Read Tulu ಮತ್ತಾಯೆ 14 Bible Online

ಮತ್ತಾಯೆ 14 - Tulu bible

ಮತ್ತಾಯೆ 14

¹ಆ ಸಮಯೊಡು ಉಪರಾಜೆ ಹೆರೋದೆ ಯೇಸುನ ಸುದ್ಧಿನ್ ಕೇಂಡ್ದ್

²ತನ ಸೇವಕೆರೆಡ, “ಇಂಬೆ ಸ್ನಾನಿಕೆ ಯೋಹಾನೆ ಕುಡ ಬದ್‌ಕ್‌ದ್ ಬೈದೆ. ಐಡ್ದಾವರ ಕಾರ್ನಿಕೊಲೆನ್ ನಡಪಾವು ಶಕ್ತಿ ಆಯಡ ಉಂಡು,” ಅಂದ್‌ದ್ ಪಂಡೆ.

³ಹೆರೋದೆ ಹೆರೋದ್ಯೆಲೆಗಾದ್ ಯೋಹಾನನ್ ಪತ್ತ್‌ದ್ ಸೆರೆಮನೆಟ್ ಪಾಡ್ದಿತ್ತೆ. ಆ ಹೆರೋದ್ಯೆಲ್ ಹೆರೋದನ ಪಲಯೆ ಆಯಿ ಫಿಲಿಪ್ಪನ ಬೊಡೆದಿ.

⁴ಯೋಹಾನೆ ಹೆರೋದಗ್, “ಈ ಮೊಲೆನ್ ದೀಪಾವೊಂದಿನವು ನ್ಯಾಯ ಅತ್ತ್ ಅಂದ್‌ದ್ ಪನೊಂದಿತ್ತೆ.”

⁵ಹೆರೋದೆ ಆಯನ್ ಕೆರೊಡು ಅಂದ್‌ದ್ ಇತ್ತೆಡಲಾ, ಜನೊಕುಲು ಯೋಹಾನನ್ ಪ್ರವಾದಿ ಪಂಡ್ದ್ ಎನ್ನೊಂದಿತ್ತಿನೆಡ್ದ್ ಅಕ್ಲೆಗ್ ಪೋಡಿದ್ ಆಯನ್ ಕೆರ್ಪಾಯಿಜೆ.

⁶ಆಂಡ ಹೆರೋದನ ಪುಟ್ಟಿ ದಿನತ ಪರ್ಬ ನಡತೊಂದುಪ್ಪುನಗ ಹೆರೋದ್ಯೆಲೆನ ಮಗಲ್ ಬತ್ತಿ ಬಿನ್ನೆರೆ ಎದುರು ನಲ್ತ್‌ದ್ ಹೆರೋದನ್ ಮೆಚ್ಚಾಯಲ್.

⁷ಆಯೆ ಆಲೆಡ, “ಈ ಎಂಚಿನ ಕೇಂಡಲಾ ಕೊರ್ಪೆ,” ಅಂದ್‌ದ್ ಆಜ ದೀದ್ ಪಾತೆರ ಕೊರಿಯೆ.

⁸ಅಪಗ ಆಲ್ ತನ ಅಪ್ಪೆನ ಪಾತೆರೊನು ಕೇಂಡ್ದ್, “ಮುಲ್ಪನೇ ಸ್ನಾನಿಕೆ ಯೋಹಾನನ ತರೆನ್ ಕಡ್ತ್‌ದ್ ಹರಿವಾಣೊಡು ಎಂಕ್ ತರ್ಪಾದ್ ಕೊರ್ಲ ಪಂಡಲ್.”

⁹ಆ ಪಾತೆರೊಗು ಅರಸು ದುಃಖ ಮಲ್ತೆಡಲಾ ತಾನ್ ದೀವೊಂದಿನ ಆಜಡ್ದಾವರ ತನಡೊಪ್ಪ ಪಂತೆಡ್ ಕುಲ್ಲೊಂದಿತ್ತಿನಾಕುಲೆಗಾದ್‌ಲಾ ಅವೆನ್ ಕನತ್ ಕೊರಿಯೆರೆ ಅಪ್ಪಣೆ ಕೊರಿಯೆ.

¹⁰ಬೊಕ್ಕ ಬೇಲೆದಾಕುಲೆನ್ ಕಡಪುಡ್ದು ಸೆರೆಮನೆಡ್ ಇತ್ತಿ ಯೋಹಾನನ ತರೆನ್ ಕಡ್ಪಾಯೆ.

¹¹ಅಕುಲು ಆಯನ ತರೆನ್ ಹರಿವಾಣೊಡು ಕನತ್‌ದ್ ಆ ಪೊಣ್ಣಗ್ ಕೊರಿಯೆರ್; ಆಲ್ ಅವೆನ್ ತನ ಅಪ್ಪೆನ ಕೈತಲ್‌ ದೆತ್ತೊಂದು ಪೋಯಲ್.

¹²ಯೋಹಾನನ ಶಿಷ್ಯೆರ್ ಬತ್ತ್‌ದ್ ಆಯನ ಪುಣೊನು ಕೊನೊದು ಪೋದು ಕೌಂತುದು ಯೇಸುನ ಕೈತಲ್‌ ಬತ್ತ್‌ದ್ ತೆರಿಪಾಯೆರ್.

¹³ಯೇಸು ಈ ಸುದ್ಧಿ ಕೇಂಡ್ದ್ ಒಂಜಿ ಓಡೊನು ಪತ್ತ್‌ದ್ ಏರ್ಲಾದಾಂತಿನ ಜಾಗ್‌ಗ್ ಪ್ರತ್ಯೇಕಾದ್ ಒರಿಯೇ ಪೋಯೆ. ಆಂಡ ಈ ಸಂಗತಿ ಜನೊಕುಲೆಗ್ ಗೊತ್ತಾಯಿನೆಡ್ದ್ ಗುಂಪುಗುಂಪಾದ್ ತನ್ಕುಲೆನ ಊರುಡ್ದು ನಡತೊಂದು ಆಯನ ಬೆರಿಯೆ ಪೋಯೆರ್.

¹⁴ಯೇಸು ಓಡೊಡ್ದು ಜಪ್ಪುನಗ ಮಸ್ತ್ ಜನೊಕುಲೆ ಗುಂಪುನು ತೂದು ಕನಿಕರ ಪಡೆದ್ ಅಕ್ಲೆಡ್ ಸೀಕ್‌ಡಿತ್ತಿನಾಕುಲೆನ್ ಗುಣ ಮಲ್ತೆ.

¹⁵ಬೈಯಡ್ ಶಿಷ್ಯೆರ್ ಯೇಸು ಕೈತಲ್‌ ಬತ್ತ್‌ದ್, “ಉಂದು ಕಾಡ್, ಪೊರ್ತು ಕಂತ್ಂಡ್. ಮೊಕುಲು ಕೈತಲುಪ್ಪು ಹಳ್ಳಿಲೆಗ್ ಪೋದು ತನ್ಕುಲೆ ವಣಸ್‌ಗಾದ್ ದಾಲಾಂಡಲಾ ದೆತ್ತೊನೆರೆ ಕಡಪುಡುಲ,” ಅಂದ್‌ದ್ ಪಂಡೆರ್.

¹⁶ಆಂಡ ಯೇಸು, “ಅಕುಲು ಪೋಪಿನವು ಅಗತ್ಯ ಇಜ್ಜಿ; ನಿಕುಲೇ ಅಕ್ಲೆಗ್ ವಣಸ್ ಕೊರ್ಲೆ,” ಪಂಡೆ.

¹⁷ಐಕ್ ಅಕುಲು, “ಎಂಕ್ಲೆಡ ಮುಲ್ಪ ಐನ್ ರೊಟ್ಟಿ ರಡ್ಡ್ ಮೀನ್ ಬುಡ್ದು ಬೇತೆ ದಾಲ ಇಜ್ಜಿ,” ಪಂಡೆರ್.

¹⁸ಆಂಡ ಯೇಸು, “ಅವೆನ್ ಎಂಕ್ ಕನತ್ ಕೊರ್ಲೆ,” ಪಂಡೆ.

¹⁹ಬೊಕ್ಕ ಜನೊಕುಲೆನ್ ಪಜಿರ್‌ದ ಮಿತ್ತ್ ಕುಲ್ಲಿಯೆರೆ ಅಪ್ಪಣೆ ಕೊರ್ದು, ಆ ಐನ್ ರೊಟ್ಟಿನ್ಲಾ ರಡ್ಡ್ ಮೀನ್‌ನ್ಲಾ ದೆತ್ತೊಂದು ಬಾನದಂಚಿ ತೂದು ದೇವೆರೆನ್ ಸುಗಿತ್‌ದ್ ರೊಟ್ಟಿನ್ ಪೊಲ್ತುದು ಶಿಷ್ಯೆರೆ ಕೈಕ್ ಕೊರಿಯೆ; ಶಿಷ್ಯೆರ್ ಜನೊಕುಲೆಗ್ ಪಟ್ಟಿಯೆರ್.

²⁰ಅಕುಲು ಮಾತೆರ್ ಉಂಡುದು ತೃಪ್ತಿ ಆಯೆರ್. ಒರಿದಿನ ರೊಟ್ಟಿ ತುಂಡುಲೆನ್ ಒಟ್ಟು ಮಲ್ಪುನಗ ಪದ್ರಾಡ್ ಪುಡಯಿ ದಿಂಜಿಂಡ್.

²¹ವಣಸ್ ಮಲ್ತಿನಾಕುಲೆಡ್ ಪೊಂಜೊವುಲು ಬೊಕ್ಕ ಜೋಕುಲೆನ್ ಬುಡ್ದು ಹೆಚ್ಚಿಕಡಿಮೆ ಐನ್ ಸಾರ ಅಂಜೊವುಲು ಇತ್ತೆರ್.

²²ಉಂದು ಆಯಿ ಕೂಡ್ಲೆ ಯೇಸು ತನ ಶಿಷ್ಯೆರೆಡ, “ಯಾನ್ ಈ ಜನೊಕುಲೆ ಗುಂಪುಲೆನ್ ಕಡಪುಡ್ದು ಕೊರ್ಪಿನೆಟ್ಟ ನಿಕುಲು ಓಡ ಮಿತ್ತಾರ್ದ್ ಎನಡ್ದ್ ದುಂಬು ಆಯೆರೆಗ್ ಪೋಲೆ,” ಅಂದ್‌ದ್ ಒತ್ತಾಯ ಮಲ್ತೆ.

²³ಆಯೆ ಜನೊಕುಲೆ ಗುಂಪುನು ಕಡಪುಡ್ದು ಕೊರಿ ಬೊಕ್ಕ ಪ್ರಾರ್ಥನೆ ಮಲ್ಪೆರೆಗಾದ್ ಒರಿಯೇ ಗುಡ್ಡೆಗ್ ಪೋಯೆ. ಪೊರ್ತು ಕಂತಿ ಬೊಕ್ಕಲಾ ಅವುಲು ಇತ್ತೆ.

²⁴ಆತ್‌ನೆಟ್ಟ ಓಡ ಕಡಲ್ದ ಕರೆಡ್ದ್ ಮಸ್ತ್ ದೂರ ಪೋದಿತ್ತ್‌ಂಡ್. ಬೊಕ್ಕ ಗಾಳಿ ಎದುರಾದ್ ಬೀಜೊಂದಿತ್ತಿನೆಡ್ದ್ ಸೆರೆಕ್ಕ್ ತಿಕ್ಕ್‌ದ್ ಅಡಿಮೇಲ್ ಆವೊಂದಿತ್ತ್ಂಡ್.

²⁵ಅಪಗ ಹೆಚ್ಚಿಕಡಿಮೆ ರಾತ್ರೆದ ನಾಲನೇ ಜಾಮೊಡು ಯೇಸು ಕಡಲ್ದ ಮಿತ್ತ್ ನಡತೊಂದು, ಅಕ್ಲೆ ಕೈತಲ್‌ ಬತ್ತೆ.

²⁶ಆಂಡ ಶಿಷ್ಯೆರ್ ಕಡಲ್ದ ಮೇಲ್‌ಡ್ ಆಯೆ ನಡಪುನೆನ್ ತೂದು, “ಅವು ಭೂತ,” ಅಂದ್‌ದ್ ತಳಮಳ ಆದ್ ಪೋಡಿದ್ ಕಲ್ಕಿಯೆರ್.

²⁷ಅಪಗನೇ ಯೇಸು ಅಕ್ಲೆಡ ಪಾತೆರ್‌ದ್, “ಧೈರ್ಯ ಮಲ್ತೊನ್ಲೆ, ಯಾನೇ ಪೋಡ್ಯಡೆ,” ಅಂದ್‌ದ್ ಪಂಡೆ.

²⁸ಐಕ್ ಪೇತ್ರೆ, “ಕರ್ತವಾ, ಈಯೇ ಆಂಡ,” ಯಾನ್ಲಾ ನೀರ್‌ದ ಮೇಲ್‌ಡ್ ನಡತ್‌ದ್ ನಿನ ಕೈತಲ್‌ ಬರಿಯೆರೆ ಅಪ್ಪಣೆ ಕೊರ್ಲ ಪಂಡೆ. ಐಕ್ ಆಯೆ, “ಬಲ,” ಪಂಡೆ.

²⁹ಅಪಗ ಪೇತ್ರೆ ಯೇಸುನ ಕೈತಲ್‌ ಪೋವೆರೆ ಓಡೊಡ್ದು ಜತ್ತ್‌ದ್ ನೀರ್‌ದ ಮೇಲ್‌ಡ್ ನಡತೆ.

³⁰ಆಂಡ ಗಾಳಿನ್ ತೂದು ಪೋಡಿದ್ ಮುರ್ಕೊಂದು, “ಕರ್ತವಾ, ಎನನ್ ಕಾಪುಲ,” ಪಂಡ್ದ್ ಬೊಬ್ಬೆ ಪಾಡಿಯೆ.

³¹ಆ ಕ್ಷಣೊಟೇ ಯೇಸು ಕೈ ನೀಡ್ದ್ ಆಯನ್ ಪತ್ತ್‌ದ್, “ನಂಬಿಕೆದಾಂತಿನಾಯಾ, ದಾಯೆ ಸಂಶಯ ಮಲ್ತ?” ಅಂದ್‌ದ್ ಪಂಡೆ.

³²ಐಡ್ದ್ ಬೊಕ್ಕ ಅಕುಲು ಓಡದ ಉಲಯಿ ಬತ್ತಿ ಬೊಕ್ಕ ಬಿರುಗಾಳಿ ಉಂತುದು ಪೋಂಡು.

³³ಅಪಗ ಓಡೊಡಿತ್ತಿನಾಕುಲು ಆಯಗ್ ಅಡ್ಡಬೂರ್ದು, “ಈ ನಿಜಾದ್‌ಲಾ, ದೇವೆರೆ ಮಗೆ,” ಅಂದ್‌ದ್ ಆಯಗ್ ವಂದನೆ ಮಲ್ತೆರ್.

³⁴ಅಕುಲು ಕಡಲ್‌ನ್ ದಾಂಟ್‌ದ್ ಗೆನೇಜರೇತುದ ಕರೆಕ್ ಬತ್ತೆರ್.

³⁵ಆ ಜಾಗ್‌ದಾಕುಲು ಯೇಸುನ ಗುರ್ತ ಪತ್ತಿಯೆರ್. ಸುತ್ತ ಇತ್ತಿ ಸೀಮೆಲೆಗ್ ಜನೊಕುಲೆನ್ ಕಡಪುಡ್ದು ಸೀಕ್‌ಡಿತ್ತಿನಾಕುಲೆನ್ ಮಾತೆರೆನ್ಲಾ ಆಯ ಕೈತಲ್‌ ಕನತೆರ್.

³⁶ನಿನ ಕುಂಟುದ ಗೊಂಡೆನಾಂಡಲಾ ಮುಟ್ಟಿಯೆರೆ ಬುಡೊಡು ಅಂದ್‌ದ್ ಆಯಡ ನಟ್ಟೊಂಡೆರ್. ಆಯನ್ ಮುಟ್ಟಿನಾಕುಲು ಮಾತ ಗುಣ ಆಯೆರ್.