Read Tshiluba 1 Samuwele 10 Bible Online

1 Samuwele 10 - Tshiluba bible

1 Samuwele 10

¹Ke Samuwele kuambula kalangi ka mafuta kavuaye naku. Kuelaye Shawule mafuta awu pa mutu. Pashishe kumupukilaye, umuambila ne: — Maweja-Nangila nkayende ke udi mukujidila bua wikale mukalenga wa tshisamba tshiende.[50]

²Mpindiewu netushiyangane nebe. Kadi pawafika ku Selsa,[51] mu buloba bua bena Binyamine, neusambakene ne bantu balume babidi, pabuipi ne lukita lua Rakele. Nebakuambile ne: “Nyama ya mpunde iuvua ukeba, mbamane kuyimona. Tatuebe katshiena ukeba nyama to, ukadi ukukeba amu wewe. Udi ukeba mushindu wa kukumona wewe muanende wa balume.”

³Pawatungunuka ne luendu, neufike pabuipi ne mutshi wa lusanga wa ku Tabore. Muaba awu, neusambakene ne bantu balume basatu badi baya mu nzubu wa Mvidi Mukulu wa mu Betele.[52] Muntu umue neikale muambule bana ba mbuji basatu, muibidi neikale muambule tukata tua mampa lupepele tusatu, muisatu neikale muambule mulondu wa biseba muikale ne maluvu.

⁴Bantu abu nebakukonke muudi muladile. Nebakulambule mampa abidi. Wangata mampa awu.

⁵Pashishe neuye ku Ngibeya-Elohime,[53] muaba udi bamfumu ba bena Peleshete. Pawafika pabuipi ne tshimenga, neusambakene ne tshisumbu tshia bambi, bapueka ku muaba wa tshijila. Kumpala kuabu nekuikale bantu badi bimba lunzenze, bimba ngoma, bela nshiba, bimba ne lunkombe. Bambi abu, nebikale baja maja, bela mbila.

⁶Pashishe Mueyelu wa Maweja-Nangila neukutulukile. Nentuadije kuja maja, kuela mbila bu bambi abu. Newikale mushintuluke.

⁷Pikala bionsu ebi bienzeka, wewe neujadike bulelela ne: Mvidi Mukulu udi nanyi. Nanku, biangatshile tshikondu atshi, wikale wenza bionsu biudi mumone ne: mbikumbane.

⁸Pashishe udianjila kupueka ku Ngilgale[54] kumpala kuanyi. Meme nenshishe kukulonda, bua kulambula milambu ya kuosha ne ya bobumue. Ungindile ku Ngilgale matuku muanda mutekete. Pangafika nenkuambile tshiudi mua kuenza.

⁹Anu Shawule umuka muaba uvua Samuwele, Mvidi Mukulu kushintulula Shawule bikole, katshiyi bu muvuaye amu to. Bionsu bivua Samuwele muambila Shawule, kukumbanabi anu dituku adi.

¹⁰Nanku Shawule ne muena mudimu wende, bafike ku Ngibeya, kusambakenabu ne tshisumbu tshia bambi. Mueyelu wa Mvidi Mukulu kutulukila Shawule, kudisangishaye ne bambi abu. Kutuadijaye kuja maja, wela mbila.

¹¹Bantu bonsu bavua bamane kumanya Shawule kuonsu eku, bamumona uja maja, wela mbila munkatshi mua bambi, kukonkanganabu ne: “Tshidi tshienzekela muana wa Kishe ntshinyi? Kadi Shawule pende ukadi muambi anyi?[55]”

¹²Muntu mukuabu wa ku bantu abu, kukonka kabidi ne: “Bambi bakuabu aba, mfumuabu nnganyi?[56]” Ke kudi kufuma lusumuinu lua ne: “Kadi Shawule pende ukadi muambi anyi?”

¹³Shawule utukija, kuyaye muaba wa tshijila.

¹⁴Mansebende kumukonka ne: — Wewe ne muena mudimu webe nuvua baye penyi? Shawule kuandamuna ne: — Tuvua baye kukeba nyama ya mpunde. Kadi katuena bayimone to. Ke tuetu kuya kuebeja Samuwele.

¹⁵Mansebende wa Shawule kumukonka kabidi ne: — Ngambile tshidi Samuwele munuambile.

¹⁶Shawule kumuambila ne: — Wakutumanyisha ne: nyama yenu ya mpunde mmimane kumueneka. Kadi Shawule kena muambile mansebende malu avua Samuwele mumuambile bua bukalenga to.

¹⁷Samuwele kubikidisha bena Izrayele ku nzubu wa Mvidi Mukulu wa mu Mispa.[57]

¹⁸Kubambilaye ne: — Maweja-Nangila Mvidi Mukulu wa bena Izrayele, udi wamba ne: “Nuenu bena Izrayele, uvua munupatule ku bupika mu Ejipitu, mmeme! Uvua munumushe ku bumfumu bua bena Ejipitu ne bua bakalenga ba bisamba bikuabu, bivua binukengesha, mmeme!”

¹⁹Kadi mpindiewu, nuenu bena Izrayele, nudi babenga Mvidi Mukulu uvua munupandishe matuku a dikenga ne a kanyinganyinga. Nuenu kumulomba ne: “Tupeshe mukalenga.[58]” Nanku fikayi kumpala kua Maweja-Nangila, balondangane mu bisamba bienu ne mu meku enu.

²⁰Samuwele kubikidisha bena Izrayele ku tshisamba ku tshisamba bua kutshinka, bua bapete mukalenga. Maweja-Nangila kuleja tshisamba tshia Binyamine.

²¹Samuwele kubikidisha bena Binyamine ku diku ku diku, Maweja-Nangila kuleja diku dia Matri. Nanku mu diku dia Matri, kulejaye Shawule muana wa Kishe. Kukebabu Shawule, kadi kabena bamumone to.

²²Kukonkabu kabidi Maweja-Nangila ne: — Muntu ewu mmufike muaba ewu anyi?[59] Maweja-Nangila kuandamuna ne: — Nuye kutangila munkatshi mua mabuki, ke muaba udiye musokome.

²³Kuyabu lubilu, kupinganabu ne Shawule. Kuimanaye munkatshi mua bena Izrayele. Uvua mupite bantu bonsu ku bule bua mutu mujima!

²⁴Samuwele kuambila bena Izrayele ne: — Tangilayi! Monayi muntu udi Maweja-Nangila musungule. Kakuenamuntu mukuabu udi mufuanangane nende, munkatshi mua bena Izrayele bonsu. Ke bantu bonsu kuela bibingu ne mbila, bambila Shawule ne: “Mukalenga ukuata ku mundundu”!

²⁵Ke Samuwele kubadila bantu bidi bantu ne bua kuenzela mukalenga, ne bidi mukalenga ne bua kuenzela bantu.[60] Kufundaye bionsu abi mu mukanda, kuutekaye mu nzubu wa Mvidi Mukulu. Pashishe kutangalajaye bena Izrayele, kupinganabu kuabu.

²⁶Shawule kabidi kupingana kuende ku Ngibeya. Uvua ne tshisumbu tshia bantu bena mvita bavua Mvidi Mukulu mujule bua kuikalabu ne Shawule.

²⁷Kadi kuvua kabidi bantu bena buenzayi, bavua bamba ne: “Muntu ewu udi mua kutusungidila mushindu kaayi?” Nanku bantu abu bavua bapepeja Shawule. Kabawa balambula milambu. Kadi Shawule kulengulula bionsu abi.[61]