Read Tshiluba 1 Samuwele 27 Bible Online

1 Samuwele 27 - Tshiluba bible

1 Samuwele 27

¹Davide kuela meji, udiambila ne: “Dituku dikuabu, Shawule ewu neanshipe. Tshiena ne tshikuabu tshindi mua kuenza mpindiewu to. Mbimpe nnyemene mu ditunga dia bena Peleshete. Nanku Shawule nealekele kunkeba mu buloba bujima bua bena Izrayele. Ke mundi mua kumunye-mena.”

²Davide kuya ne bantu bavuaye nabu nkama isambombu. Kufikaye kua Akishe, muana wa Mayoke. Akishe uvua mukalenga wa tshimenga tshia Ngate.[176]

³Kusombabu bonsu mu Ngate, pabuipi ne Akishe. Muntu yonsu wa bantu bavua nabu Davide uvua ne bena nzubu wende. Davide uvua ne bakaji bende babidi, Akinowame wa Yizreyele, ne Abigayile, muena Karmele,[177] mukaji mukamba uvua Nabale mushiye.

⁴Shawule umvua lumune: Davide mmunyemene ku Ngate, kulekelaye kumukeba.

⁵Dituku dikuabu, Davide kuebeja Akishe ne: — Mukalenga, pawikala mumone bindi ngenza ne bidi bindengelela, anyisha bua meme kusomba mu musoku mukuabu wa ku misoku idi mu mpata. Bualu ki mbimpe bua meme kusomba nebe pamue mu tshimenga tshia bukalenga to.

⁶Anu dituku adi, mukalenga Akishe kupesha Davide tshimenga tshia Siklaje.[178] Ke padi tshimenga etshi tshishale mu buloba bua bukalenga bua Yuda too ne mpindiewu.

⁷Davide uvua mushale mu ditunga dia bena Peleshete tshidimu tshimue ne ngondu inayi.

⁸Patshi wa Davide ne bantu bavuaye nabu mu Siklaje, kuluishabu bisamba ebi: bena Ngeshure, bena Ngirzi nansha bena Amaleke, mmumue ne bantu bonsu bavua basombe muaba awu kuonsu eku, mu buloba bua luseke lua ku Shure,[179] too ne ku mukalu wa ditunga dia Ejipitu.

⁹Davide ne bantu bavuaye nabu, kubutula matunga a baluishi abu. Kabawa bashiyamu muntu mulume nansha mukaji, ne muoyi to. Kuangatabu mikoku, ngombe, nyama ya mpunde, nyama ya tumelu, ne bilamba. Kupinganabu ne bintu abi kudi mukalenga Akishe.

¹⁰Pavua mukalenga Akishe ukonka Davide ne: “Lelu udi muluangane ne banganyi?” Davide uvua wandamuna ne: “Ndi muluangane ne bena Yuda badi mu buloba budi kuinshi mu ditunga,” anyi “Ndi muluangane ne bena Yerameli badi mu buloba budi kuinshi mu ditunga,” anyi “Ndi muluangane ne bena Kayine[180] badi mu buloba budi kuinshi mu ditunga.”

¹¹Davide kena mushiye muntu mulume nansha mukaji ne muoyi, bua kuya nende mu Ngate to. Uvua utshina ne: muntu ewu, udi mua kuya kunjana, wambila bantu ne: “Monayi tshidi Davide wenza.” Matuku onsu avua Davide mushale mu ditunga dia bena Peleshete, uvua wenza anu mushindu awu.

¹²Ke muvua mukalenga Akishe witaba Davide bikole. Bualu uvua wela meji ne: “Bu mudi bena Izrayele babenga Davide. Yeye neangenzele mudimu kashidi.”