Read Tshiluba 1 Samuwele 2 Bible Online

1 Samuwele 2 - Tshiluba bible

1 Samuwele 2

¹Ane kutendelela Maweja-Nangila, wamba ne: Maweja-Nangila mmunsankisha bikole. Ndi ne disanka bua bionsu bidi Maweja-Nangila mungenzela, tuambilambila, tuafua bundu. Ndi ne musangelu, Mvidi Mukulu mmungambuluishe.

²Anu Maweja-Nangila ke udi wa tshijila, kakuena Mvidi Mukulu mukuabu, amu Yeye. Mvidi Mukulu wetu nkayende udi lubuebue.

³Kanuakudi meyi a bungi bua kuditambisha, kanuakudi kabidi nansha a kapeja. Bualu Maweja-Nangila udi Mvidi Mukulu, mmumanye bionsu, ulumbuluisha bantu bua bionsu bidibu benza.[8]

⁴Bena mvita ba bukole bamone mudi mata abu atshibuka. Kadi bavua kabayi bukole kupetabu dikanda.

⁵Bavua badia bukuta, badi bakeba mudimu bua kupeta biakudia. Kadi bavua ne nzala, kabena ne bua kukuata mudimu kabidi to. Mukaji wa nkumba udi ulela, bana muanda mutekete, kadi mukaji uvua ne bana ba bungi, udi ushala nkumba.

⁶Maweja-Nangila udi ushipa, ufululula kabidi. Udi ufikisha muntu muaba wa bafue, anyi umumushamu.

⁷Maweja-Nangila udi uvuija muntu mupela nansha mubanji. Udi umupuekesha milongu, nansha umubandisha.

⁸Udi ujula mupela uvua mudishinde panshi. Umushe ku diala muena dikenga udibu bimansha, bua kumusombesha miaba ya lumu, pamue ne bantu banene. Buloba bujima budi bua Maweja-Nangila. Yeye ke udi mubuimanyike pa makunji abu.

⁹Maweja-Nangila udi mulame bantu badi bamunemeka. Kadi badi bamubenga nebafue mu midima. Bualu muntu kena mua kutshimuna ku bukole buende nkayende to.

¹⁰Maweja-Nangila udi udidisha, makubakuba mu diulu, bua kubutula baluishi bende. Udi mulumbuluishi munene wa buloba bujima. Udi ukolesha mukalenga wa bantu bende mu maboku, udiundisha bukalenga bua udiye musungule.[9]

¹¹Ke Elkana kupingana kuende ku Rama. Kadi Samuwele muana kushala ku Silo bua kuenzela Maweja-Nangila mudimu. Bavua bamulombola kudi mutuangaji Eli.

¹²Bana ba balume ba mutuangaji Eli bavua bantu babi. Kabavua batshina Maweja-Nangila to.

¹³Bushuwa, bana abu bavua batuangaji, kadi bavua bakengesha bantu[10] mushindu ewu: pavua muntu ulambula nyama, anu bateka munyinyi pa kapia, muntu uvua wambuluisha mutuangaji uvua wambula nsomu wa menu asatu, usemena ku tshilambuilu,

¹⁴utua mu tshintu tshivua ne munyinyi (mu dilongu nansha mu luesu lunene). Munyinyi onsu uvuaye wambula ku nsomu awu, uvua utuadila mutuangaji. Ke muvua bana ba balume ba mutuangaji Eli bakengesha bena Izrayele bonsu bavua mu nzubu wa Mvidi Mukulu wa ku Silo nanku.

¹⁵Misangu mikuabu kabayi banji kuosha mafuta[11] a nyama wa mulambu, muntu uvua wambuluisha mutuangaji uvua uya kudi muntu uvua ulambula mulambu, umuambila ne: “Umpeshe munyinyi wa kuoshila mutuangaji. Bualu kena musue umupesha munyinyi mulamba to, anu munyinyi mubishi.”

¹⁶Pikala muntu awu muandamune ne: “Banji kuosha mafuta. Pashishe newangate munyinyi uudi musue,” muntu uvua wambuluisha mutuangaji uvua wamba ne: “Tshiena musue to. Mpesha anu mpindiewu. Tshianana ndi ndiangatshila ku bukole.”

¹⁷Nanku bana ba balume ba mutuangaji Eli bavua bapepeja Maweja-Nangila bikole, bualu kabavua banemeka milambu ivuabu bamulambula.

¹⁸Kadi Samuwele muana, uvua ukumbaja mudimu wende bimpe kumpala kua Maweja-Nangila, uvuala tshilamba tshia buanda bua ndanda.

¹⁹Tshidimu tshionsu, Ane, mamuende wa Samuwele, uvua utelela Samuwele tshinkutu tshikese, umutuadilatshi pavuabu baye ne bayende ku Silo bua kulambula mulambu wa ku tshidimu.

²⁰Mutuangaji Eli mumane kuela Elkana ne mukajende Ane lupemba, kuambilaye Elkana ne: — Maweja-Nangila akuambuluishe, ulele bana bakuabu ne mukaji ewu, bua bapingane pa muaba wa muana udiye mulambule Maweja-Nangila. Ke Elkana ne mukajende, kupingana kuabu ku Rama.

²¹Maweja-Nangila kuambuluisha Ane. Kulelaye bana ba balume bakuabu basatu ne ba bakaji babidi. Kadi Samuwele muana uvua wenda ukola kumpala kua Maweja-Nangila.

²²Mutuangaji Eli uvua mumane kukola mukulakaje. Bavua bamuambila muvua bana bende benzela bena Izrayele bibi, kabidi muvuabu babuelela bakaji mu nzubu. Bakaji abu ke bavua benza mudimu mu mushiku wa ntenta wa kusambakena.[12]

²³Mutuangaji Eli kukonka bana bende ne: — Bualu bundi mumvue ebu budi munyi? Bantu bonsu badi banujana bua buenzayi buenu. Nudi nuenza nanku bua tshinyi?

²⁴Bana banyi, lekelayi kuenza nanku! Tshijanu tshienu tshindi mumvue mukana mua bantu ba Maweja-Nangila tshidi tshibi tshitambe.[13]

²⁵Pikala muntu muenzele muntu mukuabu bibi, Mvidi Mukulu udi mua kulumbulula tshilumbu atshi. Kadi pikala muntu muenzele Maweja-Nangila bibi, udi mua kulumbulula tshilumbu nnganyi? Kadi bana ba mutuangaji Eli, kabawa bangata mibelu ya tatuabu ne mushinga to. Bualu Maweja-Nangila uvua mumane kujadika bua bafue.

²⁶Kadi Samuwele muana, uvua ukola anu bimpe, bamuanyisha bikole kudi Maweja-Nangila ne kudi bantu.

²⁷Muambi mukuabu kuya kudi mutuangaji Eli, kumuambila ne: — Teleja tshidi Maweja-Nangila wamba ne: “Patshivua bankambua bebe mu Ejipitu ku bupika bua mukalenga wa bena Ejipitu, udi mumanye ne: meme Maweja-Nangila mvua mudimanyisha kudibu.

²⁸Munkatshi mua bisamba bionsu bia bena Izrayele, meme kusungula Arone nkambua webe, bua ikale mutuangaji wanyi, wenza mudimu wa kulambula milambu pa tshilambuilu tshianyi, kuosha mulambu wa manananshi ne kungebeja malu. Yeye ne ndelanganyi yende mvua mubapesha tshitupa tshia milambu idi bena Izrayele balambula.[14]

²⁹Kadi kanuena nunemeka milambu ya nyama ne ya bintu bia mu madimi, imvua mutuma diyi bua kulambula muaba wa tshijila bua tshinyi? Munyinyi muimpe wa mafuta, udi bantu banyi bena Izrayele bandambula, nudi nuangata bua nuenu kudia, kudiunda bua tshinyi? Wewe Eli, udi unemeka bana bebe ba balume, kuyi unnemeka meme kumpala, bipite bua tshinyi.

³⁰Bu muudi wenza nanku, teleja tshindi nkuambila, meme Maweja-Nangila Mvidi Mukulu wa bena Izrayele: Mvua mulaya bena nzubu webe ne bena diku diebe, bua bikale batuangaji banyi kashidi. Kadi mpindiewu, ndi nkujadikila ne: kabitshiena nanku to. Meme ndi nnemeka amu bantu badi bannemeka meme. Kadi bantu badi bampepeja, meme nembapepeje.

³¹Nkadi pa kumusha bantu bonsu badi bamane kukola, bakulakaje, ba mu nzubu muebe ne ba mu diku diebe, bua kabasanganyimu kabidi muntu mukulakaje to.

³²Nanku neumone muntu, udi ufuilakana nebe, wenza mudimu mu nzubu wanyi.[15] Bena Izrayele nebikale ne disanka. Kadi mu nzubu muebe kamuakuikala kabidi muntu mukulakaje kashidi to.

³³Kadi meme mushiye muntu umue wa ku ndelanganyi yebe bua asombe ku mpenga kua tshilambuilu tshianyi, neakukengeshe, akubungamije. Kadi bantu bakuabu bonsu ba mu diku diebe nebafue, kabayi banji kukulakaja.

³⁴“Bua wewe kujadika bionsu bindi nkuambila ebi, neumone malu enzekela Ofni ne Pinhase, bana bebe ba balume babidi. Nebafue bonsu babidi dituku dimue.

³⁵Pashishe meme nendisunguile mutuangaji udi mua kuenza ne muoyi umue tshindi musue. Nemmupeshe ndelanganyi idi mua kuenza mudimu wa butuangaji kashidi kumpala kua mukalenga ungikala musungule.

³⁶Nanku, muntu wa mu nzubu muebe wikale mushale ne muoyi, neaye kutua binu kumpala kua mutuangaji bua kupeta lukanu lutoke lumue lua mushinga mukole, nansha kapesa ka diampa. Neambile mutuangaji awu ne: ‘Bu wewe musue, mpeshaku mudimu muaba udi batuangaji ewu, bua mpeteku biakudia’.”