Read Tshiluba Didimanyisha 12 Bible Online

Didimanyisha 12 - Tshiluba bible

Didimanyisha 12

¹Tshintu tshinene kumueneka mu diulu: ke mukaji uvua muvuale diba bu tshilamba, ngondu kuinshi kua makasa ende, kabidi ne tshifulu tshia bukalenga ku mutu, tshileja mitotu dikumi ne ibidi.

²Ukavua pa kulela muana, wela mbila mikole ya pa lulelu, ukengakana.

³Tshintu tshikuabu kumueneka mu diulu: ke nyoka mukunze munene wa tshidika, muikale ne mitu muanda mutekete, kabidi ne nsengu dikumi. Ku mutu onsu kuvua tshifulu tshia bukalenga.[74]

⁴Kukombaye tshia bisatu tshia mitotu ya mu diulu ne mukila wende, uyimansha pa buloba. Uvua muimane kumpala kua mukaji ukavua pa kulela, bua kuminaye muana diakamue diba diapatukaye munda.[75]

⁵Ke mukaji kulela muana wa balume, wavua kuludika matunga onsu ne dikombu dia tshiamu.[76] Kadi kubakulabu muana, kuya nende too ne ku nkuasa wa butumbi wa Mvidi Mukulu.

⁶Mukaji kunyemena mu tshipela, muvua Mvidi Mukulu mumulongoluele muaba, bua kumudishilamu matuku tshinunu nkama ibidi ne makumi asambombu.

⁷Pashishe mvita kujuka mu diulu. Mikayele[77] ne batumibue bende kuluangana mvita ne nyoka wa tshidika. Nyoka pende uvua ubaluisha ne bende batumibue.

⁸Kadi kutshimunabu nyoka wa tshidika ne batumibue bende abu. Kabavua banyisha bua nyoka ne batumibue bende kushalabu kabidi mu diulu nansha.

⁹Kuipatabu nyoka wa tshidika munene awu mu diulu. Nyoka awu ke nyoka wa kale, udibu binyika ne: diabolu, nansha Satane, udi udinga buloba bujima. Kumuimanshabu pa buloba, pamue ne batumibue bende bonsu.[78]

¹⁰Ke meme kumvua diyi dikole mu diulu diamba ne: “Tshikondu tshidi Mvidi Mukulu usungidila bantu tshiafiki mpindiewu! Mvidi Mukulu wetu mmuleje bukole buende, mmutuadije bukalenga buende mpindiewu! Udi muteke bumfumu buende mu bianza bia Meshiya wende uvuaye mudisunguile. Bualu mbipate mu diulu musonguedi wa bana hetu, uvua ubasonguela kudi Mvidi Mukulu munya ne butuku.[79]

¹¹Bana betu mbamutshimune ku bukole bua mashi a Muana wa mukoku, ne ku bukole bua malu malelela avuabu bambe, bajadike. Bavua bajinga kufila muoyi wabu; nansha bua kufua bavua amu bitabe.

¹²Nanku nuenu, diulu ne badi basombamu, tuayi tshianga! Kadi nuenu, buloba ne mayi manene, nudi bena diakabi! Bualu diabolu mmupueke kunudi. Udi ne tshiji tshikole, bualu udi mumanye mudi matuku ende mashale makese.”

¹³Nyoka wa tshidika ujingulula ne: mbangele pa buloba, kutuadijaye kulondakaja mukaji uvua mulele muana wa balume awu.

¹⁴Kadi mukaji uvua mupete mapuapua abidi bu a nyunyi wa tshiminyi. Kubuukaye nawu mu tshipela too ne ku muaba wende, uvuabu ne bua kumudishila bidimu bisatu ne tshitupa,[80] muaba uvua nyoka kayi mua kumupeta.

¹⁵Ke nyoka kupatula mayi mukana muende bungi bu musulu, avua adiela kudi mukaji, bua adiinemu.

¹⁶Kadi buloba kuambuluisha mukaji, kutubula mukana, kumina mayi avua nyoka mupatule mukana.

¹⁷Nyoka kufikila mukaji munda bikole. Kuyaye kuluisha ndelanganyi ya mukaji ivua mishale. Ke bantu bonsu badi batumikila mikenji ya Mvidi Mukulu, bitabe malu malelela avua Yezu mumanyishe.

¹⁸Ke nyoka wa tshidika kuimana[81] ku muelelu wa mayi manene.