Read Tulu ಮತ್ತಾಯೆ 22 Bible Online

ಮತ್ತಾಯೆ 22 - Tulu bible

ಮತ್ತಾಯೆ 22

¹ಯೇಸು ಬೋಧನೆ ಮಲ್ತೊಂದು ನನಲಾ ಉಪಕತೆತ್ತ ರೂಪೊಡು ಅಕ್ಲೆಗ್ ಪಂಡಿನಿ ದಾನೆ ಪಂಡ,

²“ಪರಲೋಕ ರಾಜ್ಯ ಒಂಜಿ ಮಗಕ್ಕ್ ಮದ್ಮೆದ ಲೇಸ್ ತಯಾರ್ ಮಲ್ತಿ ಅರಸುಗು ಸಮ ಆದುಂಡು.

³ಆಯೆ ಮದ್ಮೆದ ಲೇಸ್‌ದ ಲೆಪ್ಪೋಲೆ ಇತ್ತಿನಾಕುಲೆನ್ ಲೆಪ್ಪೆರೆ ತನ ಬೇಲೆದಾಕುಲೆನ್ ಕಡಪುಡಿನಪಗ ಬರಿಯೆರೆ ಅಕ್ಲೆಗ್ ಮನಸಿಜ್ಜಾಂಡ್.

⁴ಕುಡ ಬೇತೆ ಬೇಲೆದಾಕುಲೆನ್ ಲೆತ್ತ್‌ದ್, ‘ನಿಕುಲು ಲೇಸ್‌ಗ್ ಲೆಪ್ಪೋಲೆ ಉಪ್ಪುನಾಕುಲೆ ಕೈತಲ್‌ ಪೋದು ಇಂದಾ, ಅಟಿಲ್ ತಯಾರಾತ್ತ್‌ಂಡ್; ಏಡ್‌ಲೆನ್ಲಾ ಚರ್ಬಿದ ಪ್ರಾಣಿಲೆನ್ಲಾ ಕಡ್ತ್‌ದ್ ಮಾತ ತಯಾರ್ ಆದುಂಡು, ನಿಕುಲು ಮದ್ಮೆದ ಲೇಸ್‌ಗ್ ಬರೊಡು ಪಂಡ್ದ್ ಅಕ್ಲೆಗ್ ಪನ್ಲೆ,’ ಅಂದ್‌ದ್ ಕಡಪುಡಿಯೆ.

⁵ಆಂಡ ಅಕುಲು ಅಲಕ್ಷ ಮಲ್ತ್‌ದ್ ಒರಿ ತನ ಕಂಡೊಗು, ಒರಿ ಆಯನ ಬ್ಯಾರ ತೂಯೆರೆ ಪೋಯೆ.

⁶ಒರಿದಿನಾಕುಲು ಆಯನ ಬೇಲೆದಾಕುಲೆನ್ ಪತ್ತ್‌ದ್ ನೆರ್ದ್ ಕೆರ್ದ್ ಪಾಡ್ಯೆರ್.

⁷ಅರಸು ಕೋಪೊಡು ತನ ಸೈನಿಕೆರೆನ್ ಕಡಪುಡ್ದು ಆ ಮಾನ್ಯ ಕೆರ್ತಿನಾಕುಲೆನ್ ನಾಶ ಮಲ್ತ್‌ದ್ ಅಕ್ಲೆನ ಪೇಂಟೆನ್ ಪೊತ್ತಾದ್ ಪಾಡಿಯೆ.

⁸ಅಪಗ ತನ ಬೇಲೆದಾಕುಲೆಗ್, ‘ಮದ್ಮೆದ ಲೇಸ್ ತಯಾರಾತ್ತ್‌ಂಡ್ ಸರಿ, ಆಂಡ ಲೆಪ್ಪೋಲೆ ಇತ್ತಿನಾಕುಲು ಯೋಗ್ಯದಾಕುಲು ಆದಿತ್ತಿಜೆರ್.

⁹ನಿಕುಲು ಇತ್ತೆ ನಾಲ್ ಸಾದಿ ಕೂಡುನ ಜಾಗ್‌ಗ್ ಪೋದು ತಿಕ್ಕಿನಾಕುಲೆನ್ ಮಾತ ಮದ್ಮೆದ ಲೇಸ್‌ಗ್ ಲೆಪ್ಪುಲೆ,’ ಅಂದ್‌ದ್ ಪಂಡೆ.

¹⁰ಆ ಬೇಲೆದಾಕುಲು ಸಾದಿಲೆಗ್ ಪೋದು ಪಡಿಕೆಂತಿನಾಕುಲೆನ್ಲಾ, ಎಡ್ಡೆಂತಿನಾಕುಲೆನ್ಲಾ ತಿಕ್ಕಿನಾಕುಲೆನ್ ಒಟ್ಟು ಕೂಡಾದ್ ಲೆತ್ತೊಂದು ಬತ್ತೆರ್. ಇಂಚ ಅಕುಲು ಕೂಡುನಗ ಆ ಮದ್ಮೆದ ಇಲ್ಲ್ ದಿಂಜಿಂಡ್.

¹¹ಬೊಕ್ಕ ಅರಸು ಕುಲ್ಲುದಿನಾಕುಲೆನ್ ತೂಯೆರೆ ಉಲಯಿ ಬತ್ತಿನಪಗ ಮದ್ಮೆದ ಅಂಗಿನ್ ಪಾಡಂದಿ ಒರಿಯನ್ ತೂದು,

¹²ಆಯಡ, ‘ದಾನೆಪ್ಪಾ, ಈ ಮದ್ಮೆದ ಅಂಗಿನ್ ಪಾಡಂದೆ ಎಂಚ ಉಲಯಿ ಬತ್ತ?’ ಕೇನ್ನಗ ಮನಿಪಂದೆ ಇತ್ತೆ.

¹³ಅಪಗ ಅರಸು ಬೇಲೆದಾಕುಲೆಡ, ‘ಆಯನ ಕೈಕಾರ್ ಕಟ್ಟ್‌ದ್ ಪಿದಾಯಿ ಕತ್ತಲೆಗ್ ನೂಕುಲೆ, ಅಲ್ಪ ಬೊಬ್ಬೆಲಾ ಕೂಲಿ ಕಡೆಪಿನವುಲಾ ಉಪ್ಪುಂಡು.’

¹⁴ಇಂಚ ಲೆಪ್ಪು ಇತ್ತಿನಾಕುಲು ಮಸ್ತ್ ಜನ, ಅಜತ್‌ದಿನಾಕುಲು ಒಂತೆ ಜನ.” ಪಂಡೆ.

¹⁵ಅಪಗ ಪರಿಸಾಯೆರ್ ಪಿದಾಡ್ದ್ ಆಯನ ಪಾತೆರೊಡು ಆಯನ್ ಎಂಚ ತಿಕ್ಕಾದ್ ಪಾಡುನು ಅಂದ್‌ದ್ ಕೂಡ್ದು ಆಲೋಚನೆ ಮಲ್ತೆರ್.

¹⁶ಬೊಕ್ಕ ಪರಿಸಾಯೆರ್ ತನ್ಕುಲೆ ಶಿಷ್ಯೆರೆನ್ ಹೆರೋದ್ಯನ ಜನೊಕುಲೆಡೊಪ್ಪ ಯೇಸು ಕೈತಲ್‌ ಕಡಪುಡ್ದು ಮೊಕುಲು ಬತ್ತ್‌ದ್, “ಗುರೂ ಈ ಸತ್ಯವಂತೆ, ದೇವೆರೆ ಮಾರ್ಗೊಲೆನ್ ಸತ್ಯವಾದ್ ಬೋಧನೆ ಮಲ್ಪುನಾಯೆ, ಏರೆಗ್ಲಾ ಪೋಡ್ಯಂದಿನಾಯೆ; ಜನೊಕುಲೆ ಮೋನೆದಾಕ್ಷಿಣ್ಯೊಗು ತಕ್ಕ ಪಾತೆರುನಾಯೆ ಅತ್ತ್ ಅಂದ್‌ದ್ ತೆರಿದ.

¹⁷ಇಂಚ ಉಪ್ಪುನಗ ಕೈಸರಗ್ ತೆರಿಗೆ ಕೊರ್ಪಿನವು ಸರಿಯಾ? ತಪ್ಪಾ? ನಿಕ್ಕ್ ಎಂಚ ತೋಜುಂಡು? ಎಂಕ್ಲೆಗ್ ಪನ್ಲ,” ಪಂಡೆರ್.

¹⁸ಆಂಡ ಯೇಸು ಅಕ್ಲೆನ ಮನಸ್‌ಡಿತ್ತಿನ ಬೊಡ್ಚಾಂದಿ ಆಲೋಚನೆನ್ ತೆರಿಯೊಂದು, “ಕಪಟಿಲೇ, ಎನನ್ ದಾಯೆಗ್ ಪರೀಕ್ಷೆ ಮಲ್ಪುವರ್?”

¹⁹ತೆರಿಗೆ ಕೊರ್ಪಿನ ಪಾವೊಲಿನ್ ಎಂಕ್ ತೋಜಾಲೆ ಅಂದ್‌ದ್ ಪಂಡೆ. ಅಕುಲು ಆಯಗ್ ಒಂಜಿ ಪಾವೊಲಿನ್ ಕನತ್ ಕೊರಿಯೆರ್.

²⁰“ಐಟಿತ್ತಿ ತರೆಲಾ ಮುದ್ರೆಲಾ ಏರೆನವು?” ಅಂದ್‌ದ್ ಕೇಂಡಿನೆಕ್ಕ್,

²¹ಅಕುಲು, “ಕೈಸರನವು,” ಅಂದ್‌ದ್ ಪಂಡೆರ್. “ಅಂಚಾಂಡ ಕೈಸರನೆನ್ ಕೈಸರಗ್ ಕೊರ್ಲೆ ಬೊಕ್ಕ ದೇವೆರ್‌ನೆನ್ ದೇವೆರೆಗ್ ಕೊರ್ಲೆ,” ಅಂದ್‌ದ್ ಪಂಡೆ.

²²ಅಕುಲು ಈ ಪಾತೆರೊಲೆನ್ ಕೇಂಡ್ದ್ ಅಚ್ಚಿರ ಆದ್ ಆಯನ್ ಬುಡ್ದು ಪೋಯೆರ್.

²³ಆನಿಯೆ ಸದ್ದುಕಾಯೆರ್‌ಲಾ ಆಯೆ ಇತ್ತಿನಡೆ ಬತ್ತೆರ್. ಮೊಕುಲು ಸೈತಿನಾಕುಲು ಕುಡೊರ ಲಕ್ಕುನವು ಇಜ್ಜಿ ಪಂಡ್ದ್ ಪನ್ಪಿನಾಕುಲು.

²⁴ಮೊಕುಲು ಆಯಡ ಒಂಜಿ ಪ್ರಶ್ನೆ ಮಲ್ತಿನಿ ದಾನೆಂದ್ಂಡ, “ಗುರೂ, ಒರಿ ನರಮಾನಿ ಜೋಕುಲ್‌ದಾಂತೆ ಸೈತ್ ಪೋಯೆಡ, ಆಯನ ಬೊಡೆದಿನ್ ಆಯನ ಮೆಗ್ಯೆ ಮದ್ಮೆ ಮಲ್ತೊಂದು ತನ ಪಲಯಗ್ ಸಂತಾನೊನು ಪಡೆಯೊಡು, ಅಂದ್‌ದ್ ಮೋಶೆ ಪನ್ತೆ.

²⁵ಆಂಡ ಇತ್ತೆ ಎಂಕ್ಲೆಡ್ ಏಳ್ವೆರ್ ಮೆಗ್ಯೆಪಲಯಾಡ್ಲು ಇತ್ತೆರ್. ಸುರುತ್ತಾಯೆ ಮದ್ಮೆ ಆದ್ ಸೈತ್ ಪೋಯೆ, ಆಯಗ್ ಸಂತಾನ ಇಜ್ಜಂದಿನೆಡ್ದಾವರ ಆಯನ ಬೊಡೆದಿನ್ ಆಯನ ಮೆಗ್ಯೆ ಮದ್ಮೆ ಆಯೆ.

²⁶ಅಂಚೆನೇ ರಡ್ಡನೆದಾಯೆ, ಮೂಜನೆದಾಯೆ, ಏಳನೆದಾಯೆ ಮುಟ್ಟಲಾ ಆಂಡ್,

²⁷ಅಕುಲು ಮಾತ ಸೈತಿ ಬೊಕ್ಕ ಕಡೆಕ್ಕ್ ಆ ಪೊಂಜೊವುಲಾ ಸೈತಲ್.

²⁸ಅಂಚಾಂಡ ಪುನರುತ್ಥಾನೊಡು ಆಲ್ ಏಳ್ವೆರೆಡ್ ಏರೆನ ಬೊಡೆದಿಯಾದುಪ್ಪುವಲ್? ಅಕುಲು ಮಾತೆರ್ಲಾ ಆಲೆನ್ ಮದ್ಮೆ ಆದಿತ್ತೆರ್ ಅತ್ತಾ?”

²⁹ಐಕ್ ಯೇಸು ಉತ್ತರ ಕೊರ್ದು ಅಕ್ಲೆಡ ಪಂಡಿನಿ, “ಶಾಸ್ತ್ರ ಆವಡ್, ದೇವೆರೆ ಬಲ ಆವಡ್ ನಿಕ್ಲೆಗ್ ತೆರಿಯಂದೆ ತಪ್ಪು ಮಲ್ಪುವರ್.

³⁰ಎಂಚಂದ್ಂಡ, ಪುನರುತ್ಥಾನೊಡ್ದು ಬೊಕ್ಕ ಮದ್ಮೆ ಮಲ್ತೊನುಜೆರ್, ಬೊಕ್ಕ ಮದ್ಮೆ ಮಲ್ತ್‌ದ್‌ಲಾ ಕೊರ್ಪುಜೆರ್, ಪರಲೋಕೊಡಿತ್ತಿನ ದೂತೆರೆ ಲೆಕ್ಕ ಉಪ್ಪುವೆರ್.

³¹ಆಂಡ ಸೈತಿನಾಕುಲೆ ಪುನರುತ್ಥಾನದ ವಿಷಯೊಡು ಎಂಚಿನ ಆಪುಂಡು ಅಂದ್‌ದ್ ನಿಕ್ಲೆಗ್ ದೇವೆರ್ ಪಂತಿನೆನ್ ಓದುದಿಜರಾ?

³²ಯಾನ್ ಅಬ್ರಹಾಮುನ ದೇವೆರ್, ಇಸಾಕನ ದೇವೆರ್ ಬೊಕ್ಕ ಯಾಕೋಬುನ ದೇವೆರ್ ಆದುಲ್ಲೆ. ಆಯೆ ಬದುಕುನಾಕುಲೆಗ್ ದೇವೆರಾದುಲ್ಲೆ, ಸೈತಿದಿನಾಕುಲೆಗ್ ಅತ್ತ್,” ಅಂದ್‌ದ್ ಪಂಡೆ.

³³ಕೂಡ್ದಿನ ಗುಂಪು ಈ ಬೋಧನೆನ್ ಕೇಂಡ್ದ್ ಬಾರಿ ಸೋದ್ಯ ಬುಡಿಯೆರ್.

³⁴ಆಂಡ ಆಯೆ ಸದ್ದುಕಾಯೆರೆ ಬಾಯಿ ಮುಚ್ಚಿಯೆ ಅಂದ್‌ದ್ ಪರಿಸಾಯೆರ್ ಕೇಂಡ್ದ್ ಒಟ್ಟಾಯೆರ್.

³⁵ಒರಿ ನ್ಯಾಯಶಾಸ್ತ್ರಿ ಬೋಧಕೆ ಯೇಸುನು ಪರೀಕ್ಷೆ ಮಲ್ಪೆರೆ ಒಂಜಿ ಪ್ರಶ್ನೆ ಪಾಡುವೆ.

³⁶“ಗುರುವೇ, ನ್ಯಾಯಕಟ್ಟ್‌ಡ್ ಮಲ್ಲ ಅಪ್ಪಣೆ ಒವು?” ಅಂದ್‌ದ್ ಆಯಡ ಕೇಂಡಿನೆಕ್ಕ್

³⁷ಐಕ್ ಯೇಸು, “‘ನಿನ ದೇವೆರಾದುಪ್ಪು ಕರ್ತವನ್ ನಿನ ಇಡೀ ಉಡಲ್‌ಡ್ದ್‌ಲಾ ನಿನ ಇಡೀ ಪ್ರಾಣೊಡ್ದುಲಾ ನಿನ ಇಡೀ ಬುದ್ಧಿಡ್ದ್‌ಲಾ ಪ್ರೀತಿ ಮಲ್ಪೊಡು,’

³⁸ಉಂದು ಸುರುತ್ತ ಬೊಕ್ಕ ಮಾತೆರೆಡ್ದ್ ಮಲ್ಲ ಅಪ್ಪಣೆ ಆದುಂಡು.

³⁹ನೆಕ್ಕ್ ಸರಿಯಾಯಿನ ರಡ್ಡನೆ ಅಪ್ಪಣೆ ಇಂಚಾದುಂಡು, ‘ನಿನ ನಿರೆತಾಯನ್ ನಿನಲೆಕ್ಕನೇ ಪ್ರೀತಿ ಮಲ್ಪುಲ.’

⁴⁰ಈ ರಡ್ಡ್ ಅಪ್ಪಣೆದ ಮಿತ್ತ್ ಮಾತ ನ್ಯಾಯಕಟ್ಟ್‌ಗ್ಲಾ ಪ್ರವಾದನೆದ ಗ್ರಂಥೊಗ್ಲಾ ಆಧಾರ ಆದುಂಡು.”

⁴¹ಪರಿಸಾಯೆರ್ ಒಟ್ಟು ಕೂಡ್ದುಪ್ಪುನಗ, ಯೇಸು ಅಕ್ಲೆಡ,

⁴²“ಬರೊಡಾಯಿ ಕ್ರಿಸ್ತನ ಸಂಗತಿಡ್ ನಿಕ್ಲೆಗ್ ಎಂಚ ತೋಜುಂಡು? ಆಯೆ ಏರೆನ ಮಗೆ?” ಅಂದ್‌ದ್ ಪ್ರಶ್ನೆ ಮಲ್ತಿನಪಗ ಅಕುಲು ಆಯಡ, “ದಾವೀದನ ಮಗೆ,” ಪಂಡ್ದ್ ಪನ್ನಗ ಆಯೆ ಅಂಚಾಂಡ, “ಯಾನ್ ನಿನ ವೈರಿಲೆನ್ ನಿನ ಪಾದಪೀಠ ಮಲ್ತ್‌ದ್ ಪಾಡುನೆಟ್ಟ, ಎನ ಬಲತ್ತ ಮರ್ಗಿಲ್‌ಡ್ ಕುಲ್ಲೊಂದುಪ್ಪುಲ ಅಂದ್‌ದ್ ಕರ್ತವೆ ಎನ ಧನಿಕ್ ಪಂಡೆ ಪನ್ಪಿ ಪಾತೆರೊಡು ದಾವೀದೆ ಆತ್ಮೊಡು ದಿಂಜಿದ್ ಆಯನ್ ಧನಿ ಪಂಡ್ದ್ ಪನ್ಪಿನಿ ಎಂಚಾ?

⁴³

⁴⁴

⁴⁵“ಅಂಚಾಯಿನೆಡ್ದ್ ದಾವೀದೆ ಆಯನ್ ‘ಕರ್ತವೆ’ ಅಂದ್‌ದ್ ಪಂಡಿ ಬೊಕ್ಕ ಆಯೆ ಆಯಗ್ ಮಗೆ ಆಪಿನವು ಎಂಚ?” ಪಂಡೆ.

⁴⁶ಏರೆಗ್ಲಾ ಆಯನ ಒಂಜೇ ಒಂಜಿ ಪಾತೆರೊಗು ಉತ್ತರ ಕೊರಿಯೆರೆ ಆಯಿಜಿ. ಉಂದತ್ತಂದೆ ಆನಿಡ್ದಿಂಚಿ ಆಯನ್ ಪ್ರಶ್ನೆ ಮಲ್ಪೆರೆ ಏರೆಗ್ಲಾ ಧೈರ್ಯ ಬತ್ತ್‌ಜಿ.