Read Tulu ಮತ್ತಾಯೆ 10 Bible Online

ಮತ್ತಾಯೆ 10 - Tulu bible

ಮತ್ತಾಯೆ 10

¹ಬೊಕ್ಕ ಆಯೆ ತನ ಪದ್ರಾಡ್ ಶಿಷ್ಯೆರೆನ್ ಕೈತಲ್ ಲೆತ್ತ್‌ದ್ ದೆವ್ವೊಲೆನ್ ಬುಡ್ಪಾಯೆರೆಲಾ ಮಾತ ತರತ ಸೀಕ್‌ಲೆನ್ಲಾ ಮಾತ ತರತ ಬೇನೆಲೆನ್ಲಾ ಗುಣ ಮಲ್ಪೆರೆ ಅಕ್ಲೆಗ್ ಅಧಿಕಾರ ಕೊರಿಯೆ.

²ಆಯೆ ಕಡಪುಡ್ದು ಕೊರಿನ ಪದ್ರಾಡ್ ಅಪೊಸ್ತಲರೆನ ಪುದರ್ ಉಂದೇ, ಸುರುತ್ತಾಯೆ ಪೇತ್ರೆ ಪನ್ಪಿ ಸೀಮೋನೆ, ಆಯನ ಮೆಗ್ಯೆ ಅಂದ್ರೆಯೆ, ಜೆಬೆದಾಯನ ಮಗೆ ಯಾಕೋಬೆ, ಆಯನ ಮೆಗ್ಯೆ ಯೋಹಾನೆ,

³ಫಿಲಿಪ್ಪು, ಬಾರ್ತೊಲೊಮಾಯೆ, ತೋಮೆ, ಸುಂಕದ ಮತ್ತಾಯೆ, ಅಲ್ಫಾಯನ ಮಗೆ ಯಾಕೋಬೆ, ತದ್ದಾಯೆ,

⁴ಮತಾಭಿಮಾನಿ ಅಂದ್‌ದ್ ಲೆಪ್ಪವೊಂಡಿ ಸೀಮೋನೆ, ಯೇಸುನು ಒಚ್ಚಿದ್ ಕೊರಿ ಇಸ್ಕಾರಿಯೋತ ಯೂದೆ ಮೊಕುಲೇ.

⁵ಈ ಪದ್ರಾಡ್ ಶಿಷ್ಯೆರೆನ್ ಅಧಿಕಾರ ಕೊರ್ದು ಯೇಸು ಕಡಪುಡಿಯೆ. ಕಡಪುಡುನಪಗ ಅಕ್ಲೆಗ್ ಅಪ್ಪಣೆ ಕೊರಿನಿ ದಾನೆಂದ್ಂಡ, “ಪಿದಯಿದ ಜನೊಕುಲೆ ಕಡೆಕ್ಕ್ ಪೋವಡೆ, ಸಮಾರ್ಯೆರೆ ಊರುದ ಉಲಯಿ ಕಾರ್ ದೀವಡೆ.

⁶ಮೊಕ್ಲೆನ್ ಬುಡ್ದು, ನಿಕುಲು ತತ್ತ್ ಪೋಯಿ ಕುರಿಕುಲೆ ಲೆಕ್ಕ ಉಪ್ಪುನ ಇಸ್ರಾಯೇಲ್ಯೆರೆ ಜನಾಂಗದ ಕೈತಲ್‌ಗ್ ಮಾತ್ರ ಪೋಲೆ.

⁷‘ಪರಲೋಕ ರಾಜ್ಯ ಕೈತಲಾತ್ತ್ಂಡ್,’ ಅಂದ್‌ದ್ ಸಾರಿಯೊಂದು ಪೋಲೆ.

⁸ಸೀಕ್‌ದಾಕುಲೆನ್ ಗುಣ ಮಲ್ಪುಲೆ, ಸೈತಿನಕುಲೆನ್ ಬದ್‌ಕಾಲೆ, ಕೊಷ್ಟ ಪತ್ತ್‌ದಿನಕುಲೆನ್ ಶುದ್ಧ ಮಲ್ಪುಲೆ. ದೆವ್ವೊಲೆನ್ ಬುಡ್ಪಾಲೆ, ನಿಕ್ಲೆಗ್ ಧರ್ಮೊಗು ತಿಕ್ಕ್‌ದ್ಂಡ್, ಧರ್ಮೊಗೇ ಕೊರ್ಲೆ.

⁹ನಿಕ್ಲೆ ಜೋಳಿಗೆಡ್ ಬಂಗಾರ್, ಬೊಳ್ಳಿ, ಕಾಸ್, ರಡ್ಡ್ ಅಂಗಿ, ಜೋಡು, ಕೋಲು ಇಂಚಿತ್ತಿನೆನ್ ದೆತ್ತೊನೊಡ್ಚಿ. ಬೇಲೆದಾಯೆ ತನ ವಣಸ್‌ಗ್ ತಕ್ಕದಾಯೆ.

¹⁰

¹¹“ನಿಕುಲು ವಾ ಊರುಗು ಇಜ್ಜಾಂಡ ಹಳ್ಳಿಗ್ ಪೋಯಿನಪಗ ಅಲ್ಪ ಯೋಗ್ಯದಾಯನ್ ನಾಡ್ ಪತ್ತ್‌ಲೆ. ಅಲ್ಪ ಯೋಗ್ಯದಾಯೆ ಏರ್ಂದ್ ತೆರಿಯೊಂದು ಆ ಊರು ಬುಡ್ಪಿನೆಟ್ಟ ಅವುಲೇ ಉಪ್ಪುಲೆ.

¹²ಆ ಇಲ್ಲದ ಉಲಯಿ ಪೋನಗ ಸಮಾಧಾನ ಆವಡ್ ಪನ್ಲೆ.

¹³ಆ ಇಲ್ಲದಾಕುಲು ಯೋಗ್ಯೆರ್ ಆದಿತ್ತ್ಂಡ ನಿಕ್ಲೆನ ಸಮಾಧಾನ ಅಕ್ಲೆಗ್ ಆವಡ್; ಅಯೋಗ್ಯೆರ್ ಆದಿತ್ತ್ಂಡ ನಿಕ್ಲೆ ಸಮಾಧಾನ ನಿಕ್ಲೆಗ್ ಪಿರ ಬರಡ್.

¹⁴ಏರಾಂಡಲಾ ನಿಕ್ಲೆನ್ ಸೇರಾವಂದೆ, ನಿಕ್ಲೆ ಪಾತೆರೊಲೆನ್ ಕೇನಂದೆ ಉಲ್ಲೆರ್ಡ ಆ ಇಲ್ಲಡ್ದಾವಡ್, ಊರುಡ್ದಾವಡ್ ಪಿದಾಡ್ದ್ ನಿಕುಲು ಪೋನಗ ನಿಕ್ಲೆ ಕಾರ್‌ದ ಧೂಳುನು ಕುಡ್ತ್‌ದ್ ಪೋಲೆ.

¹⁵ನ್ಯಾಯತೀರ್ಪುದ ದಿನೊಟು ಅಂಚಿತ್ತಿ ಊರುದ ಗತಿ ಸೋದೋಮು ಗೊಮೋರ ಸೀಮೆದ ಗತಿಡ್ದ್‌ಲಾ ಕಠಿಣ ಆದುಪ್ಪುಂಡು ಅಂದ್‌ದ್ ನಿಕ್ಲೆಗ್ ನಿಜಾದ್ ಪನ್ಪೆ.

¹⁶“ತೂಲೆ, ಚೆನ್ನನಾಯಿಲೆ ನಡುಟು ಕುರಿಕುಲೆನ್ ಪೊಗ್ಗಾಯಿಲೆಕ್ಕ ಯಾನ್ ನಿಕ್ಲೆನ್ ಕಡಪುಡ್ದು ಕೊರ್ಪೆ. ಅಂಚಾಯಿನೆಡ್ದ್ ಸರ್ಪೊಲೆ ಲೆಕ್ಕ ಬುದ್ಧಿವಂತೆರ್ಲಾ ಪಾರಿವಾಳದ ಲೆಕ್ಕ ಕಪಟದಾಂತಿನಾಕುಲುಲಾ ಆದುಪ್ಪುಲೆ.

¹⁷ಉಂದತ್ತಂದೆ ಜನೊಕುಲೆ ಸಂಗತಿಡ್, ಎಚ್ಚರಿಕೆ ಆದುಪ್ಪುಲೆ, ಅಕುಲು ನಿಕ್ಲೆನ್ ನ್ಯಾಯಸಭೆಕ್ಕ್ ಒಯ್ತೊಂದು ಪೋವೆರ್, ಬೊಕ್ಕ ಸಭಾಮಂದಿರೊಲೆಡ್ ನಿಕ್ಲೆಗ್ ಚಾಟಿಡ್ ಹಾಕೆರ್.

¹⁸ಎನಡ್ದಾವರ ನಿಕ್ಲೆನ್ ಅಧಿಪತಿಲೆ ಬೊಕ್ಕ ಅರಸುಲೆ ಎದುರು ಕೊನೊವೆರ್, ಇಂಚ ಅಕ್ಲೆಗ್ಲಾ ಪಿದಯಿದ ಜನೊಕುಲೆಗ್ಲಾ ಸಾಕ್ಷಿ ಆವರ್.

¹⁹ಆಂಡ ಅಕುಲು ನಿಕ್ಲೆನ್ ಒಚ್ಚಿದ್ ಕೊರ್ನಗ ಎಂಚ ಪಾತೆರೊಡು, ದಾದ ಪನೊಡು ಅಂದ್‌ದ್ ಚಿಂತೆ ಮಲ್ಪಡೆ; ಪನೊಡಿತ್ತಿ ಪಾತೆರೊಲು ಆ ಗಳಿಗೆಡ್ ನಿಕ್ಲೆಗ್ ದೇವೆರ್ ಕಲ್ಪಾದ್ ಕೊರುವೆ.

²⁰ಅಪಗ ಪಾತೆರುನಾಕುಲು ನಿಕುಲತ್ತ್, ನಿಕ್ಲೆ ಅಮ್ಮೆರೆನ ಆತ್ಮನೇ ನಿಕ್ಲೆಡ್ ಪಾತೆರುಂಡು.

²¹“ಉಂದತ್ತಂದೆ ಪಲಯೆ ಮೆಗ್ಯನ್, ಅಮ್ಮೆ ಮಗನ್ ಮರಣೊಗು ಒಚ್ಚಿದ್ ಕೊರುವೆರ್; ಜೋಕುಲು ಅಪ್ಪೆಅಮ್ಮಾಡ್ಲೆ ಮಿತ್ತ್ ತಿರ್ಗ್ ಬೂರ್ದು ಅಕ್ಲೆನ್ ಕೆರ್ವೆರ್.

²²ಬೊಕ್ಕ ಎನ ಪುದರ್‌ಗಾದ್ ಮಾತೆರ್ಲಾ ನಿಕ್ಲೆನ್ ಪಗೆ ಮಲ್ಪುವೆರ್. ಆಂಡ ಕಡೆ ಮುಟ್ಟ ತಾಳೊನುನಾಯಗ್ ರಕ್ಷಣೆ ಆವು.

²³ಒಂಜಿ ಊರುಡು ನಿಕ್ಲೆನ್ ಭಂಗ ಕೊರಿಯೆರ್ಡ ಬೊಕ್ಕೊಂಜಿ ಊರುಗು ಪಾರ್‌ಪೋಲೆ. ನರಮಾನಿ ಮಗೆ ಬರ್ಪಿನೆಟ್ಟ ನಿಕುಲು ಇಸ್ರಾಯೇಲ್ ಜನೊಕುಲೆ ಊರುಲೆ ಪ್ರಯಾಣೊನು ಮಲ್ತ್‌ದ್ ಮುಗಿತ್‌ದುಪ್ಪುಜರ್ ಅಂದ್‌ದ್ ನಿಕ್ಲೆಗ್ ನಿಜಾದ್ ಪನ್ಪೆ.

²⁴“ಗುರುಡ್ದು ಶಿಷ್ಯೆ ಮಲ್ಲಾಯೆ ಅತ್ತ್, ಧನಿಡ್ದ್ ಚಾಕ್ರಿದಾಯೆ ಮಲ್ಲಾಯೆ ಅತ್ತ್.

²⁵ಶಿಷ್ಯೆ ಗುರುಲೆಕ್ಕ, ಚಾಕ್ರಿದಾಯೆ ಧನಿಲೆಕ್ಕ ಉಪ್ಪುನವು ಯಾವು. ಅಕುಲು ಇಲ್ಲದ ಯಜಮಾನಗ್ ಬೆಲ್ಜೆಬೂಲ ಅಂದ್‌ದ್ ಪುದರ್ ದೀಯಿಬೊಕ್ಕ ಆಯನ ಇಲ್ಲದಾಕುಲೆನ್ ಎಂಚಿನ ಪನುವೆರ್?”

²⁶ಆಂಡಲಾ ಅಕ್ಲೆಗ್ ಪೋಡ್ಯಡೆ. ಮದೆ ಆದುಪ್ಪು ಒವುಲಾ ತೋಜಿದ್ ಬರಂದೆ ಕುಲ್ಲಂದ್. ಪಿದಯಿ ಬರಂದೆ ಉಪ್ಪುನ ಒಂಜಿ ಗುಟ್ಟುಲಾ ಇಜ್ಜಿ.

²⁷ಯಾನ್ ಕತ್ತಲೆಡ್ ನಿಕ್ಲೆಗ್ ಪನ್ಪಿನೆನ್ ನಿಕುಲು ಬೊಲ್ಪುಡು ಪನ್ಲೆ, ಬೊಕ್ಕ ಕೆಬಿಟ್ ಕೇಂಡಿನೆನ್ ಮಾಳಿಗೆದ ಮಿತ್ತ್ ಉಂತುದು ಸಾರಿಲೆ.

²⁸ಉಂದತ್ತಂದೆ ಶರೀರೊನು ಕೆರ್ದ್ ಆತ್ಮೊನು ಕೆರಿಯೆರೆ ಆವಂದಿನಾಕುಲೆಗ್ ಪೋಡ್ಯಡೆ, ಆತ್ಮ ಶರೀರ ರಡ್ಡೆನ್ಲಾ ನರಕೊಡು ಪಾಡ್ದ್ ನಾಶ ಮಲ್ಪುನ ದೇವೆರೆಗ್ ಪೋಡಿಲೆ.

²⁹ದುಡ್ಡುಗು ರಡ್ಡ್ ಗುರ್ಬ್ಬಿಲೆನ್ ಮಾರುನವು ಉಂಡತ್ತಾ? ಆಂಡಲಾ ನಿಕ್ಲೆ ಅಮ್ಮೆರೆ ಚಿತ್ತದಾಂತೆ ಒಂಜಾಂಡಲಾ ನೆಲಕ್ ಬೂರಂದ್.

³⁰ನಿಕ್ಲೆ ತರೆಕುಜಲ್ ಮಾತಲಾ ಗೆನ್ತ್‌ದುಂಡು.

³¹ಅಂಚಾಯಿನೆಡ್ದ್ ಪೋಡ್ಯಡೆ; ಮಸ್ತ್ ಗುರ್ಬ್ಬಿಲೆಡ್ದ್‌ಲಾ ನಿಕುಲು ಹೆಚ್ಚ್‌ದಾಕುಲು.

³²“ಅಂಚಾಂಡ ಏರ್ ಜನೊಕುಲೆ ಎದುರು ತಾನ್ ಯೇಸುನಾಯೆ ಅಂದ್‌ದ್ ಒಪ್ಪಿಯೊನ್ವೆನಾ, ಯಾನ್ಲಾ ಆಯನ್ ಎನ್ನಾಯೆ ಅಂದ್‌ದ್ ಪರಲೋಕೊಡುಪ್ಪು ಎನ ಅಮ್ಮೆರೆ ಎದುರು ಒಪ್ಪಿಯೊನ್ವೆ.

³³ಆಂಡ ಏರ್ ಜನೊಕುಲೆ ಎದುರು ತಾನ್ ಯೇಸುನಾಯೆ ಅತ್ತ್ ಅಂದ್‌ದ್ ಪನ್ಪೆನಾ ಆಯನ್ ಯಾನ್ಲಾ ಪರಲೋಕೊಡುಪ್ಪು ಎನ ಅಮ್ಮೆರೆ ಎದುರು ಎನ್ನಾಯೆ ಅತ್ತ್ ಅಂದ್‌ದ್ ಪನ್ಪೆ.

³⁴“ಭೂಲೋಕೊಡು ಸಮಾಧಾನ ಉಂಡು ಮಲ್ಪೆರೆ ಬೈದೆ ಅಂದ್‌ದ್ ಎನ್ನಡೆ. ಸಮಾಧಾನೊನು ಪುಟ್ಟಾವೆರೆ ಯಾನ್ ಬೈದಿಜಿ, ಕತ್ತಿನ್ ಪಾಡಿಯೆರೆ ಬೈದೆ.

³⁵ಎಂಚಂದ್ಂಡ ಮಗಕ್ಲಾ ಅಮ್ಮೆರೆಗ್ಲಾ, ಮಗಲೆಗ್ಲಾ ಅಪ್ಪೆಗ್ಲಾ, ಮರ್ಮಲೆಗ್ಲಾ ಮಾಮಿಗ್ಲಾ, ಭೇದ ಪುಟ್ಟಾಯೆರೆ ಬೈದೆ.

³⁶ಇಂಚ ಒರಿ ನರಮಾನಿಗ್ ಆಯ ಇಲ್ಲದಾಕುಲೆ ಪಗೆನಾಕುಲು ಆಪೆರ್.

³⁷“ಅಪ್ಪೆನಾವಡ್, ಅಮ್ಮೆರೆನಾವಡ್ ಎನಡ್ದ್ ಹೆಚ್ಚಾದ್ ಪ್ರೀತಿ ಮಲ್ಪುನಾಯೆ ಎಂಕ್ ಯೋಗ್ಯದಾಯೆ ಅತ್ತ್. ಮಗನಾವಡ್ ಮಗಲೆನಾವಡ್ ಎನಡ್ದ್ ಹೆಚ್ಚಾದ್ ಪ್ರೀತಿ ಮಲ್ಪುನಾಯೆ ಎಂಕ್ ಯೋಗ್ಯದಾಯೆ ಅತ್ತ್.

³⁸ಬೊಕ್ಕ ಏರಾಂಡಲಾ ತನ ಕ್ರುಸ್ಸುನು ಪತ್ತೊಂದು ಎನ ಬೆರಿಯೆ ಬರಂದಿನಾಯೆ ಆಯೆ ಎನ ಶಿಷ್ಯೆ ಆವೆರೆ ಯೋಗ್ಯದಾಯೆ ಅತ್ತ್.

³⁹ತನ ಪ್ರಾಣೊನು ಕಾತೊನುನಾಯೆ ಅವೆನ್ ಕಳೆವೊನ್ವೆ; ಆಂಡ ಎಂಕಾದ್ ತನ ಪ್ರಾಣೊನು ಕಳೆವೊಂಡಿನಾಯೆ ಅವೆನ್ ಕಾತೊನ್ವೆ.

⁴⁰“ನಿಕ್ಲೆನ್ ಸೇರಾವೊನುನಾಯೆ ಎನನ್ ಸೇರಾವೊನುನಾಯೆ ಆದುಲ್ಲೆ; ಎನನ್ ಸೇರಾವೊನುನಾಯೆ ಎನನ್ ಕಡಪುಡ್ದು ಕೊರಿನಾಯನೇ ಸೇರಾವೊನುನಾಯೆ ಆದುಲ್ಲೆ.

⁴¹ಪ್ರವಾದಿನ್ ಪ್ರವಾದಿ ಅಂದ್‌ದ್ ಸೇರಾವೊನುನಾಯೆ ಪ್ರವಾದಿಗ್ ಬರೊಡಾಯಿ ಪ್ರತಿಫಲೊನು ಪಡೆಪೆ; ನೀತಿವಂತೆರೆನ್ ನೀತಿವಂತೆ ಅಂದ್‌ದ್ ಸೇರಾವೊನುನಾಯೆ ನೀತಿವಂತಗ್ ಬರೊಡಾಯಿ ಪ್ರತಿಫಲೊನು ಪಡೆಪೆ.

⁴²ಆಂಡ ಈ ಎಲ್ಯಾಕುಲೆಡ್ ಒರಿಯಗ್ ಯೇಸುನ ಶಿಷ್ಯೆ ಪಂಡ್ದ್ ಏರಾಂಡಲಾ ಒಂಜಿ ಚೊಂಬು ಚೌಲಿ ನೀರಾಂಡಲಾ ಪರಿಯೆರೆ ಕೊರಿಯೆಡ ಬರೊಡಾಯಿ ಪ್ರತಿಫಲ ಆಯಗ್ ತಪ್ಪುನೇ ಇಜ್ಜಿ ಅಂದ್‌ದ್ ನಿಕ್ಲೆಗ್ ನಿಜಾದ್ ಪನ್ಪೆ,” ಅಂದ್‌ದ್ ಪಂಡೆ.