Read Tshiluba 2 Yowanane 1 Bible Online

2 Yowanane 1 - Tshiluba bible

2 Yowanane 1

¹Meme Mukulu, ndi mfundila Mukaji musungula kudi Mvidi Mukulu, kabidi ne bana bende,[1] mukanda ewu. Ndi mupite kununanga. Tshiena mununange amu meme nkayanyi to. Banunange kabidi kudi bonsu badi bamanye bulelela.

²Bualu bulelela budi munda muetu. Nebushale kabidi netu kashidi.

³Dinanga, luse ne bupole bia kudi Mvidi Mukulu Tatu, ne bia kudi Yezu Kristu, Muana wa Tatu, bishindame munda muenu, bua tupete mapa aa mu bulelela ne mu dinanga.

⁴Mvua ne disanka dipite, pamvua musangane bamue ba munkatshi mua bana bebe benda mu njila wa bulelela, muvua Tatu mututumine diyi.

⁵Mpindiewu, Mukaji munanga, ndi nkusengelela ne: tunanganganayi. Mukenji undi nkuambila ewu kawena mupiamupia nansha. Kadi ke mukenji utuvua bapete biangatshile ku ntuadijilu.[2]

⁶Dinanga dindi ngamba didi nenku: tulonde mikenji ya Mvidi Mukulu. Mukenji, munudi baupete biangatshile ku ntuadijilu, udi ne: nunangangane.

⁷Bena dishima bavule mbatangalake munkatshi mua bantu. Kabena bitaba ne: Yezu Kristu mmudienze muntu menemene. Muntu udi wenza malu a nanku mmuena dishima, kabidi mMuluishi wa Kristu.

⁸Nunku nuenu kabidi nudimuke bua kanujimiji bipeta bia ku mudimu wenu.[3] Kadi nukuate mudimu bua nupete difutu dienu dijima.

⁹Muntu yonsu udi kayi witaba ne dinanukila bidi Kristu ulongesha, kadi uya kua tshianana, kena ne Mvidi Mukulu to. Muntu udi witaba amu bidi Kristu ulongesha, udi ne Tatu, kabidi ne Muana.

¹⁰Padi muntu ufika kunudi ne dilongesha dikuabu, kanumubueji mu nzubu, kanumuedi nansha muoyi.

¹¹Bualu muntu udi wela wa nanku muoyi, udi udisanga nende mu malu adiye wenza.

¹²Ndi ne malu a bungi akunuambila. Kadi tshiena musue kuafunda pa dibeji ne mayi a mukanda. Ndi ntekemena kufika kuenu aku, bua tuyukidilangane mpala ne mpala, tusanka tutshionkomoka.

¹³Badi bakuela muoyi kudi bana ba Muanenu wa bakaji,[4] uvua Mvidi Mukulu musungule kabidi.