Read Tshiluba 1 Samuwele 30 Bible Online

1 Samuwele 30 - Tshiluba bible

1 Samuwele 30

¹Matuku mamane kupita abidi, Davide ne bantu bavuaye nabu kufika mu tshimenga tshia Siklaje.[190] Kadi bena Amaleke bavua bamane kuluisha bantu bavua basombe mu ditunga dia bena Yuda, ne bena mu tshimenga tshia Siklaje. Bena Amaleke bavua bosha tshimenga tshia Siklaje, batshinyangakaje.

²Bavua bakuate bakaji ne bantu bonsu[191] bavua mu tshimenga, bakulumpe ne bana, bababueje mu nzubu wa lukanu. Kabavua bashipe muntu nansha umue to. Kadi bavua babakuata, baye nabu.

³Nanku Davide ne bantu bavuaye nabu, bamane kufika mu Siklaje, kusanganabu tshimenga tshimane kuosha. Bakaji babu balela, ne bana babu: ba balume ne ba bakaji, baluishi bamane kuya nabu.

⁴Davide ne bena mvita bende kudila bikole too, kupungila.

⁵Bena Amaleke bavua bakuate bakaji babidi ba Davide: Akinowame, muena mu Yizreyele, ne Abigayile, muena mu Karmele, mukaji mukamba uvua Nabale mushiye.

⁶Davide uvua ne kanyinganyinga kakole. Bualu bantu bavuaye nabu bavua basue kumuasa mabue bua kumushipa. Muntu yonsu uvua unyingalala, wela meji kudi bana bende ba balume ne ba bakaji. Kadi ku diambuluisha dia Maweja-Nangila Mvidi Mukulu wende, Davide kupeta bukole.

⁷Davide kuambila mutuangaji Abiyatare, muana wa Akimeleke,[192] ne: — Mpesha Urime ne Tumime, bintu bia tshijila, bua nkonke Maweja-Nangila. Abiyatare kumupesha bintu abi.

⁸Davide kukonka Maweja-Nangila ne: — Meme mulondakaje bivi aba, nembapete anyi? Maweja-Nangila kuitaba ne: — Eyowa, balondakaja, neubapete. Neusungidile bantu badibu bakuata.

⁹Davide ne bantu bavuaye nabu nkama isambombu, kulondakaja bivi abu. Bamane kufika ku musulu wa Beshore,[193]

¹⁰bantu nkama ibidi ba ku bantu bavuaye nabu, kupungila bikole. Kushalabu muaba awu, kabayi ne mushindu wa kusabuka musulu. Davide kutungunuka ne luendu ne bantu nkama inayi, bavua bashala.

¹¹Bena mvita ba Davide kusangana nsongalume mukuabu wa bena Ejipitu, mu mpata. Kumukuatabu, kuyabu nende kudi Davide. Kumupeshabu diampa ne mayi a kunua.

¹²Pashishe kumupeshabu mukata muenze ne bimuma bia mfiku. Kumupeshabu kabidi ne bisangi bibidi bia tumuma tua mvinyo tumane kuuma. Nsongalume wa bena Ejipitu, mumane kudia bintu abi, kupetaye bukole. Bualu kavua mudie tshintu nansha munue mayi, matuku asatu a munya ne a butuku.

¹³Davide kukonka nsongalume awu ne: — Udi muena nganyi? Udi ufuma penyi? Nsongalume kuandamuna ne: — Ndi muena Ejipitu, ndi mupika wa bena Amaleke. Mfumuanyi mmunshiye, kudi matuku asatu, bualu mvua nsama.

¹⁴Bangabanga tuvua baluishe bantu badi basombe kuinshi mu ditunga, mu buloba bua bena Kereti, bua bena Yuda ne bua bena Kalebe.[194] Pashishe tuetu kuosha tshimenga tshia Siklaje.

¹⁵Davide kumukonka ne: — Udi mua kumfikisha muaba udi bivi abu anyi? Muntu awu kuandamuna ne: — Nenkufikishe kudibu paudi ujadika, uditshipa kumpala kua Mvidi Mukulu muudi kuyi musue kunshipesha, kuyi nansha musue kumfila kudi mfumu wanyi.

¹⁶Nsongalume wa bena Ejipitu kufikisha Davide muaba uvua bena Amaleke. Kusanganabu bena Amaleke batangalakangana mu buloba bujima, badia, banua, benza tshibilu ne bintu bipite bungi, bivuabu bapawule mu ditunga dia bena Peleshete, ne mu ditunga dia bena Yuda.

¹⁷Dituku divu dilonda, Davide kubaluisha dinda too ne dilolu. Muntu nansha umue kena munyeme to. Anu bansongalume nkama inayi bavua babanda pa nyama ya tumelu, ke bavua banyema.

¹⁸Davide kuangata bintu bionsu bivua bena Amaleke bapawule. Kusungidilaye too ne bakaji bende babidi.

¹⁹Davide uvua musungidile bantu bonsu, bakulumpe ne bana, ba balume ne ba bakaji. Bintu biabu bionsu bivua anu katakata. Bionsu bivua baluishi bapawule, Davide kubipeta.

²⁰Davide kupawula kabidi mikoku ne ngombe ya bena Amaleke. Bantu bavua basaka bimuna abi, bavua bamba ne: “Monayi bintu bidi Davide mupawule mu mvita”!

²¹Davide kupingana muaba uvua bantu bende nkama ibidi bashale, bapungile bikole, pabuipi ne musulu wa Beshore. Bantu abu, kuya kusambakena ne Davide, ne bantu bavuaye nabu. Davide ne bena mvita bende kusemena pabuipi, kubeela muoyi.

²²Kadi bena mvita bavua baye ne Davide ku mvita, kabawa ne lungenyi to, bualu bavua ne lukinu. Nanku, kuambilabu Davide ne: — Bu muvua bantu aba kabayi baye netu mu mvita, kabena mua kubapa bintu bitudi banyenga mu mvita to. Muntu yonsu angate anu mukajende ne bana bende, aye nabu.

²³Davide kuandamuna ne: — Bana betu, kanuenji nanku to. Bintu ebi mbitupesha kudi Maweja-Nangila. Yeye ke uvua mutalame, mufile mu bianza bietu, bivi aba bavua baluisha tshimenga tshia Siklaje.

²⁴Muntu nansha umue kena mua kuitaba tshinudi nuamba to. Mbimpe tuabanyangane binta mushindu ewu: “Muntu yonsu apete tshintu tshia mu mvita. Muntu uvua muye mu mvita, ne muntu uvua mushale mulame mitanda, babanyangane bintu mushindu amu umue.”

²⁵Biangatshile dituku adi, Davide kujadika mikenji eyi. Kushalayi mikenji ivuabena Izrayele bonsu ne bua kukumbaja too ne mpindiewu.

²⁶Davide upingana mu tshimenga tshia Siklaje, kutuminaye balunda bende, ne bakulu ba bena Yuda, bintu bia mu mvita. Kubambilaye ne: “Angatayi bintu bia disanka abi, mbitudi banyenga baluishi ba Maweja-Nangila.”

²⁷Kubituminaye kabidi bakulu bavua ku Betele, bavua ku Ramote, kuinshi mu ditunga, ne bavua ku Yatire,

²⁸ku Aroyere, ku Sifmote, ku Eshtemowa,

²⁹ku Rakate, mu bimenga bia bena Yerameli, ne bia bena Kayine,

³⁰bavua ku Orma, ku Borashane, ku Atake,

³¹ku Ebrone,[195] ne bavua mu misoku yonsu ivua Davide mupitshile ne bantu ba-vuaye nabu.