Read Tshiluba 1 Samuwele 25 Bible Online

1 Samuwele 25 - Tshiluba bible

1 Samuwele 25

¹Tshikondu atshi, Samuwele kufua. Kumujikabu kuende mu tshimenga tshia Rama. Bena Izrayele bonsu kudisangisha bua kuenza madilu ende. Pashishe, Davide kuya mu tshipela tshia Parane.[167]

²Mu musoku wa Mayone muvua muntu mubanji. Uvua ne mikoku binunu bisatu ne mbuji tshinunu. Uvua kabidi ne mpangu yende ku musoku wa Karmele. Muntu ewu, uvua muye ku Karmele bua kukosa miosa ya bimuna biende.[168]

³Dina dia muntu awu Nabate. Mukajende uvua Abiyayile. Mukaji ewu uvua ne mpala muimpe, kabidi muikale ne lungenyi. Kadi, bayende Nabale uvua ne malu makole, muikale ne lonji. Nabale uvua wa mu diku dia Kalebe.

⁴Pavua Davide mu tshipela, kumvuaye lumu ne: Nabale udi ukosa miosa ya bimuna biende.

⁵Davide kutuma bantu bende dikumi, kudi Nabale, ubambile ne: — Nuye ku Karmele, kua Nabale, numungelele muoyi.

⁶Numuambile ne: “Tshidimu etshi tshikulengelele![169]

⁷Davide mumane kumvua lumu ne: bantu badi bakosa miosa ya bimuna badi ku nzubu kuebe. Kadi matuku onsu atudi ne balami ba mikoku yebe ku Karmele, katuena babenzele bibi to. Kabena bajimije tshintu nansha tshimue.

⁸Udi mua kubakonka, Nebakujadikile. Davide udi nkusengelela bua utuakidile bimpe matuku a tshibilu aa, bualu tudi benyi bebe. Nanku, tuetu ne muena mudimu webe Davide, ubipeshe tshintu tshionsu tshiudi natshi.”

⁹Bantu bavua nabu Davide kuya kuambila Nabale bionsu bivua Davide mubambile abi. Pashishe, kushalabu bindile.

¹⁰Kadi Nabale kubakonka ne: — Davide wa Ishayi nnganyi? Matuku aa, bapika ba bungi badi batombokela bamfumu babu, babanyema.

¹¹Meme ndi mua kuangata diampa dianyi, mayi anyi a kunua, ne munyinyi undi mulongoluele bantu badi bakosa miosa ya mikoku yanyi, bua kupesha bantu bandi tshiyi mumanye nansha muaba udibu bafume!

¹²Bantu bavua nabu Davide, kupingana kudi Davide, kumuambila bionsu bivua Nabale muambe.

¹³Davide kutuma diyi, wamba ne: — Muntu yonsu ambula muela wa mvita! Nanku muntu yonsu kuasa muela wende wamvitaku mikaba. Davide kuambula wende muela wa mvita. Bena mvita bu nkama inayi kuya ne Davide. Bantu bakuabu nkama ibidi, kushala balame mabuki.

¹⁴Muntu wa ku bena mudimu ba Nabale, kuya kuambila Abiyayile, mukaji wa mfumuende wa mudimu, ne: — Davide uvua mutume bantu bafumine mu tshipela bua kuela mfumuetu Nabale muoyi. Kadi, mfumuetu Nabale kena mubakidile bimpe to.

¹⁵Kadi bantu aba, bavua bantu bimpe batambe. Kabawa batuenzela bualu bubi nansha bumue. Kabidi matuku onsu atuvua tuendakana nabu mu mpata, katuena bajimije tshintu nansha tshimue.

¹⁶Bantu aba, bavua batulame butuku ne munya, batuela munkatshi bu mudi tshimana. Matuku onsu atuvua tulama mikoku mu buloba muvuabu, bavua batulame bimpe.

¹⁷Nanku mpindiewu, ela meji bimpe, ukebe tshitudi mua kuenza. Bualu dikenga nedikuate mfumu Nabale ne bena nzubu wende, kamuyi mpata to. Nabale mmuntu wa malu makole. Kena musue bua muntu mukuabu kumuambilaye bualu to.

¹⁸Abiyayile kuya lubilu, kuangata mampa nkama ibidi, milondu ibidi ya biseba, ne maluvu a mvinyo tente, mikoku itanu mimane kulamba, bipimu bitanu bia ntete ya bukula mikanga, bisangi bia tumuma tume tua mvinyo lukama, ne mikata nkama ibidi mienza ne bimuma bia mutshi wa mfiku. Abiyayile kuteka bintu bionsu abi pa nyama ya mpunde.

¹⁹Pashishe kutuminaye bena mudimu bende diyi ne: — Pitayi kumpala, meme ndi nnulonda. Abiyayile kavua muambile bayende Nabale to.

²⁰Mumane kusomba pa mpunde wende, uvua wenda upueka mujiminangane ne mukuna. Diba adi, Davide ne bantu bavuaye nabu, bavua benda basemena anu luseke luvua Abiyayile uluila. Diakamue, Abiyayile kusambakena nabu.

²¹Davide utshivua udiambila munda munda ne: “Ke tshipeta tshindi mupeta pamvua mulame bintu bia muntu ewu bimpe, mu tshipela, bua kajimiji tshintu nansha tshimue. Muntu ewu wampingajidi bubi ku malu mimpe amvua mumuenzele!

²²Nanku, patuamba kufika malaba dinda, Mvidi Mukulu annyoke[170] ne dinyoka dikole, pangikala tshiyi mubutule bena diku dia Nabale bonsu.”

²³Anu Abiyayile umona Davide, kutulakaye lukasa pa nyama wende wa mpunde. Kutuaye mpala panshi,

²⁴ku makasa a Davide, umuambila ne: — Mukalenga wanyi, udi muenze bibi mmeme! Dipanga didi anu kundi meme! Kadi, itaba bua meme kuyukila nebe. Utelejaku tshindi nkuambila.

²⁵Kunangidi malu a Nabale to, bualu mmuntu mutshimbakane. Nabale mmumue ne: muntu mutshimbakane. Nanku, dina edi ndimukumbanyine, bualu kena ne lungenyi to. Kadi, mukalenga wanyi Davide, meme Abiyayile tshivua mumone bantu bebe bauvua mututumine to.

²⁶Mpindiewu bu mudi Maweja-Nangila ne muoyi, ne bu muudi wewe ne muoyi, Maweja-Nangila nkayende akukandike bua kushipianganyi, bua kudisombuedi wewe mukalenga to. Kadi baluishi bebe, ne bonsu badi bakuenzele bibi, babanyoke mudibu ne bua kunyoka Nabale.[171]

²⁷Angata bintu bia disanka bindi mukutuadile, ubiabanyine bansongalume baudi nabu.

²⁸Bu wewe musue, umfuileku luse. Bualu meme Abiyayile ndi nkujadikila ne: Maweja-Nangila neafile bukalenga mu nzubu muebe kashidi. Bualu wewe udi uluangana mvita mu dina dia Maweja-Nangila. Kabidi kabena mua kukubanda ne bualu bubi nansha bumue, matuku onsu audi ne muoyi.

²⁹Mukalenga Davide, pikala muntu wenda ukukeba bua kukushipa, Maweja-Nangila Mvidi Mukulu webe neakulame anu pabuipi nende. Maweja-Nangila neipate baluishi bebe, neabasake kule, anu bu mudibu bela lusoka mu ndundu.

³⁰Pikala Maweja-Nangila mukumbaje malu mimpe onsu adiye mukulaye, pikalaye mukuteke mukalenga wa bena Izrayele,

³¹ki mbimpe wikale uvuluka, unyingalala bua muntu mukuabu uuvua mushipe kakuyi bualu, bua kudisombuela. Nanku mukalenga, pikala Maweja-Nangila akusankishe, wamvulukaku!

³²Davide kuandamuna Abiyayile ne: — Ndi ngela Maweja-Nangila wa bena Izrayele tuasakidila. Yeye ke udi mukutume bua meme kusambakena nebe mpindiewu.

³³Ndi nkuela kabidi wewe tuasakidila. Bua lungenyi luebe luimpe, udi unkandika bua tshishipi muntu, kabidi tshidisombuedi to.

³⁴Bulelela, bu mudi Maweja-Nangila Mvidi Mukulu wa bena Izrayele ne muoyi, yeye ke udi munkandike bua tshienji bibi to. Nanku, ndi nkujadikila ne: bu wewe kuyi mufike lukasa bua kusambakena nanyi, malaba dinda mvua mbutula bantu bonsu ba mu diku dia Nabale.

³⁵Davide kuangata bintu bivua Abiyayile mumutuadile. Pashishe, kuambilaye Abiyayile ne: — Upingane kuebe ne disanka, bualu ngumvu dilomba diebe. Ndi muditabe ne disanka.

³⁶Abiyayile upingana ku nzubu, kusanganaye Nabale wenzeja tshibilu. Tshivua tshibilu tshinene bu tshia mukalenga. Nabale uvua ne disanka dia bungi, mumane kukuatshika maluvu bikole. Nanku Abiyayile kena mumuambile bualu nansha bumue too ne muakatshiabu.

³⁷Abiyayile uvua muindile bua maluvu atenduke Nabale, pashishe amuambile malu onsu awu dinda. Nabale umvua malu awu, kumutondawu bikole. Kushalaye katshiyi ne bukole.

³⁸Matuku dikumi mamane kupita, Maweja-Nangila kusangisha Nabale tshiakabidi, kufuaye.

³⁹Davide umvua lumu lua lufu lua Nabale, kuambaye ne: — Ndi nsakidila Maweja-Nangila, udi munsungidile kudi Nabale uvua umpenda. Ndi mmuela kabidi tuasakidila, bualu mmunkandike bua meme kuenza bibi, bua tshipingajidi Nabale bubi buende. Ke Davide kutuma bantu kudi Abiyayile, bua kumuambila ne: Davide mmusue bua wikale mukajende.

⁴⁰Bantu abu bafike kudi Abiyayile ku Karmele, kumuambilabu ne: — Davide mmututume, bua kukuangata bua wikale mukajende.

⁴¹Abiyayile kuinama kumpala kuabu, mutue mpala panshi, ubambila ne: — Nengikale mupika wa mukalenga Davide. Ndi muitabe bua kuikala ngowesha bena mudimu bende mayi ku makasa.

⁴²Abiyayile kujuka lukasa, kubanda pa nyama wende wa mpunde, kuya ne bena mudimu bende bakaji batanu. Kulondaye bantu bavua Davide mutume. Abiyayile kushala mukaji wa Davide.

⁴³Bangabanga Davide uvua mumane kusela Akinowame, muena Yizreyele.[172] Nanku, Akinowame ne Abiyayile bonsu babidi kushala bakaji ba Davide.

⁴⁴Mukaji wa kumpala wa Davide uvua Mikale, muana wa Shawule. Kadi tatuende Shawule uvua mumane kumuselesha, kudi Palti, muana wa Layishe, muena Ngalime.[173]