Read Tshiluba Didimanyisha 13 Bible Online

Didimanyisha 13 - Tshiluba bible

Didimanyisha 13

¹Pashishe meme kumona nyama upatuka mu mayi manene. Uvua ne nsengu dikumi ne mitu muanda mutekete. Ku lusengu luonsu kuvua tshifulu tshia bukalenga. Pa mitu yende bavua bafunde mena a kusendeka nawu Mvidi Mukulu.

²Nyama umvua mumone uvua bu nkashama, mikolu yende bu ya nyama wa urse, ne mukana muende bu mua ntambue. Nyoka wa tshidika uvua mumupeshe bukole buende, nkuasa wende wa bukalenga, ne bumfumu buende[82] bunene.

³Umue wa ku mitu yende uvua umueka bu mutapa mputa wa lufu. Kadi mputa awu ukavua mumane kuuma. Buloba bujima buvua bukatshila, bulonda nyama munyima.

⁴Bantu bonsu kutuadija kukukuila nyoka wa tshidika, bualu uvua mufile bumfumu buende kudi nyama. Bavua bakukuila kabidi nyama, bamba ne: “Udi mufuanangane ne nyama nnganyi? Udi mua kuluangana nende nnganyi?”

⁵Bavua banyishe bua nyama akule miaku ya kapeja, asendeke Mvidi Mukulu. Uvua mupete bumfumu bua kuenza malu ende ngondu makumi anayi ne ibidi.

⁶Kutuadijaye kusendeka Mvidi Mukulu, kupenda dina diende, muaba udiye usomba, kabidi ne bonsu badi basomba mu diulu.

⁷Bavua banyishe bua nyama aluishe bena tshisamba tshia Mvidi Mukulu, abatshimune.[83] Uvua mupete bumfumu bua kulombola bantu bonsu, ba bisamba bionsu, ba miakulu yonsu, ne ba mu matunga onsu.

⁸Bantu bonsu ba pa buloba nebamukukuile. Ke bonsu bavuabu kabayi bafunde mena abu, mu mukanda wa muoyi katshia bafuka buloba; ke mukanda udi Muana wa mukoku udibu bashipe nawu.

⁹“Udi ne matshi a kumvua, asangane kumvua anyi? Umvue!

¹⁰Muntu udibu bafundile lukanu, nebaye nende mu lukanu. Muntu udibu bafundile kufua ku muele wa mvita, neafue ku muele wa mvua.[84] Ke padi bantu ba Mvidi Mukulu ne bua kunanukila mu dikenga, kuleja ditaba diabu.”

¹¹Pashishe meme kumona nyama mukuabu upatuka mu buloba. Uvua ne nsengu ibidi bu ya mukoku, wakula bu nyoka wa tshidika.

¹²Uvua utuma diyi ne bumfumu buonsu buvua nyama wa kumpala nabu. Uvua ubambidika buloba ne bantu bonsu, bua bikukuile nyama wa kumpala, uvua ne mputa wa lufu mumane kuuma.

¹³Nyama muibidi ewu uvua wenza malu manene a kukema. Uvua upuekesha kapia ka mu diulu pa buloba, bantu bonsu batangile.

¹⁴Uvua upambuisha bantu ba pa buloba ku malu a dikema avuaye ne bukenji bua kuenza mu dina dia nyama wa kumpala. Kuambilaye bantu ba pa buloba, bua benze tshimfuanyi, banemekele natshi nyama uvuabu batape muele wa mvita, kadi mutshikale amu ne muoyi.

¹⁵Nyama muibidi uvua mupete bumfumu bua kupuija mueyelu wa muoyi mu tshimfuanyi tshia nyama wa kumpala, bua tshimfuanyi etshi tshimone mua kuakula, ne kushipa bonsu badi babenga kutshikukuila.

¹⁶Nyama kubambidika bantu bonsu, bana ne bakulumpe, babanji ne bashadile, bapika ne badi badienzela malu, bua babatue tshitampi pa tshianza tshia balume ne pa mpala.

¹⁷Muntu nansha umue kavua mua kusumba, nansha kusumbisha, kabayi bamutue tshitampi atshi. Tshitampi atshi tshivua tshibatua dina dia nyama, nansha bungi budi bumvuija dina adi.[85]

¹⁸Ebi bidi bikengela meji. Amu udi ne lungenyi ke udi mua kujingulula tshidi bungi abu buleja. Bungi ebu budi bumvuija dina dia muntu. Bungi buadi budi nkama isambombu makumi asambombu ne isambombu.