Read Tshiluba Rute 2 Bible Online

Rute 2 - Tshiluba bible

Rute 2

¹Nowemi uvua ne bayende tshina mu diku dia ba bayende Elimeleke, dina diende Bowaze. Uvua muntu muneme ne mubanji kabidi.

²Dituku dikuabu, Rute kuambila Nowemi ne: — Ndi nkulomba bua kuya kupumbulula[6] biakudia, bidi banowi benda bashiya mu budimi. Nempete muntu udi mua kumfuila luse. Nowemi kumuandamuna ne: — Ndaku, mukaji wa muananyi.

³Ke Rute kuya ku budimi, wenda upumbulula biakudia bivua banowi bashiya mu budimi. Diakalenga, budimi abu buvua bua Bowaze, wa mu diku dia ba Elimeleke.

⁴Mutantshi unenga, Bowaze kufika, ufumine ku Betleyeme. Kuelaye banowi muoyi ne: — Maweja-Nangila ikale nenu! Bobu pabu kuandamuna ne: — Maweja-Nangila akuele lupemba.

⁵Pashishe, Bowaze kukonka mfumu wa banowi ne: — Mukaji ewu ngua penyi?

⁶Awu kuandamuna ne: — Mukaji ewu mmuena Mowabe. Mbumuke ne Nowemi ku Mowabe, mbapingane kuneku.

⁷Uvua mundombe bua kupumbulula biakudia bidi banowi bashiya mu budimi. Mmukuate mudimu muaba ewu ku dinda too ne ku mpindiewu. Nyeye ewu utshibuelelaku bua kuikisha kakese.[7]

⁸Bowaze umvua nanku, kuambilaye Rute ne: — Teleja, nkuambile. Kuena mua kumuka mu budimi ebu kuya kupumbulula biakudia mu budimi bukuabu to. Shala pamue ne bakaji bena mudimu banyi.

⁹Mesu ebe atangile anu budimi budibu banowa. Wenda ubalonda anu munyima. Ndi mukandike bena mudimu bua kabakutatshishi. Padi nyota ikusuma, uye kunua mayi adi bena mudimu basuna mu mabungu.

¹⁰Rute kuinyika mutu panshi, ukema, umukonka ne: — Mmunyi muudi mungangate ne musangelu, bu muntu mumane kummanya kuonsu eku, panyi muikale muntu muenyi?

¹¹Bowaze kuandamuna ne: — Bakadi bamane kundondela, bangumvuije malu onsu auvua muenzele mamuenebe panyima pa lufu lua bayebe. Ndi mumanye muudi mushiye baledi bebe ne ditunga dienu dikulela. Wewe kuya kudi bantu bamua kuyi muanji kumanya.

¹²Maweja-Nangila akuvudijile disanka pa bionsu biudi muenze. Maweja-Nangila, Mvidi Mukulu wa Izrayele, akuele lupemba, bualu udi muvue kusokoma kudiye.

¹³Pashishe, Rute kuamba ne: — Mukalenga, ndi nkuela tuasakidila, bua paudi munsambe,[8] munkoleshe ku muoyi, meme tshiyi nansha bu umue wa ku bakaji bena mudimu bebe.

¹⁴Diba dia kudia dikumbana, Bowaze kubikila Rute, wamba ne: — Luaku, tudie, angata tshipese tshia diampa, utue mu maluvu malule. Rute kusomba ku luseke lua bena mudimu bua kudia. Bowaze kumupesha tshimuku. Kudiaye, kuukuta, kuteka tshivua tshishale.

¹⁵Yeye mumane kupingana bua kupumbulula kabidi, Bowaze kuambila bena mudimu bende ne: — Mukaji ewu apumbulule bintu bionsu bia mu budimi, too ne munkatshi mua bisumbu bia miepu ya ntete ya kuenza bukula. Muntu kamukandiki[9] to.

¹⁶Nuangate kabidi miepu mikuabu ya ntete ya kuenza bukula, nuyimatshishe panshi, bua ayambule. Nanku kanumutatshishi to.

¹⁷Nanku, Rute kupumbulula mu budimi bua Bowaze too ne ku dilolu. Pashishe kushipulaye bivuaye mupumbulule abi, kubipepula, kuwuja tshibombu tshinene tshia ntete tente.[10]

¹⁸Rute kusangisha bionsu abi, kuyaye nabi pambelu. Kulejaye mamuenende bivuaye mupumbulule. Kumupeshaye ne biakudia bivuaye mumutuadile; ke bivuaye mumulamine pavuaye mumane kudia kuukuta.

¹⁹Nowemi kumukonka ne: — Uvua muenze mudimu lelu penyi? Uvua mupumbulule bionsu ebi mu budimi bua nganyi? Mvidi Mukulu ele muntu uvua mukuakidile biakane ewu lupemba! Rute kulondela mamuenende bionsu biwabu bamuenzele, wamba ne: — Bintu ebi ndi mubipumbulule mu budimi bua Bowaze.

²⁰Nowemi umvua nanku, kuambila Rute ne: — Maweja-Nangila mukumbaji wa malaya ende amusankishe. Mmuwluke bonsu bafuile, ne batshidi ne muoyi. Bowaze mbayebe tshina menemene, udi ne bua kutuambuluisha bilondeshile mikenji.[11]

²¹Ke Rute kumuambila kabidi ne: — Bowaze uwa mungambile ne: wikale wenza mudimu ne bena mudimu banyi, too ne pajika dinowa dia bintu bianyi bionsu.

²²Nowemi kuambila Rute ne: — Mbimpe bitambe, mukaji wa muananyi, wikale wenza mudimu ne bena mudimu bende, bua kabavu kukutatshisha kudi muntu mukuabu mu budimi.

²³Nanku, Rute kulamata bena mudimu ba Bowaze, too ne pajikila dinowa dia ntete ya mishindu yonsu. Kadi uwa anu usomba kumbelu kua mamuenende.