Read Tshiluba Rute 1 Bible Online

Rute 1 - Tshiluba bible

Rute 1

¹Matuku avua balombodi balombola ditunga dia Izrayele, tshiyole tshia nzala tshivua tshibuela mu ditunga. Ke muntu wa mu musoku wa Betleyeme, mu ditunga dia Yuda, kuangata mukajende ne bana bende ba balume babidi, bua kuanjibu kuya kusomba mu ditunga dia Mowabe.[1]

²Muntu awu uvua Elimeleke, mukajende uvua Nowemi. Bana bende ba balume babidi, bawa Malone ne Kiliyone. Bawa bena mu tshisamba tshia Efrata.[2] Bobu bamane kuasa mu ditunga dia Mowabe,

³Elimeleke kufua. Nowemi kushala nkayende, ne bana bende ba balume babidi.

⁴Bana abu kusela bakaji ba bena Mowabe: Orpa ne Rute. Bobu bamane kushala muaba awu bidimu bitue ku dikumi,

⁵Malone ne Kiliyone kufua kabidi. Nowemi kudishadila, kayi mulume kayi bana.

⁶Patshivuabu mu Mowabe, Nowemi kumvua ne: Maweja-Nangila mmutuadije kutabalela bena tshisamba tshiabu, mubavudijile biakudia mu madimi. Nanku, kudilongololaye bua kumuka mu buloba bua Mowabe ne bakaji ba bana bende, kupingana mu buloba bua Yuda.

⁷Bobu kubanga luendu pamue, kadi mu njila,

⁸Nowemi kuambila bakaji ba bana bende ne: — Pinganayi mpindiewu, yonsu aye kudi mamuende. Maweja-Nangila anuvuluke, bu munuvua bamvuluke meme ne babayenu bafuile.

⁹Anuambuluishe, banusele tshiakabidi bua nupete muaba muimpe wa kusomba. Ke Nowemi kulayangana nabu. Kadi bobu kudila miadi,

¹⁰bamuambila ne: — Nansha! Tudi tupingana nebe kuenu.

¹¹Nowemi kubandamuna ne: — Bakaji ba bana banyi, mbimpe nupingane kuenu. Nudi basue kuya nanyi bua tshinyi? Tshiena ne mushindu undi mua kulela kabidi bana ba balume badi mua kumusela.[3]

¹²Pinganayi kuenu! Kanuyi nanyi. Nkadi mukulakaje, udibu kabayi mua kusela kabidi. Nansha meme mupetangane ne mulume butuku ebu, kulela nende bana ba balume,

¹³nuenu nudi mua kuindila too ne pakolabu anyi? Bana banyi, kanuena mua kubenga bua kunuselabu kudi balume bakuabu. Maweja-Nangila mmupite kunkengesha meme. Tshiena musue bua dikenga dianyi adi dinukuate nuenu penu to.[4]

¹⁴Nowemi wamba nanku, bakaji ba bana bende kudila bikole bipite. Kadi Orpa kulayangana ne mamuenende, kupingana kuabu. Rute kawa musue kulekelangana ne mamuenende to.

¹⁵Nowemi kuambila Rute ne: — Mona mukenebe nyewu wapinganyi kuabu, mu tshisamba tshiabu, ne kudi mvidie wabu. Mbimpe upingane pebe, uye kuenu.

¹⁶Kadi, Rute kuandamuna mamuenende ne: — Lekela kutupingaja. Ndi musue kuya nebe. Bualu kuwaya nkungaya; kuwasomba nkungasomba; bana benu mbana betu kabidi; Mvidi Mukulu webe neikale Mvidi Mukulu wanyi.

¹⁷Kuwafuila nenkufute panyi, nkuanjikabu kabidi. Meme tshiyi muenze nanku, kayanda kanyi, Maweja-Nangila angangate.

¹⁸Nowemi umona ne: Rute mmukoleshe bua kuya nende, kupuwaye. Ki mmuakule kabidi to.

¹⁹Bubidi buabu pamue kupingana ku Betleyeme. Pafikibu mu musoku wabu, bakaji bonsu kukukila, babakatshila, bamba ne: “Bushiwa ewu nNowemi anyi?”

²⁰Kadi Nowemi kubandamuna ne: — Kanumbikidi kabidi ne Nowemi (mmuena diakalenga), kadi numbikile ne: Mara (Kabungama), bualu Mvidi Mukulu wa bukole buonsu mmunkengeshe bikole.

²¹Musangu umvua mumbuke munemu, mvua ne bintu bia bungi. Kadi mpindiewu, Maweja-Nangila kumpingaja bianza bitupu. Bua tshinyi nutshidi numbikila ne: Nowemi, padi Maweja-Nangila wa bukole buonsu mumane kumbenga, munkebele diakabi.

²²Ke umvua Nowemi ne Rute, muena Mowabe, mukaji wa muanende, bafike mu Betleyeme, bafumine ku Mowabe. Bivua ku ntuadijilu wa tshikondu tshiyuabu banowa ntete ya orje ya kuenza bukula.[5]