Read Tulu ಮತ್ತಾಯೆ 20 Bible Online

ಮತ್ತಾಯೆ 20 - Tulu bible

ಮತ್ತಾಯೆ 20

¹ಅವು ಎಂಚಂದ್ಂಡ, “ಪರಲೋಕ ರಾಜ್ಯ ಒಂಜಿ ಇಲ್ಲದ ಯಜಮಾನಗ್ ಸಮಾದುಂಡು. ಆಯೆ ತನ ದ್ರಾಕ್ಷೆತೋಟೊಗು ಕೂಲಿದಾಕುಲೆನ್ ನಾಡಿಯೆರೆ ಪುಲ್ಯಕಾಂಡೆ ಪಿದಾಡುವೆ.

²ಕೂಲಿದಾಕುಲೆಗ್ ದಿನೊಕು ಒಂಜಿ ಬೊಳ್ಳಿದ ಪಾವೊಲಿಗ್ ಕೂಲಿ ನಿಗಂಟ್ ಮಲ್ತ್‌ದ್ ಅಕ್ಲೆನ್ ದ್ರಾಕ್ಷೆತೋಟೊಗು ಕಡಪುಡಿಯೆ.

³ಐಡ್ದ್ ಬೊಕ್ಕ ಹೆಚ್ಚಿಕಡಿಮೆ ಒಂರ್ಬ ಗಂಟೆಗ್ ಪೋದು ಪೇಂಟೆಡ್ ಪೊಕ್ಕಡೆ ಉಂತುದಿತ್ತಿ ನನ ಕೆಲೆವೆರೆನ್ ತೂದು,

⁴‘ನಿಕುಲುಲಾ ಎನ ದ್ರಾಕ್ಷೆತೋಟೊಗು ಪೋಲೆ; ನಿಕ್ಲೆಗ್ ಸರಿಯಾಯಿನ ಕೂಲಿ ಕೊರ್ಪೆ,’ ಪಂಡಿನಪಗ

⁵ಅಕುಲು ತೋಟೊಗು ಪೋಯೆರ್. ಆಯೆ ಕುಡ ಹೆಚ್ಚಿಕಡಿಮೆ ಪದ್ರಾಡ್ ಗಂಟೆಗ್ ಬೊಕ್ಕ ಮೂಜಿ ಗಂಟೆಗ್ ಪೋದು ಅವ್ವೇ ರೀತಿ ಮಲ್ತೆ.

⁶ಕುಡ ಹೆಚ್ಚಿಕಡಿಮೆ ಬೈಯಡ್ ಐನ್ ಗಂಟೆಗ್ ಪೋದು ಬೇತೆ ಕೆಲೆವೆರ್ ಉಂತುದುಪ್ಪುನೆನ್ ತೂದು ಅಕ್ಲೆಡ, ‘ದಿನ ಇಡೀ ಮುಲ್ಪ ಪೊಕ್ಕಡೆ ದಾಯೆ ಉಂತುದರ್?’ ಅಂದ್‌ದ್ ಕೇಂಡಿನಪಗ

⁷ಅಕುಲು, ‘ಏರ್ಲಾ ಎಂಕ್ಲೆನ್ ಕೂಲಿಗ್ ಲೆತ್ತ್‌ಜೆರ್,’ ಪಂಡಿನಪಗ ಆಯೆ, ‘ನಿಕುಲುಲಾ ಎನ ದ್ರಾಕ್ಷೆತೋಟೊಗು ಪೋಲೆ,’ ಪಂಡೆ.

⁸“ಬೈಯದ ಪೊರ್ತುಡು ದ್ರಾಕ್ಷೆತೋಟದ ಯಜಮಾನೆ ತನ ಪಾರುಪತ್ತೆದಾಯಗ್, ‘ಆ ಕೂಲಿದಾಕುಲೆನ್ ಲೆತ್ತ್‌ದ್ ಕಡೆಕ್ಕ್ ಬೈದಿನಾಕುಲೆನ್ ಪತ್ತ್‌ದ್ ದುಂಬು ಕೆಲಸೊಗು ಬೈದಿನಾಕುಲೆ ಮುಟ್ಟ ಕೂಲಿ ಕೊರ್ಲ,’ ಅಂದ್‌ದ್ ಪಂಡೆ.

⁹ಅಪಗ ಬೈಯಡ್ ಐನ್ ಗಂಟೆಗ್ ಬತ್ತಿನಾಕುಲೆಗ್ ಒಂಜೊಂಜಿ ಬೊಳ್ಳಿದ ಪಾವೊಲಿ ತಿಕ್ಕ್ಂಡ್.

¹⁰ಬೊಕ್ಕ ದುಂಬತ್ತ ಬೈದಿನಾಕುಲು ತನ್ಕುಲೆಗ್ ಹೆಚ್ಚ್ ತಿಕ್ಕು ಅಂದ್‌ದ್ ಎನ್ನಿಯೆರ್, ಆಂಡ ಮೊಕ್ಲೆಗ್ಲಾ ಒಂಜೊಂಜಿ ಬೊಳ್ಳಿದ ಪಾವೊಲಿ ತಿಕ್ಕ್ಂಡ್.

¹¹ಅವೆನ್ ದೆತ್ತೊಂದು ಇಲ್ಲದ ಯಜಮಾನನ ಮಿತ್ತ್ ಗುಣುಗುಟ್ಟುದು,

¹²‘ಕಡೆಕ್ಕ್ ಬೈದಿ ಮೊಕುಲು ಒಂಜಿ ತಾಸ್ ಮಾತ್ರ ಬೇಲೆ ಮಲ್ತ್‌ದೆರ್. ಎಂಕುಲು ಇಡೀ ದಿನ ಕಷ್ಟ ಬತ್ತ್‌ದ್ ಆ ದೊಂಬುದ ಪೆಟ್ಟ್ ತಿಂದ್‌ದ್ ಬೇಲೆ ಮಲ್ತ್‌ದ ಎಂಕ್ಲೆನ್ ಅಕ್ಲೆಗ್ ಸಮ ಮಲ್ತ್‌ದನಾ?’ ಪಂಡ್ದ್ ಪಂಡೆರ್.

¹³ಐಕ್ ಆಯೆ ಅಕ್ಲೆಡ್ ಒರಿಯಗ್, ‘ದಾನೆಪ್ಪಾ, ಯಾನ್ ನಿಕ್ಕ್ ಅನ್ಯಾಯ ಮಲ್ತ್‌ಜಿ. ಈ ಎನಡೊಪ್ಪ ಒಂಜಿ ಬೊಳ್ಳಿದ ಪಾವೊಲಿಗ್ ನಿಗಂಟ್ ಮಲ್ತೊಂಡತ್ತಾ?

¹⁴ನಿನ ಕೂಲಿ ದೆತ್ತೊಂದು ಪೋಲ. ನಿಕ್ಕ್ ಕೊರಿ ಲೆಕ್ಕ ಕಡೆಕ್ಕ್ ಬೈದಿನ ಇಂಬ್ಯಗ್ಲಾ ಕೊರಿಯೆರೆ ಎಂಕ್ ಮನಸುಂಡು.

¹⁵ಎನ ಬದ್‌ಕ್‌ನ್ ಎಂಕ್ ಬೋಡಾಯಿನಂಚ ಮಲ್ಪೆರೆ ಎಂಕ್ ಹಕ್ಕ್ ಉಂಡತ್ತಾ? ಯಾನ್ ಉದಾರ ಮನಸ್ ಮಲ್ತಿನೆಕ್ಕ್ ನಿಕ್ಕ್ ನಂಜಿ ಆಪುಂಡಾ?’ ಅಂದ್‌ದ್ ಪಂಡೆ.

¹⁶ಈ ಪ್ರಕಾರೊಡು ಕಡೆತ್ತಾಕುಲು ಸುರುತ್ತಾಕುಲು ಆಪೆರ್, ಸುರುತ್ತಾಕುಲು ಕಡೆತ್ತಾಕುಲು ಆಪೆರ್,” ಅಂದ್‌ದ್ ಪಂಡೆ.

¹⁷ಯೇಸು ಯೆರೂಸಲೇಮುಗು ಪೋವೊಂದುಪ್ಪುನಗ ಪದ್ರಾಡ್ ಶಿಷ್ಯೆರೆನ್ ಒಟ್ಟುಗು ಲೆತ್ತೊಂದು ಸಾದಿಡ್ ಅಕ್ಲೆಡ

¹⁸ತೂಲೆ, “ನಮ ಯೆರೂಸಲೇಮುಗು ಪೋವೊಂದುಲ್ಲ. ನರಮಾನಿ ಮಗನ್ ಪ್ರಧಾನಯಾಜಕೆರೆ ಬೊಕ್ಕ ಶಾಸ್ತ್ರಿಲೆನ ಕೈಕ್ ಪತ್ತ್‌ದ್ ಕೊರುವೆರ್. ಆಯಗ್‌ ಮರಣ ದಂಡನೆ ಆವು.

¹⁹ಆಯನ್ ಪಿದಯಿದ ಜನೊಕುಲೆ ಕೈಕ್ ಒಚ್ಚಿದ್ ಕೊರುವೆರ್. ಆಯಗ್ ಗೇಲಿ ಮಲ್ತ್‌ದ್ ಚಾಟಿಡ್ ಹಾಕ್‌ದ್ ಕ್ರುಸ್ಸುಗು ಪಾಡ್ವೆರ್, ಮೂಜನೇ ದಿನೊಟು ಜೀವಾದ್ ಲಕ್ಕ್‌ದ್ ಬರ್ಪೆ.” ಅಂದ್‌ದ್ ಪಂಡೆ.

²⁰ಅಪಗ ಜೆಬೆದಾಯನ ಜೋಕುಲೆನ ಅಪ್ಪೆ ಆಯಡ್ದ್ ದಾದನ ಕೇನೊಡಂದ್ ತನ ಜೋಕುಲೆನ್ ಲೆತ್ತೊಂದು ಬತ್ತ್‌ದ್ ಆಯಗ್ ಅಡ್ಡಬೂರ್ಯಲ್.

²¹ಆಯೆ ಆಲೆಡ, “ನಿಕ್ಕ್ ದಾದ ಬೋಡಮ್ಮಾ,” ಅಂದ್‌ದ್ ಕೇನ್ನಗ ಆಲ್, “ನಿನ ರಾಜ್ಯೊಡು ಈ ಎನ ರಡ್ಡ್ ಜೋಕುಲೆಡ್ ಒರಿ ನಿನ ಬಲತ್ತ ಮರ್ಗಿಲ್‌ಡ್ ಬೊಕ್ಕೊರಿ ನಿನ ದತ್ತ ಮರ್ಗಿಲ್‌ಡ್ ಕುಲ್ಲುಲೆಕ್ಕ ಅಪ್ಪಣೆ ಕೊರೊಡು,” ಪಂಡಲ್.

²²ಐಕ್ ಯೇಸು, “ನಿಕುಲು ನಟ್ಟೊಂಡಿನವು ದಾನೆಂದ್ ನಿಕ್ಲೆಗ್ ತೆರಿಯಂದ್. ಎನ ಕಷ್ಟೊಡು ಪಾಲ್‌ದಾರೆರಾವೆರೆ ನಿಕ್ಲೆಗ್ ಸಾದ್ಯನಾ?” ಅಂದ್‌ದ್ ಕೇನ್ನಗ ಅಕುಲು, “ಎಂಕ್ಲೆಡ್ದ್ ಆವು,” ಪಂಡೆರ್.

²³ಅಪಗ ಆಯೆ ಅಕ್ಲೆಡ, “ಎನ ಕಷ್ಟೊಡು ನಿಕುಲು ಪಾಲ್‌ದಾರೆರ್ ಆವರ್ ಸರಿ. ಆಂಡ ಎನ ಬಲತ್ತ ಮರ್ಗಿಲ್ಡಾವಡ್ ದತ್ತ ಮರ್ಗಿಲ್ಡಾವಡ್ ಕುಲ್ಲಾವುನ ಎನ ಬೇಲೆ ಅತ್ತ್. ಎನ ಅಮ್ಮೆರೆಡ್ದ್ ಅವು ಏರೆಗ್ ತಯಾರ್ ಮಲ್ತ್‌ದುಂಡಾ ಅಕ್ಲೆಗ್ ತಿಕ್ಕುಂಡು,” ಅಂದ್‌ದ್ ಪಂಡೆ.

²⁴ಒರಿದಿ ಪತ್ತ್ ಶಿಷ್ಯೆರ್ ಉಂದೆನ್ ಕೇಂಡ್ದ್ ಆ ಇರ್ವೆರ್ ಮೆಗ್ಯೆಪಲಯಾಡ್ಲೆ ಮಿತ್ತ್ ಕೋಪ ಮಲ್ತೆರ್.

²⁵ಆಂಡ ಯೇಸು ಅಕ್ಲೆನ್ ಕೈತಲ್‌ ಲೆತ್ತ್‌ದ್ ಅಕ್ಲೆಡ, “ಪಿದಯಿದ ಜನೊಕುಲೆನ್ ಆಳುನಾಕುಲು ಅಕ್ಲೆನ ಮಿತ್ತ್ ಅಹಂಕಾರೊಡು ಅಧಿಕಾರ ನಡಪಾವೆರ್ ಬೊಕ್ಕ ಮಲ್ಲಾಕುಲು ಬಲತ್ಕಾರೊಡ್ದು ಅಧಿಕಾರ ನಡಪಾವೆರ್ ಅಂದ್‌ದ್ ನಿಕುಲು ತೆರಿದರತ್ತಾ?

²⁶ಆಂಡ ನಿಕ್ಲೆಡ್ ಅಂಚ ಉಪ್ಪೆರೆ ಬಲ್ಲಿ. ನಿಕ್ಲೆಡ್ ಮಲ್ಲಾಯೆ ಆವೊಡುಂದು ಉಪ್ಪುನಾಯೆ ಚಾಕ್ರಿದಾಯೆ ಆದುಪ್ಪೊಡು.

²⁷ಆಂಡ ನಿಕ್ಲೆಡ್ ಸುರುತ್ತಾಯೆ ಆವೊಡು ಇನ್ಪಿನಾಯೆ ನಿಕ್ಲೆ ಅಡಿಯಾಳ್ ಆದುಪ್ಪೊಡು.

²⁸ಅಂಚೆನೆ ನರಮಾನಿ ಮಗೆಲಾ ಚಾಕ್ರಿ ಮಲ್ಪಾವೊನ್ರೆ ಅತ್ತ್, ಚಾಕ್ರಿ ಮಲ್ಪೆರೆಲಾ ತನ ಪ್ರಾಣೊನು ಮಸ್ತ್ ಜನೊಕುಲೆನ ಬುಡುಗಡೆಗಾದ್ ಕೊರಿಯೆರೆ ಬತ್ತೆ.” ಅಂದ್‌ದ್ ಪಂಡೆ.

²⁹ಅಕುಲು ಯೆರಿಕೊಗು ಪಿದಾಡ್ದ್ ಪೋವೊಂದುಪ್ಪುನಪಗ ಜನೊಕುಲೆ ಮಲ್ಲ ಗುಂಪು ಆಯನ ಬೆರಿಯೆ ಪೋಂಡು.

³⁰ಅಪಗ ಸಾದಿದ ಬರಿಟ್ಟ್ ಕುಲ್ಲೊಂದಿತ್ತಿ ಇರ್ವೆರ್ ಕುರುಡೆರ್, ಯೇಸು ಆ ಸಾದಿಡ್ ಪೋವೊಂದುಲ್ಲೆ ಅಂದ್‌ದ್ ತೆರಿದ್, “ಕರ್ತವಾ, ದಾವೀದ್ ಮಗಾ! ಎಂಕ್ಲೆನ್ ಕರುಣೆ ಮಲ್ಪುಲ!” ಅಂದ್‌ದ್ ಬೊಬ್ಬೆ ಪಾಡಿಯೆರ್.

³¹ಆ ಗುಂಪುದಾಕುಲು, “ಮನಿಪಂದೆ ಉಪ್ಪುಲೆ!” ಅಂದ್‌ದ್ ಅಕ್ಲೆನ್ ದಟ್ಟಿನಗ ಅಕುಲು, “ದಾವೀದ ಮಗಾ, ಎಂಕ್ಲೆಗ್ ಕನಿಕರ ತೋಜಾಲ,” ಅಂದ್‌ದ್ ಬೊಕ್ಕಲಾತ್ ಬೊಬ್ಬೆ ದೀಯೆರ್.

³²ಅಪಗ ಯೇಸು ಉಂತುದು ಅಕ್ಲೆನ್ ಲೆತ್ತ್‌ದ್, “ಯಾನ್ ನಿಕ್ಲೆಗ್ ದಾದ ಮಲ್ಪೊಡಂದ್‌ದ್ ಬಯಕುವರ್,” ಅಂದ್‌ದ್ ಕೇನ್ನಗ

³³ಅಕುಲು, “ಕರ್ತವಾ, ಎಂಕುಲೆ ಕಣ್ಣ್ ಜಪ್ಪುಲೆಕ್ಕ ಮಲ್ಪುಲ,” ಪಂಡೆರ್.

³⁴ಯೇಸು ಕನಿಕರ ಪಡೆದ್ ಅಕ್ಲೆನ ಕಣ್ಣ್‌ಲೆನ್ ಮುಟ್ಟಿಯೆ. ಅಪಗನೆ ಅಕ್ಲೆಗ್ ಕಣ್ಣ್ ತೋಜ್ಂಡ್. ಅಕುಲು ಆಯ ಬೆರಿಯೆ ಪೋಯೆರ್.