Read Tulu ಮತ್ತಾಯೆ 5 Bible Online

ಮತ್ತಾಯೆ 5 - Tulu bible

ಮತ್ತಾಯೆ 5

¹ಆಯೆ ಆ ಜನೊಕುಲೆ ಗುಂಪುಲೆನ್ ತೂದು ಪರ್ವತ ಮಿತ್ತಾರ್ದ್ ಕುಲ್ಲಿ ಬೊಕ್ಕ ಆಯನ ಶಿಷ್ಯೆರ್ ಆಯ ಕೈತಲ್‌ ಬತ್ತೆರ್.

²ಆಯೆ ಅಕ್ಲೆಗ್ ಬೋಧನೆ ಮಲ್ಪೆರೆ ಸುರು ಮಲ್ತೆ.

³“ಆತ್ಮೊಡು ಬಡವೆರ್ ಆದಿತ್ತಿನಾಕುಲು ಭಾಗ್ಯವಂತೆರ್, ಪರಲೋಕ ರಾಜ್ಯ ಅಕ್ಲೆನವು.

⁴ದುಃಖ ಮಲ್ಪುನಾಕುಲು ಭಾಗ್ಯವಂತೆರ್, ಅಕ್ಲೆಗ್ ದೇವೆರೆಡ್ದ್ ಸಮಾಧಾನ ತಿಕ್ಕುಂಡು

⁵ತಗ್ಗಾವೊಂಡಿನಾಕುಲು ಭಾಗ್ಯವಂತೆರ್, ಅಕ್ಲೆಗ್ ಭೂಮಿ ಬಾಧ್ಯಸ್ತಿಗೆ ಆದ್ ತಿಕ್ಕುಂಡು.

⁶ನೀತಿಗ್ ಬಡವು ಬಾಜೆಲ್ ಇತ್ತಿನಾಕುಲು ಭಾಗ್ಯವಂತೆರ್; ಅಕ್ಲೆಗ್ ತೃಪ್ತಿ ಆಪುಂಡು.

⁷ಕನಿಕರ ಇತ್ತಿನಾಕುಲು ಭಾಗ್ಯವಂತೆರ್, ಅಕುಲು ಕನಿಕರ ಪಡೆವೊನ್ವೆರ್.

⁸ಶುದ್ಧ ಉಡಲ್‌ದಾಕುಲು ಭಾಗ್ಯವಂತೆರ್, ಅಕುಲು ದೇವೆರೆನ್ ತೂವೆರ್.

⁹ಸಮಾಧಾನ ಮಲ್ಪುನಾಕುಲು ಭಾಗ್ಯವಂತೆರ್, ಅಕ್ಲೆನ್ ದೇವೆರೆ ಜೋಕುಲು ಅಂದ್‌ದ್ ಲೆಪ್ಪಾವೊನ್ವೆರ್.

¹⁰ನೀತಿಗಾದ್ ಭಂಗೊನು ತಾಳೊಂಡಿನಾಕುಲು ಭಾಗ್ಯವಂತೆರ್, ಪರಲೋಕ ರಾಜ್ಯ ಅಕ್ಲೆನವು.

¹¹ಎನಡ್ದ್ ಜನೊಕುಲು ನಿಕ್ಲೆನ್ ನಿಂದೆ ಮಲ್ತ್‌ದ್ ಭಂಗ ಕೊರ್ದು ನಿಕ್ಲೆ ಮಿತ್ತ್ ಬೊಡ್ಚಾಂದಿ ಸುಳ್ಳು ಪಾತೆರ ಪಂಡೆರ್ಡ ನಿಕುಲು ಭಾಗ್ಯವಂತೆರ್; ದಾಯೆಗಂದ್ಂಡ ನಿಕುಲು ಎನ ಶಿಷ್ಯೆರಾದುಲ್ಲರ್.

¹²“ಸಂತೋಷೊಡುಪ್ಪುಲೆ, ಉಲ್ಲಾಸೊಡುಪ್ಪುಲೆ, ಪರಲೋಕೊಡು ನಿಕ್ಲೆಗ್ ದಿಂಜ ಫಲ ಉಂಡು. ನಿಕ್ಲೆಡ್ದ್ ದುಂಬು ಇತ್ತಿ ಪ್ರವಾದಿಲೆಗ್ಲಾ ಅಕುಲು ಇಂಚೆನೆ ಭಂಗ ಕೊರ್ತೆರತ್ತಾ.

¹³“ನಿಕುಲು ಭೂಮಿಗ್ ಉಪ್ಪು ಆದುಲ್ಲರ್. ಆಂಡ ಉಪ್ಪು ಚಪ್ಪೆ ಆದ್ ಪೋಂಡ, ಐಕ್ ಒಯಿಡ್ದ್ ರುಚಿ ಬರು? ಜನೊಕುಲು ಅವೆನ್ ಪಿದಾಯಿ ಪಾಡ್ದ್ ದೊಂಕಿಯೆರೆ ಯೋಗ್ಯದವು ಅತ್ತಂದೆ ಬೊಕ್ಕ ಒಯಿಕ್‌ಲಾ ಆವಂದ್.

¹⁴“ನಿಕುಲು ಲೋಕೊಗು ಬೊಲ್ಪಾದುಲ್ಲರ್. ಪರ್ವತದ ಮಿತ್ತ್ ಕಟ್ಟ್‌ದುಪ್ಪುನ ಊರು ಏಪೊಗ್ಲಾ ಮದೆ ಆದುಪ್ಪಂದ್.

¹⁵“ಬೊಕ್ಕ ತುಡರ್‌ನ್ ಪೊತ್ತಾದ್ ಕಲಸೆದುಲಯಿ ದೀಪುಜೆರ್, ದೀಪಕಂಬದ ಮಿತ್ತ್ ದೀಪೆರತ್ತಾ. ಅಪಗ ಅವು ಇಲ್ಲಡಿತ್ತಿನಾಕುಲೆಗ್ ಮಾತೆರೆಗ್ ಬೊಲ್ಪು ಕೊರ್ಪುಂಡು.

¹⁶ಐತ ಲೆಕ್ಕನೆ ನಿಕ್ಲೆನ ಬೊಲ್ಪು ಜನೊಕುಲೆ ಎದುರುಡು ಅರ್ಲಡ್, ಇಂಚಾಂಡ ಅಕುಲು ನಿಕ್ಲೆನ ಎಡ್ಡೆ ಕ್ರಿಯೊಲೆನ್ ತೂದು ಪರಲೋಕೊಡುಪ್ಪು ನಿಕ್ಲೆ ಅಮ್ಮೆರೆನ್ ಪುಗರುವೆರ್.

¹⁷“ಮೋಶೆನ ನ್ಯಾಯಕಟ್ಟ್ ಆವಡ್ ಪ್ರವಾದಿಲೆ ಪಾತೆರೊಲೆನ್ ಆವಡ್ ದೆತ್ತ್ ಪಾಡಿಯೆರೆ ಯಾನ್ ಬತ್ತೆ ಅಂದ್‌ದ್ ಎನ್ನೊಡ್ಚಿ. ದೆತ್ತ್ ಪಾಡಿಯೆರೆ ಬೈದಿಜಿ, ಪೂರ್ತಿ ಮಲ್ಪೆರೆ ಬೈದೆ.

¹⁸ನಿಕ್ಲೆಗ್ ನಿಜಾದ್ ಪನ್ಪೆ, ಬಾನಲಾ ಭೂಮಿಲಾ ಆಳಿದ್ ಪೋಪಿನೆಟ್ಟ ನ್ಯಾಯಕಟ್ಟ್‌ಡುಪ್ಪು ಮಾತ ನಡಪುಡಂದೆ ಐತ ಉಲಯಿಡ್ದ್ ಒಂಜಿ ಸೊನ್ನೆಲಾ, ಒಂಜಿ ಶಬ್ಧಲಾ ಆಳಿದ್ ಪೋವಂದ್.

¹⁹ಅಂಚಾಯಿನೆಡ್ದ್ ಈ ಎಲ್ಯೆಲ್ಯ ಅಪ್ಪಣೆಲೆಡ್ ಒಂಜೆನ್ ಮೀರ್‌ದ್ ಜನೊಕುಲೆಗ್ಲಾ ಅಂಚ ನಡಪೆರೆ ಬೋಧನೆ ಮಲ್ಪುನಾಯೆ ಪರಲೋಕ ರಾಜ್ಯೊಡು ಬಜೀ ಎಲ್ಯಾಯೆ ಆದುಪ್ಪುವೆ; ಆಂಡ ತಾನೇ ಆ ಅಪ್ಪಣೆದಲೆಕ್ಕ ನಡತೊಂದು ಜನೊಕುಲೆಗ್ಲಾ ಅಂಚ ನಡಪೆರೆ ಬೋಧನೆ ಮಲ್ಪುನಾಯೆ ಪರಲೋಕ ರಾಜ್ಯೊಡು ಮಲ್ಲಾಯೆ ಆದುಲ್ಲೆ.

²⁰ನಿಕ್ಲೆ ನೀತಿ, ಶಾಸ್ತ್ರಿಲೆ ಬೊಕ್ಕ ಪರಿಸಾಯೆರೆ ನೀತಿಡ್ದ್‌ಲಾ ಹೆಚ್ಚಿನವು ಆದಿತ್ತಿಜಿಡ ಪರಲೋಕ ರಾಜ್ಯೊಡು ಸೇರಯರ್ ಅಂದ್‌ದ್ ಯಾನ್ ನಿಕ್ಲೆಗ್ ಪನ್ಪೆ.

²¹“ಮಾನ್ಯ ಕೆರಿಯೆರೆ ಬಲ್ಲಿ, ಮಾನ್ಯ ಕೆರ್ಪಿನಾಯೆ ನ್ಯಾಯವಿಚಾರಣೆಗ್‌ ಒಳಗಾಪೆ ಅಂದ್‌ದ್ ಹಿರಿಯೆರೆಗ್ ಪನ್ತಿನೆನ್ ನಿಕುಲು ಕೇಂಡ್ದರ್.

²²ಆಂಡ ಯಾನ್ ನಿಕ್ಲೆಗ್ ಪನ್ಪಿನಿ ದಾನೆಂದ್ಂಡ, ತನ ಸಹೋದ್ರನ ಮಿತ್ತ್ ಕೋಪ ಮಲ್ಪುನ ಪ್ರತಿಯೊರಿಲಾ ನ್ಯಾಯವಿಚಾರಣೆಗ್‌ ಒಳಗಾಪೆ. ತನ ಸಹೋದ್ರನ್ ತೂದು, ಛೀ ನೀಚೆ ಅಂದ್‌ದ್ ಪನ್ಪಿನಾಯೆ ನ್ಯಾಯಸಭೆತ ವಿಚಾರಣೆಗ್ ಒಳಗಾಪೆ. ಮೂರ್ಕೆ ಪನ್ಪಿನಾಯೆ ತೂತ ನರಕೊಗು ಒಳಗಾಪೆ.

²³ಅಂಚಾಯಿನೆಡ್ದ್ ಈ ನಿನ ಕಾಣಿಕೆನ್ ಬಲಿಪೀಠದ ಕೈತಲ್‌ ಕನತಿನಪಗ ನಿನ ಸಹೋದ್ರನ ಉಡಲ್‌ಡ್ ನಿನ ಮಿತ್ತ್ ಎಂಚಿನಾಂಡಲಾ ವಿರೋಧ ಉಂಡು ಅಂದ್‌ದ್ ನಿನ ನೆನೆಪುಗು ಬತ್ತ್ಂಡ,

²⁴ನಿನ ಕಾಣಿಕೆನ್ ಬಲಿಪೀಠದ ಎದುರುಡೇ ಬುಡ್ದು ಪೋದು ದುಂಬತ್ತ ನಿನ ಸಹೋದ್ರನ ಒಟ್ಟುಗು ಒಂಜಾಲ ಐಡ್ದ್ ಬೊಕ್ಕ ಬತ್ತ್‌ದ್ ಕಾಣಿಕೆನ್ ಕೊರ್ಲ.

²⁵“ನಿನನ್ ವಾದ ಮಲ್ಪುನಾಯೆ ನಿನಡೊಪ್ಪ ಇತ್ತೆಡ ಸಾದಿಡೇ ಆಯಡೊಪ್ಪ ಅಪಗನೆ ಸಂದಾನ ಮಲ್ತೊನ್ಲ, ಇಜ್ಜಾಂಡ ಆ ವಾದ ಮಲ್ಪುನಾಯೆ ನಿನನ್ ನ್ಯಾಯಾಧಿಪತಿಗ್ ಒಚ್ಚಿದ್ ಕೊರಿಯೆರೆ ಯಾವು. ನ್ಯಾಯಾಧಿಪತಿ ನಿನನ್ ಸೆರೆಮನೆತ ಅಧಿಕಾರಿನ ಕೈಕ್ ಒಚ್ಚಿದ್ ಕೊರುವೆ. ಅಪಗ ಈ ಸೆರೆಮನೆಟ್ ಬೂರ್ವ.

²⁶ನಿಕ್ಕ್ ನಿಜಾದ್ ಪನ್ಪೆ, ಈ ಕಡೇ ಕಾಸ್‌ನ್ ಸಂದಾವು ಮುಟ್ಟ ಅಲ್ಪಡ್ದ್ ಪಿದಯಿ ಬರ್ಪಿನೇ ಇಜ್ಜಿ.

²⁷“ವ್ಯಭಿಚಾರ ಮಲ್ಪೆರೆ ಬಲ್ಲಿ ಅಂದ್‌ದ್ ಪನ್ತಿನೆನ್ ನಿಕುಲು ಕೇಂಡ್ದರ್.

²⁸ಆಂಡ ಯಾನ್ ನಿಕ್ಲೆಗ್ ಪನ್ಪಿನಿ ದಾನೆಂದ್ಂಡ ಒಂಜಿ ಪೊಂಜೊವುನ ಮಿತ್ತ್ ಮನಸಾದ್ ಕಣ್ಣ್ ದೀಪಿನಾಯೆ ಪ್ರತಿಯೊರಿಲಾ ಅಪಗನೆ ತನ ಉಡಲ್‌ಡ್ ಆಲೆಡೊಪ್ಪ ವ್ಯಭಿಚಾರ ಮಲ್ತಿನಾಯೆ ಆಯೆ.

²⁹ನಿನ ಬಲತ್ತ ಕಣ್ಣ್ ನಿನನ್ ಪಾಪೊಗು ತಿಕ್ಕಾವುನಾಂಡ ಅವೆನ್ ಕೂಂತುದು ದಕ್ಕ್‌ದ್ ಬುಡ್ಲ. ನಿನ ಇಡೀ ಶರೀರ ನರಕೊಡು ಬೂರುನೆಡ್ದ್ ನಿನ ಅಂಗೊಲೆಡ್ದ್ ಒಂಜಿ ಹಾಳಾಪಿನವು ಏತೋ ಎಡ್ಡೆ.

³⁰ನಿನ ಬಲತ್ತ ಕೈ ನಿನನ್ ಪಾಪೊಗು ತಿಕ್ಕಾವುನಾಂಡ ಅವೆನ್ ಕಡ್ತ್‌ದ್ ದಕ್ಕ್‌ದ್ ಬುಡ್ಲ. ನಿನ ಇಡೀ ಶರೀರ ನರಕೊಡು ಬೂರುನೆಡ್ದ್ ನಿನ ಅಂಗೊಲೆಡ್ ಒಂಜಿ ಹಾಳಾಪಿನವು ಐಡ್ದ್ ಏತೋ ಎಡ್ಡೆ.

³¹“ಉಂದತ್ತಂದೆ ತನ ಬೊಡೆದಿನ್ ಬುಡ್ಪಿನಾಯೆ ಆಲೆಗ್ ತ್ಯಾಗಪತ್ರ ಕೊರೊಡು. ಅಂದ್‌ದ್ ಪನ್ತ್ಂಡ್ ಅತ್ತಾ.

³²ಆಂಡ ಯಾನ್ ಪನ್ಪಿನಿ ದಾನೆಂದ್ಂಡ, ವ್ಯಭಿಚಾರ ಮಲ್ತಿ ಕಾರಣೊಗಾದ್ ಅತ್ತಂದೆ ತನ ಬೊಡೆದಿನ್ ಬುಡ್ಪಿನಾಯೆ, ಆಲೆನ್ ವ್ಯಭಿಚಾರ ಮಲ್ಪಾವೆರೆ ಕಾರಣ ಆಪೆ. ಬೊಕ್ಕ ಕಂಡನಿ ಬುಡ್ತಿನಲೆನ್ ಮದ್ಮೆ ಮಲ್ತೊನುನಾಯೆ ವ್ಯಭಿಚಾರ ಮಲ್ಪುನಾಯೆ ಆದುಲ್ಲೆ.

³³“ಬೊಕ್ಕ ಸುಳ್ಳು ಪ್ರಮಾಣ ಪಾಡಿಯೆರೆ ಬಲ್ಲಿ. ಈ ದೀವೊಂಡಿ ಪ್ರಮಾಣೊನು ಕರ್ತವಗ್ ಸಂದಾವೊಡು ಅಂದ್‌ದ್ ಹಿರಿಯಾಕುಲೆಗ್ ಪನ್ತಿನೆನ್ ಕೇಂಡ್ದರತ್ತಾ?

³⁴ಆಂಡ ಯಾನ್ ನಿಕ್ಲೆಗ್ ಪನ್ಪಿನಿ ದಾನೆಂದ್ಂಡ, ಆಜ ಪಾಡಡೆ, ಪರಲೋಕದ ಮಿತ್ತ್ ಆಜ ಪಾಡೊಡ್ಚಿ, ಅವು ದೇವೆರೆ ಗದ್ದಿಗೆ ಆದುಂಡು.

³⁵ಭೂಮಿದ ಮಿತ್ತ್ ಆಜ ಪಾಡೊಡ್ಚಿ, ಅವು ದೇವೆರೆನ ಪಾದಪೀಠ ಆದುಂಡು. ಯೆರೂಸಲೇಮುದ ಮಿತ್ತ್ ಆಜ ಪಾಡೊಡ್ಚಿ, ಅವು ಮಲ್ಲ ಅರಸುನ ಪಟ್ಟಣ ಆದುಂಡು.

³⁶ನಿನ ತರೆತ ಮಿತ್ತ್ ಆಜ ಪಾಡೊಡ್ಚಿ, ಈ ಒಂಜಿ ಕುಜಲ್‌ನಾಂಡಲಾ ಬೊಲ್ದು ಇಜ್ಜಿಂಡ ಕಪ್ಪು ಮಲ್ಪಯ.

³⁷ನಿಕ್ಲೆನ ಪಾತೆರ ಅಂದ್ ಆದಿತ್ತ್ಂಡ ಅಂದ್, ಅತ್ತ್ ಆದಿತ್ತ್ಂಡ ಅತ್ತ್ ಆದುಪ್ಪಡ್. ಉಂದೆಡ್ದ್ ಹೆಚ್ಚ್‌ದವು ಸೈತಾನಡ್ದ್ ಬೈದಿನವು.

³⁸“ಕಣ್ಣ್‌ದ ಬದಲ್‌ಗ್ ಕಣ್ಣ್, ಕೂಲಿದ ಬದಲ್‌ಗ್ ಕೂಲಿ ದೆಪ್ಪಾವು ಅಂದ್‌ದ್ ಪನ್ತಿನೆನ್ ಕೇಂಡ್ದರತ್ತ.

³⁹ಆಂಡ ಯಾನ್ ನಿಕ್ಲೆಗ್ ಪನ್ಪಿನಿ ದಾನೆಂದ್ಂಡ ಕೇಡ್ ಮಲ್ಪುನಾಯಗ್ ಎದುರು ಉಂತಡೆ. ಒರಿ ನಿನ ಬಲತ್ತ ಕೆಪ್ಪೆಗ್ ಹಾಕಿಯೆಡ ಆಯಗ್ ಬೊಕ್ಕೊಂಜಿ ಕೆಪ್ಪೆನ್ಲಾ ತೋಜಾಲ.

⁴⁰ನಿನನ್ ಕಚೇರಿಗ್ ಲೆತ್ತೊಂದು ಪೋದು ವ್ಯಾಜ್ಯ ಮಲ್ತ್‌ದ್ ನಿನ ಉಲಯಿದ ಅಂಗಿನ್ ದೆತ್ತೊನೊಡು ಪಂಡ್ದಿತ್ತಿನಾಯಗ್ ನಿನ ಮೇಲಂಗಿನ್ ಬುಡ್ಲ.

⁴¹ಒರಿ ಒಂಜಿ ಮೈಲ್ ದೂರ ಬಲ ಪಂಡ್ದ್ ನಡಪೆರೆ ಒತ್ತಾಯ ಮಲ್ಪುವೆಡ, ಆಯನೊಟ್ಟುಗು ರಡ್ಡ್ ಮೈಲ್ ಪೋಲ.

⁴²ನಿನಡ ನಟ್ಟೊಂಡಿನಾಯಗ್ ಕೊರ್ಲ, ಸಾಲ ದೆತ್ತೊನೆರೆ ಬತ್ತಿನಾಯಗ್ ಮೋನೆ ತಿರ್ಗಾವಡ.

⁴³“ನಿನ ನಿರೆತಾಯನ್ ಪ್ರೀತಿ ಮಲ್ತ್‌ದ್ ನಿನ ಪಗೆನಾಯನ್ ಪಗೆ ಮಲ್ಪೊಡು ಅಂದ್‌ದ್ ಪನ್ತ್ಂಡ್ ಪನ್ಪಿನೆನ್ ಕೇಂಡ್ದರತ್ತ?

⁴⁴ಆಂಡ ಯಾನ್ ನಿಕ್ಲೆಗ್ ಪನ್ಪಿನಿ ದಾನೆಂದ್ಂಡ ನಿಕ್ಲೆನ ಪಗೆನಾಕುಲೆನ್ ಪ್ರೀತಿ ಮಲ್ಪುಲೆ. ನಿಕ್ಲೆಗ್ ಭಂಗ ಕೊರ್ಪಿನಾಕುಲೆಗ್ ಪ್ರಾರ್ಥನೆ ಮಲ್ಪುಲೆ.

⁴⁵ಇಂಚ ಮಲ್ತರ್ಡ ನಿಕುಲು ಪರಲೋಕೊಡುಪ್ಪು ನಿಕ್ಲೆ ಅಮ್ಮೆರೆಗ್ ಜೋಕುಲಾಪರ್. ಆಯೆ ಪಡ್ಕೆಂತಿನಾಕ್ಲೆ ಮಿತ್ತ್‌ಲಾ ಎಡ್ಡೆಂತಿನಾಕ್ಲೆ ಮಿತ್ತ್‌ಲಾ ತನ ಸೂರ್ಯೆ ಮೂಡುಲೆಕ್ಕ ಮಲ್ಪುವೆ. ನೀತಿದಾಕುಲೆ ಮಿತ್ತ್‌ಲಾ ನೀತಿಕೆಟ್ಟಿನಾಕುಲೆ ಮಿತ್ತ್‌ಲಾ ಬರ್ಸೊನು ಬರ್ಪಾವೆ.

⁴⁶ನಿಕ್ಲೆಗ್ ಪ್ರೀತಿ ತೋಜಾವುನಾಕುಲೆನೇ ನಿಕುಲು ಪ್ರೀತಿ ಮಲ್ತರ್ಡ ಐಟ್ಟ್ ದಾನೆ ಪ್ರಯೋಜನ ಉಂಡು? ಸುಂಕದಾಕುಲುಲಾ ಅಂಚೆನೇ ಮಲ್ಪುವೆರತ್ತಾ?

⁴⁷ನಿಕ್ಲೆನ ಸಹೋದ್ರೆರೆಗ್ ಮಾತ್ರ ಮರ್ಯಾದಿ ಕೊರಿಯರ್ಡ ದಾದಾಂಡಲಾ ವಿಶೇಷ ಮಲ್ತಿಲೆಕ್ಕ ಆಂಡ? ಪಿದಯಿದ ಜನೊಕುಲುಲಾ ಅಂಚೆನೇ ಮಲ್ಪುವೆರತ್ತಾ?

⁴⁸ಅಂಚಾಯಿನೆಡ್ದ್ ಪರಲೋಕೊಡುಪ್ಪು ನಿಕ್ಲೆನ ಅಮ್ಮೆ ದೋಷದಾಂತಿನಾಯೆ ಆದುಪ್ಪುಲೆಕ್ಕ ನಿಕುಲುಲಾ ದೋಷದಾಂತಿನಾಕುಲು ಆದುಪ್ಪುಲೆ.