Read Tulu ಮತ್ತಾಯೆ 16 Bible Online

ಮತ್ತಾಯೆ 16 - Tulu bible

ಮತ್ತಾಯೆ 16

¹ಅಪಗ ಪರಿಸಾಯೆರ್‌ಲಾ ಸದ್ದುಕಾಯೆರ್‌ಲಾ ಬತ್ತ್‌ದ್ ಯೇಸುನು ಪರೀಕ್ಷೆ ಮಲ್ಪೆರೆಗಾದ್, ಈ ಬಾನೊಡು ಒಂಜಿ ಗುರ್ತ ತೋಜಾದ್ ಕೊರೊಡು ಅಂದ್‌ದ್ ಕೇಂಡೆರ್.

²ಐಕ್ ಆಯೆ ಉತ್ತರ ಕೊರ್ದು ಅಕ್ಲೆಡ ಪಂಡಿನಿ, “ಬೈಯದಗ ಬೊಲ್ಕಿರ್ ಆವು, ಬಾನ ಕೆಂಪಾದುಂಡು, ಪನ್ಪರ್,

³ಕಾಂಡೆ, ಬಾನ ಮುಗಲ್ ಮುಚ್ಚೊಂದು ಕೆಂಪಾತ್ತ್ಂಡ್, ಇನಿ ಗಾಳಿ ಬರ್ಸ ಪನ್ಪರ್, ಬಾನದ ಸ್ಥಿತಿನ್ ತೂದು ಹೆಚ್ಚಿಕಡಿಮೆ ಪನಿಯೆರೆ ತೆರಿಯೊನ್ವರ್ ಆಂಡ ನಿಕ್ಲೆಗ್ ಈ ಕಾಲದ ಗುರ್ತೊಲೆನ್‌ ತೆರಿಯೊನಿಯೆರೆ ಆಪುಜಿ?

⁴ಹಾದ್ರದಂಚಿತ್ತಿ ಹಾಳ್ ಸಂತಾನ ಗುರ್ತ ಮಲ್ಪುನಂಚಿ ಕಾರ್ಯೊನು ತೂವೊಡು ಅಂದ್‌ದ್ ಬಯಕುಂಡು. ಆಂಡ ಯೋನಗ್ ಆಯಿನ ಗುರ್ತ ಮಲ್ಪುನಂಚಿ ಕಾರ್ಯೊನೇ ಅತ್ತಂದೆ ಬೇತೆ ಒವುಲಾ ನೆಕ್ಕ್ ತಿಕ್ಕಂದ್,” ಪಂಡ್ದ್ ಉತ್ತರ ಕೊರ್ದು ಅಕ್ಲೆನ್ ಬುಡ್ದು ಪೋಯೆ.

⁵ಶಿಷ್ಯೆರ್ ಆಪೆದ ಕರೆಕ್ ಪೋನಗ ರೊಟ್ಟಿದ ಬುತ್ತಿ ಕಟ್ಟೊನಿಯೆರೆ ಮದತೆರ್.

⁶ಯೇಸು ಅಕ್ಲೆಡ, “ಜಾಗ್ರತೆಡುಪ್ಪುಲೆ! ಪರಿಸಾಯೆರೆ ಬೊಕ್ಕ ಸದ್ದುಕಾಯೆರೆ ಪುಳಿಬಂದದ ಸಂಗತಿಡ್ ಎಚ್ಚರಿಕೆ ಆದುಪ್ಪುಲೆ,” ಅಂದ್‌ದ್ ಪನ್ನಗ.

⁷ಅಕುಲು, “ಎಂಕುಲು ರೊಟ್ಟಿದ ಬುತ್ತಿ ದೆತ್ತೊನಂದೆ ಬತ್ತತ್ತಾ?” ಅಂದ್‌ದ್ ತನ್ಕುಲೆ ಉಲಯಿ ಪಾತೆರೊಂಡೆರ್.

⁸ಯೇಸು ಅವೆನ್ ತೆರಿದ್, “ಒಂತೆ ನಂಬುನಾಕುಲೇ! ರೊಟ್ಟಿ ಇಜ್ಜತ್ತಾ ಪಂಡ್ದ್, ನಿಕ್ಲೆ ಉಲಯಿ ದಾಯೆಗ್ ಪಾತೆರುವರ್?

⁹ನಿಕ್ಲೆಗ್ ನನಲಾ ತೆರಿಯುಜಾ? ನಿಕ್ಲೆಗ್ ನೆನೆಪು ಇಜ್ಜಾ? ಆ ಐನ್ ರೊಟ್ಟಿ ಐನ್ ಸಾರ ಜನೊಕುಲೆಗ್ ಪಟ್ಟಿನಪಗ ಏತ್ ಪುಡಯಿ ದಿಂಜಾಯರ್?

¹⁰ಅವು ಅತ್ತಂದೆ, ಆ ಏಳ್ ರೊಟ್ಟಿ ನಾಲ್ ಸಾರ ಜನೊಕುಲೆಗ್ ಪಟ್ಟಿನಪಗ ಏತ್ ಪುಡಯಿ ದಿಂಜಾಯರ್?

¹¹ಅಂಚ ಉಪ್ಪುನಗ ಅವು ನಿಕುಲೆಗ್ ದಾಯೆಗ್ ಅರ್ಥ ಆಪುಜಿ? ರೊಟ್ಟಿದ ಸಂಗತಿಡ್ ಪಾತೆರಿದಿನಿ ಅತ್ತ್ ಆಂಡ ನಿಕ್ಲೆಗ್ ಕುಡ ಪನ್ಪಿನಿ, ಪರಿಸಾಯೆರೆ ಬೊಕ್ಕ ಸದ್ದುಕಾಯೆರೆ ಪುಳಿಬಂದದ ಸಂಗತಿಡ್ ಜಾಗ್ರತೆಡ್ ಉಪ್ಪುಲೆ.”

¹²ಅಪಗ ಶಿಷ್ಯರೆಗ್ ರೊಟ್ಟಿಗ್ ಪಾಡುನ ಪುಳಿತ ಬಂದದ ಸಂಗತಿಡ್ ಅತ್ತ್, ಪರಿಸಾಯೆರ್ ಬೊಕ್ಕ ಸದ್ದುಕಾಯೆರೆ ಬೋಧನೆದ ಸಂಗತಿಡ್ ಎಚ್ಚರಿಕೆ ಆದುಪ್ಪೊಡಂದ್‌ದ್ ಪಂಡೆ ಅಂದ್‌ದ್ ತೆರಿಯೊಂಡೆರ್.

¹³ಯೇಸು ಫಿಲಿಪ್ಪಿ ಕೈಸರೆಯ ಪನ್ಪಿ ಪಟ್ಟಣದ ಪ್ರಾಂತೊಗು ಬತ್ತಿನಪಗ ಆಯೆ ತನ ಶಿಷ್ಯೆರೆಡ, “ಜನೊಕುಲು, ನರಮಾನಿ ಮಗೆ ಆದುಪ್ಪು ಎನನ್ ಏರ್ ಅಂದ್‌ದ್ ಪನ್ಪೆರ್?” ಅಂದ್‌ದ್ ಕೇಂಡಿನೆಕ್ಕ್

¹⁴ಅಕುಲು ಪಂಡಿನಿ, “ನಿನನ್ ಕೆಲೆವೆರ್ ಸ್ನಾನಿಕೆ ಯೋಹಾನೆ ಪನ್ಪೆರ್, ಕೆಲೆವೆರ್ ಎಲೀಯೆ ಪನ್ಪೆರ್, ಬೇತೆ ಕೆಲೆವೆರ್ ಯೆರೆಮೀಯೆ, ಇಜ್ಜಾಂಡ ಪ್ರವಾದಿಲೆಡ್ ಒರಿ,” ಪಂಡ್ದ್ ಪನ್ಪೆರ್.

¹⁵ಆಯೆ ಅಕ್ಲೆಡ, “ಆಂಡ ನಿಕುಲು ಎನನ್ ಏರ್ ಅಂದ್‌ದ್ ಪನ್ಪರ್?” ಅಂದ್‌ದ್ ಕೇಂಡಿನೆಕ್ಕ್

¹⁶ಸೀಮೋನ್ ಪೇತ್ರೆ, “ಈ ಬರೊಡಾಯಿನ ಕ್ರಿಸ್ತೆ, ಜೀವಸ್ವರೂಪಿ ಆದುಪ್ಪು ದೇವೆರೆ ಮಗೆ,” ಅಂದ್‌ದ್ ಉತ್ತರ ಕೊರಿಯೆ.

¹⁷ಐಕ್ ಯೇಸು, “ಯೋನನ ಮಗೆ ಆದುಪ್ಪು ಸೀಮೋನ, ಈ ಭಾಗ್ಯವಂತೆ; ಈ ಗುಟ್ಟುನು ನಿಕ್ಕ್ ತೆರಿಪಾಯಿನಾಯೆ ಮಾಸ ನೆತ್ತೆರ್‌ದ ನರಮಾನಿ ಅತ್ತ್, ಪರಲೋಕೊಡುಪ್ಪು ಎನ ಅಮ್ಮೆನೇ ತೆರಿಪಾಯಿನಿ.

¹⁸ಬೊಕ್ಕ ಯಾನ್ಲಾ ನಿಕ್ಕ್ ಒಂಜಿ ಪಾತೆರ ಪನ್ಪೆ. ಅವು ದಾನೆಂದ್ಂಡ, ಈ ಪೇತ್ರೆ, ಈ ಪಾದೆದ ಮಿತ್ತ್ ಎನ್ನ ಸಭೆನ್ ಕಟ್ಟುವ; ಪಾತಾಳದ ಬಲ ಅವೆನ್ ಸೋಪಾವಂದ್.

¹⁹ಪರಲೋಕ ರಾಜ್ಯದ ಬೀಗದ ಕೈನ್ ನಿಕ್ಕ್ ಕೊರ್ಪೆ. ಭೂಲೋಕೊಡು ಈ ಒವೆನ್ ಕಟ್ಟುವನಾ, ಅವು ಪರಲೋಕೊಡ್ಲಾ ಕಟ್ಟ್‌ದುಪ್ಪು. ಬೊಕ್ಕ ಭೂಲೋಕೊಡು ಈ ಒವೆನ್ ಗಿರ್ಪುವನಾ ಅವು ಪರಲೋಕೊಡ್ಲಾ ಗಿರ್ಪುಂಡು,” ಪಂಡೆ.

²⁰ಅಪಗ ಆಯೆ, ತಾನ್ ಕ್ರಿಸ್ತೆ ಅಂದ್‌ದ್ ಏರೆಗ್ಲಾ ಪನಡೆ ಅಂದ್‌ದ್ ಶಿಷ್ಯೆರೆಗ್ ಕಂಡಿತಾದ್ ಪಂಡೆ.

²¹ಆನಿಡ್ದ್ ಯೇಸು, “ಯಾನ್ ಯೆರೂಸಲೇಮುಗು ಪೋವೊಡು. ಅವುಲು ಹಿರಿಯೆರೆಡ್ದ್‌ಲಾ ಪ್ರಧಾನಯಾಜಕೆರೆಡ್ದ್‌ಲಾ ಶಾಸ್ತ್ರಿಲೆಡ್ದ್‌ಲಾ ಮಸ್ತ್ ಕಷ್ಟ ಅನುಭವ ಮಲ್ತ್‌ದ್ ಕೆರ್ವೆರ್. ಮೂಜನೇ ದಿನೊಟು ಜೀವಾದ್ ಲಕ್ಕುವೆ,” ಅಂದ್‌ದ್ ತನ ಶಿಷ್ಯೆರೆಗ್ ತೆರಿಪಾಯೆರೆ ಸುರು ಮಲ್ತೆ.

²²ಅಪಗ ಪೇತ್ರೆ ಆಯನ ಕೈ ಪತ್ತ್‌ದ್ ಬರಿಕ್ಕ್ ಲೆತ್ತ್‌ದ್, “ಕರ್ತವಾ, ದೇವೆರ್ ಉಂದೆನ್ ಉಂತಾವಡ್, ನಿಕ್ಕ್ ಇಂಚ ಏಪೊಗ್ಲಾ ಆವೆರೆ ಬಲ್ಲಿ.” ದಟ್ಟಿಯೆರೆ ಸುರು ಮಲ್ತೆ.

²³ಐಕ್ ಆಯೆ ತಿರ್ಗ್‌ದ್ ಪೇತ್ರಡ, “ಸೈತಾನ, ಎನ ದುಂಬು ಉಂತಡ, ಎಂಕ್ ಈ ಅಡ್ಡಿ ಆದುಲ್ಲ; ನಿನ ಆಲೋಚನೆ ನರಮಾನಿನ ಆಲೋಚನೆ ಅತ್ತಂದೆ ದೇವೆರೆನವು ಅತ್ತ್,” ಅಂದ್‌ದ್ ಪಂಡೆ.

²⁴ಬೊಕ್ಕ ಯೇಸು ತನ ಶಿಷ್ಯೆರೆಗ್ ಪಂಡಿನಿ, “ಏರೆಗಾಂಡಲಾ ಎನ ಬೆರಿಯೆ ಬರಿಯೆರೆ ಮನಸಿತ್ತ್‌ಂಡ ಆಯೆ ತನನ್ ತಾನ್ ತಿರಸ್ಕಾರ ಮಲ್ತ್‌ದ್ ತನ ಕ್ರುಸ್ಸುನು ತುಂಬೊಂದು ಎನ ಬೆರಿಯೆ ಬರಡ್.

²⁵ತನ ಪ್ರಾಣೊನು ಒರಿಪಾವೊಡು ಅಂದ್‌ದ್ ಉಪ್ಪುನಾಯೆ ಅವೆನ್ ಕಳೆವೊನ್ವೆ; ಆಂಡ ಎಂಕಾದ್ ತನ ಪ್ರಾಣೊನು ಕಳೆವೊಂಡಿನಾಯೆ ಅವೆನ್ ಕಾತೊನ್ವೆ.

²⁶ಒರಿ ನರಮಾನಿ ಇಡೀ ಲೋಕೊನು ಸಂಪಾದನೆ ಮಲ್ತೊಂಡೆಡಲಾ ತನ ಪ್ರಾಣೊನು ಹಾಳ್ ಮಲ್ತೊಂಡೆಡ ಆಯಗ್ ದಾದ ಪ್ರಯೋಜನ ಉಂಡು? ಇಜ್ಜಿಡ ಒರಿ ತನ ಪ್ರಾಣದ ಪಗತೆಗ್ ಎಂಚಿನ ಕೊರಿಯೆರೆಗಾವು?

²⁷ನರಮಾನಿ ಮಗೆ ಅಮ್ಮೆ ಮೈಮೆಡ್ ತನ ದೂತೆರೆಡೊಪ್ಪ ಬರ್ಪೆ; ಅಪಗ ಆಯೆ ಒರಿ ಒರಿಯಗ್ ಆಯಾಯ ಕೆಲಸೊಗು ತಕ್ಕ ಪ್ರತಿಫಲ ಕೊರುವೆ.

²⁸ನಿಕ್ಲೆಗ್ ನಿಜಾದ್ ಪನ್ಪೆ. ಮುಲ್ಪ ಉಂತುದಿನಾಕುಲೆಡ್ ಕೆಲೆವೆರ್ ನರಮಾನಿ ಮಗೆ ತನ ರಾಜ್ಯೊಡು ಬರ್ಪಿನೆನ್ ತೂವ ಮುಟ್ಟ, ಸೈಪುಜರ್,” ಪಂಡೆ.