Read Tshiluba 1 Samuwele 7 Bible Online

1 Samuwele 7 - Tshiluba bible

1 Samuwele 7

¹Bena Kiriyate-Yeyarime kuya kuangata mushete awu. Kuyabu nawu mu nzubu wa Abinadabe uvua muasa pa kakuna.[36] Pashishe, kujidilabu Elazare, muana wa Abinadabe, bua kuikalaye ulama mushete wa Maweja-Nangila.

²Mushete wa tshijila wa Maweja-Nangila mumane kufika ku Kiriyate-Yeyarime, uvua mushalemu bidimu makumi abidi. Bena Izrayele bavua bajinga mua kusemena pabuipi ne Maweja-Nangila.

³Nanku Samuwele kubambila ne: — Panuikala basue kupingana kudi Maweja-Nangila ne muoyi wenu mujima, nulekele kutendelela mvidie ya Astarte ne mvidie mikuabu yonsu ya bantu benyi. Nuitabe anu Maweja-Nangila muenu muonsu, numuenzele mudimu amu yeye nkayende. Nanku neanupandishe ku bumfumu bua bena Peleshete.

⁴Bena Izrayele kuimansha mpingu ya mvidie Baale ne Astarte ivuabu nayi, kutendelelabu amu Maweja-Nangila nkayende.

⁵Ke Samuwele kubela diyi, ubambila ne: — Bantu bonsu badisangishe ku Mispa.[37] Muaba awu, nendombe kudi Maweja-Nangila bualu buenu.

⁶Bena Izrayele kudisangisha ku Mispa. Kusunabu mayi, kuitshikijabu panshi kumpala kua Maweja-Nangila. Kujilabu biakudia dituku adi. Pashishe kutondabu mibi yabu, bamba ne: tuvua batombokela Maweja-Nangila. Nanku, anu ku Mispa aku, Samuwele kutuadija kulombola bena Izrayele.

⁷Bena Peleshete kumvua lumu ne: bena Izrayele mbadisangisha ku Mispa. Nanku, bamfumu batanu ba bena Peleshete kudilongolola bua kuluisha bena Izrayele. Bena Izrayele bumvua nanku, kukuatshikabu bowa.

⁸Kuambilabu Samuwele ne: — Kutulekedi to! Wikale utulombola kudi Maweja-Nangila Mvidi Mukulu wetu, bua kutusungidilaye ku bumfumu bua bena Peleshete.

⁹Samuwele kuangata muana wa mukoku, kuulambula Maweja-Nangila, kuoshaye mujima. Pashishe kulombaye Maweja-Nangila bua afuile bena Izrayele luse. Maweja-Nangila kuitaba dilomba adi.

¹⁰Nanku, patshivua Samuwele ulambula mulambu, bena Peleshete bavua bamane kusemena pabuipi, bua kuluisha bena Izrayele. Kadi Maweja-Nangila kudidisha makubakuba makole. Bena mvita ba bena Peleshete kupapuka bikole ne bowa, bena Izrayele kutshimuna bena Peleshete.

¹¹Bena mvita ba bena Izrayele kumuka ku Mispa, kulondakaja bena Peleshete too ne kuinshi kua Bete-Kare, [38] kubashipabu bonsu.

¹²Samuwele kuela diyi, wamba ne: “Maweja-Nangila ke udi mutuambuluisha too ne mpindiewu.” Samuwele kuambula dibue, kudimanyika pankatshi pa Mispa ne Shene. Kuinyikaye dibue adi dina ne: “Dibue-dia-diambuluisha.”[39]

¹³Bena Peleshete bavua ne bundu, buamushindu uvuabu babatshimuna awu. Maweja-Nangila kubaleja bukole buende matuku onsu avua Samuwele ne muoyi. Nanku bena Peleshete kabena babuela kabidi mu buloba bua bena Izrayele to.

¹⁴Miaba yonsu ya buloba abu, pankatshi pa tshimenga tshia Ekrone ne tshia Ngate,[40] ivua bena Peleshete bamane kunyenga bena Izrayele, kuyipingajilabu anu bena Izrayele. Nanku buloba abu, kumukabu ku bumfumu bua bena Peleshete. Nansha pankatshi pa bena Izrayele ne bena Amore pavua anu ditalala.

¹⁵Samuwele uvua mushale mulombodi wa bena Izrayele too ne muakafuaye.

¹⁶Ku tshidimu tshionsu, uvua upitshila ku Betele, ku Ngilgale[41] ne ku Mispa, bua kulumbuluisha bantu mu bimenga ebi bisatu.

¹⁷Pashishe, Samuwele uvua upingana kuende ku Rama,[42] muaba uvuaye ulumbuluisha bena Izrayele. Muaba awu, uvua muashila Maweja-Nangila tshilambuilu.