Read Tulu ಮತ್ತಾಯೆ 1 Bible Online

ಮತ್ತಾಯೆ 1 - Tulu bible

ಮತ್ತಾಯೆ 1

¹ಉಂದು ಯೇಸು ಕ್ರಿಸ್ತನ ಸಂತಾನದ ಪಟ್ಟಿ. ಆಯೆ ದಾವೀದನ ಸಂತಾನದಾಯೆ, ದಾವೀದೆ ಅಬ್ರಹಾಮುನ ಸಂತಾನದಾಯೆ.

²ಅಬ್ರಹಾಮು ಇಸಾಕ್‌ನ ಅಮ್ಮೆ. ಇಸಾಕೆ ಯಾಕೋಬುನ ಅಮ್ಮೆ. ಯಾಕೋಬು ಯೂದ ಬೊಕ್ಕ ಆಯನ ಮೆಗ್ಯೆ ಪಲಯಾಡ್ಲೆನ ಅಮ್ಮೆ.

³ಯೂದೆ ಪೆರೆಸ್ ಬೊಕ್ಕ ಜೆರಹನ ಅಮ್ಮೆ, ಅಕ್ಲೆನ ಅಪ್ಪೆ ತಾಮರ. ಪೆರೆಸ್ ಹೆಚ್ರೋನುನ ಅಮ್ಮೆ. ಹೆಚ್ರೋನು ಅರಾಮನ ಅಮ್ಮೆ.

⁴ಅರಾಮು ಅಮ್ಮೀನಾದಾಬುನ ಅಮ್ಮೆ. ಅಮ್ಮೀನಾದಾಬು ನಹಸ್ಸೋನುನ ಅಮ್ಮೆ. ನಹಸ್ಸೋನ್ ಸಲ್ಮೋನನ ಅಮ್ಮೆ.

⁵ಸಲ್ಮೋನು ಬೋವಜ್‌ನ ಅಮ್ಮೆ. ಬೋವಜ್‌ನ ಅಪ್ಪೆ ರಾಹಾಬ್. ಬೋವಜೆ ಓಬೆದ್‌ನ ಅಮ್ಮೆ. ಓಬೆದ್‌ನ ಅಪ್ಪೆ ರೂತು. ಓಬೆದೆ ಇಸ್ಸಾಯನ ಅಮ್ಮೆ.

⁶ಇಸ್ಸಾಯೆ ಅರಸು ಆದುಪ್ಪು ದಾವೀದನ ಅಮ್ಮೆ. ದಾವೀದೆ ಸೊಲೊಮೋನುನ ಅಮ್ಮೆ. ಸೊಲೊಮೋನುನ ಅಪ್ಪೆ ಉರೀಯನ ಬೊಡೆದಿ ಆದಿತ್ತಿನಾಲ್.

⁷ಸೊಲೊಮೋನು ರೆಹಬ್ಬಾಮುನ ಅಮ್ಮೆ. ರೆಹಬ್ಬಾಮು ಅಬೀಯನ ಅಮ್ಮೆ. ಅಬೀಯೆ ಆಸನ ಅಮ್ಮೆ.

⁸ಆಸೆ ಯೆಹೋಷಾಫಾಟನ ಅಮ್ಮೆ. ಯೆಹೋಷಾಫಾಟ್ ಯೆಹೋರಾಮುನ ಅಮ್ಮೆ. ಯೆಹೋರಾಮು ಉಜ್ಜೀಯನ ಅಮ್ಮೆ.

⁹ಉಜ್ಜೀಯೆ ಯೋತಾಮುನ ಅಮ್ಮೆ. ಯೋತಾಮು ಆಹಾಜನ ಅಮ್ಮೆ. ಆಹಾಜೆ ಹಿಜ್ಕೀಯನ ಅಮ್ಮೆ.

¹⁰ಹಿಜ್ಕೀಯೆ ಮನಸ್ಸೆನ ಅಮ್ಮೆ. ಮನಸ್ಸೆ ಅಮೋನುನ ಅಮ್ಮೆ. ಅಮೋನು ಯೋಷೀಯನ ಅಮ್ಮೆ.

¹¹ಯೋಷೀಯೆ ಯೆಕೊನ್ಯನ ಬೊಕ್ಕ ಆಯನ ಮೆಗ್ಯೆ ಪಲಯಾಡ್ಲೆನ ಅಮ್ಮೆ. ಈ ಸಮಯೊಡು ಯೆಹೂದ್ಯೆರೆನ್ ಬಾಬೆಲ್‌ಗ್ ಕೈದ್ ಮಲ್ತ್‌ದ್ ಕೊನೊ ಪೋಯಿನವು.

¹²ಯೆಹೂದ್ಯೆರೆನ್ ಬಾಬೆಲ್‌ಗ್ ಕೈದ್ ಆದ್ ಪೋಯಿ ಬೊಕ್ಕದ ಸಂತಾನದ ಪಟ್ಟಿ. ಯೆಕೊನ್ಯೆ ಶೆಯಲ್ತಿಯೇಲನ ಅಮ್ಮೆ. ಶೆಯಲ್ತಿಯೇಲೆ ಜೆರುಬಾಬೆಲನ ಅಮ್ಮೆ.

¹³ಜೆರುಬಾಬೆಲೆ ಅಬಿಹೂದನ ಅಮ್ಮೆ. ಅಬಿಹೂದೆ ಎಲ್ಯಕೀಮುನ ಅಮ್ಮೆ. ಎಲ್ಯಕೀಮು ಅಜೋರುನ ಅಮ್ಮೆ.

¹⁴ಅಜೋರು ಸದೋಕುನ ಅಮ್ಮೆ. ಸದೋಕು ಅಖೀಮುನ ಅಮ್ಮೆ. ಅಖೀಮು ಎಲಿಹೂದನ ಅಮ್ಮೆ.

¹⁵ಎಲಿಹೂದೆ ಎಲಿಯಾಜರನ ಅಮ್ಮೆ. ಎಲಿಯಾಜರೆ ಮತ್ತಾನನ ಅಮ್ಮೆ. ಮತ್ತಾನು ಯಾಕೋಬುನ ಅಮ್ಮೆ.

¹⁶ಯಾಕೋಬು ಮರಿಯನ ಕಂಡನಿ ಆದುಪ್ಪು ಯೋಸೇಫುನ ಅಮ್ಮೆ. ಆ ಮರಿಯಡ್ದ್ ಕ್ರಿಸ್ತೆ ಪನ್ಪಿ ಯೇಸು ಪುಟ್ಟಿಯೆ.

¹⁷ಇಂಚಾದ್ ಒಟ್ಟುಗು ಅಬ್ರಹಾಮುಡ್ದು ದಾವೀದ ಮುಟ್ಟ ಪದ್ನಾಲ್ ತರೆ, ದಾವೀದಡ್ದ್ ಬಾಬೆಲ್‌ಗ್ ಸೆರೆ ಕೊನೊಪಿ ಮುಟ್ಟ ಪದ್ನಾಲ್ ತರೆ, ಐಡ್ದ್ ಬೊಕ್ಕ ಬಾಬೆಲ್‌ದ ಬಂಧನೊಡ್ದು ಕ್ರಿಸ್ತ ಮುಟ್ಟ ಪದ್ನಾಲ್ ತರೆ.

¹⁸ಯೇಸು ಕ್ರಿಸ್ತನ ಪುಟ್ಟು ಈ ರೀತಿಡ್ ಆಂಡ್. ಆಯನ ಅಪ್ಪೆ ಆದುಪ್ಪು ಮರಿಯನ್, ಯೋಸೇಫುಗು ನಿಚ್ಚಯ ಮಲ್ತ್‌ದುಪ್ಪುನೆಡ್ದ್ ಅಕುಲು ಮದ್ಮೆ ಆವೊಡ್ದು ದುಂಬೇ ಆಲ್ ಪರಿಶುದ್ಧಾತ್ಮೊಡ್ದು ಬಂಜಿನಾಲ್ ಆಯಿನವು ತೆರಿದ್ ಬತ್ತ್ಂಡ್.

¹⁹ಆಂಡ ಆಲೆನ ಕಂಡನಿ ಆಯಿ ಯೋಸೇಫೆ ಸಜ್ಜನೆ ಆದಿತ್ತಿನೆಡ್ದ್ ಈ ಸಂಗತಿನ್ ಬೈಲ್‌ಗ್ ಕನವೆರೆ ಮನಸಿಜ್ಜಂದೆ ಆಲೆನ್ ಗುಟ್ಟುಡು ಬುಡ್ದು ಬುಡೊಡು ಪಂಡ್ದಿತ್ತೆ.

²⁰ಆಯೆ ಇಂಚ ಆಲೋಚನೆ ಮಲ್ತೊಂದುಪ್ಪುನಗ ಕರ್ತವ ದೂತೆ ಕನೊಟು ಬತ್ತ್‌ದ್, “ಯೋಸೇಫೋ ದಾವೀದ ಸಂತಾನದಾಯಾ, ನಿನ ಬೊಡೆದಿ ಮರಿಯನ್ ಸೇರಾವೊನ್ರೆ ಪೋಡ್ಯಡ ಆಲೆನ ಗರ್ಭ ಪರಿಶುದ್ಧಾತ್ಮೊಡ್ದೇ ಆಯಿನವು.

²¹ಆಲ್ ಆಣ್ ಬಾಲೆನ್ ಪೆದ್ದುವಲ್. ಈ ಆ ಬಾಲೆಗ್ ಯೇಸು ಪಂಡ್ದ್ ಪುದರ್ ದೀವೊಡು, ದಾಯೆಗಂದ್ಂಡ ಆಯೆನೇ ತನ ಜನೊಕುಲೆನ್ ಅಕ್ಲೆನ ಪಾಪೊಲೆಡ್ದ್ ಬುಡ್ಪಾದ್ ಕಾಪುವೆ,” ಅಂದ್‌ದ್ ಪಂಡೆ.

²²ಕರ್ತವೆ ಪ್ರವಾದಿಡ್ದ್ ಪಂಡಿನ ಪಾತೆರ ನಡಪುಲೆಕ್ಕ ಉಂದು ಮಾತ ನಡತ್ಂಡ್. ಆ ಪಾತೆರ ದಾನೆಂದ್ಂಡ,

²³“ಇಂದಾ, ಒಂಜಿ ಕನ್ಯಪೊಣ್ಣು ಬಂಜಿನಾಲಾದ್ ಒಂಜಿ ಬಾಲೆನ್ ಪೆದ್ದುವಲ್. ಆಯಗ್ ಇಮ್ಮಾನುವೇಲ್ ಪಂಡ್ದ್ ಪುದರ್ ದೀಪೆರ್. ನೆತ್ತ ಅರ್ಥ, ‘ದೇವೆರ್ ನಮಡೊಪ್ಪ ಉಲ್ಲೆ,’ ಪಂಡ್ದ್.”

²⁴ಅಪಗ ಯೋಸೇಫೆ ನಿದ್ರೆಡ್ದ್ ಲಕ್ಕ್‌ದ್ ಕರ್ತವ ದೂತೆ ಅಪ್ಪಣೆ ಕೊರಿಲೆಕ್ಕನೆ ತನ ಬೊಡೆದಿನ್ ಸೇರಾವೊಂಡೆ.

²⁵ಅತ್ತಂದೆ ಮರಿಯ ಪೆದ್ದುನೆಟ್ಟ ಆಲೆಡ್ದ್ ದೂರ ಇತ್ತೆ. ಶರೀರ ಸಮ್ಮಂಧೊನು ಮಲ್ತ್‌ಜೆ. ಬೊಕ್ಕ ಯೋಸೇಫೆ ಆ ಬಾಲೆಗ್ ಯೇಸು ಇನ್ಪಿ ಪುದರ್ ದೀಯೆ.