Read Tulu ಮತ್ತಾಯೆ 7 Bible Online

ಮತ್ತಾಯೆ 7 - Tulu bible

ಮತ್ತಾಯೆ 7

¹“ತೀರ್ಪು ಮಲ್ಪಡೆ, ಅಪಗ ನಿಕ್ಲೆಗ್ಲಾ ತೀರ್ಪು ಆಪುಜಿ.

²ನಿಕುಲು ಮಲ್ಪುನ ತೀರ್ಪುಗು ಸರಿಯಾದ್ ನಿಕ್ಲೆಗ್ಲಾ ತೀರ್ಪು ಆಪುಂಡು, ನಿಕುಲು ಲಪ್ಪುನ ಆಳತೆಡ್ದೇ ನಿಕ್ಲೆಗ್ಲಾ ಲಪ್ಪುವೆರ್.

³ಈ ನಿನ ಕಣ್ಣ್‌ಡುಪ್ಪು ಕಜವುನ್ ತೂವಂದೆ ನಿನ ಸಹೋದ್ರನ ಕಣ್ಣ್‌ಡುಪ್ಪು ಧೂಳುನು ದಾಯೆಗ್ ತೂಪ?

⁴ಈ ನಿನ ಸಹೋದ್ರಗ್, ‘ನಿನ ಕಣ್ಣ್‌ದುಲಯಿಡ್ದ್ ಧೂಳುನು ದೆಪ್ಪುವೆ ಬಲ,’ ಅಂದ್‌ದ್ ಎಂಚ ಪನ್ಪ? ನಿನ ಕಣ್ಣ್‌ಡೇ ಕಜವು ಉಂಡತ್ತಾ.

⁵ಕಪಟಿಯೇ, ದುಂಬತ್ತ ನಿನ ಕಣ್ಣ್‌ದುಲಯಿದ ಕಜವುನ್ ದೆತ್ತ್ ಪಾಡ್ಲ. ಐಡ್ದ್ ಬೊಕ್ಕ ನಿನ ಸಹೋದ್ರನ ಕಣ್ಣ್‌ದುಲಯಿಡ್ದ್ ಧೂಳುನು ದೆಪ್ಪೆರೆ ಸರಿಟ್ಟ್ ತೋಜುಂಡು.

⁶“ಪರಿಶುದ್ಧದೆನ್ ನಾಯಿಗ್ ಪಾಡಡೆ; ನಿಕಲ್ನ ಮುತ್ತುಲೆನ್ ಪಂಜಿಲೆ ಎದುರುಡು ಬಿರ್ಕಡೆ, ಬಿರ್ಕಿಯರ್ಡ ಐಕುಲು ಅವೆನ್ ಕಾರ್‌ಡ್ ದೊಂಕುದು ಪಿರ ಬತ್ತ್‌ದ್ ನಿಕ್ಲೆನ್ ತಿಗ್ತ್ ಪಾಡು.

⁷“ಕೇನೊನ್ಲೆ, ಅಪಗ ನಿಕ್ಲೆಗ್ ಕೊರುವು. ನಾಡ್‌ಲೆ ಅಪಗ ನಿಕ್ಲೆಗ್ ತಿಕ್ಕು. ಬೊಟ್ಟುಲೆ ಅಪಗ ನಿಕ್ಲೆಗ್ ಜಪ್ಪು.

⁸ದಾಯೆಗಂದ್ಂಡ ಕೇನುನ ಪ್ರತಿಯೊರಿಯಗ್ಲಾ ಕೊರ್ಪುಂಡು, ನಾಡುನಾಯಗ್ ತಿಕ್ಕುಂಡು, ಬೊಟ್ಟುನಾಯಗ್ ಜಪ್ಪುಂಡು.

⁹ನಿಕ್ಲೆಡ್ ಏರಾಂಡಲಾ ರೊಟ್ಟಿ ಕೇನುನ ಮಗಕ್ಕ್ ಕಲ್ಲ್‌ನ್ ಕೊರುವೆನಾ?

¹⁰ಮೀನ್ ಕೇಂಡ ಉಚ್ಚುನು ಕೊರುವೆನಾ.

¹¹ಅಂಚಾಂಡ ಪಡಿಕೆಂತಿನಕುಲಾಯಿ ನಿಕುಲು ನಿಕ್ಲೆನ ಜೋಕುಲೆಗ್ ಎಡ್ಡೆ ವಸ್ತುಲೆನ್ ಕೊರ್ಪಿನಕುಲಾಂಡ; ಪರಲೋಕೊಡುಪ್ಪು ನಿಕ್ಲೆನ ಅಮ್ಮೆ ತನಡ ಕೇನುನಾಕುಲೆಗ್ ಏತೋ ಹೆಚ್ಚಾದ್ ಎಡ್ಡೆ ವಸ್ತುಲೆನ್ ಕೊರುವೆತ್ತಾ?

¹²“ಆಂಡಲಾ ಜನೊಕುಲು ನಿಕ್ಲೆಗ್ ಎಂಚೆಂಚಿನ ಮಲ್ಪೊಡು ಅಂದ್‌ದ್ ಆಸೆ ಮಲ್ಪುವೆರಾ, ಅವೆನೇ ನಿಕುಲು ಅಕ್ಲೆಗ್ ಮಲ್ಪುಲೆ. ಉಂದೇ ನ್ಯಾಯಕಟ್ಟ್‌ದ ಬೊಕ್ಕ ಪ್ರವಾದಿಲೆನ ಬೋಧನೆದ ಸಾರಾಂಶ.

¹³“ಇಕ್ಕಟ್ಟಾಯಿ ಬಾಕಿಲ್‌ಡ್ದ್ ಉಲಯಿ ಪೋಲೆ. ದಾಯೆಗಂದ್ಂಡ ನಾಶಾನೊಗು ಪೋಪಿ ಬಾಕಿಲ್ ಮಲ್ಲ, ಸಾದಿ ಅಗೆಲ, ಐಟ್ಟ್ ಪೋಪಿನಾಕುಲು ಮಸ್ತ್ ಜನ.

¹⁴ನಿತ್ಯಜೀವೊಗು ಪೋಪಿ ಬಾಕಿಲ್ ಇಕ್ಕಟ್ಟ್‌ದವು. ಸಾದಿಲಾ ಭಂಗದವು; ಅವೆನ್ ನಾಡ್ ಪತ್ತುನಾಕುಲು ಒಂತೆ ಜನ.

¹⁵“ಸುಳ್ಳು ಪ್ರವಾದಿಲೆ ಸಂಗತಿಡ್ ಜಾಗ್ರತೆ. ಅಕುಲು ಕುರಿತ ವೇಶೊಡು ನಿಕ್ಲೆ ಕೈತಲ್‌ ಬರ್ಪೆರ್ ಆಂಡ ಉಲಯಿ ತೂಂಡ ತಿಂದ್ ಪಾಡುನ ಚೆನ್ನನಾಯಿಲೆ!

¹⁶ಅಕ್ಲೆನ ಕಾರ್ಯೊಲೆಡ್ದ್ ಅಕ್ಲೆನ್ ತೆರಿಯೊನ್ವರ್. ಮುಳ್ಳು ಗಿಡೊಕ್ಲೆಡ್ದ್ ದ್ರಾಕ್ಷೆದ ಪರ್ಂದ್ ಅತ್ತ್‌ಡ ಕಲ್ಲಿಲೆಡ್ದ್ ಅಂಜೂರದ ಪರ್‌ಂದ್ ಕೊಯ್ಪಿನವು ಉಂಡಾ?

¹⁷ಅಂಚೆನೇ ಎಡ್ಡೆಂತಿನ ಮರ ಎಡ್ಡೆ ಫಲ ಕೊರ್ಪುಂಡು, ಹಾಳ್ ಮರ ಹಾಳ್ ಫಲ ಕೊರ್ಪುಂಡು.

¹⁸ಎಡ್ಡೆ ಮರ ಹಾಳ್ ಫಲೊನು ಕೊರಂದ್, ಅಂಚೆನೇ ಹಾಳ್ ಮರ ಎಡ್ಡೆ ಫಲೊನು ಕೊರಂದ್.

¹⁹ಎಡ್ಡೆ ಫಲ ಕೊರಂದಿ ಮಾತ ಮರೊನು ಕಡ್ತ್‌ದ್ ತೂಕು ಪಾಡ್ವೆರ್.

²⁰ಇಂಚ ಉಪ್ಪುನಪಗ ಅಕ್ಲೆ ಕಾರ್ಯೊಲೆಡ್ದ್ ಅಕ್ಲೆನ್ ತೆರಿಯೊನ್ವರ್.

²¹“ಎನನ್ ಕರ್ತವಾ, ಕರ್ತವಾ! ಪನ್ಪಿನಾಕುಲು ಮಾತೆರ್ ಪರಲೋಕ ರಾಜ್ಯೊಡು ಸೇರುವರಂದ್ ಎನ್ನಡೆ; ಪರಲೋಕೊಡುಪ್ಪು ಎನ ಅಮ್ಮೆರೆ ಚಿತ್ತೊನು ಮಲ್ಪುನಾಯೆನೇ ಪರಲೋಕ ರಾಜ್ಯದ ಉಲಯಿ ಸೇರುವೆ.

²²ಕರ್ತವಾ, ಕರ್ತವಾ ನಿನ ಪುದರ್‌ದ ಮಿತ್ತ್ ಎಂಕುಲು ಪ್ರವಾದನೆ ಮಲ್ತ್‌ಜನಾ? ನಿನ ಪುದರ್‌ಡ್ ದೆವ್ವೊಲೆನ್ ಬುಡ್ಪಾದ್‌ದಿಜನಾ? ನಿನ ಪುದರ್‌ಡ್ ದಿಂಜ ಬಲತ್ತ ಕಾರ್ಯೊಲೆನ್ ಮಲ್ತ್‌ಜನಾ ಅಂದ್‌ದ್ ಆ ತೀರ್ಪುದ ದಿನೊಕ್ಲೆಡ್ ಏತೋ ಜನೊಕುಲು ಎಂಕ್ ಪನ್ವೆರ್.

²³ಅಪಗ ಯಾನ್ ಅಕ್ಲೆಗ್, ‘ನಿಕ್ಲೆನ ಗುರ್ತ ಎಂಕಿಜ್ಜಿ, ಅನ್ಯಾಯಗಾರೆರೇ, ಎನನ್ ಬುಡ್ದು ಪೋಲೆ ಅಂದ್‌ದ್ ಮಾತೆರೆ ಎದುರುಡು ಪಂಡ್ದ್ ಬುಡ್ಪೆ.’

²⁴“ಅವೆಡ್ದಾವರ, ಈ ಎನ ಪಾತೆರೊಲೆನ್ ಕೇಂಡ್ದ್ ಐತ ಲೆಕ್ಕನೆ ನಡಪುನಾಯೆ ತನ ಇಲ್ಲ್‌ನ್ ಪಾದೆದ ಮಿತ್ತ್ ಕಟ್ಟ್‌ದಿ ಬುದ್ಧಿ ಇತ್ತಿ ನರಮಾನಿಗ್ ಸಮ ಆದುಲ್ಲೆ.

²⁵ಕಟ್ಟಿ ಬೊಕ್ಕ ಬರ್ಸ ದೊರಿಂಡ್, ಬೊಲ್ಲ ಬತ್ತ್ಂಡ್; ನಾಲ್ ಕಡೆಡ್ದ್ ಗಾಳಿ ಬೀಜ್‌ದ್ ಆ ಇಲ್ಲಗ್ ಹಾಕ್‌ಂಡ್, ಆಂಡಲಾ ಐತ ಪಂಚಾಂಗ ಪಾದೆದ ಮಿತ್ತ್ ಇತ್ತಿನೆಡ್ದ್ ಅವು ಮಗ್‌ರ್ದ್‌ಜಿ.

²⁶“ಆಂಡ ಎನ ಪಾತೆರೊಲೆನ್ ಕೇಂಡ್ದ್‌ಲಾ ಐತ ಲೆಕ್ಕನೆ ನಡಪಂದಿನಾಯೆ ಪೊಯ್ಯೆದ ಮಿತ್ತ್ ಇಲ್ಲನ್ ಕಟ್ಟ್‌ದಿ ಬುದ್ಧಿದಾಂತಿ ನರಮಾನಿಗ್ ಸಮ ಆದುಲ್ಲೆ.

²⁷ಕಟ್ಟಿ ಬೊಕ್ಕ ಬರ್ಸ ದೊರಿಂಡ್, ಬೊಲ್ಲ ಏರ್‌ಂಡ್, ಗಾಳಿ ಬೀಜ್‌ದ್ ಆ ಇಲ್ಲಗ್ ಹಾಕ್‌ಂಡ್. ಅಪಗ ಆ ಇಲ್ಲ್ ಜರಿದ್ ಬೂರ್ದು ನೆಲ ಸಮ ಆಂಡ್.”

²⁸ಯೇಸು ಈ ಪಾತೆರೊಲೆನ್ ಪಂಡ್ದ್ ಮುಗಿತಿ ಬೊಕ್ಕ ಆ ಜನೊಕುಲೆ ಗುಂಪು ಆಯನ ಬೋಧನೆನ್ ಕೇಂಡ್ದ್ ಅಚ್ಚಿರ ಆಯೆರ್.

²⁹ದಾಯೆಗಂದ್ಂಡ ಆಯೆ ಅಕ್ಲೆ ಶಾಸ್ತ್ರಿಲೆ ಲೆಕ್ಕ ಬೋಧನೆ ಕೊರಂದೆ, ಅಧಿಕಾರ ಇತ್ತಿನಾಯಲೆಕ್ಕ ಅಕ್ಲೆಗ್ ಬೋಧನೆ ಕೊರಿಯೆ.