Read Tulu ಮತ್ತಾಯೆ 2 Bible Online

ಮತ್ತಾಯೆ 2 - Tulu bible

ಮತ್ತಾಯೆ 2

¹ಅರಸು ಆಯಿ ಹೆರೋದನ ದಿನೊಕುಲೆಡ್, ಯೂದಾಯದ ಬೇತ್ಲೆಹೇಮು ಪನ್ಪಿ ಊರುಡು ಯೇಸು ಪುಟ್ಟಿನಪಗ ಮೂಡಾಯಿ ದೇಶದ ಜೊಯಿಸೆರ್ ಯೆರೂಸಲೇಮುಗು ಬತ್ತ್‌ದ್,

²“ಯೆಹೂದ್ಯೆರೆಗ್ ಅರಸು ಆದ್ ಪುಟ್ಟಿನಾಯೆ ಓಲುಲ್ಲೆ? ಆಯನ್ ತೋಜಾವುನ ಬೊಳ್ಳಿನ್ ಮೂಡಾಯಿ ದೇಶೊಡು ತೂದು, ಎಂಕುಲು ಆಯಗ್ ಅಡ್ಡಬೂರ್ಯೆರೆ ಬೈದ,” ಪಂಡೆರ್.

³ಉಂದೆನ್ ಕೇಂಡ್ದ್ ಅರಸು ಆಯಿ ಹೆರೋದೆಲಾ ಆಯ ಒಟ್ಟುಗು ಇಡೀ ಯೆರೂಸಲೇಮುದಾಕುಲು ಮಾತೆರ್ ಗಡಿಬಿಡಿ ಆಯೆರ್.

⁴ಅಪಗ ಅರಸು ಯೆಹೂದ್ಯೆರೆ ಮಾತ ಪ್ರಧಾನಯಾಜಕೆರೆನ್ಲಾ ಪ್ರಜೆತ ಶಾಸ್ತ್ರಿಲೆನ್ಲಾ ಸೇರಾದ್, “ಕ್ರಿಸ್ತೆ ಪುಟ್ಟೊಡಾಯಿನವು ಓಲು?” ಅಂದ್‌ದ್ ಅಕ್ಲೆಡ ಕೇಂಡೆ.

⁵ಅಕುಲು ಆಯಡ, “ಯೂದಾಯದ ಬೇತ್ಲೆಹೇಮುಡೇ ಅಂದ್‌ದ್ ಪ್ರವಾದಿಲೆನ ಗ್ರಂಥೊಡು ಬರೆತ್ಂಡ್.

⁶‘ಯೆಹೂದ ಸೀಮೆದ ಬೇತ್ಲೆಹೇಮೋ, ಯೆಹೂದದ ಮುಖ್ಯ ಪಟ್ಟಣಲೆಡ್, ಈ ಏತ್ ಮಾತ್ರೊಗ್ಲಾ ಎಲ್ಯವು ಅತ್ತ್. ಒರಿ ಅಧಿಪತಿ ನಿನ ಉಲಯಿಡ್ದ್ ಪಿದಾಡುವೆ. ಆಯೆ ಎನ ಪ್ರಜೆಕುಲಾಯಿ ಇಸ್ರಾಯೇಲ್ಯೆರೆನ್ ಆಳುವೆ,’” ಪಂಡೆರ್.

⁷ಅಪಗ ಹೆರೋದೆ ಏರೆಗ್ಲಾ ತೆರಿಯಂದಿಲೆಕ್ಕ ಜೋಯಿಸೆರೆನ್ ಲೆಪ್ಡಾದ್ ಆ ಬೊಳ್ಳಿ ತೋಜಿದ್ ಬತ್ತಿ ಕಾಲೊನು ಅಕ್ಲೆಡ ಸರಿಯಾದ್ ತೆರಿಯೊಂದು,

⁸“ನಿಕುಲು ಪೋದು ಆ ಬಾಲೆದ ಸಂಗತಿಡ್ ಸರಿಯಾದ್ ವಿಚಾರ ಮಲ್ಪುಲೆ. ಅವು ತಿಕ್ಕಿಬೊಕ್ಕ ಎಂಕ್ ತೆರಿಪಾಲೆ, ಯಾನ್ಲಾ ಬತ್ತ್‌ದ್ ಆ ಬಾಲೆಗ್ ಅಡ್ಡಬೂರ್ವೆ,” ಅಂದ್‌ದ್ ಜೋಯಿಸೆರೆನ್ ಬೇತ್ಲೆಹೇಮುಗು ಕಡಪುಡಿಯೆ.

⁹ಅಕುಲು ಅರಸುನ ಪಾತೆರೊನು ಕೇಂಡ್ದ್ ಪಿದಾಡ್ನಗ ಮೂಡಾಯಿ ದೇಶೊಡು ತೂಯಿ ಬೊಳ್ಳಿ ಕುಡ ತೋಜಿದ್ ಬತ್ತ್‌ದ್ ಅಕ್ಲೆನ ದುಂಬು ದುಂಬು ಪೋದು ಬಾಲೆ ಇತ್ತಿ ಜಾಗ್‌ದ ಮಿತ್ತ್ ಬತ್ತ್‌ದ್ ಉಂತುಂಡು.

¹⁰ಅಕುಲು ಆ ಬೊಳ್ಳಿನ್ ತೂದು ಮಸ್ತ್ ಸಂತೋಷ ಮಲ್ತೆರ್.

¹¹ಬೊಕ್ಕ ಆ ಇಲ್ಲದುಲಯಿ ಪೋದು ಆ ಬಾಲೆನ್ಲಾ ಐತ ಅಪ್ಪೆ ಮರಿಯನ್ಲಾ ತೂದು, ಐಕ್ ಅಡ್ಡಬೂರ್ದು ಆರಾಧನೆ ಮಲ್ತ್‌ದ್ ತನ್ಕುಲೆ ಗಂಟ್‌ನ್ ಗಿರ್ತ್‌ದ್ ಐಕ್ ಬಂಗಾರ, ಲೋಭಾನ, ರಕ್ತಬೋಳಲೆನ್ ಉಡಿಗೆರೆ ಆದ್ ಕೊರಿಯೆರ್.

¹²ಐಡ್ದ್ ಬೊಕ್ಕ ದೇವೆರ್ ಕನೊಟು ಅಕ್ಲೆಗ್ ತೋಜಿದ್ ಬತ್ತ್‌ದ್, “ನಿಕುಲು ಹೆರೋದ ಕೈತಲ್‌ ಪಿರ ಪೋವೆರೆ ಬಲ್ಲಿ,” ಅಂದ್‌ದ್ ಅಪ್ಪಣೆ ಕೊರಿನೆಡ್ದ್ ಅಕುಲು ಬೊಕ್ಕೊಂಜಿ ಸಾದಿಡ್ದ್ ತನ್ಕುಲೆ ದೇಶೊಗು ಪಿದಾಡ್ದ್ ಪೋಯೆರ್.

¹³ಅಕುಲು ಪೋಯಿ ಬೊಕ್ಕ ಕರ್ತವ ದೂತೆ ಯೋಸೇಫುಗು ಕನೊಟು ತೋಜಿದ್ ಬತ್ತ್‌ದ್, “ಈ ಲಕ್ಕ್‌ದ್ ಈ ಬಾಲೆನ್ಲಾ ಐತ ಅಪ್ಪೆನ್ಲಾ ಲೆತ್ತೊಂದು ಐಗುಪ್ತ ದೇಶೊಗು ಪಾರ್‌ಪೋದು ಯಾನ್ ನಿಕ್ಕ್ ಪನ್ಪಿ ಮುಟ್ಟ ಅವುಲೇ ಉಪ್ಪುಲ. ಹೆರೋದೆ ಈ ಬಾಲೆನ್ ಕೆರೊಡು ಅಂದ್‌ದ್ ಅವೆನ್ ನಾಡೊಂದುಲ್ಲೆ,” ಪಂಡೆ.

¹⁴ಅಪಗನೆ ಆಯೆ ಲಕ್ಕ್‌ದ್ ಆ ಬಾಲೆನ್ಲಾ ಐತ ಅಪ್ಪೆನ್ಲಾ ರಾತ್ರೆಡೇ ಲೆತ್ತೊಂದು ಐಗುಪ್ತೊಗು ಪೋಯೆ.

¹⁵ಹೆರೋದೆ ಸೈಪಿನೆಟ್ಟ ಐಗುಪ್ತೊಡೆ ಇತ್ತೆ. ಉಂದೆಡ್ದ್, “ಎನ ಮಗನ್ ಐಗುಪ್ತ ದೇಶದುಲಯಿಡ್ದ್ ಲೆತ್ತೆ,” ಅಂದ್‌ದ್ ಕರ್ತವೆ ಪ್ರವಾದಿಲೆಡ್ದ್ ಪಂಡಿ ಪಾತೆರ ನಡತ್ಂಡ್.

¹⁶ಅಪಗ ಹೆರೋದೆ ತನ್ಕ್ ಜೋಯಿಸೆರ್ ಮೋಸ ಮಲ್ತೆರ್ ಅಂದ್‌ದ್ ತೆರಿದ್ ಕೋಪೊಡು ಜನ ಕಡಪುಡ್ದು ತಾನ್ ಜೋಯಿಸೆರೆಡ್ದ್ ತೆರಿಯೊಂಡಿ ಕಾಲೊಗು ಸರಿಯಾದ್ ಬೇತ್ಲೆಹೇಮುಡ್ಲಾ ಐತ ಕೈತಲ್‌ದ ಹಳ್ಳಿಲೆಡ್ಲಾ ರಡ್ಡ್ ವರ್ಸದುಲಯಿದ ಆಣ್ ಬಾಲೆಲೆನ್ ಕೆರ್ಪಾಯೆ.

¹⁷ಯೆರೆಮೀಯ ಪನ್ಪಿ ಪ್ರವಾದಿ ಪಂಡಿ ಪಾತೆರೊಲು ಆ ಕಾಲೊಡು ನಡತ್ಂಡ್. ಅವು ದಾನೆಂದ್ಂಡ,

¹⁸ರಾಮೊಡು ಬೊಬ್ಬೆ ಕೇಂಡ್. ಮಸ್ತ್ ಬುಲಿಪಾಟಲಾ ಅರಬಾಯಿಲಾ ಉಂಡಾಂಡ್. ರಾಹೆಲ್ ತನ ಜೋಕುಲೆಗಾದ್ ಬುಲ್ತು ಬುಲ್ತುದು ಅಕುಲು ಇಜ್ಜಾಂದೆ ಪೋಯಿನೆಕ್ಕಾದ್ ಸಮಾಧಾನ ಆವಂದೆ ಇತ್ತಲ್ ಪನ್ಪಿನವೇ.

¹⁹ಹೆರೋದೆ ಸೈತಿ ಬೊಕ್ಕ ಐಗುಪ್ತ ದೇಶೊಡು ಕರ್ತವ ದೂತೆ ಯೋಸೇಫುಗು ಕನೊಟು ತೋಜಿದ್ ಬತ್ತ್‌ದ್ ಪಂಡೆ,

²⁰“ಈ ಲಕ್ಕ್‌ದ್ ಬಾಲೆನ್ಲಾ ಐತ ಅಪ್ಪೆನ್ಲಾ ಲೆತ್ತೊಂದು ಇಸ್ರಾಯೇಲ್ ದೇಶೊಗು ಪೋಲ. ಬಾಲೆದ ಪ್ರಾಣೊನು ದೆಪ್ಪೊಡುಂದು ಇತ್ತಿನಾಕುಲು ಸೈತ್ ಪೋಯೆರ್,”

²¹ಅಪಗ ಯೋಸೇಫು ಬಾಲೆನ್ಲಾ ಐತ ಅಪ್ಪೆನ್ಲಾ ಲೆತ್ತೊಂದು ಇಸ್ರಾಯೇಲ್ ದೇಶೊಗು ಬತ್ತೆ.

²²ಆಂಡ ಅರ್ಕೆಲಾಯೆ ತನ ಅಮ್ಮೆ ಆಯಿ ಹೆರೋದನ ಪಗತೆಗ್ ಯೂದಾಯೊನು ಆಳುವೆ ಅಂದ್‌ದ್ ತೆರಿದ್ ಅಡೆಗ್ ಪೋಯೆರೆ ಪೋಡಿಯೆ. ಅಪಗ ಆಯೆ ಕನೊಟು ದೇವೆರೆ ಅಪ್ಪಣೆನ್ ಪಡೆದ್ ಗಲಿಲಾಯದ ಸೀಮೆಗ್ ಪೋಯೆ.

²³ಬೊಕ್ಕ ನಜರೇತ್ ಪನ್ಪಿ ಊರುಗು ಬತ್ತ್‌ದ್ ಅಲ್ಪ ಇಲ್ಲ್ ಮಲ್ತ್‌ದ್ ಕುಲ್ಲಿಯೆ. ನೆಡ್ದ್, “ನಜರಾಯೆ ಪನ್ಪಿ ಪುದರ್ ಬರ್ಪುಂಡು,” ಪಂಡ್ದ್ ಪ್ರವಾದಿಲೆಡ್ದ್ ಪನ್ಪಾಯಿನ ಪಾತೆರ ನಡತ್ಂಡ್.