Read Tshiluba Didimanyisha 18 Bible Online

Didimanyisha 18 - Tshiluba bible

Didimanyisha 18

¹Malu aa mamane kupita, meme kumona mutumibue mukuabu utuluka mu diulu. Uvua ne bumfumu bunene. Butumbi buende buvua bukenkesha buloba bujima.

²Uvua wela diyi dikole, wamba ne: “Eyi, tshimenga ntshibutuke! Tshimenga tshinene tshia Babilone ntshibutuke! Tshikadi mpindiewu muaba udi diabolu ne mikishi mibi ya mishindu yonsu bisombela. Nyunyi mibi ya mikiya ya mishindu yonsu kabidi idi isombamu.

³Bualu tshimenga etshi tshivua tshinuishe bisamba bionsu maluvu atshi, maluvu makole a buendenda buatshi bubi. Bakalenga ba pa buloba bavua benza natshi malu a bundu.[112]’ Bangenda mushinga ba pa buloba bavua banema ne bintu bimpe kabiyi kubala, bivuatshi nabi.”

⁴Pashishe meme kumvua diyi dikuabu difuma mu diulu, diamba ne: “Bantu banyi, umukayi mu tshimenga etshi, bua bubi buatshi kabunulamatshi, kabanunyoki pamue natshi.

⁵Mvidi Mukulu kena mupue muoyi malu mabi a Babilone, bualu mibi ya tshimenga etshi idi yenza mishiki too ne mu diulu.

⁶Enzelayi Babilone muvuaye munuenzele. Mufutayi misangu ibidi pa bivuaye muenze. Uwujayi dikopu diende ne maluvu makole. Bukole buawu bupite misangu ibidi bua avuaye munuelele.

⁷Numubungamije, munukengeshe, bilondeshile muvuaye uditemba bua lumu ne bubanji bivuaye nabi. Uvua udiamba ne: ‘Meme apa ndi Mukalenga mukaji. Tshiena mukamba to. Makenga kaakunkuata to.’

⁸Ke padi bipupu bionsu, bidibu bamulamina, ne bua kumukuata dituku dimue: disama dia lufu, madilu, ne tshiyole tshia nzala. Kapia nekamubutule. Bualu Maweja-Nangila udi umulumbuluisha, udi ne bukole.[113]”

⁹Bakalenga ba buloba, bavua benze nende malu a bundu, basanke pamue ne bubanji buende, nebadile, bele miyenga, pamonabu muinshi wa kapia kadi kosha tshimenga.

¹⁰Nebimane mutantshi mule, bazakale bua makenga adi ne bua kukuata tshimenga. Nebambe ne: “Babilone, ndiakabi kaayi edi! nDikenga kaayi! Wewe tshimenga tshinene, tshia bukole kabidi! Badi bakunyoka amu diba dimue, ubutuka butubutuu![114]”

¹¹Bangenda mushinga ba pa buloba kabidi badi badila, bela miyenga bualu buende, bualu muntu nansha umue kena usumba kabidi bintu biabu.

¹²Kabatshiena basumba mpawungi, tshiamu tshitoke tshia mushinga mukole, mabue a mushinga mukole, ne a busanga; bilamba bimpe bienza ne ndanda, bilamba bia lumu bifikuluke ne bikunze, bikuabu bienza ne buanda bua meshi; bintu bishilangane bienza ne mibanga, ne mabaya a mushinga mukole, ne tshiamu tshikunze, nansha tshifiike, nansha ne mabue a mekala;

¹³bintu bishilangane bia kulunga nabi biakudia; manananshi, musenga wa kamonya; maluvu, mafuta, bukula ne ntete ya kuenza bukula; ngombe ne mikoku, nyama ya tubalu ne matempu; bapika ne bantu bakuabu bena mudimu.

¹⁴Bangenda mushinga aba badi bambila tshimenga ne: “Bintu bionsu biuvua mujinge mbikujimine. Bubanji buebe ne lumu luebe mbikunyeme lubilu. Kashidi kuakubipeta kabidi to!”

¹⁵Bangenda mushinga bavua banemena mu tshimenga etshi, nebimanyine kule bua makenga atshi kaabakuatshi.[115] Nebadile miadi, bele miyenga,

¹⁶bamba ne: “Diakabi kaayi edi! Dikenga kaayi bunene nanku didi dikuata tshimenga! Tshivua tshivuale bilamba bimpe bienza ne ndanda, bilamba bia lumu bifikuluke ne bikunze bia mushinga mukole. Tshivua tshidilengeja ne bintu bia bungi bia mpawungi, kabidi ne mabue a mushinga mukole, ne a busanga.

¹⁷Biuma biebe bionsu ebi bikadi bikujimine amu diba dimue!” Balombodi bonsu ba majuwa ne bena luendu, bena mudimu ba majuwa, ne bangenda mushinga bonsu badi benda pa mayi manene, bavua bimanyine amu kule!

¹⁸Bavua bela bibingu, pavuabu bamona muinshi wa kapia kavua kosha tshimenga, bamba ne: “Kakuvua tshimenga tshifuanangane ne tshimenga tshinene etshi to!”

¹⁹Bavua badiela buloba mu mitu, badila, bela miyenga, bamba ne: “Diakabi kaayi! Dikenga kaayi bunene nanku didi dikuata tshimenga! Bonsu badi ne ntatu enda pa mayi manene, mbaneme ne bubanji bua tshimenga etshi. Kadi kujimijatshi bionsu amu diba dimue![116]”

²⁰Wewe diulu, sanka, bua padi tshimenga etshi tshibutuke.[117] Nuenu bantu ba Mvidi Mukulu, nuenu bapostolu ne bambi, tuayi tshianga! Bualu Mvidi Mukulu mmutshifundile tshibawu tshia bubi buvuatshi tshinuenzele!

²¹Nenku mutumibue wa dikanda kuambula dibue dia bujitu, bu didibu bapela nadi. Kudielaye mu mayi manene, wamba ne: “Ke muelabu tshimenga tshinene tshia Babilone panshi ne bukole buonsu. Kabakutshimona kabidi kashidi kashidi.

²²Babilone, kashidi kabakumvua kabidi muebe miadi ya nzenze, ne ya misambu ya tungimba, ya bedi ba nshiba, nansha ba mpungi. Kabakumona muena mudimu wa bianza nansha umue muebe. Kabakumvua kabidi muadi wa dibue diatshipelelu.

²³Muendu kawakukenka kabidi muebe nansha musangu umue. Kabakumvua kabidi muebe mbila ya disanka ya badi babuela mu dibaka. Bangenda mushinga ba muebe ke bavua bapite ba buloba bujima. Kadi udi mushime bisamba bionsu ne malu ebe a majimbu.[118]”

²⁴Bavua banyoka Babilone, bualu badi basangane mu tshimenga etshi mashi a bambi, ne a bantu bakuabu ba Mvidi Mukulu. Eyowa, mashi a bonsu bavuabu bashipe pa buloba adi pambidi pende.[119]