Read Tulu ಮತ್ತಾಯೆ 13 Bible Online

ಮತ್ತಾಯೆ 13 - Tulu bible

ಮತ್ತಾಯೆ 13

¹ಆ ದಿನೊಟು ಯೇಸು ಇಲ್ಲಡ್ದ್ ಪಿದಾಡ್ದ್ ಕಡಲ್ದ ಕರೆಟ್ ಕುಲ್ಲೊಂಡೆ.

²ಒಂಜಿ ಮಲ್ಲ ಜನೊಕುಲೆ ಗುಂಪು ಆಯನ ಕೈತಲ್‌ ಸೇರ್ದ್ ಬತ್ತಿನೆಡ್ದ್ ಆಯೆ ಓಡ ಮಿತ್ತಾರ್ದ್ ಕುಲ್ಲಿಯೆ. ಆ ಜನೊಕುಲು ಕರೆಟ್ ಉಂತುದಿತ್ತೆರ್.

³ಅಪಗ ಆಯೆ ಅಕ್ಲೆಗ್ ಉಪಕತೆತ್ತ ರೂಪೊಡು ಮಸ್ತ್ ಸಂಗತಿಲೆನ್ ಪಂಡೆ. “ಕೇನ್ಲೆ, ಬಿತ್ತುನಾಯೆ ಬಿತ್ತಿಯೆರೆ ಪಿದಾಡಿಯೆ.

⁴ಆಯೆ ಬಿತ್ತ್‌ನಗ ಕೆಲವು ಬಿತ್ತುಲು ಸಾದಿದ ಬರಿಟ್ಟ್ ಬೂರ್‌ಂಡ್. ಪಕ್ಕಿಲು ಬತ್ತ್‌ದ್ ತಿಂದ್‌ದ್ ಬುಡಿಯ.

⁵ಕೆಲವು ಬಿತ್ತ್ ಮಣ್ಣ್‌ದಾಂತಿ ಪಾದೆದ ನೆಲೊಟ್ಟು ಬೂರ್‌ಂಡ್. ಮಣ್ಣ್ ತೆಲ್ಪು ಇತ್ತಿನೆಡ್ದ್ ಬೇಗ ಮುಂಗೆ ಬತ್ತ್ಂಡ್.

⁶ಆಂಡ ಸೂರ್ಯನ ದೊಂಬು ಅರ್ಲುನಗ ಬೇರ್ ದಿಂಜ ಅಡಿಕ್ ಪೋವಂದಿನೆಡ್ದ್ ಬಾಡ್ದ್ ನುಂಗುದು ಪೋಂಡು.

⁷ಬೊಕ್ಕ ಕೆಲವು ಬಿತ್ತ್ ಮುಳ್ಳುದ ಪುದೆಲ್‌ಡ್ ಬೂರ್‌ಂಡ್; ಮುಳ್ಳುಗಿಡೊಕ್ಲು ಬುಲೆದ್ ಅವೆನ್ ದೆಂಗಾಂಡ್.

⁸ನನ ಕೆಲವು ಬಿತ್ತ್ ಎಡ್ಡೆ ನೆಲತ ಮಿತ್ತ್ ಬೂರ್ದು ಕೆಲವು ನೂದೆದಾತ್, ಕೆಲವು ಅಜ್ಪದಾತ್, ಕೆಲವು ಮುಪ್ಪದಾತ್ ಫಲ ಕೊರಿಯ.”

⁹“ಕೇನಿಯೆರೆ ಕೆಬಿ ಇತ್ತಿನಾಯೆ ಕೇನಡ್,” ಪಂಡೆ.

¹⁰ಐಡ್ದ್ ಬೊಕ್ಕ ಶಿಷ್ಯೆರ್ ಬತ್ತ್‌ದ್ ಆಯಡ, ದಾಯೆಗ್ ಉಪಕತೆತ್ತ ರೂಪೊಡು ಅಕ್ಲೆಡ ಪಾತೆರುವ ಅಂದ್‌ದ್ ಕೇಂಡೆರ್.

¹¹ಐಕ್ ಆಯೆ ಅಕ್ಲೆಡ, “ಪರಲೋಕ ರಾಜ್ಯದ ಗುಟ್ಟುಲೆನ್ ತೆರಿಯೊನ್ನ ವರ ನಿಕ್ಲೆಗ್ ಕೊರ್ತುಂಡು; ಅಕ್ಲೆಗ್ ಕೊರ್ತ್‌ಜಿ.

¹²ದಾಯೆ ಪಂಡ ಇತ್ತಿನಾಯಗ್ ದೇವೆರ್ ಹೆಚ್ಚಾದ್ ಕೊರುವೆ, ಆಯಗ್ ನನಲಾ ಹೆಚ್ಚಾಪುಂಡು; ಇಜ್ಜಾಂದಿನಾಯಡ ಇತ್ತಿನವುಲಾ ದೆತ್ತ್‌ದ್ ಬುಡ್ಪುಂಡು.

¹³ಯಾನ್ ಅಕ್ಲೆಡ ಉಪಕತೆತ್ತ ರೂಪೊಡು ಪಾತೆರಿಯೆರೆ ಕಾರಣ ದಾನೆಂದ್ಂಡ ಅಕ್ಲೆಗ್ ಕಣ್ಣ್ ಇತ್ತ್ಂಡಲಾ ತೂಪುಜೆರ್, ಕೆಬಿ ಇತ್ತ್ಂಡಲಾ ಕೇನುಜೆರ್ ಬೊಕ್ಕ ತೆರಿಯೊನುಜೆರ್.

¹⁴ಯೆಶಾಯೆ ಪಂಡಿನ ಪ್ರವಾದನೆ ಅಕ್ಲೆಡ್ದ್ ಪೂರ್ತಿ ಆಂಡ್; ಅವು ದಾನೆಂದ್ಂಡ, ನಿಕುಲು ಕೆಬಿ ಇತ್ತ್‌ದ್ ಕೇಂಡಲಾ ತೆರಿಯೊನುಜರ್, ಕಣ್ಣ್ ಇತ್ತ್‌ದ್ ತೂಯರ್ಡಲಾ ತೋಜುನೇ ಇಜ್ಜಿ.

¹⁵ದಾಯೆಗಂದ್ಂಡ ಈ ಜನೊಕುಲೆ ಉಡಲ್ ಕಲ್ಲಾತ್ತ್‌ಂಡ್, ಮೊಕ್ಲೆ ಕೆಬಿ ಮಂದ ಆತ್ಂಡ್, ಮೊಕುಲು ಕಣ್ಣ್ ಮುಚ್ಚೊಂದೆರ್. ತನ್ಕುಲು ಕಣ್ಣ್‌ಡ್ ತೂದು, ಕೆಬಿಟ್ ಕೇಂಡ್ದ್ ಉಡಲ್‌ಡ್ ತೆರಿದ್, ಅಕುಲು ಎನ ಕಡೆಕ್ಕ್ ತಿರ್ಗಂದೆ ಯಾನ್ ಅಕ್ಲೆನ್ ಗುಣ ಮಲ್ಪಂದೆ ಉಪ್ಪುಲೆಕ್ಕ ಮಲ್ತೊಂದೆರ್ ಪನ್ಪಿನವೇ.

¹⁶“ಆಂಡ ನಿಕ್ಲೆ ಕಣ್ಣ್ ತೋಜುಂಡು, ನಿಕ್ಲೆ ಕೆಬಿ ಕೇನುಂಡು; ಅಂಚಾಯಿನೆಡ್ದ್ ನಿಕುಲು ಭಾಗ್ಯವಂತೆರ್.

¹⁷ನಿಕ್ಲೆಗ್ ನಿಜಾದ್ ಪನ್ಪೆ. ನಿಕುಲು ತೂವೊಂದುಪ್ಪುನ ಕಾರ್ಯೊಲೆನ್ ಮಸ್ತ್ ಮಂದಿ ಪ್ರವಾದಿಲುಲಾ, ನೀತಿವಂತೆರ್‌ಲಾ ತೂವೊಡಂದ್ ಆಸೆ ಮಲ್ತ್ಂಡಲಾ ತೂಯಿಜೆರ್; ನಿಕುಲು ಕೇನೊಂದುಪ್ಪುನ ಸಂಗತಿನ್ ಅಕುಲು ಕೇನೊಡುಂದು ಆಸೆ ಮಲ್ತೆರ್ಡಲಾ ಕೇನಿಯೆರೆ ತಿಕ್ಕ್‌ದಿಜಿ.

¹⁸“ಬಿತ್ತುನಾಯನ ಉಪಕತೆತ್ತ ಅರ್ಥೊನು ಕೇನ್ಲೆ

¹⁹ಏರಾಂಡಲಾ ಪರಲೋಕ ರಾಜ್ಯದ ಪಾತೆರೊನು ಕೇಂಡ್ದ್ ತೆರಿಯೊನಂದೆ ಇತ್ತಿನಪಗ ಸೈತಾನೆ ಬತ್ತ್‌ದ್ ಆ ನರಮಾನಿನ ಉಡಲ್‌ಡ್ ಬಿತ್ತ್‌ದಿನೆನ್ ದೆತ್ತ್ ಪಾಡುವೆ; ಆ ನರಮಾನಿಯೇ ಸಾದಿದ ಬರಿಟ್ಟ್ ಬೂರ್ದಿತ್ತಿ ಬಿತ್ತ್ ಆದುಪ್ಪುವೆ.

²⁰ಪಾದೆ ನೆಲತ್ತ ಮಿತ್ತ್ ಬೂರ್ದಿನ ಬಿತ್ತ್ ಪನ್ನಗ, ಒರಿ ಪಾತೆರೊನು ಕೇಂಡ್ದ್ ಅಪಗನೇ ಅವೆನ್ ಸಂತೋಷೊಡು ಸ್ವೀಕಾರ ಮಲ್ಪುವೆ;

²¹ತನ್ಕ್ ಬೇರ್ ದಿಂಜ ಅಡಿಕ್ ಪೋವಂದಿನೆಡ್ದ್ ಇಂಬೆ ಒಂತೆ ಕಾಲ ಮಾತ್ರ ಇತ್ತ್‌ದ್ ಆ ಪಾತೆರೊಡ್ದು ಆಯಗ್ ಕಷ್ಟ ಆವಡ್ ಭಂಗ ಆವಡ್ ಬತ್ತ್ಂಡ ಬೇಗ ದಂಟ್‌ದ್ ಬೂರುವೆ. ಇಂಬೆನೇ ಪಾದೆ ನೆಲಟ್ಟ್ ಬೂರ್ದಿತ್ತಿ ಬಿತ್ತ್ ಆದುಪ್ಪುವೆ.

²²ಒರಿ ಪಾತೆರೊನು ಕೇಂಡಲಾ ಲೋಕದ ಚಿಂತೆ ಐಶ್ವರ್ಯೊಡ್ದು ಆಪಿನ ಮೋಸಲಾ ಈ ಪಾತೆರೊನು ದೆಂಗಾದ್ ಬುಡ್ಪಿನೆಡ್ದ್ ಫಲ ಕೊರಂದೆ ಉಪ್ಪುವೆ; ಇಂಬೆನೇ ಮುಳ್ಳುಗಿಡೊಕ್ಲೆಡ್ ಬಿತ್ತ್ ಬೂರಿ ನೆಲ ಆದುಪ್ಪುವೆ.

²³ಒರಿ ಪಾತೆರೊನು ಕೇಂಡ್ದ್ ತೆರಿಯೊಂದು ಫಲವಂತೆ ಆದ್ ನೂದೆದಾತ್ ಆವಡ್, ಅಜ್ಪದಾತ್ ಆವಡ್, ಮುಪ್ಪದಾತ್ ಆವಡ್ ಫಲ ಕೊರ್ಪೆ; ಇಂಬೆನೇ ಎಡ್ಡೆ ನೆಲ ಆದುಲ್ಲೆ,” ಅಂದ್‌ದ್ ಪಂಡೆ.

²⁴ಆಯೆ ಕುಡೊಂಜಿ ಉಪಕತೆನ್ ಅಕ್ಲೆಗ್ ಪಂಡೆ, “ಪರಲೋಕ ರಾಜ್ಯ ಪಂಡ, ತನ ಕಂಡೊಡು ಎಡ್ಡೆ ಬಿತ್ತ್‌ನ್ ಬಿತ್ತ್‌ದಿನ ಒರಿ ನರಮಾನಿಗ್ ಸಮ ಆದುಂಡು.

²⁵ಆಂಡ ಜನೊಕುಲು ನಿದ್ರೆ ಮಲ್ಪು ಸಮಯೊಡು ಆಯನ ಪಗೆನಾಯೆ ಬತ್ತ್‌ದ್ ಗೋದಿದ ನಡುಟು ದಡ್ಡ್ ಬಿತ್ತ್ ಬಿತ್ತ್‌ದ್ ಪೋಪೆ.

²⁶ಆ ಗೋದಿ ಬುಲೆದ್ ಕೊರಲ್ ಬುಡ್ನಗ ಐತೊಟ್ಟಿಗೆ ದಡ್ಡ್‌ಲಾ ಬುಲೆಂಡ್.

²⁷ಅಪಗ ಬೇಲೆದಾಕುಲು ಯಜಮಾನನ ಕೈತಲ್‌ ಬತ್ತ್‌ದ್, ‘ಅಯ್ಯಾ, ಈ ನಿನ ಕಂಡೊಡು ಎಡ್ಡೆ ಬಿತ್ತ್ ಬಿತ್ತಿಯ ಅತ್ತಾ? ಐತ ನಡುಟು ದಡ್ಡ್ ಎಂಚ ಬತ್ತ್ಂಡ್?’ ಅಂದ್‌ದ್ ಕೇಂಡಿನಪಗ

²⁸‘ಉಂದು ಪಗೆನಾಯೆ ಮಲ್ತಿನ ಬೇಲೆ,’ ಅಂದ್‌ದ್ ಪಂಡೆ. ಐಕ್ ಬೇಲೆದಾಕುಲು ಆಯಡ, ‘ಎಂಕುಲು ಆ ದಡ್ಡ್‌ನ್ ಅಜತ್‌ದ್ ದೆಪ್ಪೊಡಾ?’ ಅಂದ್‌ದ್ ಕೇಂಡಿನೆಕ್ಕ್

²⁹‘ಬೊಡ್ಚಿ ದಡ್ಡ್‌ನ್ ಅಜತ್‌ದ್ ದೆಪ್ಪುನಗ ಐತ ಒಟ್ಟುಡು ಗೋದಿನ್ಲಾ ದೆಪ್ಪರ್.

³⁰ಸುಗ್ಗಿ ಕಾಲ ಮುಟ್ಟ ರಡ್ಡ್‌ಲಾ ಬುಲೆವೆರೆ ಬುಡ್ಲೆ; ಸುಗ್ಗಿಕಾಲೊಡು ಯಾನ್ ಕೊಯ್ಪಿನಾಕುಲೆಗ್ ದುಂಬತ್ತ ದಡ್ಡ್‌ಲೆನ್ ಅಜತ್ ದೆತ್ತ್‌ದ್ ಅವೆನ್ ಪೊತ್ತಾಯೆರೆ ಕಟ್ಟ ಕಟ್ಟ್‌ಲೆ ಬೊಕ್ಕ ಗೋದಿನ್ ಎನ ತುಪ್ಪೆಗ್ ದಿಂಜಾದ್ ದೀಲೆ,’ ಪಂಡ್ದ್ ಪನ್ಪೆ,” ಅಂದ್‌ದ್ ಪಂಡೆ.

³¹ಆಯೆ ಬೊಕ್ಕೊಂಜಿ ಉಪಕತೆನ್ ಅಕ್ಲೆಗ್ ಪಂಡೆ; ಅವು ದಾನೆಂದ್ಂಡ, “ಪರಲೋಕ ರಾಜ್ಯ ದಾಸೆಮಿ ಬಿತ್ತ್‌ಗ್ ಸಮ ಆದುಂಡು. ಒರಿ ನರಮಾನಿ ಅವೆನ್ ದೆತ್ತೊಂದು ಪೋದು ತನ ಕಂಡೊಡು ಬಿತ್ತಿಯೆ.

³²ಅವು ಮಾತ ಬಿತ್ತ್‌ಲೆಡ್ದ್‌ಲಾ ಎಲ್ಯದವು ಆದಿತ್ತ್‌ಂಡಲಾ ಬುಲೆಯಿ ಬೊಕ್ಕ ಕಾಯಿಕಜಿಪುಲೆಡ್ದ್ ಮಲ್ಲೆ ಆದ್ ಮರ ಆಪುಂಡು. ಬಾನೊಡು ರಾಪಿ ಪಕ್ಕಿಲು ಬತ್ತ್‌ದ್ ಐತ ಗೆಲ್ಲ್‌ಲೆಡ್ ಗೂಡು ಕಟ್ಟ್‌ದ್ ವಾಸ ಮಲ್ಪುವ.”

³³ಆಯೆ ಕುಡೊಂಜಿ ಉಪಕತೆನ್ ಅಕ್ಲೆಗ್ ಪಂಡೆ; ಅವು ದಾನೆಂದ್ಂಡ, “ಪರಲೋಕ ರಾಜ್ಯ ಪುಳಿ ಬಂದೊಗು ಸಮ ಆದುಂಡು. ಅವೆನ್ ಒಂಜಿ ಪೊಂಜೊವು ದೆತ್ತೊಂದು ಮೂಜಿ ಸೇರ್ ಹಿಟ್ಟ್‌ನ್ ಕಲತ್ ದೀಯಿನಪಗ ಆ ಹಿಟ್ಟ್ ಮಾತಲಾ ಪುಳಿ ಆಂಡ್.”

³⁴ಯೇಸು ಈ ಪಾತೆರೊಲೆನ್ ಮಾತ ಜನೊಕುಲೆ ಗುಂಪುಗು ಉಪಕತೆತ್ತ ರೂಪೊಡು ಪಂಡೆ; ನಿಜಾದ್‌ಲಾ ಉಪಕತೆದಾಂತೆ ಒಂಜೆನ್ಲಾ ಪಂಡಿಜೆ.

³⁵ಇಂಚ, “ಯಾನ್ ಬಾಯಿ ಜತ್ತ್‌ದ್ ಉಪಕತೆತ್ತ ರೂಪೊಡು ಬೋಧನೆ ಮಲ್ಪುವೆ; ಲೋಕಾದಿಡ್ದ್ ಮದೆ ಆದಿತ್ತಿನೆನ್ ಪಿದಾಯಿ ಪಾಡುವೆ,” ಅಂದ್ಂಡ ಒರಿ ಪ್ರವಾದಿಡ್ದ್ ಪಂಡಿ ಪಾತೆರ ನಡತ್ಂಡ್.

³⁶ಅಪಗ ಯೇಸು ಜನೊಕುಲೆನ್ ಬುಡ್ದು ಇಲ್ಲಗ್ ಪೋಯಿ ಬೊಕ್ಕ ಆಯನ ಶಿಷ್ಯೆರ್ ಬತ್ತ್‌ದ್, “ಕಂಡದ ದಡ್ಡ್‌ದ ಉಪಕತೆತ್ತ ಅರ್ಥೊನು ಎಂಕ್ಲೆಗ್ ಪನ್ಲ,” ಪಂಡೆರ್.

³⁷ಐಕ್ ಆಯೆ, “ಎಡ್ಡೆ ಬಿತ್ತ್‌ನ್ ಬಿತ್ತುನಾಯೆ ಪಂಡ ನರಮಾನಿ ಮಗೆ.

³⁸ಕಂಡ ಪಂಡ ಈ ಲೋಕ; ಎಡ್ಡೆ ಬಿತ್ತ್ ಪಂಡ ಪರಲೋಕ ರಾಜ್ಯದ ಬಾಲೆಲು; ದಡ್ಡ್ ಪಂಡ ಸೈತಾನನ ಬಾಲೆಲು;

³⁹ಅವೆನ್ ಬಿತ್ತುನ ಪಗೆನಾಯೆ ಪಂಡ ಸೈತಾನೆ; ಸುಗ್ಗಿ ಕಾಲ ಪಂಡ ಯುಗತ ಅಂತ್ಯ; ಕೊಯ್ಪಿನಾಕುಲು ಪಂಡ ದೂತೆರ್.

⁴⁰ಇಂಚ ಉಪ್ಪುನಗ ಎಂಚ ದಡ್ಡ್‌ನ್ ಅಜತ್ ದೆತ್ತ್‌ದ್ ಪೊತ್ತಾದ್ ಬುಡ್ಪೆರಾ, ಅಂಚೆನೇ ಯುಗತ ಅಂತ್ಯೊಡ್ಲಾ ನಡಪುಂಡು.

⁴¹ನರಮಾನಿ ಮಗೆ ತನ ದೂತೆರೆನ್ ಕಡಪುಡ್ವೆ, ಅಕುಲು ಆಯನ ರಾಜ್ಯದ ಉಲಯಿಡ್ದ್ ಮಾತ ಪಾಪೊಗು ಕಾರಣ ಆದಿತ್ತಿನಾಕುಲೆನ್ಲಾ ಅನ್ಯಾಯ ಮಲ್ಪುನಾಕುಲೆನ್ಲಾ ಒಟ್ಟು ಸೇರಾದ್

⁴²ತೂತ ಗುಂಡಿಗ್ ಪಾಡ್ವೆರ್. ಅಲ್ಪ ಅಕುಲು ಅರಬಾಯಿಲಾ, ಕಟಕಟ ಕೂಲಿ ಕಡೆಯೊಂದುಲಾ ಉಪ್ಪುವೆರ್.

⁴³ಅಪಗ ನೀತಿವಂತೆರ್ ತನ್ಕುಲೆ ಅಮ್ಮೆರೆ ರಾಜ್ಯೊಡು ಸೂರ್ಯದಲೆಕ್ಕ ಮಿಂಚುವೆರ್. ಕೇನಿಯೆರೆ ಕೆಬಿ ಇತ್ತಿನಾಯೆ ಕೇನಡ್ ಪಂಡೆ.

⁴⁴“ಪರಲೋಕ ರಾಜ್ಯ ಕಂಡೊಡು ಕೌಂತು ದೀತಿ ದ್ರವ್ಯೊಲೆಗ್ ಸಮ ಆದುಂಡು. ಒರಿ ಅವೆನ್ ನಾಡ್ ಪತ್ತ್‌ದ್ ಮುಚ್ಚಿ ದೀದ್ ಸಂತೋಷೊಡು ತನ ಬದ್‌ಕ್‌ನ್ ಮಾತ ಮಾರ್ದ್ ಆ ಕಂಡೊನು ದೆತ್ತೊಂಡೆ.

⁴⁵“ಬೊಕ್ಕ ಪರಲೋಕ ರಾಜ್ಯ ಎಡ್ಡೆಂತಿನ ಮುತ್ತುಲೆನ್ ನಾಡುನ ಒರಿ ವ್ಯಾಪಾರಿಗ್ ಸಮ ಆದುಂಡು.

⁴⁶ಆಯೆ ಬಾರಿ ಬಿಲೆತ ಒಂಜಿ ಮುತ್ತುನು ತೂದು ತನ ಬದ್‌ಕ್‌ನ್ ಮಾತ ಮಾರ್ದ್ ಬತ್ತ್‌ದ್ ಅವೆನ್ ದೆತ್ತೊಂಡೆ.

⁴⁷“ಬೊಕ್ಕ ಪರಲೋಕ ರಾಜ್ಯ ಒಂಜಿ ಬಲೆಕ್ ಸಮ ಆದುಂಡು. ಅವೆನ್ ಕಡಲ್ಡ್ ಪಾಡ್ದ್ ಮಾತ ಜಾತಿದ ಮೀನ್‌ಲೆನ್ ಪತ್ತಿಯೆರ್.

⁴⁸ಬಲೆ ದಿಂಜಿದ್ ಪೋನಗ ಮೀನ್ ಪತ್ತುನಾಕುಲು ಆ ದಿಂಜಿದಿನ ಬಲೆನ್ ಮಿತ್ತ್ ಒಯಿತ್‌ದ್, ಐಟ್ಟ್ ಬೂರ್ದಿತ್ತಿನ ಎಡ್ಡೆ ಮೀನ್‌ಲೆನ್ ಪುಡಾಯಿಗ್ ಪಾಡ್ವೆರ್, ಹಾಳ್ ಇತ್ತಿನೆನ್ ದಕ್ಕ್‌ದ್ ಬುಡ್ಪೆರ್.

⁴⁹ಅಂಚೆನೇ ಯುಗತ ಅಂತ್ಯೊಡ್ಲಾ ಆಪುಂಡು. ದೂತೆರ್ ಬತ್ತ್‌ದ್ ನೀತಿವಂತೆರೆಡ್ದ್ ಪಡಿಕೆಂತಿನಾಕುಲೆನ್ ಬೇತೆ ಮಲ್ತ್‌ದ್

⁵⁰ಅಕ್ಲೆನ್ ತೂತ ಗುಂಡಿಡ್ ಪಾಡ್ವೆರ್ ಅಲ್ಪ ಅರಬಾಯಿಲಾ ಕಟಕಟ ಕೂಲಿ ಕಡೆಯುನವುಲಾ ಉಪ್ಪುಂಡು.

⁵¹“ಈ ಮಾತ ಪಾತೆರೊಲೆ ಅರ್ಥ ನಿಕ್ಲೆಗ್ ತೆರಿಂಡಾ?” ಅಂದ್‌ದ್ ಕೇನ್ನಗ ಅಕುಲು, “ತೆರಿಂಡ್,” ಪಂಡೆರ್.

⁵²ಅಪಗ ಆಯೆ ಅಕ್ಲೆಡ, “ಇಂಚ ಉಪ್ಪುನಗ ಪರಲೋಕ ರಾಜ್ಯದ ಸಂಗತಿಡ್ ಉಪದೇಶ ಪಡೆಯೊಂದಿನ ಪ್ರತಿಯೊರಿ ಶಾಸ್ತ್ರಿಲಾ ಇಲ್ಲದ ಯಜಮಾನಗ್ ಸಮ ಆದುಲ್ಲೆ. ಆಯೆ ತನ ಗೋದಾಮುಡ್ದು ಪೊಸ ದ್ರವ್ಯೊಲೆನ್ಲಾ ಐತ ಒಟ್ಟುಗು ಪರತ್ತ್‌ದೆನ್ಲಾ ಪಿದಯಿ ಕನವೊಂದುಪ್ಪುವೆ,” ಅಂದ್‌ದ್ ಪಂಡೆ.

⁵³ಯೇಸು ಈ ಉಪಕತೆಲೆನ್ ಪಂಡ್ದ್ ಅಲ್ತ್‌ಡ್ದ್ ಪಿದಾಡ್ದ್ ಪೋಯೆ.

⁵⁴ಐಡ್ದ್ ಬೊಕ್ಕ ಆಯೆ ತನ ಊರುಗು ಬತ್ತ್‌ದ್ ಅಲ್ಪ ಉಪ್ಪುನ ಸಭಾಮಂದಿರೊಡು ಜನೊಕುಲೆಗ್ ಬೋಧನೆ ಮಲ್ತೊಂದಿತ್ತೆ. ಅಕುಲು ಕೇಂಡ್ದ್ ಅಚ್ಚಿರ ಆದ್, “ಇಂಬ್ಯಗ್ ಈ ಬುದ್ಧಿಲಾ ಈ ಮಲ್ಲಕಾರ್ಯೊಲೆನ್ಲಾ ಮಲ್ಪೆರೆ ಒಲ್ತುಡ್ದು ಬುದ್ಧಿ ಬತ್ತ್‌ದುಪ್ಪು?

⁵⁵ಇಂಬೆ ಆ ಮರತ ಬೇಲೆದಾಯನ ಮಗೆ ಅತ್ತಾ? ಇಂಬೆನ ಅಪ್ಪೆ ಮರಿಯ ಅತ್ತಾ? ಯಾಕೋಬು, ಯೋಸೇಫು, ಸೀಮೋನೆ, ಯೂದೆ ಇಂಬೆನ ಮೆಗ್ಯಾಡ್ಲು ಅತ್ತಾ.

⁵⁶ಇಂಬೆನ ಮೆಗ್ದಿಯಾಡ್ಲು ಮಾತ ನಮೊಟ್ಟುಗು ಉಲ್ಲೆರತ್ತಾ. ಅಂಚಾಂಡ ಇಂಚಿನ ಬುದ್ಧಿ ಇಂಬ್ಯಗ್ ಒಲ್ತುಡ್ದು ಬತ್ತ್‌ದುಪ್ಪು?” ಅಂದ್‌ದ್ ಪಾತೆರೊಂದು ಆಯನ ಸಂಗತಿಡ್ ಬೇಜಾರ್ ಆಯೆರ್.

⁵⁷ಆಂಡ ಯೇಸು ಅಕ್ಲೆಡ, “ಪ್ರವಾದಿಗ್ ಮಾತ ಕಡೆಟ್ಲಾ ಮರ್ಯಾದಿ ಉಂಡು; ಆಂಡ ಸ್ವಂತ ಊರುಡ್ಲಾ, ಸ್ವಂತ ಇಲ್ಲಡ್ಲಾ ಮರ್ಯಾದಿ ಇಜ್ಜಿ,” ಪಂಡೆ.

⁵⁸ಅಕ್ಲೆನ ಅಪನಂಬಿಕೆಡ್ದ್ ಆಯೆ ಅಲ್ಪ ಮಸ್ತ್ ಕಾರ್ನಿಕೊಲೆನ್ ಮಲ್ತ್‌ಜೆ.