Read Tulu ಮತ್ತಾಯೆ 28 Bible Online

ಮತ್ತಾಯೆ 28 - Tulu bible

ಮತ್ತಾಯೆ 28

¹ಸಬ್ಬತ್‌ದಿನ ಆಯಿ ಬೊಕ್ಕ ವಾರದ ಸುರುತ್ತ ದಿನ ಬೊಲ್ಪಾನಗ ಮಗ್ದಲದ ಮರಿಯಲಾ, ಕುಡೊರ್ತಿ ಮರಿಯಲಾ ಸಮಾಧಿನ್ ತೂಯೆರೆ ಬತ್ತೆರ್.

²ಅಪಗ ಮಲ್ಲ ಭೂಕಂಪ ಆಂಡ್. ಕರ್ತವ ದೂತೆ ಪರಲೋಕೊಡ್ದು ತಿರ್ತ್ ಬತ್ತ್‌ದ್ ಆ ಕಲ್ಲ್‌ನ್ ಬಾಕಿಲ್‌ಡ್ದ್ ಪೊರೆಲ್ಪಾದ್ ಐತ ಮಿತ್ತ್ ಕುಲ್ಲೊಂಡೆ.

³ಆಯ ಮೋನೆದ ರೂಪ ಮಿಂಚಿದಲೆಕ್ಕಲಾ ಆಯ ಕುಂಟು ಹಿಮತಾತ್ ಬೊಲ್ದು ಆದಿತ್ತ್ಂಡ್.

⁴ಆ ಸಮಾಧಿದ ಕಾವಲ್ದಾಕುಲು ಆಯಗ್ ಪೋಡಿದ್ ನಡ್‌ಗ್‌ದ್ ಸೈತಿ ಲೆಕ್ಕ ಆಯೆರ್.

⁵ಅಪಗ ದೂತೆ ಆ ಪೊಂಜೊವುಲೆಡ, “ನಿಕುಲು ಪೋಡ್ಯಡೆ. ಕ್ರುಸ್ಸುಗು ಪಾಡ್ದಿತ್ತಿನ ಯೇಸುನು ನಾಡುವರ್ ಅಂದ್‌ದ್ ತೆರಿದೆ. ಆಯೆ ಮುಲ್ಪ ಇಜ್ಜೆ.

⁶ಆಯೆ ಪಂಡಿಲೆಕ್ಕನೇ ಆಯೆ ಜೀವಾದ್ ಲಕ್ಕ್‌ದೆ. ಬಲೆ, ಆಯನ್ ದೀತಿನ ಜಾಗ್‌ನ್ ತೂಲೆ.

⁷ಬೊಕ್ಕ ಬೇಗ ಪೋದು ಶಿಷ್ಯೆರೆಗ್ ಪನ್ಲೆ, ‘ಸೈತಿನಾಯೆ ಬದ್‌ಕ್‌ದೆ. ಆಯೆ ನಿಕ್ಲೆಡ್ದ್ ದುಂಬು ಗಲಿಲಾಯೊಗು ಪೋವೊಂದುಲ್ಲೆ. ನಿಕುಲು ಆಯನ್ ಅವುಲು ತೂವರ್,’ ಯಾನ್ ಪಂತಿನೆನ್ ನಿಕುಲು ನೆನೆಪು ಮಲ್ಪುಲೆ,” ಅಂದ್‌ದ್ ಪಂಡೆ.

⁸ಅಕುಲು ಪೋಡಿದ್‌ಲಾ, ಮಸ್ತ್ ಸಂತೋಷೊಡ್ಲಾ ಸಮಾಧಿಡ್ದ್ ಪಿದಾಡ್ದ್ ಶಿಷ್ಯೆರೆ ಕೈತಲ್‌ ಪನಿಯೆರೆ ಪಾರ್ದ್ ಪೋಯೆರ್.

⁹ಅಕುಲು ಸಾದಿಡುಪ್ಪುನಗ ಯೇಸು ಅಕಲ್ನ ಎದುರು ಬತ್ತ್‌ದ್, “ನಿಕ್ಲೆಗ್ ಸಮಾಧಾನ ಆವಡ್,” ಪಂಡೆ. ಅಕುಲು ಮುಟ್ಟ ಬತ್ತ್‌ದ್ ಆಯ ಕಾರಕೈತಲ್ ಅಡ್ಡಬೂರ್ದು ಆಯಗ್ ವಂದನೆ ಮಲ್ತೆರ್.

¹⁰ಯೇಸು ಅಕ್ಲೆಡ, “ಪೋಡ್ಯಡೆ, ಎನ ಸಹೋದರೆರೆ ಕೈತಲ್‌ ಪೋದು ಅಕುಲು ಗಲಿಲಾಯೊಗು ಪೋವೊಡಂದ್‌ದ್ ಪನ್ಲೆ. ಅವುಲು ಎನನ್ ತೂವೆರ್,” ಅಂದ್‌ದ್ ಪಂಡೆ.

¹¹ಅಕುಲು ಪೋವೊಂದುಪ್ಪುನಗ ಕಾವಲ್ದಾಕುಲೆಡ್ ಕೆಲೆವೆರ್ ಪಟ್ಟಣದುಲಯಿ ಬತ್ತ್‌ದ್ ನಡತಿ ಸಂಗತಿಲೆನ್ ಪ್ರಧಾನಯಾಜಕೆರೆಗ್ ತೆರಿಪಾಯೆರ್.

¹²ಮೊಕುಲು ಹಿರಿಯೆರೆಡೊಪ್ಪ ಕೂಡುದು ಆಲೋಚನೆ ಮಲ್ತ್‌ದ್ ಆ ಕಾವಲ್ದಾಕುಲೆಗ್ ಮಸ್ತ್ ದುಡ್ಡು ಕೊರ್ದು,

¹³“ಆಯನ್ ಶಿಷ್ಯೆರ್ ರಾತ್ರೆಡ್ ಬತ್ತ್‌ದ್ ಎಂಕುಲು ನಿದ್ರೆ ಮಲ್ತೊಂದುಪ್ಪುನಗ ಕಂಡೊಂದು ಪೋಯೆರ್, ಅಂದ್‌ದ್ ಪನ್ಲೆ.

¹⁴ಈ ಸುದ್ಧಿ ದೇಶಾಧಿಪತಿನ ಕೆಬಿಕ್ ಬೂರುಂಡ ಎಂಕುಲು ಆಯನ್ ಸಮಾಧಾನ ಮಲ್ತ್‌ದ್ ನಿಕ್ಲೆಗ್ ದಾಲಾ ತೊಂದರೆ ಆವಂದಿಲೆಕ್ಕ ಮಲ್ಪುವ,” ಪಂಡೆರ್.

¹⁵ಮೊಕುಲು ಆ ದುಡ್ಡುನು ದೆತ್ತೊಂದು ತನ್ಕುಲೆಗ್ ಪಂಡ್ದ್ ಕೊರಿಲೆಕ್ಕನೇ ಮಲ್ತೆರ್. ಈ ಪಾತೆರ ಇನಿಕ್ಲಾ ಯೆಹೂದ್ಯೆರೆಡ್ ಪರಡ್ದುಂಡು.

¹⁶ಐಡ್ದ್ ಬೊಕ್ಕ ಪತ್ತೊಂಜಿ ಮಂದಿ ಶಿಷ್ಯೆರ್ ಗಲಿಲಾಯೊಗು ಪೋದು ಯೇಸು ತನ್ಕುಲೆಗ್ ಪಂಡಿ ಗುಡ್ಡೆಗ್ ಪೋಯೆರ್.

¹⁷ಅವುಲು ಆಯನ್ ತೂದು ಆಯಗ್ ಅಡ್ಡಬೂರ್ಯೆರ್. ಆಂಡ ಕೆಲೆವೆರ್ ಸಂಶಯ ಮಲ್ತೆರ್.

¹⁸ಅಪಗ ಯೇಸು ಕೈತಲ್‌ ಬತ್ತ್‌ದ್, “ಪರಲೋಕೊಡ್ಲಾ, ಭೂಲೋಕೊಡ್ಲಾ ಮಾತ ಅಧಿಕಾರ ಎಂಕ್ ಕೊರ್ತುಂಡು.

¹⁹ಅಂಚಾಯಿನೆಡ್ದ್ ನಿಕುಲು ಪೋದು ಮಾತ ಜನಾಂಗದ ಜನೊಕುಲೆನ್ ಶಿಷ್ಯೆರಾದ್ ಮಲ್ಪುಲೆ. ಅಕ್ಲೆಗ್ ಅಮ್ಮೆ ಮಗೆ ಪರಿಶುದ್ಧಾತ್ಮ ಪುದರ್‌ಡ್ ದೀಕ್ಷಾಸ್ನಾನ ಕೊರ್ಲೆ.

²⁰ಯಾನ್ ನಿಕ್ಲೆಗ್ ಅಪ್ಪಣೆ ಕೊರಿನವು ಮಾತೆನ್ಲಾ ಕೈಕೊನ್ರೆ ಅಕ್ಲೆಗ್ ಬೋಧನೆ ಕೊರ್ಲೆ. ತೂಲೆ, ಯಾನ್ ಯುಗತ ಅಂತ್ಯ ಮುಟ್ಟಲಾ ಮಾತ ದಿನ ನಿಕ್ಲೆಡೊಪ್ಪ ಉಪ್ಪುವೆ,” ಅಂದ್‌ದ್ ಪಂಡೆ.