Read Tulu ಮತ್ತಾಯೆ 8 Bible Online

ಮತ್ತಾಯೆ 8 - Tulu bible

ಮತ್ತಾಯೆ 8

¹ಯೇಸು ಪರ್ವತೊಡ್ದು ತಿರ್ತ್ ಬನ್ನಗ ಮಸ್ತ್ ಜನ ಆಯ ಬೆರಿಯೆ ಬತ್ತೆರ್.

²ಒರಿ ಕೊಷ್ಟದಾಯೆ ಯೇಸು ಕೈತಲ್‌ ಬತ್ತ್‌ದ್ ಅಡ್ಡಬೂರ್ದು, “ಕರ್ತವಾ, ನಿಕ್ಕ್ ಮನಸಿತ್ತ್‌ಂಡ ಎನನ್ ಶುದ್ಧ ಮಲ್ಪೊಲಿ,” ಅಂದ್‌ದ್ ಪಂಡೆ.

³ಯೇಸು ಕೈ ನೀಡ್ದ್ ಆಯನ್ ಮುಟ್ಟುದು, “ಎಂಕ್ ಮನಸುಂಡು, ಶುದ್ಧ ಆಲ,” ಅಂದ್‌ದ್ ಪಂಡೆ. ಅಪಗನೆ ಆಯನ ಕೊಷ್ಟ ಪೋದು ಶುದ್ಧ ಆಯೆ.

⁴ಅಪಗ ಯೇಸು ಆಯಡ, “ತೂಲ ಉಂದೆನ್ ಏರೆಗ್ಲಾ ಪನೊಡ್ಚಿ, ಆಂಡ ಪೋದು ಯಾಜಕೆರೆಗ್ ನಿನ ಮೆಯಿ ತೋಜಾದ್ ಮೋಶೆ ನೇಮಕ ಮಲ್ತಿ ಕಾಣಿಕೆನ್ ಅರ್ಪಣೆ ಮಲ್ಪುಲ; ಅವು ಜನೊಕುಲೆಗ್ ಸಾಕ್ಷಿ ಆವಡ್,” ಅಂದ್‌ದ್ ಪಂಡೆ.

⁵ಯೇಸು ಕಪೆರ್ನೌಮುಗು ಬತ್ತಿನಪಗ ಒರಿ ಶತಾಧಿಪತಿ ಆಯ ಕೈತಲ್‌ ಬತ್ತ್‌ದ್, “ಕರ್ತವಾ, ಎನ ಬೇಲೆದಾಯೆ ಪಕ್ಷವಾತ ಆದ್ ಬೇನೆಡ್ ನರಳೊಂದು ಇಲ್ಲಡ್ ಬೂರೊಂದೆ,” ಅಂದ್‌ದ್ ಪಂಡೆ.

⁷ಐಕ್ ಯೇಸು ಆಯಡ, “ಯಾನ್ ಬತ್ತ್‌ದ್ ಆಯನ್ ಗುಣ ಮಲ್ಪುವೆ,” ಅಂದ್‌ದ್ ಪಂಡಿನೆಕ್ಕ್

⁸ಶತಾಧಿಪತಿ ಉತ್ತರ ಕೊರ್ದು, “ಕರ್ತವಾ! ಈ ಎನ ಮಾಡ್‌ದ ಉಲಯಿ ಬರ್ಪಿನಾತ್ ಯೋಗ್ಯತೆ ಎಂಕಿಜ್ಜಿ; ಈ ಒಂಜಿ ಪಾತೆರ ಪಂಡ್ಂಡ ಯಾವು, ಎನ ಬೇಲೆದಾಯಗ್ ಗುಣ ಆವು.

⁹ಯಾನ್ಲಾ ಬೊಕ್ಕೊರಿಯನ ಅಧಿಕಾರದ ಉಲಯಿ ಉಪ್ಪುನಾಯೆ. ಎನ ಕೈ ತಿರ್ತ್‌ಲಾ ಸಿಪಾಯಿಲು ಉಲ್ಲೆರ್. ಯಾನ್ ಅಕ್ಲೆಡ್ ಒರಿಯಗ್ ‘ಪೋ’ ಪಂಡ್ಂಡ ಪೋಪೆ. ಬೊಕ್ಕೊರಿಯನ್ ‘ಬಲ’ ಪಂಡ ಬರ್ಪೆ. ಎನ ಬೇಲೆದಾಯಗ್ ಇಂಚಿತ್ತಿನೆನ್ ಮಲ್ಪು ಪಂಡ್ಂಡ ಮಲ್ಪುವೆ,” ಅಂದ್‌ದ್ ಪಂಡೆ.

¹⁰ಯೇಸು ಉಂದೆನ್ ಕೇಂಡ್ದ್ ಅಚ್ಚಿರ ಆದ್ ತನ ಪಿರವುಡು ಬರೊಂದಿತ್ತಿನಾಕುಲೆಗ್, “ಯಾನ್ ಇಂಚಿತ್ತಿ ಮಲ್ಲ ನಂಬಿಕೆನ್ ಇಸ್ರಾಯೇಲ್ ಜನೊಕುಲೆಡ್ಲಾ ತೂತುಜಿ ಅಂದ್‌ದ್ ನಿಕ್ಲೆಗ್ ಸತ್ಯಾದ್ ಪನ್ಪೆ.

¹¹ಉಂದತ್ತಂದೆ ನಿಕ್ಲೆಗ್ ಪನ್ಪಿನಿ ದಾನೆಂದ್ಂಡ ಮೂಡಾಯಿ ಪಡ್ಡಯಿ ದಿಕ್ಕ್‌ಲೆಡ್ದ್ ಮಸ್ತ್ ಜನೊಕುಲು ಬತ್ತ್‌ದ್ ಪರಲೋಕ ರಾಜ್ಯೊಡು ಅಬ್ರಹಾಮು ಇಸಾಕ್ ಯಾಕೋಬು ಮೊಕ್ಲೆ ಒಟ್ಟುಗು ವಣಸ್‌ಗ್ ಕುಲ್ಲುವೆರ್.

¹²ಆಂಡ ಆ ರಾಜ್ಯದ ಬಾಧ್ಯಸ್ಥೆರ್ ಇಸ್ರಾಯೇಲ್ಯೆರೆಡ್ ಪರಲೋಕ ರಾಜ್ಯೊಡು ಉಪ್ಪುನಂಚ ಯೋಗ್ಯತೆ ಇಜ್ಜಂದಿನಾಕುಲೆನ್ ಪಿದಾಯಿ ಗರ್ಗಂಡ ಕತ್ತಲೆಗ್ ಪಾಡ್ವೆರ್. ಅಲ್ಪ ಅರ್ಪಿನವುಲಾ ಕೂಲಿ ಕಡೆಪಿನವುಲಾ ಉಪ್ಪುಂಡು,” ಅಂದ್‌ದ್ ಪಂಡೆ.

¹³ಐಡ್ದ್ ಬೊಕ್ಕ ಯೇಸು ಆ ಶತಾಧಿಪತಿಗ್, “ಈ ನಂಬಿ ಲೆಕ್ಕನೇ ನಿಕ್ಕ್ ಆವಡ್. ಪೋಲ” ಅಂದ್‌ದ್ ಪಂಡೆ. ಅವ್ವೇ ಗಳಿಗೆಡ್ ಆಯ ಬೇಲೆದಾಯಗ್ ಗುಣ ಆಂಡ್.

¹⁴ಐಡ್ದ್ ಬೊಕ್ಕ ಯೇಸು ಪೇತ್ರ ಇಲ್ಲಗ್ ಬತ್ತ್‌ದ್, ಅಲ್ಪ ಆಯನ ಮಾಮಿ ಜ್ವರೊಟು ಜೆತ್ತ್‌ದಿನೆನ್ ತೂದು ಆಲೆನ ಕೈ ಮುಟ್ಟಿಯೆ.

¹⁵ಮುಟ್ಟಿನಪಗನೇ ಆಲೆನ ಜ್ವರ ಬುಡ್ದು ಪೋಂಡು, ಆಲ್ ಲಕ್ಕ್‌ದ್ ಆಯನ ಉಪಚಾರ ಮಲ್ತಲ್.

¹⁶ಬೈಯಗ್‌ ದೆವ್ವ ಪತ್ತ್‌ದಿನಾಕುಲೆನ್ ಆಯ ಕೈತಲ್‌ಗ್ ಲೆತ್ತೊಂದು ಬತ್ತೆರ್. ಆಯೆ ಬಜೀ ಪಾತೆರೊಡೇ ದೆವ್ವೊಲೆನ್ ಬುಡ್ಪಾಯಿನತ್ತಂದೆ ಮೆಯಿಟ್ ಸಮಕಟ್ಟ್ ಇಜ್ಜಂದಿನಾಕುಲೆನ್ಲಾ ಗುಣ ಮಲ್ತೆ.

¹⁷ಉಂದೆಡ್ದ್, “ಎಂಕ್ಲೆನ ಬೇನೆಲೆನ್ ತಾನೆ ದೆತ್ತೊಂದು ಎಂಕ್ಲೆನ ಸೀಕ್‌ಲೆನ್ ತುಂಬೊಂಡೆ,” ಅಂದ್‌ದ್ ಯೆಶಾಯೆ ಪನ್ಪಿ ಪ್ರವಾದಿಡ್ದ್ ಪನ್ಪಾಯಿನ ಪಾತೆರ ನಡತ್ಂಡ್.

¹⁸ಯೇಸು ತನ ಸುತ್ತ ಇತ್ತಿ ಜನೊಕುಲೆ ಮಲ್ಲ ಗುಂಪುಲೆನ್ ತೂದು ಆಪೆದ ಬರಿಕ್ಕ್ ಪೋಯಿ ಅಂದ್‌ದ್ ಅಪ್ಪಣೆ ಕೊರಿಯೆ.

¹⁹ಅಪಗ ಒರಿ ಶಾಸ್ತ್ರಿ ಕೈತಲ್‌ ಬತ್ತ್‌ದ್ ಯೇಸುಡ, “ಗುರೂ, ಈ ಒಡೆಗ್ ಪೋಂಡಲಾ ಯಾನ್ ನಿನ ಬೆರಿಯೆ ಬರ್ಪೆ,” ಅಂದ್‌ದ್ ಪನ್ನಗ,

²⁰ಯೇಸು ಆಯಗ್, “ಕುದ್‌ಕೆರ್‌ಲೆಗ್ ಮಾಟೆಲು ಉಂಡು, ಬಾನೊಡು ರಾಪಿನ ಪಕ್ಕಿಲೆಗ್ ಗೂಡುಲು ಉಂಡು, ಆಂಡ ನರಮಾನಿ ಮಗಕ್ಕ್ ತರೆ ದೀಪಿನಾತ್ ಜಾಗ್‌ಲಾ ಇಜ್ಜಿ,” ಅಂದ್‌ದ್ ಪಂಡೆ.

²¹ಶಿಷ್ಯೆರೆಡ್ ಬೇತೆ ಒರಿ, “ಕರ್ತವಾ, ಯಾನ್ ದುಂಬತ್ತ ಪೋದು ಎನ ಅಮ್ಮೆರೆನ್ ಕೌಂತ್‌ದ್ ಬರಿಯೆರೆ ಎಂಕ್ ಅಪ್ಪಣೆ ಆವೊಡು,” ಅಂದ್‌ದ್ ಪಂಡೆ.

²²ಐಕ್ ಯೇಸು ಆಯಗ್, “ಎನ ಬೆರಿಯೆ ಬಲ, ಸೈತಿನಾಕುಲು ತನ್ಕುಲೆಡ್ ಸೈತ್ ಪೋತಿನಾಕುಲೆನ್ ಕೌಂಪಡ್,” ಅಂದ್‌ದ್ ಪಂಡೆ.

²³ಯೇಸು ಓಡೊಗು ಮಿತ್ತಾರ್ನಗ ಆಯನ ಶಿಷ್ಯೆರ್ ಆಯನ ಬೆರಿಯೆ ಪೋಯೆರ್.

²⁴ಆಂಡ ಅಕುಲು ಪೋವೊಂದುಪ್ಪುನಗ ಕಡಲ್ಡ್ ಮಲ್ಲ ಮಲಕ ಲಕ್ಕ್‌ದ್ ಓಡ ಸೆರೆಕ್ಕುಲೆಡ್ದ್ ಮುಚ್ಚಿದ್ ಪೋಂಡು, ಆಂಡ ಯೇಸು ನಿದ್ರೆ ಬತ್ತ್‌ದ್ ಜೆತ್ತ್‌ದಿತ್ತೆ.

²⁵ಅಕುಲು ಕೈತಲ್‌ ಬತ್ತ್‌ದ್ ಆಯನ್ ಲಕ್ಕಾದ್, “ಕರ್ತವಾ! ಎಂಕ್ಲೆನ್ ಕಾಪುಲಾ, ಎಂಕುಲು ಸೈಯೊಂದುಲ್ಲ,” ಅಂದ್‌ದ್ ಪನ್ನಗ,

²⁶ಆಯೆ ಅಕ್ಲೆಗ್, “ಒಂತೆ ನಂಬುನಾಕುಲೇ ನಿಕುಲು ದಾಯೆಗ್ ಪೋಡಿವರ್,” ಪಂಡ್ದ್ ಲಕ್ಕ್‌ದ್ ಗಾಳಿನ್ಲಾ ಕಡಲ್‌ನ್ಲಾ ದಟ್ಟಿಯೆ; ಅಪಗ ಮಾತಲಾ ಶಾಂತ ಆಂಡ್.

²⁷ಅಪಗ ಅಕುಲು ಪೋಡಿದ್, “ಉಂಬೆ ಎಂಚಿತ್ತಿನಾಯೆ ಆದುಪ್ಪೆ? ಗಾಳಿಲಾ ಕಡಲ್‌ಲಾ ಆಯೆ ಪಂಡಿ ಪಾತೆರೊನು ಕೇನುಂಡತ್ತಾ,” ಪಂಡೆರ್.

²⁸ಐಡ್ದ್ ಬೊಕ್ಕ ಯೇಸು, ಆಪೆದ ಬರಿಕ್ಕ್ ಗದರೇನೆರೆ ಸೀಮೆಗ್ ಮುಟ್ಟಿನಪಗ, ದೆವ್ವ ಪತ್ತ್‌ದಿನಾಕುಲು ಇರ್ವೆರ್ ಸಮಾಧಿದ ಮಾಟೆದುಲಯಿಡ್ದ್ ಪಿದಾಡ್ದ್ ಆಯ ಎದುರು ಬತ್ತೆರ್. ಅಕುಲು ಬಾರಿ ಕಠಿಣದಾಕುಲು ಆದಿತ್ತಿನೆಡ್ದ್ ಆ ಸಾದಿಡ್ ಏರ್ಲಾ ಪೋವೊಂದಿಜ್ಜಾಂಡ್.

²⁹ಅಕುಲು “ದೇವೆರೆ ಮಗಾ, ಎಂಕ್ಲೆನ ಸುದ್ಧಿ ನಿಕ್ಕ್ ದಾಯೆಗ್? ಕಾಲ ಬರೊಡ್ದುಂಬು ಎಂಕ್ಲೆಗ್ ಉಪದ್ರ ಕೊರಿಯೆರೆ ಇಡೆಗ್ ಬತ್ತನಾ,” ಅಂದ್‌ದ್ ಅರಬಾಯಿ ದೀಯೆರ್.

³⁰ಆ ಜಾಗ್‌ದ ಒಂತೆ ದೂರೊಡು, ಮಲ್ಲ ಪಂಜಿದ ಒಂಜಿ ಪುಂಡು ಮೇಯೊಂದಿತ್ತ್‌ಂಡ್.

³¹ಅಪಗ ಆ ದೆವ್ವೊಲು ಆಯಡ ನಟ್ಟೊಂಡ, “ಈ ಎಂಕ್ಲೆನ್ ಮೊಕ್ಲೆಡ್ದ್ ಪಿದಯಿ ಪಾಡ್ವಡ, ಆ ಪಂಜಿಲೆ ಗುಂಪುದುಲಯಿ ಕಡಪುಡ್ದು ಕೊರ್ಲ.”

³²ಆಯೆ ಐಕ್ಲೆಗ್, “ಪೋಲೆ” ಪನ್ನಗ ಐಕುಲು ಪಿದಯಿ ಬತ್ತ್‌ದ್ ಪಂಜಿಲೆ ಉಲಯಿ ಪೊಗ್ಗಿಯ, ಆ ಕ್ಷಣೊಟೇ ಆ ಪಂಜಿಲು ಪಾರ್ದ್ ಸಂದ್ ಜಾಗ್‌ಲೆಡ್ದ್ ಪೋದು ಕಡಲ್ದ ಉಲಯಿ ಬೂರ್ದು ನೀರ್‌ಡ್ ಮುರ್ಕುದು ಸೈತ್ ಪೋಯ.

³³ಪಂಜಿಲೆನ್ ಮೇಪಾವುನಾಕುಲು ಊರುದ ಉಲಯಿ ಪಾರ್‌ಪೋದು ಮಾತ ನಡತಿನೆನ್ಲಾ ದೆವ್ವ ಪತ್ತ್‌ದಿನಾಕುಲೆ ಸಂಗತಿನ್ಲಾ ತೆರಿಪಾನಗ

³⁴ಆ ಊರುದಾಕುಲು ಮಾತೆರ್ ಯೇಸುನು ತೂವೆರೆ ಪಿದಾಡ್ದ್ ಬತ್ತ್‌ದ್ ಆಯನ್ ತೂಯಿ ಬೊಕ್ಕ ತನ್ಕುಲೆ ಸೀಮೆನ್ ಬುಡ್ದು ಪೋವೊಡು ಅಂದ್‌ದ್ ನಟ್ಟೊಂಡೆರ್.