Read Tshiluba 1 Samuwele 13 Bible Online

1 Samuwele 13 - Tshiluba bible

1 Samuwele 13

²Shawule[74] kusungula bena mvita binunu bisatu munkatshi mua bena Izrayele. Bena mvita binunu bibidi kushala nende ku Mikmase, ne mu buloba bua mikuna bua Betele. Bena mvita bakuabu tshinunu, kuasa mu buloba bua Binyamine,[75] mu tshimenga tshia Ngibeya, pamue ne Yonatane, muana wa Shawule. Shawule kupingaja bena Izrayele bakuabu ku nzubu yabu.

³Dituku dikuabu, Yonatane kushipa mfumu mukuabu wa bena Peleshete uvua musombele mu Ngeba.[76] Bena Peleshete kumvua lumu lua bualu abu. Shawule kuelesha mpungi mu ditunga dijima, bualu uvua wela meji ne: “Mbimpe bua bena Ebrewu bamanye bualu ebu.”

⁴Bena Izrayele bumvua ne: Shawule ke udi mushipe mfumu wa bena Peleshete, kabidi ne: Bena Peleshete mbafikile bena Izrayele munda. Ke bena mvita bonsu ba bena Izrayele kudisangisha kudi Shawule mu Ngilgale.[77]

⁵Bena Peleshete kusangila bua kuluisha bena Izrayele. Bavua ne matempu a mvita binunu makumi asatu, bantu bavua babanda pa tubalu binunu bisambombu, bena mvita bungi bu lusenga ludi ku muelelu wa mayi manene. Nanku kuasabu mitanda ku Mikmase, luseke ludi diba dipatukila lua Bete-Avene.[78]

⁶Bena Izrayele bamone baluishi bamane kubafinakaja, kuyabu kusokoma ku mikuna mu biina, mu mikela, mu mbuebue, mu nyongolu ne mu milundu.

⁷Bantu bakuabu kusabuka musulu wa Yardene bua kusokoma mu buloba bua Ngade ne bua Ngilaade. Diba adi, Shawule utshivua anu mu Ngilgale. Bena mvita bonsu bavuaye nabu bavua bazakala bua bowa.

⁸Shawule ne bena mvita bavuaye nabu bavua bindila, matuku muanda mutekete, difika dia Samuwele bu muvuaye mubalaye.[79] Kadi Samuwele kavua mufike ku Ngilgale to. Nanku bena mvita kutuadija kumuka kudi Shawule, kutangalakabu.

⁹Ke Shawule kutuma diyi bua balongolole nyama ya mulambu wa kuosha ne ya milambu ya bobumue. Shawule kulambula mulambu wa kuosha yeye nkayende.[80]

¹⁰Ujikija kulambula, Samuwele kufika. Shawule kuya kuakidila Samuwele, umuela muoyi.

¹¹Samuwele kumuebeja ne: — Tshiudi wenza muaba ewu ntshinyi? Shawule kuandamuna ne: — Ndi muenze nanku, bualu bena mvita bavua batuadija kunshiya, batangalaka. Wewe kuena mufike bu muuvua muambe to. Kabidi ndi mumanye ne: bena Peleshete mbadisangishe ku Mikmase.

¹²Mvua muele meji ne: Bena Peleshete nebafike mu Ngilgale bua kutuluisha, katuyi banji kulambula mulambu bua Maweja-Nangila atuambuluishe. Ke pandi mulambule mulambu wa kuosha meme nkayanyi.

¹³Samuwele kuandamuna ne: — Udi muenze bualu bubi budibu benza kudi muntu udi kayi ne lungenyi to! Kuena munemeke bionsu bivua Maweja-Nangila Mvidi Mukulu webe mukuambile to. Bu wewe muenze bionsu bivuaye mukuambile, nanku Maweja-Nangila uvua mua kuitaba bua diku diebe dishale diku dia bukalenga bua bena Izrayele kashidi.

¹⁴Kadi mpindiewu, kuakushala mu bukalenga matuku a bungi to. Maweja-Nangila mmumane kusungula muntu mukuabu udiye musue bua kuikala mukalenga wa bantu bende[81] bena Izrayele. Bualu wewe kuena mutumikile meyi a Maweja-Nangila to.

¹⁵Samuwele kumuka mu Ngilgale, kuya luseke lukuabu. Bena mvita bavua bashale, kuyabu ne Shawule. Kumukabu ku Ngilgale kuyabu ku Ngibeya wa bena Binyamine,[82] muaba uvua bena mvita bende bakuabu. Shawule kutentekela bena mvita bonsu, batshivuaye mushale nabu. Bavua bu nkama isambombu.

¹⁶Shawule kuasa mu Ngibeya wa bena Binyamine, ne muanende wa balume Yonatane, ne bena mvita bavuaye mushale nabu. Bena Peleshete bavua base mitanda yabu mu Mikmase.

¹⁷Dituku dikuabu, bantu ba bena Peleshete bavua bamanye mvita bikole, kupatuka mu mitanda, kutapulukabu mu bisumbu bisatu. Tshisumbu tshia kumpala kulonda njila wa Ofra, mu buloba bua Shuwale.[83]

¹⁸Tshisumbu tshibidi kulonda njila wa ku Bete-Orone. Tshisumbu tshisatu kulonda njila udi ku mukalu udi ulonda tshibandabanda tshia Seboyime, luseke lua ku tshipela.[84]

¹⁹Tshikondu atshi, mu buloba bua bena Izrayele bonsu, kamuvua nsenda wa biamu nansha umue to. Bualu bena Peleshete kabavua basue bua bena Izrayele benza miela nansha mafuma.

²⁰Muena Izrayele yonsu, uvua uya kudi nsenda wa bena Peleshete bua kunona tshikasu tshia ku ditempu, kasuyi, bikasu bikuabu, nansha nkasu ya kumbula nayi buloba.[85]

²¹Nanku, bua kunona tshikasu tshia ku ditempu, lukasu, tshiamu tshia kukunguja natshi bisosa, kasuyi, tshiamu tshia kusaka natshi bimuna, nansha bua kuasa tshiamu mu tshilabi, bavua ne bua kufuta bia bisatu bibidi bia lukanu lutoke lua mushinga mukole.

²²Dituku dia kuluangana mvita, bena mvita ba Shawule ne ba Yonatane kabawa ne miela nansha ne mafuma to. Anu mukalenga Shawule ne muanende Yonatane ke bavua nabi.

²³Tshisumbu tshia bena mvita ba bena Peleshete kuya kuela mualu wa mvita mu njila wa ku Mikmase.