Read Tulu ಮತ್ತಾಯೆ 3 Bible Online

ಮತ್ತಾಯೆ 3 - Tulu bible

ಮತ್ತಾಯೆ 3

¹ಆ ದಿನೊಕುಲೆಡ್ ಸ್ನಾನಿಕೆ ಯೋಹಾನೆ ಬತ್ತ್‌ದ್ ಯೂದಾಯದ ಕಾಡ್‌ಡ್ ಸಾರಿಯೊಂದು, “ಪಶ್ಚಾತಾಪ ಪಡೆದ್ ದೇವೆರೆ ಕಡೆಕ್ಕ್ ತಿರ್ಗ್‌ಲೆ, ದಾಯೆಗಂದ್ಂಡ ಪರಲೋಕ ರಾಜ್ಯ ಕೈತಲ್ ಬೈದ್‌ಂಡ್,” ಪಂಡ್ದ್ ಪಂಡೆ.

³“ಕರ್ತವ ಮಾರ್ಗೊನು ತಯಾರ್ ಮಲ್ಪುಲೆ, ಆಯ ಸಾದಿನ್ ಸರ್ತ ಮಲ್ಪುಲೆ, ಅಂದ್‌ದ್ ಕಾಡ್‌ಡ್ ಬೊಬ್ಬೆ ಪಾಡುನಾಯನ ಸ್ವರ ಉಂಡು,” ಪಂಡ್ದ್ ಪ್ರವಾದಿ ಯೆಶಾಯಡ್ದ್ ಪಂಡಿನಾಯೆ ಇಂಬೆನೇ.

⁴ಈ ಯೋಹಾನನ ಕುಂಟು ಒಂಟೆ ಕುಜಲ್‌ದ ಪೊದೆಪುಲಾ ಸೊಂಟೊಡು ಚರ್ಮದ ಸೊಂಟಪಟ್ಟಿಲಾ ಕಟ್ಟ್‌ದಿತ್ತೆ. ಮೊಂಟೆಲಾ ಕಾಡ್‌ದ ತಿಗತನೆಯಿಲಾ ಆಯನ ತಿನಸ್ ಆದಿತ್ತ್ಂಡ್.

⁵ಅಪಗ ಯೆರೂಸಲೇಮು, ಇಡೀ ಯೂದಾಯ, ಯೊರ್ದಾನ್ ತುದೆತ ಸುತ್ತೊಡುಪ್ಪು ಮಾತ ಸೀಮೆದ ಜನೊಕುಲುಲಾ ಆಯನ ಕೈತಲ್‌ ಪೋದು,

⁶ಅಕುಲು ತನ್ಕುಲೆ ಪಾಪೊಲೆನ್ ಪಂಡೊಂದು ಯೊರ್ದಾನ್ ತುದೆಟ್ ಆಯಡ್ದ್ ದೀಕ್ಷಾಸ್ನಾನ ಮಲ್ಪಾವೊಂದಿತ್ತೆರ್.

⁷ಆಂಡ ಯೋಹಾನೆ ಪರಿಸಾಯೆರೆಡ್ದ್‌ಲಾ ಸದ್ದುಕಾಯೆರೆಡ್ದ್‌ಲಾ ಮಸ್ತ್ ಜನ ತನಡ್ದ್ ದೀಕ್ಷಾಸ್ನಾನ ಮಲ್ಪಾವೊನ್ರೆ ಬರ್ಪಿನೆನ್ ತೂದು ಅಕ್ಲೆಗ್, “ಓ ಸರ್ಪ ಜಾತಿದಾಕುಲೇ, ದುಂಬಗ್ ತೋಜಿದ್ ಬರ್ಪಿ ದೈವಕೋಪೊಡ್ದು ತಪ್ಪಾವೊನ್ರೆ ನಿಕ್ಲೆಗ್ ಎಚ್ಚರಿಕೆ ಏರ್ ಕೊರಿಯೆರ್?

⁸ಅಂಚಾಂಡ ನಿಕಲ್ನ ಮನಸ್ ದೇವೆರೆ ಕಡೆಕ್ಕ್ ತಿರ್ಗ್‌ದ್ಂಡ್ ಪನ್ಪಿನೆಕ್ಕ್ ತಕ್ಕ ಫಲೊನು ತೋಜಾಲೆ.

⁹ಅಬ್ರಹಾಮು ಎಂಕ್ಲೆನ ಪೂರ್ವಜೆ ಪನ್ಪಿನ ಆಲೋಚನೆನ್ ಬುಡ್ಲೆ. ದೇವೆರ್ ಅಬ್ರಹಾಮುಗು ಈ ಕಲ್ಲ್‌ಲೆಡ್ದ್‌ಲಾ ಜೋಕುಲೆನ್ ಪುಟ್ಟಾವೆರೆ ಸಾದ್ಯ ಉಂಡು, ಅಂದ್‌ದ್ ನಿಕ್ಲೆಗ್ ಪನ್ಪೆ.

¹⁰ಇತ್ತೆನೇ ಮರತ ಬೇರ್‌ಗ್ ಕುಡರಿ ಪಾಡ್ದ್ಂಡ್. ಎಡ್ಡೆ ಫಲೊನು ಕೊರಂದಿ ಪ್ರತಿಯೊಂಜಿ ಮರೊನು ಕಡ್ತ್‌ದ್ ತೂಕು ಪಾಡ್ವೆರ್.

¹¹ಯಾನಾಂಡಲಾ ನಿಕುಲು ಪಶ್ಚಾತಾಪ ಪಡೆಯೊಡು ಅಂದ್‌ದ್ ನಿಕ್ಲೆಗ್ ನೀರ್‌ಡ್ ದೀಕ್ಷಾಸ್ನಾನ ಮಲ್ಪಾಯೆ. ಆಂಡ ಎನಡ್ದ್ ಬಲ ಇತ್ತಿನಾಯೆ ಎನ ಬೆರಿಯೆ ಬರ್ಪೆ. ಆಯ ಕಾರ್‌ದ ಜೋಡುನು ತುಂಬೆರೆಗ್ಲಾ ಯಾನ್ ಯೋಗ್ಯದಾಯೆ ಅತ್ತ್. ಆಯೆ ನಿಕ್ಲೆಗ್ ಪರಿಶುದ್ಧಾತ್ಮೊಡು ಬೊಕ್ಕ ತೂಟು ದೀಕ್ಷಾಸ್ನಾನ ಮಲ್ಪಾವೆ.

¹²ಆಯನ ಕೈಟ್ ತಡ್ಪೆ ಉಂಡು, ತನ್ನ ಜಾಲ್‌ನ್ ಕೊಡೀಕಡೆ ಅಡ್ತ್‌ದ್, ಬುಲೆತ ರಾಶಿನ್ ರಾಪಾದ್ ಪುಡೆತ್‌ದ್ ತನ್ನ ಗೋದಿನ್ ತುಪ್ಪೆಡ್ ದಿಂಜಾದ್ ದೀಪೆ; ಆಂಡ ದಡ್ಡ್‌ನ್ ತೆಕ್ಕಂದಿ ತೂಟು ಪೊತ್ತಾದ್ ಬುಡ್ಪೆ,” ಪಂಡೆ.

¹³ಆ ಸಮಯೊಡು ಯೇಸು ಯೋಹಾನಡ್ದ್ ದೀಕ್ಷಾಸ್ನಾನ ಮಲ್ತೊನೊಡು ಪಂಡ್ದ್ ಗಲಿಲಾಯೊಡ್ದು ಯೊರ್ದಾನ್ ತುದೆಕ್ ಬತ್ತೆ.

¹⁴ಅಪಗ ಯೋಹಾನೆ ಯೇಸುನು ತಡೆತ್‌ದ್, “ಯಾನೇ ನಿನಡ್ದ್ ದೀಕ್ಷಾಸ್ನಾನ ದೆತ್ತೊನೊಡಿತ್ತ್‌ಂಡ್. ಆಂಡ ಈ ಎನ ಕೈತಡೆಗ್ ದಾಯೆಗ್ ಬರ್ಪ?” ಅಂದ್‌ದ್ ಕೇಂಡಿನೆಕ್ಕ್

¹⁵ಅಪಗ ಯೇಸು ಆಯಗ್, “ಸದ್ಯೊಗು ಬುಡು, ಇಂಚ ನಮ ಮಾತ ಧರ್ಮೊಲೆನ್ ನಡಪಾವೊಡಾಪುಂಡು,” ಅಂದ್‌ದ್ ಪನ್ನಗ ಯೋಹಾನೆ ಒಪ್ಪಿಯೊಂಡೆ.

¹⁶ಯೇಸು ದೀಕ್ಷಾಸ್ನಾನ ದೆತ್ತೊಂಡಿ ಬೊಕ್ಕ ನೀರ್‌ಡ್ದ್ ಮಿತ್ತ್ ಬತ್ತಿ ಕೂಡ್ಲೆ, ಇಂದಾ, ಆಯಗ್ ಪರಲೋಕ ಜತ್ತ್ಂಡ್, ಬೊಕ್ಕ ದೇವೆರೆ ಆತ್ಮ ಪಾರಿವಾಳದ ರೂಪೊಡು ಆಯನ ಮಿತ್ತ್ ಜಪ್ಪುನೆನ್ ಯೋಹಾನೆ ತೂಯೆ.

¹⁷ಅಪಗ ಪರಲೋಕೊಡ್ದು ಒಂಜಿ ಸ್ವರ ಆಂಡ್, “ಇಂಬೆ ಎನ ಪ್ರೀತಿದ ಮಗೆ, ಇಂಬ್ಯನ್ ಯಾನ್ ಮೆಚ್ಚಿದೆ.”