Read Tulu ಮತ್ತಾಯೆ 26 Bible Online

ಮತ್ತಾಯೆ 26 - Tulu bible

ಮತ್ತಾಯೆ 26

¹ಯೇಸು ಈ ಪಾತೆರೊಲೆನ್ ಮಾತ ಪಂಡ್ದ್ ಮುಗಿತಿ ಬೊಕ್ಕ ತನ ಶಿಷ್ಯೆರೆಡ,

²“ರಡ್ಡ್ ದಿನೊಡ್ದು ಬೊಕ್ಕ ಪಸ್ಕ ಪರ್ಬ ಬರ್ಪುಂಡು ಅಂದ್‌ದ್ ನಿಕ್ಲೆಗ್ ಗೊತ್ತುಂಡು. ಅಪಗ ನರಮಾನಿ ಮಗನ್ ಕ್ರುಸ್ಸುಗು ಪತ್ತಾವೆರೆ ಒಚ್ಚಿದ್ ಕೊರುವೆರ್,” ಅಂದ್‌ದ್ ಪಂಡೆ.

³ಆ ಸಮಯೊಡು ಪ್ರಧಾನಯಾಜಕೆರ್‌ಲಾ, ಪ್ರಜೆತ ಹಿರಿಯೆರ್‌ಲಾ ಕಾಯಫೆ ಪನ್ಪಿ ಪ್ರಧಾನಯಾಜಕನ ಮಠೊಕು ಸೇರ್ದ್ ಬತ್ತ್‌ದ್,

⁴ಯೇಸುನು ಉಪಾಯೊಡು ಪತ್ತ್‌ದ್ ಕೆರೊಡು ಅಂದ್‌ದ್ ಆಲೋಚನೆ ಮಲ್ತೊಂಡೆರ್.

⁵“ಆಂಡಲಾ ಪರ್ಬದಪಗ ಪತ್ತುನ ಬೊಡ್ಚಿ, ನಮ ಜನೊಕುಲೆಡ್ ಗಲಾಟೆ ಆವು,” ಅಂದ್‌ದ್ ಪಾತೆರೊಂಡೆರ್.

⁶ಯೇಸು ಬೇಥಾನ್ಯೊಡು ಕೊಷ್ಟದಾಯೆ ಆದುಪ್ಪು ಸೀಮೋನನ ಇಲ್ಲಡ್ ಇತ್ತಿನಪಗ ಒರ್ತಿ ಪೊಂಜೊವು

⁷ಮಸ್ತ್ ಬಿಲೆತ ಕಮ್ಮೆನದ ಎಣ್ಣೆದ ಕುಪ್ಪಿನ್ ದೆತ್ತೊಂದು ಬತ್ತ್‌ದ್ ಆಯೆ ವಣಸ್‌ಗ್ ಕುಲ್ಲೊಂದಿತ್ತಿನಪಗ ಆ ಎಣ್ಣೆನ್ ಯೇಸುನ ತರೆತ ಮಿತ್ತ್ ಮೈತಲ್.

⁸ಶಿಷ್ಯೆರ್ ಉಂದೆನ್ ತೂದು ಕೋಪೊಡು, “ಈ ನಷ್ಟ ದಾಯೆಗ್?

⁹ಈ ಎಣ್ಣೆನ್ ಮಸ್ತ್ ದುಡ್ಡುಗು ಮಾರ್ದ್ ಬಡವೆರೆಗ್ ಕೊರ್ತೊಲಿ ಅತ್ತಾ?” ಪಂಡೆರ್.

¹⁰ಯೇಸು ಉಂದೆನ್ ತೆರಿದ್ ಅಕ್ಲೆಡ, “ಈ ಪೊಂಜೊವುಗು ದಾಯೆಗ್ ತೊಂದರೆ ಕೊರೊಂದುಲ್ಲರ್? ಮೋಲು ಎಂಕ್ ಎಡ್ಡೆ ಬೇಲೆ ಮಲ್ತಲ್.

¹¹ಬಡವೆರ್ ಏಪಲಾ ನಿಕ್ಲೆಡೊಪ್ಪ ಉಪ್ಪುವೆರ್, ಆಂಡ ಯಾನ್ ಏಪಲಾ ನಿಕ್ಲೆಡೊಪ್ಪ ಉಪ್ಪುಜಿ.

¹²ಮೋಲು ಈ ಎಣ್ಣೆನ್ ಎನ ಮೆಯಿಕ್ ಮೈತಿನವು ಎನ ಮರಣಡ್ದುಂಬು ಆಪಿ ಕ್ರಿಯೊಲೆಗ್ ಬೋಡಾದ್ ಮಲ್ತಲ್.

¹³ಈ ಸುವಾರ್ತೆನ್ ಇಡೀ ಲೋಕೊಡು ಓಲೋಲು ಸಾರಿಯುಂಡಾ ಅಲ್ಪಲ್ಪ ಮೋಲು ಮಲ್ತಿನೆನ್ ಆಲೆನ ನೆನೆಪುಗಾದ್ ಪನ್ವೆರ್ ಅಂದ್‌ದ್ ನಿಕ್ಲೆಗ್ ನಿಜಾದ್ ಪನ್ಪೆ,” ಅಂದ್‌ದ್ ಪಂಡೆ.

¹⁴ಐಡ್ದ್ ಬೊಕ್ಕ ಪದ್ರಾಡ್ ಶಿಷ್ಯೆರೆಡ್ ಒರಿ ಇಸ್ಕಾರಿಯೋತ ಯೂದೆ ಪನ್ಪಿನಾಯೆ ಪ್ರಧಾನಯಾಜಕೆರೆ ಕೈತಲ್‌ ಪೋದು,

¹⁵“ಯಾನ್ ಯೇಸುನು ನಿಕ್ಲೆಗ್ ಪತ್ತ್‌ದ್ ಕೊರಿಯೆಡ ಎಂಕ್ ದಾದ ಕೊರ್ಪರ್?” ಅಂದ್‌ದ್ ಕೇಂಡೆ. ಐಕ್ ಅಕುಲು ಆಯಗ್ ಮುಪ್ಪ ಬೊಳ್ಳಿದ ನಾಣ್ಯೊನು ಗೆನ್ತ್‌ದ್ ಕೊರಿಯೆರ್.

¹⁶ಆನಿಡ್ದಿಂಚಿ ಆಯೆ ಯೇಸುನು ಪತ್ತ್‌ದ್ ಕೊರಿಯೆರೆ ಸಮಯೊನು ತೂವೊಂದಿತ್ತೆ.

¹⁷ಪುಳಿದಾಂತಿ ರೊಟ್ಟಿದ ಪರ್ಬದ ಸುರುತ್ತ ದಿನತಾನಿ ಶಿಷ್ಯೆರ್ ಯೇಸು ಕೈತಲ್‌ ಬತ್ತ್‌ದ್, “ಪಸ್ಕದ ವಣಸ್ ಮಲ್ಪೆರೆ ಎಂಕುಲು ನಿಕ್ಕ್ ಓಲು ತಯಾರ್ ಮಲ್ಪೊಡು ಅಂದ್‌ದ್ ಕೇನ್ನಗ”

¹⁸ಆಯೆ, “ನಿಕುಲು ಪೇಂಟೆದ ಉಲಯಿ ಇಂಚಿತ್ತಿನಾಯನ ಕೈತಲ್‌ ಪೋದು ಆಯಡ, ‘ಎನ ಕಾಲ ಕೈತಲಾಂಡ್. ನಿನ ಇಲ್ಲಡ್ ಎನ ಶಿಷ್ಯೆರೆಡೊಪ್ಪ ಪಸ್ಕ ಪರ್ಬ ಮಲ್ಪುವೆ ಅಂದ್‌ದ್ ಬೋಧಕೆ ಪನ್ಪೆ ಅಂದ್‌ದ್ ಪನ್ಲೆ.’”

¹⁹ಯೇಸು ಅಕ್ಲೆಗ್ ಅಪ್ಪಣೆ ಕೊರಿಲೆಕ್ಕನೆ ಶಿಷ್ಯೆರ್ ಪಸ್ಕದ ವಣಸ್‌ನ್ ತಯಾರ್ ಮಲ್ತೆರ್.

²⁰ಬೈಯಗ್‌ ಆಯೆ ಪದ್ರಾಡ್ ಶಿಷ್ಯೆರೆಡೊಪ್ಪ ವಣಸ್‌ಗ್ ಕುಲ್ಲಿಯೆ.

²¹ಅಕುಲು ವಣಸ್ ಮಲ್ತೊಂದುಪ್ಪುನಗ ಆಯೆ, “ನಿಕ್ಲೆಗ್ ನಿಜಾದ್ ಪನ್ಪೆ, ನಿಕ್ಲೆಡ್ ಒರಿ ಎನನ್ ಪತ್ತ್‌ದ್ ಕೊರುವೆ,” ಅಂದ್‌ದ್ ಪಂಡೆ.

²²ಅಪಗ ಅಕುಲು ಬಾರೀ ದುಃಖೊಡು, “ಕರ್ತವಾ, ಯಾನತ್ತತ್ತಾ?” ಅಂದ್‌ದ್ ಪ್ರತಿ ಒರಿಲಾ ಕೇನಿಯೆರೆ ಸುರು ಮಲ್ತೆರ್.

²³ಐಕ್ ಆಯೆ, “ಬಟ್ಟಲ್ಡ್ ಎನಡೊಪ್ಪ ಕೈ ಪಾಡುನಾಯೆನೇ ಎನನ್ ಪತ್ತ್‌ದ್ ಕೊರ್ಪೆ.

²⁴ನರಮಾನಿ ಮಗೆ ಪಿದಾಡ್ದ್ ಪೋಪೆ ಸರಿ, ಅಂಚ ಆಯನ ಸಂಗತಿಡ್ ಬರೆತ್ಂಡತ್ತಾ. ಆಂಡ ಏರ್ ನರಮಾನಿ ಮಗನ್ ಪತ್ತ್‌ದ್ ಕೊರ್ಪೆನಾ ಆಯನ ಗತಿನ್ ದಾನೆಂದ್ ಪನೊಲಿ, ಆ ನರಮಾನಿ ಪುಟ್ಟಂದೆ ಇತ್ತ್‌ದ್ಂಡ ಆಯಗ್ ಎಡ್ಡೆ ಇತ್ತ್ಂಡ್.”

²⁵ಅಪಗ ಆಯನ್ ಪತ್ತ್‌ದ್ ಕೊರಿಯೆರೆ ಇತ್ತಿನ ಯೂದೆ, “ಗುರೂ, ಯಾನಾ?” ಪಂಡಿನೆಕ್ಕ್ ಯೇಸು ಆಯಗ್, “ಈಯೇ ಪಂಡ,” ಅಂದ್‌ದ್ ಪಂಡೆ.

²⁶ಅಕುಲು ವಣಸ್ ಮಲ್ತೊಂದುಪ್ಪುನಗ ಯೇಸು ರೊಟ್ಟಿನ್ ದೆತ್ತೊಂದು, ದೇವೆರೆನ್ ಸುಗಿತ್‌ದ್, ಪೊಲ್ತುದು ಶಿಷ್ಯೆರೆಗ್ ಕೊರ್ದು, “ದೆತ್ತೊನ್ಲೆ, ತಿನ್ಲೆ, ಉಂದು ಎನ ಶರೀರ,” ಅಂದ್‌ದ್ ಪಂಡೆ.

²⁷ಐಡ್ದ್ ಬೊಕ್ಕ ಪಾತ್ರೆನ್ ದೆತ್ತೊಂದು, ಸುಗಿತ್‌ದ್ ಅಕ್ಲೆಗ್ ಕೊರ್ದು, “ಉಂದೆಟ್ಟ್ ಇತ್ತಿನೆನ್ ಮಾತೆರ್ಲಾ ಪರ್ಲೆ,

²⁸ಉಂದು ಎನ ನೆತ್ತೆರ್, ಮಸ್ತ್ ಜನೊಕುಲೆ ಪಾಪೊಲೆ ಪರಿಹಾರೊಗಾದ್ ಗುತ್ತುದಿನ ಒಡಂಬಡಿಕೆದ ನೆತ್ತೆರ್.

²⁹ಯಾನ್ ಎನ ಅಮ್ಮೆರೆ ರಾಜ್ಯೊಡು ನಿಕ್ಲೆಡೊಪ್ಪ ಪೊಸತ್ತಾದ್ ಪರ್ಪಿನ ಆ ದಿನ ಮುಟ್ಟ ದ್ರಾಕ್ಷಾರಸೊನು ನನ ಪರ್ಪಿನೇ ಇಜ್ಜಿ, ಅಂದ್‌ದ್ ನಿಕ್ಲೆಗ್ ಪನ್ಪೆ”

³⁰ಬೊಕ್ಕ ಅಕುಲು ಕೀರ್ತನೆ ರಾಗ ಮಲ್ತ್‌ದ್ ಇಪ್ಪೆಗುಡ್ಡೆಗ್ ಪಿದಾಡ್ದ್ ಪೋಯೆರ್.

³¹ಅಪಗ ಯೇಸು ಅಕ್ಲೆಡ, ನಿಕುಲು ಮಾತೆರ್ಲಾ ಈ ರಾತ್ರೆಡ್ ಎನ ಸಂಗತಿಡ್ ಪೋಡಿದ್ ಪಿರ ಜಾರುವರ್. ದಾಯೆಗಂದ್ಂಡ, “ಯಾನ್, ‘ಕುರುಬಗ್ ಹಾಕುವೆ, ಪುಂಡುದ ಕುರಿಕುಲು ಚಲ್ಲಾಪಿಲ್ಲಿ ಆವು,’ ಅಂದ್‌ದ್ ಬರೆತ್ಂಡತ್ತಾ.

³²ಆಂಡ ಯಾನ್ ಜೀವಾದ್ ಲಕ್ಕಿ ಬೊಕ್ಕ ನಿಕ್ಲೆ ದುಂಬು ಗಲಿಲಾಯೊಗು ಪೋವೆ,” ಅಂದ್‌ದ್ ಪಂಡೆ.

³³ಆಂಡ ಪೇತ್ರೆ ಆಯಡ, “ಮಾತೆರ್ಲಾ ನಿನ ಬಗೆಟ್ ಪೋಡಿದ್ ಪಿರಜಾರಿಯೆರ್ಡಲಾ ಯಾನ್ ಏಪೊಗ್ಲಾ ಪಿರಜಾರಯೆ,” ಅಂದ್‌ದ್ ಉತ್ತರ ಕೊರಿಯೆ.

³⁴ಯೇಸು, “ನಿಕ್ಕ್ ನಿಜಾದ್ ಪನ್ಪೆ. ಉಂದೇ ರಾತ್ರೆ ಕೋರಿ ಕಿಲೆಪುನೆಕ್ಕ್ ದುಂಬು ಈ ಎನ ಬಗೆಟ್, ಆಯನ್ ತೆರಿಯಯೆ ಅಂದ್‌ದ್ ಮೂಜಿ ಸರ್ತಿ ಪನ್ಪ,” ಪಂಡೆ.

³⁵ಪೇತ್ರೆ ಆಯಡ, “ಯಾನ್ ನಿನಡೊಪ್ಪ ಸೈಯೊಡಾಂಡಲಾ ನಿನನ್ ತೆರಿಯಯೆ ಅಂದ್‌ದ್ ಪನಯೆ,” ಅಂಚೆನೇ ಮಾತ ಶಿಷ್ಯೆರ್‌ಲಾ ಪಂಡೆರ್.

³⁶ಯೇಸು ತನ ಶಿಷ್ಯೆರೆಡೊಪ್ಪ ಗೆಥ್ಸೇಮನೆ ಪನ್ಪಿ ತೋಟೊಗು ಬತ್ತ್‌ದ್ ಅಕ್ಲೆಡ, “ಯಾನ್ ಪೋದು ಪ್ರಾರ್ಥನೆ ಮಲ್ಪುವೆ, ನಿಕುಲು ಮುಲ್ಪನೆ ಕುಲ್ಲುಲೆ.” ಅಂದ್‌ದ್ ಪಂಡೆ.

³⁷ಪೇತ್ರನ್ಲಾ ಜೆಬೆದಾಯನ ಇರ್ವೆರ್ ಜೋಕುಲೆನ್ಲಾ ಲೆತ್ತೊಂದು ಪೋದು ದುಃಖ ಮಲ್ಪೆರೆಲಾ ವ್ಯಥೆ ಬುಡಿಯೆರೆಲಾ ಸುರು ಮಲ್ತೆ.

³⁸ಬೊಕ್ಕ ಅಕ್ಲೆಡ, “ಎನ ಪ್ರಾಣ ಸೈತ್ ಪೋಪಿನಾತ್ ದುಃಖೊಡು ದಿಂಜಿದ್‌ಂಡ್; ನಿಕುಲು ಮೂಲೇ ಇತ್ತ್‌ದ್ ಎನಡೊಪ್ಪ ಎಚ್ಚರಿಕೆ ಆದುಪ್ಪುಲೆ,” ಅಂದ್‌ದ್ ಪಂಡೆ.

³⁹ಒಂತೆ ದುಂಬು ಪೋದು ಅಡ್ಡಬೂರ್ದು, “ಎನ ಅಮ್ಮೆರೇ, ಸಾದ್ಯ ಇತ್ತ್ಂಡ ಈ ಕಷ್ಟ ಅನುಭವಿಪುನ ದುನ್ನ ಎನನ್ ಬುಡ್ದು ಪೋವಡ್; ಎಂಚಲಾ ಎನ ಚಿತ್ತದ ಲೆಕ್ಕ ಅತ್ತ್ ನಿನ ಚಿತ್ತದಲೆಕ್ಕನೇ ಆವಡ್ ಅಂದ್‌ದ್ ದೇವೆರೆಡ ಪ್ರಾರ್ಥನೆ ಮಲ್ತೆ.”

⁴⁰ಐಡ್ದ್ ಬೊಕ್ಕ ಶಿಷ್ಯೆರೆ ಕೈತಲ್‌ ಬತ್ತ್‌ದ್ ಅಕುಲು ನಿದ್ರೆ ಮಲ್ಪುನೆನ್ ತೂದು ಪೇತ್ರಗ್, “ಇಂಚನ, ಒಂಜಿ ಗಳಿಗೆ ಆಂಡಲಾ ಎನಡೊಪ್ಪ ಎಚ್ಚರಿಕೆ ಆದುಪ್ಪಯರಾ?

⁴¹ನಿಕುಲು ಶೋಧನೆಗ್ ಬೂರಂದಿಲೆಕ್ಕ ಎಚ್ಚರಿಕೆ ಆದಿತ್ತ್‌ದ್ ಪ್ರಾರ್ಥನೆ ಮಲ್ಪುಲೆ. ಆತ್ಮ ತಯಾರುಂಡು ಸರಿ, ಆಂಡ ಶರೀರ ಬಲದಾಂತಿನವು,” ಅಂದ್‌ದ್ ಪಂಡೆ.

⁴²ಕುಡ ರಡ್ಡನೆ ಸರ್ತಿ ಪೋದು, “ಎನ ಅಮ್ಮೆರೆ, ಯಾನ್ ಪರಂದೆ ಈ ಕಷ್ಟ ಅನುಭವಿಪುನ ದುನ್ನ ಎನಡ್ದ್ ಬುಡ್ದು ಪೋಯೆರೆ ಬಲ್ಲಿಂದ್ ಇತ್ತ್ಂಡ ನಿನ ಚಿತ್ತದಲೆಕ್ಕನೇ ಆವಡ್ ಅಂದ್‌ದ್,” ಪ್ರಾರ್ಥನೆ ಮಲ್ತೆ.

⁴³ಆಯೆ ಕುಡ ಬತ್ತಿನಪಗ ಅಕುಲು ನಿದ್ರೆ ಮಲ್ಪುನೆನ್ ತೂಯೆ, ಅಕ್ಲೆನ ಕಣ್ಣ್‌ಲು ದುನ್ನ ಆದಿತ್ತ್ಂಡ್.

⁴⁴ಐಡ್ದ್ ಬೊಕ್ಕ ಅಕ್ಲೆನ್ ಬುಡ್ದು ಪೋದು ಕುಡ ಅವ್ವೇ ಪಾತೆರೊನು ಪಂಡ್ದ್ ಮೂಜನೇ ಸರ್ತಿ ಪ್ರಾರ್ಥನೆ ಮಲ್ತೆ.

⁴⁵ಐಡ್ದ್ ಬೊಕ್ಕ ಶಿಷ್ಯೆರೆ ಕೈತಲ್‌ ಬತ್ತ್‌ದ್ ಅಕ್ಲೆಡ, “ನಿಕುಲು ನನಲಾ ನಿದ್ರೆ ಮಲ್ತೊಂದು ಬಚ್ಚೆಲ್ ದೆತ್ತೊಂದುಲ್ಲರಾ? ಇಂದಾ, ಗಳಿಗೆ ಕೈತಲ್ ಬತ್ತ್ಂಡ್, ಇತ್ತೆ ನರಮಾನಿ ಮಗನ್ ಪಾಪಿಷ್ಟೆರೆ ಕೈಕ್ ಒಚ್ಚಿದ್ ಕೊರುವೆರ್.

⁴⁶ಲಕ್ಕ್‌ಲೆ, ನಮ ಪೋಯಿ. ಎನನ್ ಪತ್ತ್‌ದ್ ಕೊರ್ಪಿನಾಯೆ ಕೈತಲ್ ಬೈದೆ ತೂಲೆ,” ಅಂದ್‌ದ್ ಪಂಡೆ.

⁴⁷ಆಯೆ ನನಲಾ ಪಾತೆರೊಂದುಪ್ಪುನಗನೇ, ಪದ್ರಾಡ್ ಶಿಷ್ಯೆರೆಡ್ ಒರಿ ಯೂದೆ ಬತ್ತೆ. ಆಯಡೊಪ್ಪ ಪ್ರಧಾನಯಾಜಕೆರೆ, ಶಾಸ್ತ್ರಿಲೆ, ಪ್ರಜೆತ ಹಿರಿಯೆರೆ ಮೊಕ್ಲೆ ಕಡೆಡ್ದ್ ಒಂಜಿ ಮಲ್ಲ ಜನೊಕುಲೆ ಗುಂಪು ಕತ್ತಿ ಸೋಂಟೆಲೆನ್ ಪತ್ತೊಂದು ಬತ್ತೆರ್.

⁴⁸ಉಂದತ್ತಂದೆ ಆಯನ್ ಪತ್ತ್ ಕೊರ್ಪಿನಾಯೆ ಅಕ್ಲೆಡ, “ಯಾನ್ ಏರೆಗ್ ಮುತ್ತು ಕೊರ್ಪೆನಾ ಆಯೆನೇ ಆಯೆ, ಆಯನ್ ಪತ್ತ್‌ಲೆ,” ಅಂದ್‌ದ್ ಗುರ್ತ ಪಂಡ್ದ್ ಕೊರಿಯೆ.

⁴⁹ಅಪಗನೆ ಆಯೆ ಯೇಸುನ ಕೈತಲ್‌ ಪೋದು, “ಗುರೂ, ವಂದನೆ,” ಪಂಡ್ದ್ ಆಯಗ್ ಮುತ್ತು ಕೊರಿಯೆ.

⁵⁰ಯೇಸು ಆಯಡ, “ಸ್ನೇಹಿತಾ, ಈ ಮಲ್ಪೆರೆ ಬೈದಿನ ಬೇಲೆ ಉಂದೆನಾ?” ಅಂದ್‌ದ್ ಪಂಡಿನಪಗ ಅಕುಲು ಕೈತಲ್‌ ಬತ್ತ್‌ದ್ ಯೇಸುನ ಮಿತ್ತ್ ಕೈ ಪಾಡ್ದ್ ಆಯನ್ ಪತ್ತಿಯೆರ್.

⁵¹ಪತ್ತಿಲೆಕ್ಕನೇ ಯೇಸುಡೊಪ್ಪ ಇತ್ತಿನಾಕುಲೆಡ್ ಒರಿ ಕೈ ದುಂಬು ಮಲ್ತ್‌ದ್ ತನ ಕತ್ತಿನ್ ದೆತ್ತ್‌ದ್ ಪ್ರಧಾನಯಾಜಕನ ಬೇಲೆದಾಯಗ್ ಹಾಕ್‌ದ್ ಆಯನ ಬಲತ್ತ ಕೆಬಿನ್ ಕಡ್ತ್‌ದ್ ಬುಡಿಯೆ.

⁵²ಅಪಗ ಯೇಸು ಆಯಗ್, “ನಿನ ಕತ್ತಿನ್ ಪಿರ ಐತ ಜಾಗ್‌ಡ್ ದೀಲ. ಕತ್ತಿ ಪತ್ತಿನಾಕುಲು ಕತ್ತಿಡ್ದೇ ಸೈಪೆರ್.

⁵³ಯಾನ್ ಎನ ಅಮ್ಮೆರೆಡ ನಟ್ಟೊಂಡ ಎಂಕ್ ಇತ್ತೆನೇ ಪದ್ರಾಡ್ ದಂಡ್‌ಲೆಡ್ದ್ ಹೆಚ್ಚ್ ದೂತೆರೆ ಸೈನೊನು ಕಡಪುಡ್ದು ಕೊರಿಯೆರೆ ಸಾದ್ಯ ಇಜ್ಜಿ ಅಂದ್‌ದ್ ಎನ್ನುವನಾ?

⁵⁴ಕಡಪುಡ್ದು ಕೊರಿಯೆಡ ಎಂಕ್ ಇಂಚಿಂಚಿನವು ಆವೊಡು ಪನ್ಪಿನ ಶಾಸ್ತ್ರದ ಪಾತೆರೊಲು ನಡಪುನು ಎಂಚಾ,” ಅಂದ್‌ದ್ ಪಂಡೆ.

⁵⁵ಅವ್ವೇ ಗಳಿಗೆಡ್ ಯೇಸು ಗುಂಪುಗುಂಪಾದ್ ಸೇರ್ದಿತ್ತಿ ಜನೊಕುಲೆಗ್, “ಒರಿ ಕಲ್ವನ್ ಪತ್ತಿಯೆರೆ ಬತ್ತಿಲೆಕ್ಕ ಕತ್ತಿನ್ಲಾ, ಸೋಂಟೆನ್ಲಾ ಪತ್ತೊಂದು ಎನನ್ ಪತ್ತಿಯೆರೆ ಬತ್ತರಾ? ಯಾನ್ ದಿನಾಲ ದೇವಾಲಯೊಡು ಕುಲ್ಲೊಂದು ಬೋಧನೆ ಮಲ್ತೊಂದುಪ್ಪುನಗ ನಿಕುಲು ಎನನ್ ಪತ್ತ್‌ಜರ್.

⁵⁶ಆಂಡ ಉಂದು ಪ್ರವಾದಿಲು ಶಾಸ್ತ್ರೊಡು ಬರೆತಿನವು ಪೂರ್ತಿ ಆಪಿಲೆಕ್ಕ ನಡತ್ಂಡ್,” ಅಂದ್‌ದ್ ಪಂಡೆ. ಅಪಗ ಶಿಷ್ಯೆರ್ ಮಾತೆರ್ಲಾ ಆಯನ್ ಬುಡ್ದು ಪಾರ್‌ಪೋಯೆರ್.

⁵⁷ಬೊಕ್ಕ ಯೇಸುನು ಪತ್ತಿನಾಕುಲು ಪ್ರಧಾನಯಾಜಕೆ ಆಯಿ ಕಾಯಫ ಕೈತಲ್‌ ಲೆತ್ತೊಂದು ಪೋಯೆರ್. ಅಲ್ಪ ಶಾಸ್ತ್ರಿಲುಲಾ, ಹಿರಿಯೆರ್‌ಲಾ ಕೂಡ್ದು ಬತ್ತ್‌ತ್ತೆರ್.

⁵⁸ಪೇತ್ರೆಲಾ ದೂರೊಡ್ದು ಆಯನ ಬೆರಿಯೆ ಪೋವೊಂದು ಪ್ರಧಾನಯಾಜಕನ ಮಠತ ಜಾಲ್ ಮುಟ್ಟ ಬತ್ತ್‌ದ್ ಉಲಯಿ ಪೋದು ಆಯನ ಗತಿ ದಾನೆ ಆಪುಂಡು ತೂವೊಡು ಅಂದ್‌ದ್ ಪಾರದಾಕುಲೆಡೊಪ್ಪ ಕುಲ್ಲಿಯೆ.

⁵⁹ಅಪಗ ಪ್ರಧಾನಯಾಜಕೆರ್‌ಲಾ ಹಿರಿಸಭೆತಾಕುಲುಲಾ ಯೇಸುನು ಕೆರ್ಪಾವೊಡು ಅಂದ್‌ದ್ ಆಯ ಮಿತ್ತ್ ಸುಳ್ಳು ಸಾಕ್ಷಿನ್ ನಾಡಿಯೆರ್;

⁶⁰ಆಂಡ ಮಸ್ತ್ ಜನ ಸುಳ್ಳು ಸಾಕ್ಷಿ ಕೊರಿಯೆರ್ಡಲಾ, ಆಯಡ ದಾಲಾ ತಪ್ಪು ತಿಕ್ಕಿಜಿ. ಕಡೆಕ್ಕ್ ಇರ್ವೆರ್ ದುಂಬು ಬತ್ತ್‌ದ್,

⁶¹“ಈ ನರಮಾನಿ ಪನೊಂದಿತ್ತೆ, ‘ಯಾನ್ ದೇವೆರೆ ಆಲಯೊನು ದರ್ತ್‌ದ್ ಮೂಜಿ ದಿನತ ಉಲಯಿ ಕಟ್ಟುವೆ ಅಂದ್‌ದ್ ಇಂಬೆ ಪನ್ತೆ ,’” ಪಂಡ್ದ್ ಪನ್ನಗ,

⁶²ಪ್ರಧಾನಯಾಜಕೆ ಲಕ್ಕ್‌ದ್ ಉಂತುದು, “ಈ ದಾಲಾ ಉತ್ತರ ಕೊರ್ಪುಜನಾ? ಮೊಕುಲು ನಿನ ಮಿತ್ತ್ ಪನ್ಪಿನ ಈ ಸಾಕ್ಷಿ ಎಂಚಿನವು ಅಂದ್‌ದ್,” ಆಯನ್ ಕೇನ್ನಗ ಯೇಸು ಮನಿಪಂದೆ ಇತ್ತೆ.

⁶³ಅಪಗ ಪ್ರಧಾನಯಾಜಕೆ, “ನಿಕ್ಕ್ ಜೀವ ಇತ್ತಿ ದೇವೆರೆನ ಆಜ ದೀಪೆ. ಈ ದೇವೆರೆ ಮಗೆ ಆದುಪ್ಪು ಕ್ರಿಸ್ತೆ ಅಂದಾ, ಅತ್ತಾ? ಅಂದ್‌ದ್ ಎಂಕ್ಲೆಗ್ ಈ ಪನೊಡು,” ಪಂಡ್ದ್ ಪನ್ನಗ

⁶⁴ಯೇಸು ಆಯಗ್, “ಈಯೇ ಪಂಡ! ಉಂದತ್ತಂದೆ ನನ ಮಿತ್ತ್ ನರಮಾನಿ ಮಗೆ ಸರ್ವಶಕ್ತನ ಬಲತ್ತ ಮರ್ಗಿಲ್‌ಡ್ ಕುಲ್ಲುದುಪ್ಪುನೆನ್ಲಾ, ಬಾನದ ಮುಗಲ್‌ದ ಮಿತ್ತ್ ಕುಲ್ಲೊಂದು ಬರ್ಪಿನೆನ್ಲಾ ತೂವರ್, ಅಂದ್‌ದ್ ನಿಕ್ಲೆಗ್ ಪನ್ಪೆ,” ಅಂದ್‌ದ್ ಪಂಡೆ.

⁶⁵ಅಪಗ ಪ್ರಧಾನಯಾಜಕೆ ತನ ಅಂಗಿನ್ ಪರ್ತೊಂದು, “ಉಂದು ದೂಷಣೆದ ಪಾತೆರ, ನಂಕ್ ಸಾಕ್ಷಿಲು ನನ ದಾಯೆಗ್ ಬೋಡು? ಆಯೆ ಇತ್ತೆ ಪಂಡಿನ ದೂಷಣೆದ ಪಾತೆರೊನು ಕೇಂಡರತ್ತಾ?

⁶⁶ನಿಕ್ಲೆಗ್ ಎಂಚ ತೋಜುಂಡು?” ಪನ್ನಗ, “ಉಂಬೆ ಮರಣ ದಂಡನೆಗ್ ತಕ್ಕದಾಯೆ,” ಅಂದ್‌ದ್ ಉತ್ತರ ಕೊರಿಯೆರ್.

⁶⁷ಅಪಗ ಆಯನ ಮೋನೆದ ಮಿತ್ತ್ ಉಬ್ಬಿದ್ ಆಯನ್ ಗುದ್ದಿಯೆರ್. ಕೆಲೆವೆರ್ ಆಯನ ಕೆಪ್ಪೆಗ್ ಹಾಕ್‌ದ್

⁶⁸“ಕ್ರಿಸ್ತ, ನಿಕ್ಕ್ ಹಾಕಿನಾಯೆ ಏರ್? ಎಂಕ್ಲೆಗ್ ಪ್ರವಾದನೆ ಪನ್ಲ,” ಪಂಡೆರ್.

⁶⁹ಇಂಚಿಡ್ದ್ ಪೇತ್ರೆ ಪಿದಯಿ ಜಾಲ್‌ಡ್ ಕುಲ್ದಿತ್ತೆ. ಅಲ್ಪ ಒರ್ತಿ ಚಾಕ್ರಿದಾಲ್ ಆಯ ಕೈತಲ್‌ ಬತ್ತ್‌ದ್, “ಈಲಾ ಗಲಿಲಾಯದ ಯೇಸುಡೊಪ್ಪ ಇತ್ತಿನಾಯೆ.” ಪಂಡಿನಪಗ

⁷⁰ಆಯೆ, “ಇಜ್ಜಿ, ಈ ದಾದ ಪನೊಂದುಲ್ಲನ ಎಂಕ್ ತೆರಿಯಂದ್,” ಅಂದ್‌ದ್ ಮಾತೆರೆ ಎದುರು ಆರೆಂಜಿಯೆ.

⁷¹ಆಯೆ ಅಲ್ತ್‌ಡ್ದ್ ಬಾಕಿಲ್‌ದ ಕೈತಲ್‌ ಪೋಯಿನಪಗ ಬೊಕ್ಕೊರ್ತಿ ಚಾಕ್ರಿದಾಲ್ ಆಯನ್ ತೂದು ಕೈತಲ್‌ಡ್ ಉಂತುದಿನಾಕುಲೆಗ್, “ಉಂಬೆಲಾ ನಜರೇತ್‌ದ ಯೇಸುಡೊಪ್ಪ ಇತ್ತಿನಾಯೆ.” ಪಂಡಲ್.

⁷²ಆಯೆ ಕುಡ, “ಆರೆಂಜಿಯೆ, ಆ ನರಮಾನಿನ್ ಯಾನ್ ತೆರಿಯಯೆ,” ಅಂದ್‌ದ್ ಆಜ ದೀವೊಂದು ಪಂಡೆ.

⁷³ಒಂತೆ ಪೊರ್ತುಡ್ದು ಬೊಕ್ಕ ಅಲ್ಪ ಉಂತುದಿನಾಕುಲು ದುಂಬು ಬತ್ತ್‌ದ್ ಪೇತ್ರಗ್, “ಕಂಡಿತಾದ್ ಈಲಾ ಅಕ್ಲೆಡ್ ಒರಿ, ನಿನ ಬಾಷೆನೇ ಈ ಗಲಿಲಾಯದಾಯೆ ಅಂದ್‌ದ್ ತೋಜಾವುಂಡು,” ಅಂದ್‌ದ್ ಪನ್ನಗ

⁷⁴ಆಯೆ, “ಆ ನರಮಾನಿನ್ ಯಾನ್ ತೆರಿಯಯೆ,” ಅಂದ್‌ದ್ ಶಾಪಿಯೊನಿಯೆರೆಗ್ಲಾ, ಆಜ ಪಾಡಿಯೆರೆಗ್ಲಾ ಸುರು ಮಲ್ತೆ. ಅಪಗನೇ ಕೋರಿ ಕಿಲೆತ್ತ್ಂಡ್.

⁷⁵ಅಪಗ ಪೇತ್ರೆ, “ಕೋರಿ ಕಿಲೆಪೊಡ್ದು ದುಂಬು ಮೂಜಿ ಸರ್ತಿ ಎನ ಬಗೆಟ್, ಆಯನ್ ತೆರಿಯಯೆ ಅಂದ್‌ದ್ ಅರೆಂಜುವ,” ಪಂಡ್ದ್ ಯೇಸು ಪನ್ತಿನ ಪಾತೆರೊನು ನೆನೆಪು ಮಲ್ತ್‌ದ್ ಪಿದಯಿ ಪೋದು ಬಿಕ್ಕ್‌ಬಿಕ್ಕ್‌ದ್ ಬುಲ್ತೆ.