Read Tshiluba 1 Samuwele 1 Bible Online

1 Samuwele 1 - Tshiluba bible

1 Samuwele 1

¹Mu tshimenga tshia Rama, mu buloba bua mikuna bua Efrayime, muvua muntu mukuabu wa bena Efrayime, wa mu diku dia Sufa.[1] Dina diende ngElkana. Uvua muana wa Yerowame, Yerowame mmuana wa Eliku, Eliku mmuana wa Toku, Toku mmuana wa Sufa.

²Elkana uvua ne bakaji babidi: Ane uvua mukalenga muadi, Penina mutu wa lubanza. Penina uvua ne bana. Kadi Ane kavua mulele to.

³Tshidimu tshionsu, Elkana uvua umuka mu tshimenga tshia Rama, uya mu nzubu wa Mvidi Mukulu wa ku Silo[2] bua kutendelela Maweja-Nangila Mvidi Mukulu wa Izrayele, ne kumulambula milambu. Ofni ne Pinhase, bana ba balume babidi ba mutuangaji Eli, ke bavua batuangaji ba Maweja-Nangila mu Silo.

⁴Misangu yonsu ivua Elkana ulambula mulambu wende, uvua upesha mukajende Penina dibulu dia munyinyi dia nyama uvuaye mulambula awu. Uvua upesha kabidi muana yonsu wa Penina dibulu dia munyinyi.

⁵Kadi uvua upesha Ane dibulu dia munyinyi dinene, dipite dia Penina misangu ibidi, bualu Elkana uvua munange Ane bikole, nansha muvua Maweja-Nangila kayi mumupe bana.[3]

⁶Bu muvua Ane kayi mulele muana, Penina mukaji muibidi wa Elkana, uvua wenza muende muonsu bua kukengesha mukenende, umufuisha bundu.

⁷Nanku ku tshidimu tshionsu, pavua Elkana ne bakaji bende baya mu nzubu wa Mvidi Maweja-Nangila, Penina uvua anu uluisha mukenende Ane bundu. Tshidimu tshikuabu, pavua Ane udila, ubenga mua kudia,

⁸bayende kumukonka ne: — Ane udi udila bua tshinyi? Udi unyingalala nunku bua tshinyi? Meme patudi nebe, tshiena mupite bana ba balume dikumi anyi?

⁹Bajikija kudia, Ane kuya mu mushiku wa muaba wa tshijila ku Silo. Mutuangaji Eli uvua musombe pa nkuasa mu mushiku wa nzubu.

¹⁰Ane uvua mubungame bikole. Pavuaye udila, uvua ulomba Mvidi Mukulu ne: “Maweja-Nangila Mvidi Mukulu wa Izrayele, tangila mundi mu dikenga!

¹¹Kumpu muoyi, umfuile luse! Umpesheku muana wa balume. Ndi nditshipa bua kumufila ku mudimu webe kashidi. Kabena mua kumubeya too ne kashidi.[4]”

¹²Ane uvua utendelela musangu mule. Mutuangaji Eli uvua anu mumubambishe,

¹³mumone amu muvua mishiku ya Ane inyunga, kadi kavua mumvue tshintu. Bualu Ane uvua ulomba Mvidi Mukulu munda munda. Mutuangaji Eli kuela meji ne: mukaji awu mmukuatshike maluvu!

¹⁴Nanku kukonkaye Ane ne: — Maluvu neakutenduke diba kaayi? Patuka uye kulala muaba mukuabu bua maluvu akutenduke.

¹⁵Ane kuandamuna ne: — Tshiena mukuatshika maluvu to. Ndi mukaji muena dikenga. Tshiena munue maluvu to. Ndi mufike muaba ewu bua kukuatshila Maweja-Nangila dikenga dianyi.

¹⁶Nanku kummonyi bu mukaji udi kayi ne mushinga. Ndi ndomba Mvidi Mukulu musangu mule, bualu ndi ne kanyinganyinga kakole ne dibungama kabidi.

¹⁷Eli kuambila Ane ne: — Waya bimpe. Mvidi Mukulu wa bena Izrayele akupe tshiudi umulomba.

¹⁸Ane kuandamuna Eli ne: — Ne wewe pebe umvuluke! Ke Ane kuya, kudia, kayi uleja kabidi mpala wa dibungama.

¹⁹Butshia dinda, Elkana ne bena nzubu wende bonsu kuya kutendelela Maweja-Nangila. Pashishe kupinganabu kuabu mu Rama. Elkana kubuelela mukajende Ane mu nzubu. Maweja-Nangila kuitaba dilomba dia Ane.

²⁰Ke Ane kuimita difu, kulela muana wa balume. Ane kuamba ne: — Muana ewu ndi mmuinyika ne: Samuwele,[5] bu alu ndi mumulomba kudi Maweja-Nangila.

²¹Pashishe Elkana kuya kabidi ku Silo ne bena nzubu wende bonsu bua kulambula Maweja-Nangila mulambu wa ku tshidimu, ne mulambu wa mapiku avuaye muela.

²²Kadi musangu awu, Ane kavua muye ne bayende to. Uvua muambila bayende ne: “Ndi muindila bua muana alekele kuamua dibela. Pashishe nenye nende ku Silo, nemmulambule Maweja-Nangila, ashaleku mu nzubu wende kashidi.”

²³Elkana kuandamuna ne: “Mbimpe muudi mumane kulongolola amu. Nanku ushale ne muana too ne palekelaye dibela. Maweja-Nangila nkayende akumbaje bualu buvuaye mumane kulaya.” Nanku Ane kushala mu Rama bua kuamusha muanende.

²⁴Ane mumane kutekesha muana dibela, nansha mutshivuaye mutekete, Ane kuya nende mu nzubu wa Maweja-Nangila ku Silo. Ane ne bayende Elkana, kuangata ngombe mulume wa bidimu bisatu,[6] mufuku wa bukula ne mulondu wa biseba muwule ne maluvu.

²⁵Kulambulabu ngombe awu. Pashishe kuyabu ne muana kudi mutuangaji Eli.

²⁶Ane kukonka mutuangaji Eli ne: — Utshidi muvuluke mukaji uvua muimane muaba ewu dituku dikuabu, pabuipi nebe bua kulomba Maweja-Nangila anyi? Amu bu muudi ne muoyi bulelela, ndi nkujadikila ne: mukaji awu mmeme.

²⁷Muana umvua ndomba mu ditendelela nyeye ewu. Maweja-Nangila wamumpeshi.

²⁸Nanku meme panyi ndi musue kumufila kudi Maweja-Nangila kashidi. Neashale anu muena mudimu wende. Ke bena diku diende[7] bonsu kukukuila Maweja-Nangila.