Read Tshiluba 1 Samuwele 26 Bible Online

1 Samuwele 26 - Tshiluba bible

1 Samuwele 26

¹Bena mu Zife, kuya ku Ngibeya kuvua Shawule, kumuambila ne: — Kuena mumanye ne: Davide mmusokome ku mikuna ya Akila[174] pabuipi ne tshipela anyi?

²Ke Shawule kuya mu tshipela tshia Zife bua kukeba Davide. Uvua ne bena mvita ba bena Izrayele binunu bisatu, bavua bamanye mvita bikole.

³Shawule kuasa mitanda yende, ku mikuna ya Akila, ku mpenga kua njila. Davide mu tshipela kumvua lumu lua ne: Shawule mmufike bua kukukeba.

⁴Kutumaye bantu bua kujadika bualu abu. Kumujadikilabu ne: Shawule mmumane kufika.

⁵Davide kuya muaba uvua mitanda ya Shawule, bua kujadika muaba menemene uvua Shawule balale ne Abnere, muana wa Nere, mfumu wa bena mvita bende. Shawule uvua mulale munkatshi mua mitanda. Bena mvita bende bonsu bavua bamuele munkatshi.

⁶Davide kubikila Akimeleke, muena Iti, ne Abishayi. (Abishayi ne Yowabe bavua bana ba Seruya, yayende wa Davide). Davide kubakonka ne: — Nnganyi wa kunudi utudi mua kuya nende too ne ku mitanda ya Shawule? Abishayi kuitaba ne: — Netuye nebe.

⁷Munkatshi mua butuku, Davide ne Abishayi kuya mu mitanda, muaba uvua bena mvita ba Shawule. Shawule uvua mulale tulu, munkatshi mua mitanda. Difuma diende divu diasa panshi ku mutu wende. Abnere ne bena mvita, bavua balale, bela Shawule munkatshi.

⁸Abishayi kuambila Davide ne: — Butuku ebu, Mvidi Mukulu mmufile Shawule, muluishi webe mu bianza biebe. Itaba, meme nenye kumutua difuma diende, dipatuka ditua ne mu buloba. Ndi mmutua difuma anu musangu umue. Tshiakumutua musangu muibidi to.

⁹Davide kubenga ne: — Nansha, kumushipi to. Udi wela meji ne: muntu udi mushipe muntu udi Maweja-Nangila musungule, kena mua kupeta dinyoka anyi?

¹⁰Bu mudi Maweja-Nangila ne muoyi, ndi nkujadikila ne: Maweja-Nangila nkayende neajikije bualu buende. Shawule udi mua kufua bu mudi bantu bonsu bafue anyi udi mua kufua mu mvita.

¹¹Kadi Maweja-Nangila neankandike bua tshishipi mukalenga uvuaye mudisunguile. Nanku, tuambule amu difuma diende didi ku mutu, pabuipi nende, tuambule kabidi ne mulondu wende wa mayi, tuye nabi.

¹²Davide kuambula difuma ne mulondu wa mayi, bivua ku mutu kua Shawule. Kuyabu nabi. Muntu nansha umue kena mubike to. Muntu nansha umue kavua mumone, nansha mumanye, bionsu bivua bienzeka abi. Bantu bavua balale amu tulu. Bualu Maweja-Nangila uvua mubaladike tulu tukole.

¹³Davide kuya luseke lukuabu lua tshibandabanda. Kuimanaye pa mukuna, mutantshi mule ne mitanda ya Shawule.

¹⁴Davide kuela diyi luseke luvua bena mvita ba Shawule, ubikila Abnere, muana wa Nere, ne: — Akia! Abnere, ngitaba! Abnere kukonka ne: — Udi ne dikamakama nanku, unyangila mukalenga tulu nnganyi?

¹⁵Davide kukonka Abnere ne: — Abnere, wewe kuena muntu mulume anyi? Mu ditunga dijima dia bena Izrayele, kamuena muena mvita mukuabu udi ne dikima mukupite wewe to! Kadi, kuena mulame mukalenga webe Shawule bimpe bua tshinyi? Muntu mukuabu uvua mufike bua kumushipa.

¹⁶Bu mudi Maweja-Nangila ne muoyi, paudi ulengulula mudimu webe, kuena wenza bimpe to! Nuenu bena mvita bende bonsu, mbimpe banushipe, bualu kanuena balame mukalenga wenu Shawule bimpe to! Shawule mmukalenga musungula kudi Maweja-Nangila! Kadi, tangila ku mutu kua mukalenga: difuma diende ne mulondu wende wa mayi bidi penyi?

¹⁷Shawule kumanya diyi dia Davide, kukonkaye ne: — Muananyi Davide, diyi dindi mumvue edi, ndiebe wewe anyi? Davide kuandamuna ne: — Mukalenga Shawule, ndianyi meme.

¹⁸Davide kumukonka kabidi ne: — Mukalenga Shawule, udi wenda unkeba bua tshinyi? Ndi mukuenzele tshinyi? Mbualu bubi kaayi bundi mukuenzele.

¹⁹Pikala Maweja-Nangila musue bua wewe kungenzela bibi, nanku Maweja-Nangila itaba mulambu bua kujikija tshiji tshiende. Kadi, pikalabu bakuenzeja bionsu ebi kudi bantu, Maweja-Nangila abatshipe. Bualu lelu badi bangipata, bua tshisombi mu ditunga didi Maweja-Nangila mupeshe bantu bende, bidi bu mudi muntu ungamba ne: “Uye kutendelela mvidie mikuabu.[175]”

²⁰Kadi meme tshiena musue kufuila muaba mukuabu to, anu muaba udi Maweja-Nangila. Mukalenga Shawule, meme ndi kantu tshianana, bu mudi tshipu, kadi udi unduisha bua tshinyi? Udi wenda ungipata, bu mudi muntu wipata nkuadi mu mikuna bua tshinyi?

²¹Shawule kuandamuna ne: — Ndi muenze bibi! Muananyi Davide, pingana, tshiena nkuenzela bibi kabidi to. Bualu butuku ebu, udi munnemeke, kuena munshipe to. Meme ndi anu bu muntu udi kayi ne lungenyi. Ndi mutupakane bikole.

²²Davide kuandamuna ne: — Mukalenga Shawule, difuma diebe ndiodi edi. Muntu umue wa ku bena mudimu bebe, alue kukuangatshiladi.

²³Maweja-Nangila enzela muntu yonsu wa kutudi, bilondeshile buakane buende, ne mushindu udiye mulamate Maweja-Nangila. Lelu, Maweja-Nangila uvua mukufile mu bianza bianyi. Kadi tshiena musue kukushipa to. Bualu wewe udi mukalenga musungula kudi Maweja-Nangila.

²⁴Bu mundi muangate muoyi webe ne mushinga, Maweja-Nangila angate kabidi muoyi wanyi ne mushinga, ansungidile mu makenga onsu.

²⁵Ke Shawule kuambila Davide ne: — Muananyi Davide, Maweja-Nangila akuela lupemba. Newenze malu manene. Bulelela newikale muena diakalenga. Shawule kupingana kuende. Davide kupingana pende kuvua bantu bende.