidi mbila ne: “Anu Maweja-Nangila, anu Ngideyone!”

¹⁹Pabuipi ne munda nkulu, Ngideyone ne bena mvita lukama bavuaye nabu, kufika ku mpenga kua mitanda. Baluishi bavua bamane kushintulula batentekedi. Ngideyone ne bavuaye nabu kuela mpungi, kushipa milondu ivuabu bambule.

²⁰Bisumbu bikuabu bibidi kuenza nanku kabidi. Bonsu kukuata bimunyi mu tshianza tshia bakaji, mpungi mu tshianza tshia balume, bela mbila ne: — Tuluishayi bantu aba mu dina dia Maweja-Nangila, ne dia Ngideyone!

²¹Kuimanabu nseke yonsu ya mitanda. Muntu yonsu uvua pa muaba wende. Kadi mu mitanda bantu bonsu bavua banyema, bela mbila, batshina.

²²Pavua bena mvita abu nkama isatu bela mpungi, Maweja-Nangila uvua usaka bena Madiyane bua bashipangane nkayabu mu mitanda yonsu. Ku nshikidilu, bena Madiyane bavua bashala, kunyema too ne ku Bete-Shita luseke lua ku Sereda, nansha too ne ku tshimenga tshia Abele-Mekola, pabuipi ne Tabate.[54]

²³Kubikilabu bena Izrayele ba mu tshisamba tshia Naftali, tshia Ashere, ne tshia Menashe bonsu, bua balondakaje bena Madiyane.

²⁴Ngideyone kutuma bantu bua kuela diyi luseke lua mikuna ya Efrayime ne: — Puekayi bonsu, nujikile bena Madiyane njila. Nukuate maloba onsu adi ku musulu wa Yardene, too ne ku Bete-Bara. Nanku kubikilabu bena Efrayime bua bapueke, bakuate maloba adi ku Yardene too ne ku Bete-Bara.

²⁵Kukuatabu bamfumu babidi ba bena Madiyane, Orebe ne Zebe. Kushipelabu Orebe pa lubuebue lua Orebe. Kushipelabu Zebe ku tshikaminu tshia Zebe. Pashishe kutungunukabu, balondakaja bena Madiyane. Ngideyone uvua mushale dishiya dia Yardene. Kumutuadilabu mutu wa Orebe ne wa Zebe.