Read Tulu ಮತ್ತಾಯೆ 4 Bible Online

ಮತ್ತಾಯೆ 4 - Tulu bible

ಮತ್ತಾಯೆ 4

¹ಬೊಕ್ಕ ಯೇಸು ಸೈತಾನಡ್ದ್ ಶೋಧನೆ ಆವೊಡು ಅಂದ್‌ದ್ ಆತ್ಮೆ ಆಯನ್ ಕಾಡ್‌ಗ್ ಲೆತ್ತೊಂದು ಪೋಯೆ.

²ಯೇಸು ನಲ್ಪ ದಿನ ರಾತ್ರೆ ಪಗೆಲ್ ಉಪವಾಸ ಮಲ್ತಿ ಬೊಕ್ಕ ಆಯಗ್ ಬಾರಿ ಬಡವು ಆಂಡ್.

³ಅಪಗ ಆ ಶೋಧಕೆ ಯೇಸು ಕೈತಲ್‌ ಬತ್ತ್‌ದ್, “ಈ ದೇವೆರೆ ಮಗೆ ಆದಿತ್ತಡ ಈ ಕಲ್ಲ್‌ಲೆನ್ ರೊಟ್ಟಿ ಆಪಿಲೆಕ್ಕ ಅಪ್ಪಣೆ ಕೊರ್ಲ,” ಅಂದ್‌ದ್ ಪನ್ನಗ,

⁴ಯೇಸು, “‘ನರಮಾನಿ ರೊಟ್ಟಿ ತಿಂದ್‌ಂಡ ಮಾತ್ರ ಬದುಕುಜೆ. ದೇವೆರೆ ಬಾಯಿಡ್ದ್ ಬರ್ಪಿ ಪ್ರತಿಯೊಂಜಿ ಪಾತೆರೊಡ್ದು ಬದುಕುವೆ,’ ಅಂದ್‌ದ್ ಬರೆತ್ಂಡ್,” ಪಂಡೆ.

⁵ಅಪಗ ಸೈತಾನೆ ಯೇಸುನು ಪರಿಶುದ್ಧ ಪಟ್ಟಣೊಗು ಲೆತ್ತೊಂದು ಪೋದು ದೇವಾಲಯದ ಗೋಪುರದ ಮಿತ್ತ್ ಉಂತಾದ್

⁶ಆಯಡ, “ಈ ದೇವೆರೆ ಮಗೆ ಆದಿತ್ತಡ ಮುಲ್ತುಡ್ದು ತಿರ್ತ್ ಲೈಪುಲ. ‘ದೇವೆರ್ ತನ ದೂತೆರೆಗ್ ಅಪ್ಪಣೆ ಕೊರುವೆ; ನಿನ ಕಾರ್ ಕಲ್ಲ್‌ಗ್ ತಾಂಟಂದಿಲೆಕ್ಕ ಅಕುಲು ನಿನನ್ ಕೈಟ್ ದೆರ್ತ್ತ್ ಪತ್ತ್‌ವೆರ್,’ ಅಂದ್‌ದ್ ಬರೆತ್ಂಡ್,” ಅಂದ್‌ದ್ ಪಂಡೆ.

⁷ಐಕ್ ಯೇಸು, “ನಿನ ದೇವೆರಾದುಪ್ಪು ಕರ್ತವನ್ ಪರೀಕ್ಷೆ ಮಲ್ಪೆರೆ ಬಲ್ಲಿ ಪಂಡ್ದ್‌ಲಾ ಬರೆತ್ಂಡ್,” ಅಂದ್‌ದ್ ಪಂಡೆ.

⁸ಐಡ್ದ್ ಬೊಕ್ಕ ಸೈತಾನೆ ಆಯನ್ ಬಾರಿ ಎತ್ತರದ ಪರ್ವತೊಗು ಲೆತ್ತೊಂದು ಪೋದು ಲೋಕದ ಮಾತ ರಾಜ್ಯೊಲೆನ್ಲಾ ಐತ ಮೈಮೆನ್ಲಾ ಆಯಗ್ ತೋಜಾಯೆ.

⁹ಬೊಕ್ಕ ಸೈತಾನೆ, “ಈ ಎಂಕ್ ಅಡ್ಡಬೂರ್ದು ಆರಾಧನೆ ಮಲ್ತ್ಂಡ ಉಂದೆನ್ ಮಾತ ನಿಕ್ಕ್ ಕೊರ್ಪೆ,” ಪಂಡೆ.

¹⁰ಅಪಗ ಯೇಸು ಆಯಡ ಪಂಡಿನಿ, “ಸೈತಾನಾ, ಈ ಮುಲ್ತುಡ್ದು ಪೋಲ, ‘ನಿನ ದೇವೆರಾದುಪ್ಪು ಕರ್ತವಗ್ ಅಡ್ಡಬೂರ್ದು ಆಯನ್ ಒರಿಯನೇ ಆರಾಧನೆ ಮಲ್ಪೊಡಂದ್‌ದ್ ಬರೆತ್ಂಡ್.’”

¹¹ಅಪಗ ಸೈತಾನೆ ಆಯನ್ ಬುಡ್ದು ಪೋಯೆ. ಬೊಕ್ಕ ದೂತೆರ್ ಬತ್ತ್‌ದ್ ಆಯಗ್ ಉಪಚಾರ ಮಲ್ತೆರ್.

¹²ಯೋಹಾನೆ ಸೆರೆಮನೆಟ್ ಬೂರಿಯೆ ಪನ್ಪಿ ಸುದ್ಧಿನ್ ಯೇಸು ಕೇಂಡ್ದ್ ಆ ಜಾಗ್‌ನ್ ಬುಡ್ದು ಗಲಿಲಾಯ ಸೀಮೆಗ್ ಪಿರ ಪೋಯೆ.

¹³ಐಡ್ದ್ ಬೊಕ್ಕ ನಜರೇತ್ ಪನ್ಪಿ ಊರುನು ಬುಡ್ದು ಜೆಬುಲೋನ್ ನೆಫ್ತಲೀಮ್ ಪನ್ಪಿ ನಾಡ್‌ಗ್ ಬತ್ತ್‌ದ್ ಕಡಲ್ದ ಕೈತಲಿತ್ತಿ ಕಪೆರ್ನೌಮು ಪನ್ಪಿ ಊರುಗು ಪೋದು ಉಂತಿಯೆ.

¹⁴ಉಂದೆಡ್ದ್ ಯೆಶಾಯೆ ಪನ್ಪಿ ಪ್ರವಾದಿಡ್ದ್ ಪಂಡ್ದುಪ್ಪು ಪಾತೆರ ನಡತ್ಂಡ್. ಆ ಪಾತೆರ ದಾನೆಂದ್ಂಡ,

¹⁵“ಜೆಬುಲೋನ್ ಸೀಮೆಲಾ ನೆಫ್ತಲೀಮ್ ಸೀಮೆಲಾ ಯೊರ್ದಾನ್ ತುದೆತ್ತ ಅಂಚಿ ಕಡಲ್ದ ಕೈತಲುಪ್ಪು ಸೀಮೆಲಾ ಪಿದಯಿದ ಜನೊಕುಲು ಉಪ್ಪು ಗಲಿಲಾಯ ಸೀಮೆಲಾ

¹⁶ಕತ್ತಲೆಡ್ ಬದ್‌ಕಿನ ಈ ಸೀಮೆದ ಜನೊಕುಲೆಗ್ ಮಲ್ಲ ಬೊಲ್ಪು ತೋಜ್ಂಡ್. ಗರ್ಗಂಡ ಕತ್ತಲೆದ ದೇಶೊಡುಪ್ಪುನಾಕುಲೆಗ್ ಸೂರ್ಯೆ ಮೂಡ್ದು ಬತ್ತ್ಂಡ್.”

¹⁷ಆನಿಡ್ದ್ ಯೇಸು, “ಪಶ್ಚಾತಾಪ ಪಡೆಲೆ ದಾಯೆಗಂದ್ಂಡ ಪರಲೋಕ ರಾಜ್ಯ ಕೈತಲ್ ಬೈದ್‌ಂಡ್,” ಅಂದ್‌ದ್ ಸಾರಿಯೆರೆ ಸುರು ಮಲ್ತೆ.

¹⁸ಯೇಸು ಗಲಿಲಾಯ ಕಡಲ್ದ ಬರಿಟ್ಟ್ ನಡಪುನಗ, ಪೇತ್ರೆ ಪನ್ಪಿ ಸೀಮೋನೆ ಬೊಕ್ಕ ಆಯನ ಮೆಗ್ಯೆ ಅಂದ್ರೆಯೆ, ಮೆಗ್ಯೆಪಲಯಾಡ್ಲು ಬಲೆ ಬೀಪುನೆನ್ ತೂಯೆ. ಅಕುಲು ಮೀನ್ ಪತ್ತುನಾಕುಲು.

¹⁹ಆಯೆ ಅಕ್ಲೆಗ್, “ಎನ ಬೆರಿಯೆ ಬಲೆ; ಯಾನ್ ನಿಕ್ಲೆನ್ ನರಮಾನಿಲೆನ್ ಪತ್ತುನ ಬೆಸ್ತೆರಾದ್ ಮಲ್ಪುವೆ,” ಅಂದ್‌ದ್ ಪಂಡಿ ಕೂಡ್ಲೆ,

²⁰ಅಕುಲು ತನ್ಕುಲೆ ಬಲೆನ್ ಬುಡ್ದು ಆಯ ಬೆರಿಯೆ ಪೋಯೆರ್.

²¹ಯೇಸು ಅಲ್ಪಡ್ದ್ ದುಂಬು ಪೋನಗ ಬೇತೆ ಇರ್ವೆರ್ ಮೆಗ್ಯಪಲಯಾಡ್ಲು ಜೆಬೆದಾಯನ ಮಗೆ ಯಾಕೋಬುನ್ಲಾ ಆಯನ ಮೆಗ್ಯೆ ಯೋಹಾನನ್ಲಾ ತೂಯೆ. ಮೊಕುಲು ತನ್ಕುಲೆ ಅಮ್ಮೆ ಆಯಿ ಜೆಬೆದಾಯಡೊಪ್ಪ ಓಡೊಡು ತನ್ಕುಲೆ ಬಲೆನ್ ಸರಿ ಮಲ್ತೊಂದಿತ್ತೆರ್. ಯೇಸು ಮೊಕ್ಲೆನ್ಲಾ ಲೆತ್ತೆ.

²²ಕೂಡ್ಲೇ ಅಕುಲು ಓಡೊನ್ಲಾ ತನ್ಕುಲೆ ಅಮ್ಮೆರೆನ್ಲಾ ಬುಡ್ದು ಯೇಸುನ ಬೆರಿಯೆ ಪೋಯೆರ್.

²³ಇಂಚ ಯೇಸು ಗಲಿಲಾಯ ಇಡೀ ತಿರ್ಗ್‌ದ್ ಅಲ್ಪದ ಸಭಾಮಂದಿರೊಲೆಡ್ ಬೋಧನೆ ಮಲ್ತೊಂದು ಪರಲೋಕ ರಾಜ್ಯದ ಸುವಾರ್ತೆನ್ ಸಾರಿದ್ ಜನೊಕುಲೆನ ಮಾತ ತರತ ಸೀಕ್‌ಲೆನ್, ಮಾತ ತರತ ಬೇನೆಲೆನ್ ಗುಣ ಮಲ್ತೊಂದು ಬತ್ತೆ.

²⁴ಆಯನ ಸುದ್ಧಿ ಸುರಿಯ ದೇಶೊಡಿಡೀ ಪರಡಿನೆಡ್ದ್ ಮೆಯಿಟ್ ಸೌಖ್ಯದಾಂತಿನಾಕುಲು, ಪಂಡ ತರತರತ ಸೀಕ್‌ಲೆಡ್ದ್ ಭಂಗ ಬರ್ಪಿನಾಕುಲೆನ್ಲಾ, ದೆವ್ವ ಪತ್ತ್‌ದಿನಾಕುಲೆನ್ಲಾ, ಮೂರ್ಚಂಡೆ ರೋಗದಾಕುಲೆನ್ಲಾ, ಪಕ್ಷವಾತದಾಕುಲೆನ್ಲಾ, ಆಯನ ಕೈತಲ್‌ ಕನವೊಂದಿತ್ತೆರ್. ಆಯೆ ಅಕ್ಲೆನ್ ಗುಣ ಮಲ್ತೆ.

²⁵ಬೊಕ್ಕ ಗಲಿಲಾಯ, ದೆಕಪೊಲಿ, ಯೆರೂಸಲೇಮ್, ಯೂದಾಯ, ಯೊರ್ದಾನ್ ತುದೆತ ಆಪೆ ಮರ್ಗಿಲ್‌ಡ್ದ್‌ಲಾ ಮಸ್ತ್ ಜನೊಕುಲು ಗುಂಪುಗುಂಪಾದ್ ಆಯನ ಬೆರಿಯೆ ಬತ್ತೆರ್.