Read Tshiluba 1 Samuwele 22 Bible Online

1 Samuwele 22 - Tshiluba bible

1 Samuwele 22

¹Ke Davide kumuka mu tshimenga tshia Ngate, kunyemenaye mu lubuebue lua Adulame.[150] Bana babu ne Davide, ne bena diende bonsu, kumvuabu ne: Davide udi mu lubuebue alu. Kuyabu kudisangisha nende.

²Bantu bakuabu bu nkama inayi, bavua ne bilumbu, nansha bavua ne mabanza, nansha bavua babenga bulongolodi bua ditunga, kudisangisha muaba uvua Davide. Davide kushala mfumuabu.

³Davide kumuka mu lubuebue lua Adulame, kuya ku Mispa mu Mowabe.[151] Kuambila mukalenga wa bena Mowabe ne: — Anyisha bua tatu wanyi ne mamu wanyi balue kuasa munemu, too ne pangamanya tshidi Mvidi Mukulu musue kungenzela.

⁴Davide kuya ne baledi bende mu lubanza lua mukalenga wa bena Mowabe. Kushalabu mu lubanza amu matuku onsu avua Davide munyemena mu lubuebue.

⁵Dituku dikuabu, muambi Ngade kuambila Davide ne: — Kushadi kabidi ku lubuebue elu luudi munyemena to. Pingana mu ditunga dia bena Yuda. Nanku, Davide kumuka kuya mu ditu dia Erete.[152]

⁶Shawule kumvua lumu ne: bakumona Davide ne bantu bavuaye nabu. Dituku adi, mukalenga Shawule uvua usomba ku Ngibeya,[153] muinshi mua mutshi wa kampanga nzevu uvuabu bakuna pa kakuna. Uvua ne difuma mu tshianza. Bena mudimu bende bonsu bavua bimana pabuipi nende.

⁷Ke Shawule kubambila ne: — Nuenu bena Binyamine, telejayi! Muana ewu wa Ishayi,[154] neanupeshe bonsu bintu bindi meme Shawule munupe anyi? Neanupeshe madimi ne mionji ya maluvu a mvinyo anyi? Davide neanuteke balombodi ba bisumbu bia bena mvita bende anyi? Nansha kakese!

⁸Kadi, nuenu bonsu nudi bangelela meji mabi bua tshinyi? Muntu nansha umue kena mummanyisheku ne: muananyi Yonatane mmutue ndondu wa bulunda ne Davide. Muntu nansha umue wa kunudi kena mummanyishe mudi muananyi Yonatane usonsola Davide bua antekele buteyi, bu mudiye muenze lelu!

⁹Doweje, muena Edome, uvua munkatshi mua bena mudimu ba Shawule, kumuambilaye ne: — Dituku dikuabu, mvua mumone muana wa Ishayi, ufika ku Nobe kudi mutuangaji Akimeleke, muana wa Akitube.[155]

¹⁰Mutuangaji Akimeleke kukonka Maweja-Nangila bua kumanya tshivua Davide ne bua kuenza. Pashishe kupeshaye Davide biakudia, kumupesha kabidi ne muela wa Ngoliyate, muena Peleshete.[156]

¹¹Mukalenga Shawule kutuma bantu ku Nobe bua kukeba mutuangaji Akimeleke ne bena nzubu wende bonsu, bavua benza mudimu wa butuangaji. Kufikabu bonsu bua kudileja kudi mukalenga.

¹²Shawule kuambila Akimeleke ne: — Wewe, muana wa Akitube, teleja. Mutuangaji Akimeleke, kuandamuna ne: — Eyowa, mukalenga.

¹³Mukalenga Shawule kumukonka ne: — Wewe ne muana wa Ishayi, nudi bangelela meji mabi bua tshinyi? Wewe uvua mupeshe muana wa Ishayi biakudia, mumupeshe kabidi ne muela. Pashishe uvua mukonke Mvidi Mukulu bua Davide kuntombokela, kunteya bu mudiye muenze lelu!

¹⁴Akimeleke kuandamuna ne: — Mukalenga, munkatshi mua bena mudimu bebe, mudiku muntu mukuabu udi mukulamate bu mudi Davide anyi? Davide udi muku webe, kabidi udi mfumu wa bena mvita badi bakulama. Bantu bonsu badi mu nzubu muebe, badi bamutumbisha bikole.

¹⁵Dituku adi, dindi mukonke Maweja-Nangila Mvidi Mukulu bualu bua Davide, ki mmusangu wa kumpala to. Kadi meme tshiena mukuelele meji mabi to! Wewe, lekela kumbanda meme ne bena mu nzubu muanyi. Bualu meme tshivua mumanye bualu ebu to.

¹⁶Mukalenga Shawule kuambila mutuangaji Akimeleke ne: — Wewe ne bena mu nzubu webe nenufue bonsu.

¹⁷Ke mukalenga kuambila bena mvita bende bavua bamulame, bimane eku ne eku, ne: Shipayi batuangaji ba Maweja-Nangila aba tumone, bualu bavua bambuluisha Davide. Bavua bamanya ne: Davide mmunyeme. Kadi kabena bammanyisha to. Kadi, ku bena mvita ba Shawule bavua bamulame, muntu nansha umue kavua musue kulenga batuangaji ba Maweja-Nangila bua kubashipa.

¹⁸Ke, mukalenga Shawule kuambila Doweje, muena Edome, ne: — Wewe, shipa batuangaji aba. Doweje kusemena, kudishipela yeye batuangaji. Dituku adi, Doweje uvua mushipe bantu balume makumi muanda mukulu ne batanu, bavua ne tshibidilu tshia kuvuala bilamba bia tshijila.

¹⁹Kadi mu tshimenga tshia Nobe tshia batuangaji abu, Shawule kushipesha kabidi bantu bakuabu bonsu: balume, bakaji, bana ne bana ba pambidi, too ne bimuna: ngombe, mpunde, mikoku ne mbuji.

²⁰Anu muntu umue Abiyatare, muana wa mutuangaji Akimeleke, kabidi muikulu wa Akitube, kupandukaye. Kunyemaye, kuya kudi Davide.

²¹Abiyatare kuambila Davide ne: Shawule mmushipe batuangaji ba Maweja-Nangila.

²²Davide kumuambila ne: — Dituku adi, mvua mumone Doweje, muena Edome, muikale ku Nobe. Mvua anu mumanye ne: Doweje neambile Shawule malu onsu. Nanku, meme Davide ndi ne tshilumbu tshia lufu lua bena nzubu wenu bonsu.

²³Kadi mpindiewu, usombe anu muaba undi ewu. Kutshinyi to. Anu muluishi wanyi Shawule, udi ukeba kunshipa, ke udi ukeba kukushipa wewe kabidi. Patudi nebe, kakuena tshidi mua kukuenzekela to.