Read Tshiluba Didimanyisha 22 Bible Online

Didimanyisha 22 - Tshiluba bible

Didimanyisha 22

¹Mutumibue wa Mvidi Mukulu kundeja musulu udi ne mayi a muoyi, ubalakana bu lusoka lua kristale. Musulu awu udi upatuka ku nkuasa wa butumbi wa Mvidi Mukulu, ne wa Muana wa mukoku,[144]

²upueka munkatshi mua musesu munene wa mu tshimenga. Ku nseke ibidi ya musulu kudi mutshi wa muoyi,[145] udi ukuama bimuma misangu dikumi ne ibidi ku tshidimu, musangu umue ku ngondu yonsu. Bavua bondapa bisamba bia bantu ne mabeji awu.

³Mu tshimenga kamuakuikala kabidi tshintu tshidi Mvidi Mukulu mutshipe.[146] Nkuasa wa butumbi wa Mvidi Mukulu ne wa Muana wa mukoku neikale mu tshimenga. Bantu ba Mvidi Mukulu nebamukukuile.

⁴Nebamone mpala wende. Nebafunde dina diende pa mpala yabu.

⁵Butuku kabuakuikala kabidi to. Kabakukengela munya, nansha muendu. Bualu Maweja-Nangila Mvidi Mukulu neabakenkeshile butoke buende. Nebadie bumfumu kashidi.[147]

⁶Pashishe mutumibue kungambila ne: — Miaku eyi mmilelela, nudi mua kuyitaba. Kabidi Maweja-Nangila Mvidi Mukulu, udi upa bambi Mueyelu wende, uvua mutume mutumibue wende, bua aleje bantu bende bidi ne bua kuenzeka amu mpindiewu.

⁷Yezu udi wamba ne: “Teleja! Nkadi mu njila! Bantu badi bitaba miaku idi muambi mufunde mu mukanda ewu, mbena diakalenga!”

⁸Meme Yowanane, mvua mumvue bionsu ebi, mubimone kabidi. Meme mumane kubiu-mvua, mubimone bionsu, ke meme kudiela panshi ku makasa a mutumibue uvua mubideje, bua kumukukuila.

⁹Kadi yeye kungambila ne: — Kuenji nanku to![148] Ndi muntu wa Mvidi Mukulu bu wewe, bu bana benu bambi, bu bonsu badi bitaba miaku ya mu mukanda ewu. Kukuila Mvidi Mukulu nkayende!

¹⁰Pashishe kungambaye ne: — Kusokoki miaku ya muambi idi mu mukanda ewu, bualu tshikondu tshidi bionsu ebi ne bua kuenzeka tshikadi pabuipi.

¹¹Udi wenza malu mabi, atungunuke amu nawu. Udi musue kupia mikiya, apie amu mikiya. Kadi udi wenza malu mimpe, atungunuke amu nawu. Udi wa tshijila, ashale amu wa tshijila.[149]

¹²Yezu kuamba ne: “Teleja! Nkadi mu njila! Nennutuadile mafutu enu. Nemfute muntu yonsu bilondeshile bivuaye muenze.

¹³Ndi Alfa ne Omega, wa kumpala ne wa ndekelu, ntuadijilu ne nshikidilu.[150]”

¹⁴Bantu badi basukula mintumpu yabu, mbena diakalenga. Nanku nebabanyishe bua badie tshimuma tshia mutshi wa muoyi,[151] babuele mu tshimenga, bapitshile ku tshiibi.

¹⁵Kadi bantu badi batombokela Mvidi Mukulu, benza malu a majimbu, benza malu a bundu, bashipianganyi, batendeledi ba nwidie, ne bonsu badi bashimangana ku miaku nansha ku ngenzelu, kabakubuela mu tshimenga!

¹⁶“Meme Yezu, mvua mutume mutumibue wanyi bua kunujadikila bionsu ebi mu Bisumbu bienu bia bena ditaba. Ndi wa ku ndelanganyi ya Davide. Ndi mutotu wa nkesha.[152]”

¹⁷Mueyelu wa Tshijila, ne Mukaji udi ubuela mu dibaka, badi bamba ne: “Luaku!” Udi mumvue muaku ewu, ambe kabidi ne: “Luaku!” Muntu udi ne nyota, asemene pabuipi. Muntu udi ujinga kunua mayi a muoyi, nebamupewu tshianana.[153]

¹⁸Meme Yowanane, ndi mbela bantu bonsu badi bumvua miaku ya muambi idi mu mukanda ewu ne: pikala muntu musakidile tshintu ku miaku eyi, Mvidi Mukulu neasakidile ku dinyoka diende bipupu bidibu bafunde mu mukanda ewu.

¹⁹Kadi pikala muntu mumbushe umue wa ku miaku ya muambi ya mu mukanda ewu,[154] Mvidi Mukulu neamumbushile tshiende tshitupa tshia tshimuma tshia mutshi wa muoyi, ne tshiende tshitupa tshia tshimenga tshia tshijila, mudibu babifunde mu mukanda ewu.

²⁰Udi ujadika bulelela bua malu onsu aa, udi wamba ne: “Bushuwa, nkadi mu njila!” Eyo! Bikale nanku! Mfumu Yezu, vuaku![155]

²¹Dinanga dia Mfumu Yezu dishindame munda muenu bonsu.