Read Tulu ಮತ್ತಾಯೆ 11 Bible Online

ಮತ್ತಾಯೆ 11 - Tulu bible

ಮತ್ತಾಯೆ 11

¹ಯೇಸು ತನ ಪದ್ರಾಡ್ ಮಂದೆ ಶಿಷ್ಯೆರೆಗ್ ಅಪ್ಪಣೆ ಕೊರ್ದು ಮುಗಿ ಬೊಕ್ಕ ಅಲ್ಪದ ಊರುಲೆಗ್ ಬೋಧನೆ ಮಲ್ಪೆರೆಲಾ ಸುವಾರ್ತೆನ್ ಸಾರಿಯೆರೆಲಾ ಅಲ್ತ್‌ಡ್ದ್ ಪಿದಾಡಿಯೆ.

²ಅಪಗ ಯೋಹಾನೆ ಸೆರೆಮನೆಟ್ ಕ್ರಿಸ್ತನ ಕ್ರಿಯೊಲೆ ಸುದ್ಧಿನ್ ಕೇಂಡ್ದ್ ಆಯ ಕೈತಲ್‌ ಶಿಷ್ಯೆರೆನ್ ಕಡಪುಡ್ದು,

³“ಬರ್ಪಿನಾಯೆ ಈಯೆನಾ, ಎಂಕುಲು ಬೊಕ್ಕೊರಿಯನ ಸಾದಿನ್ ತೂವೊಡಾ ಅಂದ್‌ದ್ ಕೇನ್ಪಾಯೆ.”

⁴ಐಕ್ ಯೇಸು ಅಕ್ಲೆಡ, “ನಿಕುಲು ತೂದು ಕೇಂಡಿನೆನ್ ಯೋಹಾನಗ್ ಪೋದು ಪನ್ಲೆ,

⁵ಕುರುಡೆರೆಗ್ ಕಣ್ಣ್ ತೋಜುಂಡು, ಚೊಂಟೆರೆಗ್ ಕಾರ್ ಬರ್ಪುಂಡು, ಕೊಷ್ಟದಾಕುಲು ಶುದ್ಧ ಆಪೆರ್, ಕೆಪ್ಪೆರೆಗ್ ಕೆಬಿ ಕೇನುಂಡು. ಸೈತಿನಾಕುಲು ಲಕ್ಕುವೆರ್, ಬಡವೆರೆಗ್ ಸುವಾರ್ತೆ ಸಾರುಂಡು.

⁶ಎನ ಸಂಗತಿಡ್ ಸಂಶಯ ಮಲ್ಪಂದಿನಾಯೆನೇ ಭಾಗ್ಯವಂತೆ,” ಅಂದ್‌ದ್ ಯೇಸು ಉತ್ತರ ಕೊರಿಯೆ.

⁷ಅಕುಲು ಪಿದಾಡ್ದ್ ಪೋಯಿ ಬೊಕ್ಕ ಯೇಸು ಜನೊಕುಲೆ ಗುಂಪುಲೆಗ್ ಯೋಹಾನನ ಸಂಗತಿನ್ ಪನಿಯೆರೆ ಸುರು ಮಲ್ತೆ, “ಎಂಚಿನೆನ್ ತೂವೊಡು ಅಂದ್‌ದ್ ಕಾಡ್‌ಗ್ ಪೋದಿತ್ತರ್? ಗಾಳಿಗ್ ಪಂದುನ ದಂಟ್‌ನಾ?

⁸ಇಜ್ಜಾಂಡ ಎಂಚಿನ ತೂವೊಡು ಅಂದ್‌ದ್ ಪೋದಿತ್ತರ್? ನಯತ್ತ ಕುಂಟುನು ಪಾಡ್ದಿನ ನರಮಾನಿನಾ? ನಯತ್ತ ಕುಂಟುನು ಪಾಡುನಾಕುಲು ಅರಸುನ ಇಲ್ಲ್‌ಲೆಡ್ ಉಪ್ಪುವೆರತ್ತಾ?

⁹ಅಪಗಾಂಡ ದಾಯೆಗ್ ಪೋದಿತ್ತರ್? ಪ್ರವಾದಿನ್ ತೂಯೆರೆಗಾ? ಅಂದ್, ಪ್ರವಾದಿಡ್ದ್‌ಲಾ ಹೆಚ್ಚ್‌ದಾಯನ್ ತೂಯರ್, ಅಂದ್‌ದ್ ನಿಕ್ಲೆಗ್ ಪನ್ಪೆ.

¹⁰‘ಇಂದಾ, ಎನ ದೂತನ್ ನಿನ ದುಂಬು ಕಡಪುಡ್ವೆ. ಈ ಪೋಪಿನ ಸಾದಿನ್ ಆಯೆ ಸರಿ ಮಲ್ಪುವೆ,’ ಅಂದ್‌ದ್ ಏರೆ ಸಂಗತಿಡ್‌ ಗ್ರಂಥೊಡು ಬರೆತ್ಂಡಾ ಆ ನರಮಾನಿ ಉಂಬೆನೇ.

¹¹ಪೊಂಜೊವುಲೆಡ್ದ್ ಪುಟ್ಟುದಿನಾಕುಲೆಡ್ ಸ್ನಾನಿಕೆ ಯೋಹಾನಡ್ದ್ ಮಲ್ಲಾಯೆ ಲಕ್ಕ್‌ದಿಜೆ. ಆಂಡಲಾ ಪರಲೋಕ ರಾಜ್ಯೊಡುಪ್ಪು ಎಲ್ಯಾಯೆ ಆಯಡ್ದ್‌ಲಾ ಮಲ್ಲಾಯೆ ಆದುಲ್ಲೆ ಅಂದ್‌ದ್ ನಿಕ್ಲೆಗ್ ನಿಜಾದ್ ಪನ್ಪೆ.

¹²ಉಂದತ್ತಂದೆ ಸ್ನಾನಿಕೆ ಯೋಹಾನನ ಕಾಲೊಡ್ದು ಇನಿ ಮುಟ್ಟಲಾ ಪರಲೋಕ ರಾಜ್ಯ ಬಲಾತ್ಕಾರೊಗು ಒಳಗಾತ್ಂಡ್; ಬಲಾತ್ಕಾರಿಲು ಪೊಗ್ಗುದು ಅವೆನ್ ಸ್ವಾದೀನ ಮಲ್ತೊನ್ವೆರ್.

¹³ಪ್ರವಾದಿಲು ಮಾತೆರ್ಲಾ, ನ್ಯಾಯಕಟ್ಟ್‌ಲಾ ಪ್ರವಾದನೆ ಮಲ್ಪುನವುಲಾ ಯೋಹಾನ ಮುಟ್ಟ ಇತ್ತ್ಂಡ್.

¹⁴ನಿಕ್ಲೆಗ್ ತೆರಿಯೊನಿಯರೆ ಮನಸಿತ್ತ್‌ಂಡ ಬರೊಡಾಯಿ ಎಲೀಯೆ ಇಂಬೆನೇ ಅಂದ್‌ದ್ ತೆರಿಯೊನ್ಲೆ.

¹⁵ಕೇನಿಯೆರೆ ಕೆಬಿ ಇತ್ತಿನಾಯೆ ಕೇನಡ್.

¹⁶“ಆಂಡ ಈ ಸಂತಾನೊನು ಏರೆಗ್ ಸಮ ಮಲ್ಪೊಲಿ? ಪೇಂಟೆಡ್ ಕುಲ್ಲೊಂದು ತನ್ಕುಲೆ ಸ್ನೇಹಿತೆರೆಗ್,

¹⁷‘ಎಂಕುಲು ನಿಕ್ಲೆಗಾದ್ ಕೊಳಲ್ ಉರ್ತ ನಿಕುಲು ನಲ್ತ್‌ಜರ್, ನಿಕ್ಲೆಗ್ ಮುರೆಡಿಯ, ನಿಕುಲು ತಿಗಲೆ ಬೊಟೊನುಜರ್,’ ಅಂದ್‌ದ್ ಅರಬಾಯಿ ದೀದ್ ಪನ್ಪಿನ ಆಣ್ ಜೋಕುಲೆಗ್ ಸಮ ಆದುಂಡು.

¹⁸ಎಂಚಂದ್ಂಡ, ಯೋಹಾನೆ ಬತ್ತೆ. ಆಯೆ ನುಪ್ಪು ನೀರ್ ದೆತ್ತೊನಂದಿನಾಯೆ ಆದಿತ್ತೆ. ಅಕುಲು ಆಯಗ್ ದೆವ್ವ ಪತ್ತ್‌ದ್ಂಡ್ ಪನ್ಪೆರ್.

¹⁹ನರಮಾನಿ ಮಗೆ ಬತ್ತೆ, ಆಯೆ ನುಪ್ಪು ನೀರ್‌ನ್ ದೆತ್ತೊನುನಾಯೆ ಆದುಲ್ಲೆ; ಅಕುಲು, ‘ಇಂದಾ, ಇಂಬೆ ಬಂಜೆಲೆ, ಪರ್ಪೆಲೆ, ಸುಂಕದಾಕುಲೆ ಬೊಕ್ಕ ಪಾಪಿಲೆ ದೋಸ್ತಿಯಾಡ್ಲು ಅಂದ್‌ದ್ ಪನ್ಪೆರ್.’ ಆಂಡ ಗೇನ ತನ ಕೆಲಸೊಲೆಡ್ದೇ ಗೇನ ಪಂಡ್ದ್ ಗೊತ್ತಾಪುಂಡು,” ಪಂಡೆ.

²⁰ಅಪಗ ಆಯೆ ತನ ಕಾರ್ನಿಕೊಲು ಹೆಚ್ಚಾದ್ ನಡತಿ ಊರುಲು ದೇವೆರೆ ಕಡೆಕ್ಕ್ ತಿರ್ಗುಜೆರ್ ಪಂಡ್ದ್ ಐಕುಲೆನ್‌ ದಡ್ಡಿಯೆರೆ ಸುರು ಮಲ್ತೆ.

²¹ಎಂಚ ಪಂಡ, “ಅಯ್ಯೋ, ಕೊರಜಿನೋ, ಅಯ್ಯೋ ಬೆತ್ಸಾಯಿದಾ, ನಿಕ್ಲೆನಲ್ಪ ನಡತಿ ಮಲ್ಲಕಾರ್ನಿಕೊಲು ತೂರ್ ಬೊಕ್ಕ ಸೀದೋನ್ ಪೇಂಟೆಲೆಡ್ ನಡತುದುಂಡ ಅಲ್ಪದಾಕುಲು ಅಪಗನೆ ಗೋಣಿ ಪೊದೆತೊಂದು ಬೊನ್ಯೊಡು ಕುಲ್ಲೊಂದು ಪಶ್ಚಾತಾಪ ಪಡೆದಿತ್ತ್‌ದ್ವೆರ್.

²²ನ್ಯಾಯತೀರ್ಪುದ ದಿನೊಟು ನಿಕಲ್ನ ಗತಿಡ್ದ್‌ಲಾ ತೂರ್ ಸೀದೋನ್‌ದ ಪಟ್ಟಣಲೆ ಗತಿ ಮೇಲಾದುಪ್ಪುಂಡು ಪಂಡ್ದ್ ನಿಕ್ಲೆಗ್ ಪನ್ಪೆ.

²³ಕಪೆರ್ನೌಮೋ, ನಿನನ್ ಪರಲೋಕೊಗು ಏರಾವೊನುವನಾ? ಪಾತಾಳೊಗು ಜಪ್ಪುವ. ನಿನ್ನಲ್ಪ ನಡೆತಿ ಮಲ್ಲಕಾರ್ಯೊಲು ಸೋದೋಮುಡು ನಡತ್‌ದುಂಡ ಅವು ಇನಿ ಮುಟ್ಟಲಾ ಒರಿದು.

²⁴ಆಂಡ ನ್ಯಾಯತೀರ್ಪುದ ದಿನೊಟು ನಿನ ಗತಿಡ್ದ್‌ಲಾ ಸೋದೋಮು ಸೀಮೆದ ಗತಿ ಮೇಲಾದುಪ್ಪುಂಡು ಪಂಡ್ದ್ ನಿಕ್ಲೆಗ್ ಪನ್ಪೆ.”

²⁵ಆ ಪೊರ್ತುಡು ಯೇಸು ಪಂಡಿನಿ ದಾನೆಂದ್ಂಡ, “ಅಮ್ಮೆರೇ, ಪರಲೋಕ ಭೂಲೋಕದ ಕರ್ತವಾ, ಈ ಗೇನದಾಕುಲೆಗ್ಲಾ ಬುದ್ಧಿವಂತೆರೆಗ್ಲಾ ಈ ಪಾತೆರೊಲೆನ್ ಮದೆ ಮಲ್ತ್‌ದ್ ಜೋಕುಲೆಗ್ ತೆರಿಪಾಯ ಅಂದ್‌ದ್ ನಿನನ್ ಪುಗರುವೆ.

²⁶ಅಂದ್ ಅಮ್ಮೆರೇ, ಇಂಚ ಮಲ್ಪುನವೇ ಎಡ್ಡೆಂದ್‌ದ್ ನಿನ ದೃಷ್ಟಿಗ್ ತೋಜಿನೆಡ್ದ್ ನಿನನ್ ಪುಗರುವೆ.

²⁷“ಎನ ಅಮ್ಮೆ ಮಾತೆನ್ ಎಂಕ್ ಒಚ್ಚಿದ್ ಕೊರ್ತೆ. ಅಮ್ಮೆ ಅತ್ತಂದೆ ಬೇತೆ ಏರ್ಲಾ ಮಗನ್ ತೆರಿಯಯೆ; ಬೊಕ್ಕ ಮಗೆ ಅತ್ತಂದೆ ಬೇತೆ ಏರ್ಲಾ ಅಮ್ಮೆರೆನ್ ತೆರಿಯಯೆ. ಬೊಕ್ಕ ಮಗೆ ಅಮ್ಮೆರೆನ್ ಏರೆಗ್ ತೋಜಾದ್ ಕೊರಿಯೆರೆ ಮನಸ್ ಮಲ್ತ್‌ದೆನಾ ಆಯೆಲಾ ಅಮ್ಮೆರೆನ್ ತೆರಿದಿನಾಯೆ ಆದುಲ್ಲೆ.”

²⁸“ಕಷ್ಟೊಡುಪ್ಪುನಾಕುಲೇ, ಪುದೆ ತುಂಬೊಂದಿನಾಕುಲೇ, ನಿಕುಲು ಮಾತೆರ್ಲಾ ಎನ ಕೈತಲ್‌ ಬಲ್ಲೆ; ಯಾನ್ ನಿಕ್ಲೆಗ್ ಸುಖ ಕೊರ್ಪೆ.

²⁹ಯಾನ್ ಸಜ್ಜನೆಲಾ, ತಗ್ಗ್‌ದಿ ಮನಸ್‌ದಾಯೆಲಾ ಆದುಪ್ಪುನೆಡ್ದ್ ಎನ ನುಗೊನು ನಿಕ್ಲೆ ಮಿತ್ತ್ ದೆತ್ತೊಂದು ಎನಡ್ದ್ ಕಲ್ತೊನ್ಲೆ, ಅಪಗ ನಿಕ್ಲೆ ಆತ್ಮೊಗು ಸುಖ ತಿಕ್ಕು.

³⁰ದಾಯೆಗಂದ್ಂಡ ಎನ ನುಗ ನಯ, ಎನ ಪುದೆ ಹಗುರ ಆದುಂಡು.”