Read Tulu ಮತ್ತಾಯೆ 24 Bible Online

ಮತ್ತಾಯೆ 24 - Tulu bible

ಮತ್ತಾಯೆ 24

¹ಐಡ್ದ್ ಬೊಕ್ಕ ಯೇಸು ದೇವಾಲಯೊಡ್ದು ಪಿದಾಡ್ದ್ ಪೋವೊಂದುಪ್ಪುನಗ ಆಯನ ಶಿಷ್ಯೆರ್ ಆಯನ ಕೈತಲ್‌ ಬತ್ತ್‌ದ್ ಆಯಗ್ ದೇವಾಲಯದ ಕಟ್ಟಣೊನು ತೋಜಾಯೆರ್.

²ಅಪಗ ಆಯೆ, “ಉಂದೆನ್ ಮಾತ ತೂಪರತ್ತಾ, ನೆತ್ತ ಒಂಜಿ ಕಲ್ಲ್‌ಲಾ ಒಂಜೆತ್ತ ಮಿತ್ತ್ ಒಂಜಿ ಉಪ್ಪಂದ್. ಮಾತಲಾ ಮಗ್‌ರ್ದ್ ತಿರ್ತ್ ಬೂರ್ದು ಪೋವು,” ಅಂದ್‌ದ್ ನಿಕ್ಲೆಗ್ ನಿಜಾದ್ ಪನ್ಪೆ.

³ಐಡ್ದ್ ಬೊಕ್ಕ ಆಯೆ ಇಪ್ಪೆಗುಡ್ಡೆದ ಮಿತ್ತ್ ಕುಲ್ಲುದಿತ್ತಿನಪಗ ಶಿಷ್ಯೆರ್ ಆಯ ಕೈತಲ್‌ ಬೇತೆ ಬೇತೆ ಆದ್ ಬತ್ತ್‌ದ್, “ಉಂದು ಏಪ ಆವು. ಈ ಕುಡ ಬರ್ಪಿನೆಕ್ಕ್‌ಲಾ ಯುಗತ ಅಂತ್ಯ ಆಪಿನೆಕ್ಕ್‌ಲಾ ಗುರ್ತ ಎಂಚಿನವು ಎಂಕ್ಲೆಗ್ ಪನ್ಲ,” ಪಂಡೆರ್.

⁴ಅಪಗ ಯೇಸು ಅಕ್ಲೆಗ್ ಉತ್ತರ ಕೊರ್ದು ಪಂಡಿನಿ, “ಏರಾಂಡಲಾ ನಿಕ್ಲೆನ್ ಮೋಸ ಮಲ್ಪಂದಿಲೆಕ್ಕ ತೂವೊನ್ಲೆ.

⁵ದಾಯೆ ಪಂಡ ಕೆಲೆವೆರ್ ಬತ್ತ್‌ದ್ ಎನ ಪುದರ್ ದೆತ್ತೊಂದು, ‘ಯಾನೇ ಕ್ರಿಸ್ತೆ,’ ಅಂದ್‌ದ್ ಏತೋ ಜನೊಕುಲೆನ್ ಮೋಸೊಡು ಪಾಡೆರ್.

⁶ಉಂದತ್ತಂದೆ ಯುದ್ದೊಲು ಆಪಿನೆನ್ಲಾ, ಯುದ್ದೊಲು ಆಪಿಲೆಕ್ಕ ಉಂಡು ಪನ್ಪಿ ಸುದ್ಧಿಲೆನ್ಲಾ ನಿಕುಲು ಕೇನೊಡಾಪುಂಡು. ಗಲಿಬಿಲಿ ಆವಂದಿಲೆಕ್ಕ ತೂವೊನ್ಲೆ. ಇಂಚಿನ ಪರಿಸ್ಥಿತಿ ಆಪಿನವು ಅಗತ್ಯ. ಆಂಡಲಾ ಉಂದು ಅಂತ್ಯಕಾಲ ಅತ್ತ್.

⁷ಜನಾಂಗದ ವಿರೋಧಾದ್ ಜನಾಂಗೊಲುಲಾ, ರಾಜ್ಯೊಗು ವಿರೋಧಾದ್ ರಾಜ್ಯೊಲುಲಾ ಲಕ್ಕುಂಡು. ಬರಗಾಲ ಬರ್ಪಿನವುಲಾ ಭೂಕಂಪೊಲು ಆಪಿನವುಲಾ

⁸ಉಂದು ಮಾತ (ಪೊಸ ಯುಗ ಪುಟ್ಟುನ) ಪೆದ್ದುನ ಬೇನೆದ ಸುರುತ್ತ ಬೇನೆಲು.

⁹ಅಪಗ ನಿಕ್ಲೆನ್ ಭಂಗೊಗು ಒಚ್ಚಿದ್ ಕೊರ್ದು ಕೆರ್ವೆರ್. ಎನ ಪುದರ್‌ಗಾದ್ ನಿಕ್ಲೆನ್ ಮಾತ ಜನಾಂಗದಾಕುಲು ಪಗೆ ಮಲ್ಪುವೆರ್.

¹⁰ಅಪಗ ಮಸ್ತ್ ಜನ ಪಿರಜಾರ್ದ್ ಒರಿಯನ್ ಒರಿ ಪತ್ತ್‌ದ್ ಕೊರುವೆರ್. ಒರಿಯ ಮಿತ್ತ್ ಒರಿ ಪಗೆ ಮಲ್ಪುವೆರ್.

¹¹ಮಸ್ತ್ ಜನ ಸುಳ್ಳು ಪ್ರವಾದಿಲುಲಾ ಲಕ್ಕ್‌ದ್ ಮಸ್ತ್ ಜನೊಕುಲೆನ್ ಮೋಸೊಗು ಪಾಡೆರ್.

¹²ಉಂದತ್ತಂದೆ ಅನ್ಯಾಯ ಹೆಚ್ಚಾಪಿನೆಡ್ದ್ ಮಸ್ತ್ ಜನೊಕುಲೆ ಪ್ರೀತಿ ಚೌಲಿ ಆದ್ ಪೋಪುಂಡು.

¹³ಆಂಡ ಕಡೆ ಮುಟ್ಟ ತಾಳೊನುನಾಯಗ್ ರಕ್ಷಣೆ ಆವು.

¹⁴ಉಂದತ್ತಂದೆ ಪರಲೋಕ ರಾಜ್ಯದ ಈ ಸುವಾರ್ತೆನ್ ಇಡೀ ಲೋಕೊಡು ಮಾತ ಜನಾಂಗೊಲೆಗ್ ಸಾಕ್ಷಿಗಾದ್ ಸಾರಿಯುಂಡು. ಅಪಗ ಅಂತ್ಯ ಬರ್ಪುಂಡು.

¹⁵“ಅಂಚಾಯಿನೆಡ್ದ್ ಪ್ರವಾದಿ ದಾನಿಯೇಲೆ ಪಂಡಿನಂಚಿನ, ‘ಹಾಳ್ ಮಲ್ಪುನ ಅಸಹ್ಯ ವಸ್ತುಲು ಪರಿಶುದ್ಧಸ್ಥಾನೊಡು ಉಂತುದುಪ್ಪುನೆನ್,’ ನಿಕುಲು ತೂನಗ, (ಉಂದೆನ್ ಓದುನಾಯೆ ತೆರಿಯೊನುಡು).

¹⁶ಯೂದಾಯೊಡು ಉಪ್ಪುನಾಕುಲು ಪರ್ವತೊಲೆಗ್ ಪಾರ್ದ್ ಪೋವಡ್.

¹⁷ಮಾಳಿಗೆಡ್ ಉಪ್ಪುನಾಯೆ ತಿರ್ತ್ ಜತ್ತ್‌ದ್ ಇಲ್ಲದುಲಯಿ ಪೋವಂದೆ ತನ ಇಲ್ಲದುಲಯಿಡ್ದ್ ದಾದಾಂಡಲಾ ದೆತ್ತೊನಂದೆ ಉಪ್ಪಡ್.

¹⁸“ಕಂಡೊಡು ಉಪ್ಪುನಾಯೆ ತನ ಪೊದೆಪುನು ದೆತ್ತೊನಿಯೆರೆ ಪಿರ ಪೋವಂದೆ ಉಪ್ಪಡ್.

¹⁹ಆಂಡ ಆ ದಿನೊಟು ಬಂಜಿನಾಕುಲೆಗ್ಲಾ ಬಾಲೆಗ್ ಮಿರೆ ಕೊರ್ಪಿ ಅಪ್ಯಾಡ್ಲೆಗ್ಲಾ ಬರ್ಪಿ ಕಷ್ಟೊನು ಪನಿಯೆರೆ ತೀರಂದ್.

²⁰ನಿಕುಲು ಪಾರ್ ಪೋಪಿನವು ಚಳಿಕಾಲೊಡಾವಡ್ ಸಬ್ಬತ್ ದಿನೊಟಾವಡ್ ಆವೆರೆ ಬಲ್ಲಿ ಅಂದ್‌ದ್ ಪ್ರಾರ್ಥನೆ ಮಲ್ಪುಲೆ.

²¹ಅಂಚಿನ ಸಂಕಟ ಲೋಕದ ಆರಂಭದ ದಿನೊಡ್ದು ಇನಿ ಮುಟ್ಟಲಾ ಆತ್‌ಜಿ. ನನ ಮಿತ್ತ್‌ಗ್ಲಾ ಆವಂದ್.

²²ಕರ್ತವೆ ಆ ದಿನೊಕುಲೆನ್ ಕಡಿಮೆ ಮಲ್ತ್‌ಜೆಡ ಒಂಜಿ ನರಪ್ರಾಣಿಲಾ ಬದ್‌ಕಂದ್. ಆಂಡ ತಾನ್ ಅಜತ್ ದೆತ್ತೊಂಡಿನಾಕುಲೆಗಾದ್ ಆ ದಿನೊಕುಲೆನ್ ಕಡಿಮೆ ಮಲ್ಪುವೆ.

²³ಅಪಗ ಏರಾಂಡಲಾ ನಿಕ್ಲೆಗ್, ‘ಇಂದಾ, ಕ್ರಿಸ್ತೆ ಮೂಲು ಉಲ್ಲೆ,’ ಇಂದಾ, ‘ಅಲ್ಪ ಉಲ್ಲೆ,’ ಅಂದ್‌ದ್ ಪಂಡೆರ್ಡ ನಂಬಡೆ

²⁴ಸುಳ್ಳು ಕ್ರಿಸ್ತೆರ್ಲಾ ಸುಳ್ಳು ಪ್ರವಾದಿಲುಲಾ ತೋಜಿದ್ ಬರ್ವೆರ್. ಸಾದ್ಯ ಇತ್ತ್ಂಡ ದೇವೆರ್ ಅಜತ್ ದೆತ್ತೊಂಡಿನಾಕುಲೆನ್ಲಾ ಮೋಸೊಡು ಪಾಡಿಯೆರೆಗಾದ್ ಮಲ್ಲ ಮಲ್ಲ ಗುರ್ತೊಲೆನ್ಲಾ ಕಾರ್ನಿಕೊಲೆನ್ಲಾ ಮಲ್ತ್‌ದ್ ತೋಜಪಾವೆರ್.

²⁵ಇಂದಾ, ನಿಕ್ಲೆಗ್ ಸುರುಟ್ಟೆ ಪನ್ತೆ.

²⁶ಅಂಚಾಯಿನೆಡ್ದ್ ಏರಾಂಡಲಾ ನಿಕ್ಲೆಗ್, ‘ಇಂದಾ, ಕ್ರಿಸ್ತೆ ಕಾಡ್‌ಡ್ ಉಲ್ಲೆ,’ ಪಂಡೆರ್ಡ ಪಿದಾಡ್ದ್ ಪೋವಡೆ. ‘ಇಂದಾ, ಕೋಣೆದ ಉಲಯಿ ಉಲ್ಲೆ,’ ಅಂದ್‌ದ್ ಪಂಡೆರ್ಡ ನಂಬಡೆ.

²⁷ಎಂಚ ಮಿಂಚಿ ಮೂಡಯಿಡ್ ಪುಟ್ಟುದು ಪಡ್ಡಯಿ ಮುಟ್ಟ ಮಿಂಚುಂಡಾ, ಅಂಚೆನೇ ನರಮಾನಿ ಮಗನ ಅವತಾರ ಉಪ್ಪುಂಡು.

²⁸ಪುಣೊಕುಲು ಓಲುಂಡಾ ಅಲ್ಪನೇ ಗಿಡಿಕುಲು ಸೇರ್ದ್ ಬರ್ಪುಂಡು.

²⁹“ಆ ದಿನೊಕುಲೆ ಸಂಕಟ ಮುಗಿನಪಗ ಸೂರ್ಯೆ ಕತ್ತಲೆ ಆದ್ ಪೋವು, ಚಂದ್ರೆ ಬೊಲ್ಪು ಕೊರಂದ್, ನಕ್ಷತ್ರೊಲು ಬಾನೊಡ್ದು ತಾಲ್ದ್ ಬೂರು ಬಾನದ ಶಕ್ತಿ ಪಂದ್‌ದ್ ಪೋವು.

³⁰ಅಪಗ ನರಮಾನಿ ಮಗನ್ ತೋಜಾವುನ ಗುರ್ತ ಬಾನೊಡು ತೋಜಿದ್ ಬರ್ಪುಂಡು. ಅಪಗ ಭೂಲೋಕೊಡುಪ್ಪು ಮಾತ ಗೋತ್ರೊಲು ತಿಗಲೆ ದರ್ತೊನ್ವೆರ್, ಬೊಕ್ಕ ನರಮಾನಿ ಮಗೆ ಬಲೊಟ್ಲಾ ಬಾರಿ ಮೈಮೆಡ್ಲಾ ಬಾನದ ಮುಗಲ್‌ದ ಮಿತ್ತ್ ಬರ್ಪಿನೆನ್ ತೂವೆರ್

³¹ಬೊಕ್ಕ ಆಯೆ ತುತೂರಿದ ಮಲ್ಲ ಶಬ್ಧೊಡು ತನ ದೂತೆರೆನ್ ಕಡಪುಡ್ವೆ. ಅಕುಲು ಆಯೆ ಅಜತ್ ದೆತ್ತೊಂಡಿನಾಕುಲೆನ್ ಬಾನದ ಒಂಜಿ ಕಡೆಡ್ದ್ ಬೊಕ್ಕೊಂಜಿ ಕಡೆ ಮುಟ್ಟ ನಾಲ್ ದಿಕ್ಕ್‌ಲೆಡ್ದ್ ಒಟ್ಟು ಕೂಡಾವೆರ್.

³²“ಅಂಜೂರದ ಮರತ ಉಪಕತೆಡ್ದ್ ಬುದ್ಧಿ ಕಲ್ತೊನ್ಲೆ. ಐತ ಗೆಲ್ಲ್ ನನಲಾ ಲತ್ತ್ ಇತ್ತ್‌ದ್ ಇರೆ ಬುಡ್ನಗ ಅರೆಗಾಲ ಕೈತಲಾಂಡ್ ಅಂದ್‌ದ್ ತೆರಿಯೊನ್ವರ್.”

³³ಅಂಚೆನೇ ನಿಕುಲುಲಾ ಉಂದೆನ್ ಮಾತ ತೂನಗ ಆ ದಿನ ಕೈತಲಾಂಡ್, ಬಾಕಿಲ್‌ದಲ್ಪನೇ ಉಂಡು ಅಂದ್‌ದ್ ತೆರಿಯೊನ್ಲೆ.

³⁴ಉಂದು ಮಾತ ಆಪಿನೆಟ್ಟ ಈ ಸಂತಾನ ಆಳಿದ್ ಪೋಪಿನೇ ಇಜ್ಜಿ ಅಂದ್‌ದ್ ನಿಕ್ಲೆಗ್ ನಿಜಾದ್ ಪನ್ಪೆ.

³⁵ಬಾನಲಾ ಭೂಮಿಲಾ ಆಳಿದ್ ಪೋವು, ಆಂಡ ಎನ ಪಾತೆರೊಲು ಆಳಿದ್ ಪೋಪಿನೆ ಇಜ್ಜಿ.

³⁶“ಉಂದತ್ತಂದೆ ಆ ದಿನತ ಬಗೆಟ್ಲಾ ಆ ಗಳಿಗೆದ ಬಗೆಟ್ಲಾ ಎನ ಅಮ್ಮೆರೆಗ್ ಒರಿಯಗೇ ತೆರಿಯು ಅತ್ತಂದೆ ಬೊಕ್ಕ ಏರೆಗ್ಲಾ ತೆರಿಯಂದ್. ಪರಲೋಕೊಡುಪ್ಪು ದೂತೆರೆಗ್ಲಾ ತೆರಿಯಂದ್, ಮಗಕ್ಲಾ ತೆರಿಯಂದ್.

³⁷ನೋಹನ ದಿನೊಕುಲೆಡ್ ಎಂಚ ಇತ್ತನಾ ಅಂಚೆನೇ ನರಮಾನಿ ಮಗೆ ಬರ್ಪಿನವುಲಾ ಉಪ್ಪು.

³⁸ಎಂಚಂದ್ಂಡ ಜಲಪ್ರಳಯದ ದುಂಬದ ದಿನೊಕುಲೆಡ್ ನೋಹೆ ಕಪ್ಪಲ್‌ಡ್ ಸೇರಿನ ದಿನ ಮುಟ್ಟ ಜನೊಕುಲು ಉನೊಂದು, ಪರೊಂದು, ಮದ್ಮೆ ಮಲ್ತೊಂದು, ಮಲ್ಪಾವೊಂದು ಇತ್ತೆರ್.

³⁹ಜಲಪ್ರಳಯದ ನೀರ್ ಬತ್ತ್‌ದ್ ಮಾತೆರೆನ್ ಒಯ್ತೊಂದು ಪೋನೆಟ್ಟ ದಾಲಾ ತೆರಿಯಂದೆ ಇತ್ತೆರತ್ತಾ, ಐತ ಲೆಕ್ಕನೆ ನರಮಾನಿ ಮಗೆ ಕುಡ ಬರ್ಪಿ ಕಾಲೊಡ್ಲಾ ಉಪ್ಪು.

⁴⁰ಅಪಗ ಇರ್ವೆರ್ ಕಂಡೊಡು ಉಪ್ಪುವೆರ್. ಒರಿಯನ್ ದೆತ್ತೊನುವೆರ್, ಒರಿಯನ್ ಬುಡ್ಪೆರ್.

⁴¹ರಡ್ಡ್ ಪೊಂಜೊವುಲು ಬೀಸುನ ಕಲ್ಲ್‌ದ ದುಂಬು ಕುಲ್ಲುದು ಬೀಸೊಂದುಪ್ಪುವೆರ್. ಒರ್ತಿನ್ ದೆತ್ತೊನ್ವೆರ್, ಒರ್ತಿನ್ ಬುಡ್ಪೆರ್.

⁴²ಇಂಚ ಉಪ್ಪುನಗ ನಿಕ್ಲೆ ಕರ್ತವೆ ಬರ್ಪಿನ ದಿನ ನಿಕ್ಲೆಗ್ ಗೊತ್ತುದಾಂತೆ ಉಪ್ಪುನೆಡ್ದ್ ಎಚ್ಚರಿಕೆ ಆದುಪ್ಪುಲೆ.

⁴³ಕಲ್ವೆ ಬರ್ಪಿನ ಗಳಿಗೆ ಇಲ್ಲದ ಯಜಮಾನಗ್ ತೆರಿದಿತ್ತ್‌ಂಡ ಆಯೆ ಎಚ್ಚರಿಕೆಡ್ ಇತ್ತ್‌ದ್ ತನ ಇಲ್ಲಗ್ ಮಾಟೆ ದೆಪ್ಪೆರೆ ಬುಡ್ತುವಯೆ ಅಂದ್‌ದ್ ತೆರಿಯೊನ್ಲೆ.

⁴⁴ಅಂಚಾಯಿನೆಡ್ದ್ ನಿಕುಲುಲಾ ತಯಾರಾದುಪ್ಪುಲೆ; ನಿಕುಲು ಎನ್ನಂದಿ ಗಳಿಗೆಡ್ ನರಮಾನಿ ಮಗೆ ಬರ್ಪೆ.

⁴⁵“ಅಂಚಾಂಡ ಯಜಮಾನೆ ತನ ಇಲ್ಲದಾಕುಲೆಗ್ ಪೊರ್ತು ಪೊರ್ತುಗು ವಣಸ್ ತಿನಸ್ ಕೊರಿಯೆರೆ ಅಕ್ಲೆ ಮಿತ್ತ್ ದೀತಿನ ನಂಬಿಗೆದಾಯೆಲಾ ಬುದ್ಧಿವಂತೆಲಾ ಅಂಚಿತ್ತಿ ಬೇಲೆದಾಯೆ ಏರ್?

⁴⁶ಯಜಮಾನೆ ಪಿದಾಯಿ ಪೋದು ಬನ್ನಮುಟ್ಟ ಜವಾಬ್ದಾರಿಡ್ ಬೇಲೆ ಮಲ್ಪುನಾಯೆನೇ ಭಾಗ್ಯವಂತೆ.

⁴⁷ಅಂಚಿತ್ತಿನಾಯನ್ ಆಯೆ ತನ ಮಾತ ಆಸ್ತಿದ ಮಿತ್ತ್ ನೇಮಕ ಮಲ್ಪುವೆ, ಅಂದ್‌ದ್ ನಿಕ್ಲೆಗ್ ನಿಜಾದ್ ಪನ್ಪೆ.

⁴⁸ಆಂಡ ಆ ಹಾಳ್ ಬೇಲೆದಾಯೆ, ‘ತನ ಯಜಮಾನೆ ಬರಿಯೆರೆ ತಡ ಮಲ್ಪುವೆ,’ ಅಂದ್‌ದ್ ತನ ಉಡಲ್‌ಡ್ ಎನ್ನೊಂದು

⁴⁹ತನ ಜತೆ ಬೇಲೆದಾಕುಲೆಗ್ ಹಾಕ್ಯೆರೆ ಸುರು ಮಲ್ತ್‌ದ್ ಪರ್ಪೆಲೆರೆ ಜತೆಟ್ ತಿನೊಂದು ಪರೊಂದು ಉಪ್ಪುವೆ.

⁵⁰ಆಂಡ ಆಯೆ ಎನ್ನಂದಿ ದಿನೊಟ್ಲಾ ತೆರಿಯಂದಿ ಗಳಿಗೆಡ್ಲಾ ಆ ಬೇಲೆದಾಯನ ಯಜಮಾನೆ ಬತ್ತ್‌ದ್ ಆಯಗ್ ಭಯಂಕರ ಪೆಟ್ಟ್ ಕೊರ್ಪಾದ್

⁵¹ಕಪಟಿಲೆಗ್ ಆವೊಡಾಯಿ ಗತಿನ್ ಆಯಗ್ ನೇಮಕ ಮಲ್ಪುವೆ. ಅವುಲು ಅರಬಾಯಿಲಾ ಕಟಕಟ ಕೂಲಿ ಕಡೆಪಿನವುಲಾ ಉಪ್ಪುಂಡು.”