Read Tulu ಮತ್ತಾಯೆ 17 Bible Online

ಮತ್ತಾಯೆ 17 - Tulu bible

ಮತ್ತಾಯೆ 17

¹ಆಜಿ ದಿನೊಡ್ದು ಬೊಕ್ಕ ಯೇಸು ಪೇತ್ರನ್, ಯಾಕೋಬು ಬೊಕ್ಕ ಆಯನ ಮೆಗ್ಯೆ ಯೋಹಾನನ್ ಪ್ರತ್ಯೇಕಾದ್ ಒಂಜಿ ಎತ್ತರ ಗುಡ್ಡೆಗ್ ಲೆತ್ತೊಂದು ಪೋಯೆ.

²ಅಲ್ಪ ಅಕ್ಲೆನ ಕಣ್ಣೆದುರುಡು ಆಯನ ರೂಪ ಬೇತೆ ಆಂಡ್; ಆಯ ಮೋನೆ ಸೂರ್ಯದಲೆಕ್ಕ ಮಿಂಚಿಂಡ್; ಆಯೆ ಪಾಡ್ದಿನ ಕುಂಟುಲು ಬೊಲ್ಪುದ ಲೆಕ್ಕನೇ ಬೊಲ್ದಾಂಡ್.

³ಉಂದತ್ತಂದೆ ಮೋಶೆಲಾ ಎಲೀಯೆಲಾ ಆಯಡೊಪ್ಪ ಪಾತೆರೊಂದು ಅಕ್ಲೆಗ್ ತೋಜಿಯೆರ್.

⁴ಅಪಗ ಪೇತ್ರೆ ಯೇಸುಡ, “ಕರ್ತವ, ನಮ ಮೂಲೇ ಉಪ್ಪುನವು ಎಡ್ಡೆ. ಈ ಒಪ್ಪಿಯಡ ಮುಲ್ಪ ಮೂಜಿ ಗುಡಾರ ಕಟ್ಟ್‌ಗ; ನಿಕ್ಕೊಂಜಿ, ಮೋಶೆಗೊಂಜಿ, ಎಲೀಯಗೊಂಜಿ,” ಅಂದ್‌ದ್ ಪಂಡೆ.

⁵ಇಂಚ ಪಾತೆರೊಂದು ಉಪ್ಪುನಪಗನೇ ಬೊಲ್ಪುದ ಮುಗಲ್ ಅಕ್ಲೆನ ಮಿತ್ತ್ ನಿರೆಲಾಂಡ್. ಆ ಮುಗಲ್‌ದ ಉಲಯಿಡ್ದ್, “ಇಂಬೆ ಎನ ಪ್ರೀತಿದ ಮಗೆ, ಆಯನ ಪಾತೆರೊನು ಕೇನ್ಲೆ.” ಅಂದ್‌ದ್ ಒಂಜಿ ಮಲ್ಲ ಸ್ವರ ಆಂಡ್.

⁶ಶಿಷ್ಯೆರ್ ಉಂದೆನ್ ಕೇಂಡ್ದ್ ಪೋಡಿದ್ ನೆಲಕ್ ಕಬ್ಬೆ ಬೂರಿಯೆರ್.

⁷ಆಂಡ ಯೇಸು ಕೈತಲ್‌ ಬತ್ತ್‌ದ್ ಅಕ್ಲೆನ್ ಮುಟ್ಟುದು, “ಲಕ್ಕ್‌ಲೆ, ಪೋಡ್ಯಡೆ,” ಪಂಡೆ.

⁸ಅಕುಲು ಕಣ್ಣ್ ದೆರ್ತ್ತ್ ತೂನಗ ಯೇಸುವೇ ಮಾತ್ರ ಅತ್ತಂದೆ ಬೇತೆ ಏರೆನ್ಲಾ ತೂಯಿಜೆರ್.

⁹ಅಕುಲು ಆ ಗುಡ್ಡೆಡ್ದ್ ಜತ್ತ್‌ದ್ ಬರೊಂದುಪ್ಪುನಗ ಯೇಸು ಅಕ್ಲೆಡ, “ನಿಕುಲು ಇತ್ತೆ ತೂಯಿನ ದರ್ಶನೊನು ನರಮಾನಿ ಮಗೆ ಸೈತ್‌ದ್ ಜೀವಾದ್ ಲಕ್ಕ ಮುಟ್ಟ ಏರೆಗ್ಲಾ ಪನಿಯೆರೆ ಬಲ್ಲಿ,” ಅಂದ್‌ದ್ ಅಪ್ಪಣೆ ಕೊರಿಯೆ.

¹⁰ಅಪಗ ಆಯನ ಶಿಷ್ಯೆರ್, “ಎಲೀಯೆ ಸುರುಟ್ಟು ಬರ್ಪಿನವು ಅಗತ್ಯ ಅಂದ್‌ದ್ ಶಾಸ್ತ್ರಿಲು ದಾಯೆಗ್ ಪನ್ಪೆರ್?” ಆಯಡ ಕೇಂಡೆರ್.

¹¹ಐಕ್ ಯೇಸು ಅಕ್ಲೆಗ್ ಉತ್ತರ ಕೊರ್ದು ಪಂಡಿನಿ, “ಎಲೀಯೆ ಸುರುಟ್ಟು ಬತ್ತ್‌ದ್ ಮಾತೆನ್ ಸರಿ ಮಲ್ಪುನವು ನಿಜ.

¹²ಆಂಡ ಯಾನ್ ನಿಕ್ಲೆಗ್ ಪನ್ಪಿನಿ ದಾನೆಂದ್ಂಡ, ಎಲೀಯೆ ಬತ್ತ್‌ದ್ ಪೋಯೆ, ಜನೊಕುಲು ಆಯನ್ ತೆರಿಯಂದೆ ತನ್ಕುಲೆ ಮನಸ್‌ಗ್ ಬತ್ತಿಲೆಕ್ಕ ಆಯಗ್ ಮಲ್ತೆರ್. ಆಯಗ್ ಆದುಪ್ಪುಲೆಕ್ಕನೇ ನರಮಾನಿ ಮಗಕ್ಲಾ ಅಕ್ಲೆ ಕಡೆಡ್ದ್ ಭಂಗ ಆಪುಂಡು.” ಪಂಡ್ದ್ ಉತ್ತರ ಕೊರಿಯೆ.

¹³ಅಪಗ ಸ್ನಾನಿಕೆ ಯೋಹಾನನ ಬಗೆಟ್ ತನ್ಕುಲೆಗ್ ಈ ಪಾತೆರೊನು ಪಂಡೆ ಅಂದ್‌ದ್ ಶಿಷ್ಯೆರ್ ತೆರಿಯೊಂಡೆರ್.

¹⁴ಅಕುಲು ಜನೊಕುಲೆ ಗುಂಪುದಡೆ ಬತ್ತಿನಪಗ, ಒರಿ ಆಯ ಕೈತಲ್‌ ಬತ್ತ್‌ದ್ ಆಯ ದುಂಬು ಮೊರಂಪೂರ್ದು,

¹⁵“ಕರ್ತವಾ, ಎನ ಮಗಕ್ಕ್ ಕನಿಕರ ತೋಜಾಲ, ಮೂರ್ಚಂಡೆ ಸೀಕ್‌ಡ್ ಬಾರಿ ಕಷ್ಟ ಪಡೆಪೆ. ಅಪಗಪಗ ತೂಟುಲಾ ನೀರ್‌ಡ್ಲಾ ಬೂರೊಂದುಪ್ಪುವೆ.

¹⁶ಆಯನ್ ನಿನ ಶಿಷ್ಯೆರೆ ಕೈತಲ್‌ ಕನತ್‌ದ್ ತೋಜಾಯೆ, ಆಂಡ ಆಯನ್ ಗುಣ ಮಲ್ಪೆರೆ ಅಕ್ಲೆಡ್ದ್ ಆವಂದೆ ಪೋಂಡು,” ಪಂಡೆ.

¹⁷ಐಕ್ ಯೇಸು, “ಓ! ನಂಬಿಕೆದಾಂತಿ ಮೂರ್ಖ ಸಂತಾನೊಲೇ, ನನ ಏತ್ ದಿನ ಯಾನ್ ನಿಕ್ಲೆಡೊಪ್ಪ ಇತ್ತ್‌ದ್ ನಿಕ್ಲೆನ್ ಸಹಿಸೊನೊಡು? ಆಯನ್ ಇಂಚಿ ಎನ ಕೈತಲ್‌ ಲೆತ್ತೊಂದು ಬಲೆ,” ಪಂಡೆ.

¹⁸ಯೇಸು ಅವೆನ್ ದಟ್ಟಿನಗ, ದೆವ್ವ ಆಯನ್ ಬುಡ್ದು ಪೋಂಡು; ಆ ಕ್ಷಣೊಟೇ ಆ ಆಣ್ ಗುಣ ಆಯೆ.

¹⁹ಐಡ್ದ್ ಬೊಕ್ಕ ಶಿಷ್ಯೆರ್ ಪ್ರತ್ಯೇಕಾದ್ ಯೇಸು ಕೈತಲ್‌ ಬತ್ತ್‌ದ್, “ಅವೆನ್ ಬುಡ್ಪಾಯೆರೆ ಎಂಕ್ಲೆಡ್ದ್ ದಾಯೆಗ್ ಆಯಿಜಿ,” ಅಂದ್‌ದ್ ಕೇಂಡೆರ್.

²⁰ಐಕ್ ಆಯೆ ಅಕ್ಲೆಡ, “ನಿಕ್ಲೆ ನಂಬಿಕೆ ಕಡಿಮೆ ಆಯಿನೆಡ್ದ್ ಆಯಿಜಿ. ನಿಕ್ಲೆಗ್ ನಿಜಾದ್ ಪನ್ಪೆ, ನಿಕ್ಲೆಡ ದಾಸೆಮಿದಾತ್ ನಂಬಿಕೆ ಇತ್ತ್ಂಡ, ನಿಕುಲು ಈ ಗುಡ್ಡೆಗ್,

²¹‘ಮುಲ್ತುಡ್ದು ಅಡೆಗ್ ಪೋಲ,’ ಅಂದ್‌ದ್ ಪಂಡ್ಂಡ ಅವುಲಾ ಪೋವು. ನಿಕ್ಲೆ ಕೈಟ್ ಆವಂದಿನ ಕೆಲಸೊಲು ಒಂಜಿಲಾ ಇಜ್ಜಿ. ಆಂಡ ಇಂಚಿತ್ತಿ ದೆವ್ವೊಲು ಪ್ರಾರ್ಥನೆಡ್ದ್ ಉಪವಾಸೊಡ್ದು ಅತ್ತಂದೆ ಪಿದಾಡುಜಿ.”

²²ಗಲಿಲಾಯೊಡು ಅಕುಲು ಒಟ್ಟು ಸೇರೊಂದುಪ್ಪುನಗ ಯೇಸು ಅಕ್ಲೆಡ, “ನರಮಾನಿ ಮಗನ್ ಜನೊಕುಲೆ ಕೈಕ್ ಒಚ್ಚಿದ್ ಕೊರ್ಪೆರ್.

²³ಅಕುಲು ಆಯನ್ ಕೆರ್ವೆರ್; ಸೈತ್‌ದ್ ಮೂಜನೇ ದಿನೊಟು ಆಯೆ ಜೀವಾದ್ ಲಕ್ಕ್‌ದ್ ಬರುವೆ,” ಅಂದ್‌ದ್ ಪಂಡೆ. ಅವೆನ್ ಕೇಂಡ್ದ್ ಅಕುಲು ಬಾರೀ ದುಃಖ ಮಲ್ತೆರ್.

²⁴ಅಕುಲು ಕಪೆರ್ನೌಮುಗು ಬತ್ತಿನಪಗ ದೇವಾಲಯೊಗಾದ್ ತೆರಿಗೆ ದೆತ್ತೊನುನಾಕುಲು ಪೇತ್ರ ಕೈತಲ್‌ ಬತ್ತ್‌ದ್, “ನಿಕ್ಲೆ ಬೋಧಕೆ ದೇವಾಲಯದ ತೆರಿಗೆ ಕೊರ್ಪುಜೆನಾ?” ಅಂದ್‌ದ್ ಕೇಂಡಿನಪಗ, “ಅಂದ್ ಸಂದಾವೆ,” ಪಂಡೆ.

²⁵ಪೇತ್ರೆ ಇಲ್ಲದುಲಯಿ ಬತ್ತಿನಪಗ ಯೇಸು ಆಯಡ್ದ್ ದುಂಬೇ, “ಸೀಮೋನಾ ನಿಕ್ಕ್ ಎಂಚ ತೋಜುಂಡು? ಈ ಪ್ರಪಂಚದ ಅರಸೆರ್ ಏರೆಡ್ದ್ ತೆರಿಗೆ ಇಜ್ಜಿಡ ಸುಂಕ ದೆತ್ತೊನುವೆರ್? ತನ್ಕುಲೆ ಜೋಕುಲೆಡ್ದಾ ಇಜ್ಜಿಂಡ ಬೇತೆಕ್ಲೆಡ್ದಾ?” ಅಂದ್‌ದ್ ಕೇಂಡೆ.

²⁶ಬೇತೆಕ್ಲೆಡ್ದ್ ಪಂಡ್ದ್ ಉತ್ತರ ಕೊರಿನಪಗ ಯೇಸು ಆಯಡ, “ಅಂಚಾಂಡ ಜೋಕುಲು ಐಕ್ ಸೇರ್ದಿನಾಕುಲು ಅತ್ತತ್ತಾ.

²⁷ಆಂಡಲಾ ಎಂಕುಲೆ ಸಂಗತಿಡ್ ಅಕುಲು ಬೇಜಾರ್ ಮಲ್ತೊನೆರೆ ಬಲ್ಲಿ. ಈ ಕಡಲ್‌ಗ್ ಪೋದು ಗಾಳ ಪಾಡ್ದ್ ದುಂಬತ್ತ ತಿಕ್ಕುನ ಮೀನ್ ದೆರ್ಪುಲ. ಐತ ಬಾಯಿ ಬಿಚ್ಚಾನಗ ಒಂಜಿ ಬೊಳ್ಳಿದ ಪಾವೊಲಿ ತಿಕ್ಕು. ಅವೆನ್ ದೆತ್ತೊಂದು ಪೋದು ಎಂಕ್ಲೆನ ಇರ್ವೆರೆನ ತೆರಿಗೆ ಅಂದ್‌ದ್ ಅಕ್ಲೆಗ್ ಕೊರು,” ಅಂದ್‌ದ್ ಪಂಡೆ.