Read Tshiluba Didimanyisha 20 Bible Online

Didimanyisha 20 - Tshiluba bible

Didimanyisha 20

¹Pashishe meme kumona mutumibue upatuka mu diulu, mukuate mu tshianza nsapi ya ku kandondu, kabidi ne lukanu lukole.

²Kukuataye nyoka wa tshidika, nyoka wa kale: ke diabolu nansha Satane. Kumusuikaye bua bamulame mu lukanu bidimu tshinunu.[128]

³Mutumibue kumuela mu kandondu, kukanga ne nsapi, kutua tshitampi, bua nyoka wa tshidika kamonyi mua kupambula kabidi bisamba bia bantu, too ne muakumbana bidimu tshinunu. Pakumbana bidimu ebi, nebanji kumulekela bua katupa kipi.

⁴Pashishe meme kumona nkuasa ya butumbi.[129] Bavua basombamu, bavua bapete bumfumu bua kulumbuluisha bantu. Meme kumona kabidi bantu bavuabu bashipe, bualu bavua bajadike malu malelela avua Yezu mumanyishe, bajadike ne muaku wa Mvidi Mukulu. Bantu aba kabavua bakukuile nyama, nansha tshimfuanyi tshiende. Kabavua babatue tshitampi tshia nyama pa mpala, nansha pa tshianza to. Kufululukabu, kudiabu bukalenga pamue ne Kristu bidimu tshinunu.

⁵(Bafue bakuabu kabavua bafululuka, amu bidimu tshinunu bimane kukumbana.) Edi ke dibiika dia kumpala.

⁶Bantu bavua bafululuka musangu wa kumpala awu mbena diakalenga, badi Mvidi Mukulu muele lupemba mushindu musunguluke! Lufu luibidi kaluena lubakuata to. Nebakuatshile Mvidi Mukulu ne Kristu mudimu wa butuangaji. Nebadie bukalenga pamue ne Kristu bidimu tshinunu.

⁷Papita bidimu tshinunu, nebapande diabolu mu lukanu.

⁸Neaye kudinga bantu bonsu ku ntengu inayi ya buloba, ke Ngoge ne Magoge.[130] Neabasangishe bua kuluangana mvita. Nebikale bungi bu lusenga lua ku muelelu wa mayi manene.

⁹Badi batangalaka mu buloba bujima, banyungulukila mitanda ya bantu ba Mvidi Mukulu, ne tshimenga tshidi Mvidi Mukulu munange. Kadi kapia kadi katuluka mu diulu, kabosha kababutula.

¹⁰Diba adi, nebele diabolu uvua mubadinge mu mayi manene avua atema kapia ka mvuanda.[131] mukavuabu bamane kuela nyama ne muambi wa dishima. Nebabakengeshe muaba awu munya ne butuku kashidi.

¹¹Pashishe meme kumona nkuasa munene mutoke wa butumbi, ne uvua musombepu. Buloba ne diulu bivua bimunyema lubilu, bijimina kashidi.

¹²Pashishe meme kumona bafue bonsu, baneme ne bashadile, bimane kulu kumpala kua nkuasa wa butumbi. Kubululabu mikanda. Kubululabu kabidi mukanda mukuabu, mukanda wa muoyi. Kulumbuluishabu bafue, bilondeshile malu avuabu benze, avuabu bafunde mu mikanda ayi.[132]

¹³Mayi manene kupingaja bafue bavua munda muawu. Lufu ne kandondu kabidi kupingaja bafue bavuabi bilame. Ke kulumbuluishabu muntu yonsu pa bivuaye muenze.

¹⁴Kadi kuelabu lufu ne kandondu ka bafue mu mayi manene atema kapia. (Mayi manene adi atema kapia aa, ke lufu luibidi.)

¹⁵Muntu yonsu uvua kayi ne dina diende mu mukanda wa muoyi, bavua bamuela mu mayi manene atema kapia.