Read Tshiluba 1 Samuwele 21 Bible Online

1 Samuwele 21 - Tshiluba bible

1 Samuwele 21

¹Pashishe Davide kutungunuka ne luendu. Yonatane kupingana mu tshimenga.

²Davide kuya ku Nobe,[140] kumutuangaji Akimeleke. Akimeleke kuya kumuakidila ne bowa, umukonka ne: — Davide, muudi mufike apa anu nkayebe, kuyi ne muntu mukuabu, mbishi?

³Davide kuandamuna ne: — Mukalenga Shawule mmuntume, kadi mmungambile ne: “Kuambidi muntu nansha umue bualu bundi nkutumina.” Nanku, bantu batudi nabu, ndi mumane kubambila bua tuetu kusambakena muaba mukuabu.

⁴Kadi, mpindiewu, udiku ne tshintu tshia kudia anyi? Umpesheku mampa atanu, nansha tshiakudia tshikuabu tshiudi natshi.

⁵Mutuangaji Akimeleke kuandamuna ne: — Tshiena ne mampa makuabu muaba ewu to, anu adibu bamane kujidila.[141] Kadindi mua kukupa mampa aa anu pikala bantu baudi nabu kabayi babuelele bakaji mu nzubu matuku aa to.

⁶Davide kuandamuna ne: — Bulelela, misangu yonsu patudi mu luendu lua mushindu ewu, badi anu batukandika bua kubuelela bakaji mu nzubu. Kadi pandi nya mu mvita, bia mvita bidibu nabi kudi bantu batudi nabu, bidi anu bijidila. Nansha luendu elu kaluyi lua tshijila, kadi lelu, luendu elu ludi anu lua tshijila, bualu bia kuluangana nabi mvita mbia tshijila.[142]

⁷Ke mutuangaji Akimeleke kupesha Davide mampa avuabu bamane kujidila, bualu kavua ne mampa makuabu to. Mampa awu bavua bamane kualambula Maweja-Nangila, pashishe baumushe mu nzubu wa Mvidi Mukulu, bua kupingaja mampa makuabu mapiamapia.[143]

⁸Dituku adi, muena mudimu wa Shawule uvua mu nzubu wa Maweja-Nangila, bua kukumbaja dilaya divuaye nadi. Muntu awu uvua muena Edome, dina diende Doweje. Uvua ne bukole bupite balami bakuabu ba mikoku ba mukalenga Shawule.[144]

⁹Davide kukonka mutuangaji Akimeleke ne: — Muaba ewu, kuenaku ne difuma nansha muela anyi? Bu muvua mukalenga Shawule muntume lukasa lukasa, tshivua ne mushindu wa kuangata muela wanyi, nansha tshintu tshikuabu tshia mvita to.

¹⁰Mutuangaji Akimeleke kuandamuna ne: — Muela udi muaba ewu udi anu wa Ngoliyate, muena Peleshete uuvua mutshimune mu tshibandabanda tshia Ela. Muela awu udi panyima pa bilamba bia tshijila bia mutuangaji,[145] mubuikila mu tshinkutu. Pawikala nawu dijinga uwangate. Ke tshintu tshia mvita tshimuepele tshitudi natshi. Davide kuandamuna ne: — Mpeshayi muela awu, bualu tshiena mua kupeta tshintu tshikuabu tshia mvita tshipite muela awu to.

¹¹Anu dituku adi, Davide kutungunuka ne luendu, unyema Shawule. Kuyaye ku nzubu kua Akishe, mukalenga wa mu tshimenga tshia Ngate.[146]

¹²Balombodi ba mu bukalenga bua Akishe kuambila mukalenga wabu ne: — Muntu wawa kena Davide mukalenga wa mu ditunga dia bena Izrayele anyi? Bakaji bavua bamuimbila misambu, bamujila maja bamba ne: “Shawule uvua mushipe baluishi tshinunu, kadi Davide mmushipe baluishi binunu makumi ne makumi![147]”

¹³Miaku ayi kutonda Davide bikole, kutshinaye mukalenga Akishe.[148]

¹⁴Davide kuenza anu kumpala kua bena Peleshete bu muntu udi kayi ne lungenyi. Kuendakanaye munkatshi muabu amu bu muntu mupale, wenda ufunda miaku ku biibi bia ku tshimenga, mate apueka ku miedi.[149]

¹⁵Mukalenga Akishe kuambila balombodi ba mu bukalenga buende ne: — Nudi bamone ne: muntu ewu mmupale! Kadi nudi bamufite kundi bua thinyi?

¹⁶Meme tshiena ne bapale bakumbane bua nuenu kumpesha kabidi ewu bua kuntatshishaye ne bupale buende anyi? Mupale ewu kafiki ku nzubu kuanyi to!