Read Tulu ಮತ್ತಾಯೆ 12 Bible Online

ಮತ್ತಾಯೆ 12 - Tulu bible

ಮತ್ತಾಯೆ 12

¹ಆ ಸಮಯೊಡು ಯೇಸು ಸಬ್ಬತ್‌ದಿನೊಟು ಬುಲೆತ ಕಂಡೊಲೆನ್ ದಾಂಟ್‌ದ್ ಪೋವೊಂದುಪ್ಪುನಗ ಆಯನ ಶಿಷ್ಯೆರ್ ಬಡವುಡು ಕುರಲ್‌ನ್‌ ರುಂಬುದು ತಿನೊಂದಿತ್ತೆರ್.

²ಪರಿಸಾಯೆರ್ ಉಂದೆನ್ ತೂದು, “ತೂಲ, ನಿನ ಶಿಷ್ಯೆರ್ ಸಬ್ಬತ್‌ದಿನೊಟು ಮಲ್ಪಂದಿ ಬೇಲೆನ್ ಮಲ್ಪುವೆರ್?” ಅಂದ್‌ದ್ ಆಯಗ್ ಪಂಡೆರ್.

³ಆಯೆ ಅಕ್ಲೆಡ, “ದಾವೀದೆ ತಾನ್‌ಲಾ ತನಡೊಪ್ಪ ಇತ್ತಿನಾಕುಲುಲಾ ಬಡವು ಆಯಿನಪಗ ದಾದ ಮಲ್ತೆರ್ ಪನ್ಪಿನೆನ್ ನಿಕುಲು ಓದುದಿಜರಾ.

⁴ಆಯೆ ದೇವೆರೆ ಆಲಯದ ಉಲಯಿ ಪೋದು ಯಾಜಕೆರ್ ಮಾತ್ರ ಅತ್ತಂದೆ ತಾನಾವಡ್, ತನಡೊಪ್ಪ ಇತ್ತಿನಾಕುಲಾವಡ್ ತಿನಿಯೆರೆ ಬಲ್ಲಿ ಅಂದ್‌ದ್ ಇತ್ತಿನ ನೈವೇದ್ಯದ ರೊಟ್ಟಿನ್ ತಿಂದೆ ಅತ್ತಾ?

⁵ಉಂದತ್ತಂದೆ ಸಬ್ಬತ್‌ದಿನೊಟು ಯಾಜಕೆರ್ ದೇವಾಲಯೊಡು ಸಬ್ಬತ್‌ದ ನಿಯಮೊನು ಮಿರಿಯೆರ್ಡಲಾ, ಅಕುಲು ತಪ್ಪುಗಾರೆರ್ ಆಪುಜೆರ್, ಅಂದ್‌ದ್ ಮೋಶೆನ ನ್ಯಾಯಕಟ್ಟ್‌ಡ್ ಬರೆತಿನೆನ್ ಓದುದಿಜರಾ?

⁶ಯಾನ್ ನಿಕ್ಲೆಗ್ ಪನ್ಪೆ, ಆ ದೇವಾಲಯೊಡ್ದುಲಾ ಮಲ್ಲಾಯೆ ಮೂಲು ಉಲ್ಲೆ.

⁷ಎಂಕ್ ಬಲಿ ಬೊಡ್ಚಿ, ಕನಿಕರನೇ ಬೋಡು ಪನ್ಪಿನೆತ್ತ ಅರ್ಥೊನು ನಿಕುಲು ತೆರಿದಿತ್ತ್‌ಂಡ ನಿರಪರಾಧಿಲೆನ್ ಅಪರಾಧಿಲು ಅಂದ್‌ದ್ ತೀರ್ಪು ಮಲ್ತ್‌ದ್ವಯರ್.

⁸ನರಮಾನಿ ಮಗೆ ಸಬ್ಬತ್‌ದಿನತಲಾ ಕರ್ತವೆ ಆದುಲ್ಲೆ,” ಅಂದ್‌ದ್ ಪಂಡೆ.

⁹ಆಯೆ ಅಲ್ತ್‌ಡ್ದ್ ಪಿದಾಡ್ದ್ ಸಭಾಮಂದಿರೊಗು ಪೋಯಿನಪಗ ಅವುಲು ಕೈ ನುಂಗುಪೋತಿನಾಯೆ ಒರಿ ಇತ್ತೆ.

¹⁰ಅಪಗ ಅಕುಲು ಆಯನ ಮಿತ್ತ್ ತಪ್ಪು ನಾಡೊಡು ಅಂದ್‌ದ್ ಯೇಸುಡ, “ಸಬ್ಬತ್‌ದಿನೊಟು ಗುಣ ಮಲ್ಪುನವು ಸರಿಯಾ?” ಅಂದ್‌ದ್ ಕೇಂಡೆರ್.

¹¹ಐಕ್ ಆಯೆ, “ನಿಕ್ಲೆಡ್ ಏರೆಗಾಂಡಲಾ ಒಂಜೇ ಒಂಜಿ ಕುರಿ ಇತ್ತ್‌ದ್ ಅವು ಸಬ್ಬತ್‌ದಿನೊಟು ಕಣಿತ್ತುಲಯಿ ಬೂರುಂಡ ಆಯೆ ಅವೆನ್ ಪತ್ತ್‌ದ್ ಮಿತ್ತ್ ದೆಪ್ಪಂದೆ ಉಪ್ಪೆನಾ?

¹²ಆ ಕುರಿಡ್ದ್ ನರಮಾನಿ ಏತೋ ಬಿಲೆತ್ತಾಯೆ. ಅಂಚಾಯಿನೆಡ್ದ್ ಸಬ್ಬತ್‌ದಿನೊಟು ಎಡ್ಡೆ ಬೇಲೆ ಮಲ್ಪುನವು ಸರಿಯಾಯಿನವೆ,” ಪಂಡ್ದ್ ಉತ್ತರ ಕೊರಿಯೆ.

¹³ಬೊಕ್ಕ ಯೇಸು ಆ ನರಮಾನಿಗ್, “ನಿನ ಕೈ ನೀಡ್ಲ!” ಅಂದ್‌ದ್ ಪಂಡೆ. ಆಯೆ ನೀಡಿಯೆ; ಅವು ಪೂರ್ತಿ ಗುಣ ಆದ್ ಬೊಕ್ಕೊಂಜೆತ್ತ ಲೆಕ್ಕ ಆಂಡ್.

¹⁴ಆಂಡ ಪರಿಸಾಯೆರ್ ಪಿದಯಿ ಪೋದು ಇಂಬ್ಯನ್ ವಾ ಉಪಾಯೊಡು ಕೆರ್ಪಿನಿ ಪಂಡ್ದ್ ಆಯಗ್ ವಿರೋಧಾದ್ ಆಲೋಚನೆ ಮಲ್ತೊಂಡೆರ್.

¹⁵ಯೇಸು ಅವೆನ್ ತೆರಿದ್ ಅಲ್ತ್‌ಡ್ದ್ ಪಿದಾಡ್ದ್ ಪೋಯೆ. ಮಸ್ತ್ ಜನ ಆಯನ ಬೆರಿಯೆ ಪೋಯೆರ್. ಆಯೆ ಅಕ್ಲೆನ್ ಮಾತೆರೆನ್ ಗುಣ ಮಲ್ತ್‌ದ್

¹⁶ತಾನ್ ಇಂಚಿತ್ತಿನಾಯೆ ಅಂದ್‌ದ್ ಏರೆಗ್ಲಾ ತೆರಿಪಾಯೆರೆ ಬಲ್ಲಿ ಅಂದ್‌ದ್ ಅಕ್ಲೆಗ್ ಕಂಡಿತಾದ್ ಪಂಡೆ.

¹⁷ಇಂಚ ಯೆಶಾಯೆ ಇನ್ಪಿ ಪ್ರವಾದಿಡ್ದ್ ಪನ್ಪಾಯಿ ಪಾತೆರ ನಡತ್ಂಡ್; ಅವು ದಾನೆಂದ್ಂಡ,

¹⁸“ಇಂದಾ, ಎನ ಸೇವಕೆ; ಇಂಬ್ಯನ್ ಯಾನ್ ಅಜತೊಂದೆ. ಇಂಬೆ ಎಂಕ್ ಇಷ್ಟೆ, ಇಂಬ್ಯನ್ ಯಾನ್ ಮೆಚ್ಚಿದೆ. ಇಂಬ್ಯಡ್ ಎನ ಆತ್ಮೊನು ದೀಪೆ ಇಂಬೆ ಪಿದಯಿದ ಜನೊಕುಲೆಗ್ ನ್ಯಾಯೊನು ಸಾರಿಯುವೆ.

¹⁹ಇಂಬೆ ಲಡಯಿ ಮಲ್ಪುಜೆ, ಬೊಬ್ಬೆ ದೀಪುಜೆ, ಸಾದಿಲೆಡ್ ಇಂಬೆನ ಸ್ವರ ಏರೆಗ್ಲಾ ಕೇನಂದ್.

²⁰ಗುದ್ದುದಿ ದಂಟ್‌ನ್ ಪೊಲ್ತು ಪಾಡಂದೆಲಾ, ತೆಕ್ಕ್‌ದ್ ಪೋಪಿನ ತುಡರ್‌ನ್ ತೆಕ್ಕಾವಂದೆಲಾ ಉಪ್ಪುವೆ. ನ್ಯಾಯೊನು ಜಯೊಕು ನಡಪುಡುವೆ.

²¹ಪಿದಯಿದ ಜನೊಕುಲು ಇಂಬೆನ ಪುದರ್‌ನ್ ಕೇಂಡ್ದ್ ಕಾತೊಂದುಪ್ಪುವೆರ್.”

²²ದೆವ್ವ ಪತ್ತ್‌ದಿ ಕುರುಡೆಲಾ ಪೊಟ್ಟೆಲಾ ಆದಿತ್ತಿ ಒರಿಯನ್ ಯೇಸು ಕೈತಲ್‌ ಕನತೆರ್, ಯೇಸು ಆಯನ್ ಗುಣ ಮಲ್ತಿನಪಗ ಆ ಪೊಟ್ಟಗ್ ಬಾಯಿಲಾ, ಕಣ್ಣ್‌ಲಾ ರಡ್ಡ್‌ಲಾ ಬತ್ತ್ಂಡ್.

²³ಐಕ್ ಜನೊಕುಲು ಮಾತ ಅಚ್ಚಿರ ಆದ್, “ಇಂಬೆ ದಾವೀದನ ಮಗೆ ಆದುಪ್ಪೆನಾ,” ಅಂದ್‌ದ್ ಪಾತೆರೊಂದಿತ್ತೆರ್.

²⁴ಆಂಡ ಪರಿಸಾಯೆರ್ ಉಂದೆನ್ ಕೇಂಡ್ದ್, “ಇಂಬೆ ದೆವ್ವೊಲೆ ಮುಖ್ಯಸ್ಥೆ ಆಯಿ ಬೆಲ್ಜೆಬೂಲಡ್ದ್ ದೆವ್ವೊಲೆನ್ ಬುಡುಪಾವೆ ಅತ್ತಂದೆ ಬೇತೆ ರೀತಿಡ್ದ್ ಬುಡ್ಪಾವುಜೆ,” ಪಂಡೆರ್.

²⁵ಆಯೆ ಅಕ್ಲೆನ ಆಲೋಚನೆಲೆನ್ ತೆರಿದ್ ಅಕ್ಲೆಗ್ ಪಂಡಿನಿ ದಾನೆಂದ್ಂಡ, “ವಾ ರಾಜ್ಯ ಆಂಡಲಾ ತನಡ್ ಭೇದ ಪುಟ್ಟಾಂಡ ನಾಶ ಆಪುಂಡು, ತನಡ್ ಭೇದ ಪುಟ್ಟಿನ ವಾ ಪಟ್ಟಣ ಆವಡ್ ಇಲ್ಲಾವಡ್ ಒರಿಯಂದ್.

²⁶ಅಂಚೆನೇ ಸೈತಾನೆ ಸೈತಾನನ್ ಪಿದಾಡ್ಪಾಯೆಡಾ ತನಡನೇ ಭೇದ ಪುಟ್ಟಾಯಿಲೆಕ್ಕ ಆಂಡ್. ಅಂಚಾಂಡ ಆಯನ ರಾಜ್ಯ ಎಂಚ ಒರಿಯು?

²⁷ಯಾನ್ ಬೆಲ್ಜೆಬೂಲನ ಬಲೊಡ್ದು ದೆವ್ವೊಲೆನ್ ಬುಡ್ಪಾವುನಾಂಡ ನಿಕ್ಲೆನಾಕುಲು ಏರೆನ ಬಲೊಟು ಬುಡ್ಪಾವೆರ್? ಅಂಚಾಯಿನೆಡ್ದ್ ಅಕುಲೇ ನಿಕ್ಲೆಗ್ ನ್ಯಾಯತೀರ್ಪು ಮಲ್ಪುನಾಕುಲು ಆಪೆರ್.

²⁸ಯಾನ್ ದೇವೆರೆ ಆತ್ಮನ ಬಲೊಡ್ದೇ ದೆವ್ವೊಲೆನ್ ಬುಡ್ಪಾವುನಾಂಡ ದೇವೆರೆ ರಾಜ್ಯ ನಿಕ್ಲೆ ಕೈತಲೇ ಬತ್ತ್‌ಂಡತ್ತಾ.

²⁹“ಉಂದತ್ತಂದೆ ಒರಿ ಸುರುಟ್ಟು ಬಲವಂತನ್ ಕಟ್ಟ್‌ದ್ ಪಾಡಂದೆ ಆ ಬಲವಂತನ ಇಲ್ಲನ್ ಪೊಗ್ಗುದು ಸೊತ್ತುಲೆನ್ ಲೂಟಿ ಎಂಚ ಮಲ್ಪೊಲಿ? ಕಟ್ಟಿ ಬೊಕ್ಕನೇ ಆಯನ ಇಲ್ಲನ್ ಲೂಟಿ ಮಲ್ಪೊಲಿ.

³⁰“ಎನ ಪಕ್ಷ ಪತ್ತಂದಿನಾಯೆ ಎಂಕ್ ವಿರೋಧಿ. ಎನ ಜತೆಟ್ ಸೇರಂದಿನಾಯೆ ಚಲ್ಲಾಪಿಲ್ಲಿ ಮಲ್ಪುನಾಯೆ ಆದುಲ್ಲೆ.”

³¹ಅಂಚಾಯಿನೆಡ್ದ್ ನಿಕ್ಲೆಗ್ ಪನ್ಪೆ, ನರಮಾನಿ ಮಲ್ಪುನ ಪ್ರತಿ ಒಂಜಿ ಪಾಪೊಗ್ಲಾ ದೂಷಣೆಗ್ಲಾ ಮಾಪು ಉಂಡು; ಆಂಡ ಪವಿತ್ರಾತ್ಮ ದೂಷಣೆಗ್ ಮಾಪು ಇಜ್ಜಿ.

³²ಏರಾಂಡಲಾ ನರಮಾನಿ ಮಗಕ್ಕ್ ವಿರೋಧಾದ್ ಪಾತೆರಿಯೆಡ ಅವು ಆಯಗ್ ಮಾಪು ಮಲ್ಪುಂಡು; ಪರಿಶುದ್ಧಾತ್ಮೊಗು ವಿರೋಧಾದ್ ಪಾತೆರಿಯೆಡ ಆಯಗ್ ಈ ಲೋಕೊಡಾವಡ್, ಬರ್ಪಿ ಪರಲೋಕೊಡಾವಡ್ ಮಾಪು ಆವಂದ್.

³³“ಎಡ್ಡೆ ಮರತ ಫಲ ಎಡ್ಡೆ ಉಪ್ಪುಂಡು; ಹಾಳ್ ಮರತ ಫಲ ಹಾಳೇ ಆದುಪ್ಪುಂಡು, ಫಲೊಡ್ದು ಮರತ ಗುಣ ಗೊತ್ತಾಪುಂಡು.

³⁴ಸರ್ಪ ಜಾತಿದಾಕುಲೇ, ನಿಕುಲು ಪಡಿಕೆಂತಿನಾಕುಲು ಆಯಿನೆಡ್ದ್ ಎಡ್ಡೆ ಪಾತೆರೊಲೆನ್ ಪಾತೆರಿಯೆರೆ ನಿಕ್ಲೆಡ್ದ್ ಎಂಚ ಆವು? ಉಡಲ್‌ಡ್ ದಿಂಜಿದಿತ್ತಿನವೇ ಬಾಯಿಡ್ದ್ ಪಿದಾಡುಂಡು.

³⁵ಎಡ್ಡೆಂತಿನಾಯೆ ತನ ಎಡ್ಡೆಂತಿ ಕಜನೆದುಲಯಿಡ್ದ್ ಎಡ್ಡೆ ವಸ್ತುಲೆನ್ ದೆಪ್ಪುವೆ; ಪಡಿಕೆಂತಿನಾಯೆ ಪಡಿಕೆಂತಿ ಕಜನೆದುಲಯಿಡ್ದ್ ಹಾಳ್ ವಸ್ತುಲೆನ್ ದೆಪ್ಪುವೆ.

³⁶“ಉಂದತ್ತಂದೆ ಯಾನ್ ನಿಕ್ಲೆಗ್ ಪನ್ಪಿನಿ ದಾನೆಂದ್ಂಡ, ನರಮಾನಿ ಪೊಕ್ಕಡೆ ಪಾತೆರುನ ಪ್ರತಿ ಒಂಜಿ ಪಾತೆರದ ಸಂಗತಿಡ್ ನ್ಯಾಯತೀರ್ಪುದ ದಿನೊಟು ಲೆಖ್ಖ ಕೊರೊಡು.

³⁷ನಿನ ಪಾತೆರೊಲೆಡ್ದೇ ನೀತಿವಂತೆ ಅಂದ್‌ದ್ ನಿಕ್ಕ್ ತೀರ್ಪು ಆವು. ನಿನ ಪಾತೆರೊಲೆಡ್ದೇ ಈ ಅಪರಾಧಿ ಪಂಡ್ದ್‌ಲಾ ನಿಕ್ಕ್ ತೀರ್ಪು ಆವು.”

³⁸ಅಪಗ ಶಾಸ್ತ್ರಿಲೆಡ್ಲಾ ಪರಿಸಾಯೆರೆಡ್ಲಾ ಕೆಲೆವೆರ್, “ಬೋಧಕಾ, ನಿನಡ್ದ್ ಆಪಿನ ಒಂಜಿ ಮಹತ್ಕಾರ್ಯೊನು ತೂವೊಡು,” ಅಂದ್‌ದ್ ಯೇಸುಡ ಕೇನ್ನಗ

³⁹ಆಯೆ ಅಕ್ಲೆಗ್ ಉತ್ತರ ಕೊರ್ದು ಪಂಡಿನಿ ದಾನೆಂದ್ಂಡ, “ಹಾದ್ರದಂಚಿತ್ತಿ ಹಾಳ್ ಸಂತಾನ ಮಹತ್ಕಾರ್ಯೊನು ತೂವೊಡು ಅಂದ್‌ದ್ ಬಯಕುಂಡು. ಆಂಡ ಯೋನೆ ಪನ್ಪಿ ಪ್ರವಾದಿಡ್ ಆಯಿನ ಗುರ್ತನೇ ಅತ್ತಂದೆ ಬೇತೆ ಒವುಲಾ ಗುರ್ತ ನೆಕ್ಕ್ ತಿಕ್ಕಂದ್,”

⁴⁰ಪಂಡ ಯೋನೆ ಎಂಚ ಮೂಜಿ ದಿನ ರಾತ್ರೆ ಪಗೆಲ್ ಮಲ್ಲ ಮೀನ್‌ದ ಬಂಜಿದುಲಯಿ ಇತ್ತೆನಾ ಅಂಚೆನೇ ನರಮಾನಿ ಮಗೆಲಾ ಮೂಜಿ ದಿನ ರಾತ್ರೆ ಪಗೆಲ್ ಭೂಗರ್ಭದುಲಯಿ ಉಪ್ಪುವೆ.

⁴¹ನ್ಯಾಯತೀರ್ಪುಡು ನಿನವೆ ಪಟ್ಟಣದಾಕುಲು ಈ ಸಂತಾನಡೊಪ್ಪ ಉಂತುದು ಮೊಕ್ಲೆನ್ ಅಪರಾಧಿಲು ಅಂದ್‌ದ್ ಪನುವೆರ್; ಅಕುಲು ಯೋನೆ ಸಾರಿನ ಪಾತೆರೊಲೆನ್ ಕೇಂಡ್ದ್ ಪಶ್ಚಾತಾಪ ಪಡೆಯೆರ್; ಆಂಡ ಮುಲ್ಪ ಯೋನಡ್ದ್‌ಲಾ ಮಲ್ಲಾಯೆ ಉಲ್ಲೆ.

⁴²ತೆನ್‌ಕಯಿ ದೇಶದ ರಾಣಿ ನ್ಯಾಯತೀರ್ಪುನಪಗ ಈ ಸಂತಾನದೊಟ್ಟುಗು ಉಂತುದು ಮೊಕ್ಲೆನ್ ಅಪರಾಧಿಲು ಅಂದ್‌ದ್ ಪನ್ಪಲ್; ಆಲ್ ಸೊಲೊಮೋನನ ಗೇನೊನು ತೆರಿಯೊನ್ರೆ ಭೂಮಿದ ಕಟ್ಟಕಡೆಡ್ದ್ ಬತ್ತಲ್; ಆಂಡ ಮುಲ್ಪ ಸೊಲೊಮೋನಡ್ದ್‌ಲಾ ಮಲ್ಲಾಯೆ ಉಲ್ಲೆ.

⁴³“ದೆವ್ವ ನರಮಾನಿನ್ ಬುಡ್ದು ಪೋಯಿ ಬೊಕ್ಕ ನಿಲೆ ನಾಡೊಂದು ನೀರ್ ಇಜ್ಜಾಂದಿ ಜಾಗ್‌ಡ್ ತಿರ್ಗುವ.

⁴⁴ನಿಲೆ ತಿಕ್ಕಂದಿನೆಡ್ದ್ ಅವು ‘ಯಾನ್ ಬುಡ್ದು ಬೈದಿನ ಎನ ಇಲ್ಲಗ್ ಪಿರ ಪೋಪೆ ಅಂದ್‌ದ್ ಪನೊಂದು ಬರ್ಪ.’ ಆ ಇಲ್ಲ್ ಒಕ್ಕೆಲ್‌ದಾಂತಿನವುಲಾ ಅಡ್ತ್‌ದ್ ಸಿಂಗಾರ ಮಲ್ತಿನೆನ್ ತೂದು ಕುಡ ಪೋದು,

⁴⁵ತನಡ್ದ್ ಪಡಿಕೆಂತಿನ ಬೇತೆ ಏಳ್ ದೆವ್ವೊಲೆನ್ ತನೊಡೊಪ್ಪ ಲೆತ್ತೊಂದು ಬರ್ಪುಂಡು. ಐಕುಲು ಉಲಯಿ ಪೊಗ್ಗುದು ಅಲ್ಪ ವಾಸ ಮಲ್ಪುವ. ಅಪಗ ಆ ನರಮಾನಿನ ಕಡೆತ ಸ್ಥಿತಿ ದುಂಬುಡ್ದು ಕಡೆ ಆದುಪ್ಪುಂಡು, ಐತ ಲೆಕ್ಕನೇ ಈ ಹಾಳ್ ಸಂತಾನೊಗು ಆಪುಂಡು,” ಪಂಡೆ.

⁴⁶ಆಯೆ ಜನೊಕುಲೆ ಗುಂಪುದೊಟ್ಟಿಗೆ ನನಲಾ ಪಾತೆರೊಂದುಪ್ಪುನಗ ಆಯನ ಅಪ್ಪೆಲಾ ಮೆಗ್ಯಾಡ್ಲುಲಾ ಆಯನ್ ಪಾತೆರ್ಪಾವೊಡು ಅಂದ್‌ದ್ ಪಿದಯಿ ಉಂತುದಿತ್ತೆರ್.

⁴⁷ಅಪಗ ಒರಿ, “ಇಂದಾ, ನಿನ ಅಪ್ಪೆಲಾ, ನಿನ ಮೆಗ್ಯಾಡ್ಲುಲಾ ನಿನಡ ಪಾತೆರೊಡುಂದು ಪಿದಯಿ ಉಂತುದೆರ್,” ಪಂಡೆ.

⁴⁸ಐಕ್ ಆಯೆ ಆ ಪಾತೆರ ಪಂಡಿನಾಯಡ, “ಎನ ಅಪ್ಪೆ ಏರ್? ಎನ ಮೆಗ್ಯೆ ಏರ್?” ಪಂಡ್ದ್

⁴⁹ಬೊಕ್ಕ ತನ ಶಿಷ್ಯೆರೆನಂಚಿ ಕೈ ತೋಜಾದ್, “ಇಂದಾ, ಮೊಕುಲೇ ಎನ ಅಪ್ಪೆಲಾ ಎನ ಮೆಗ್ಯಾಡ್ಲುಲಾ.

⁵⁰ಪರಲೋಕೊಡುಪ್ಪು ಎನ ಅಮ್ಮೆರೆ ಚಿತ್ತದ ಲೆಕ್ಕ ನಡಪುನಾಯೆನೇ ಎನ ಮೆಗ್ಯೆಲಾ ಮೆಗ್ದಿಲಾ ಅಪ್ಪೆಲಾ ಆದುಲ್ಲೆರ್.”