Read Tulu ಮತ್ತಾಯೆ 9 Bible Online

ಮತ್ತಾಯೆ 9 - Tulu bible

ಮತ್ತಾಯೆ 9

¹ಯೇಸು ಓಡೊಗು ಮಿತ್ತಾದ್ ಕಡಲ್ ದಾಂಟ್‌ದ್ ತನ ಊರುಗು ಬತ್ತೆ.

²ಅಲ್ಪ ಬನ್ನಗ ಪಜೆಟ್ಟ್‌ ಬೂರ್ದಿತ್ತಿ ಒರಿ ಪಕ್ಷವಾತದಾಯನ್ ಕೆಲೆವೆರ್ ಆಯನ ಕೈತಲ್‌ ತುಂಬೊಂದು ಬತ್ತೆರ್. ಯೇಸು ಅಕ್ಲೆ ನಂಬಿಕೆನ್ ತೂದು ಪಕ್ಷವಾತದಾಯಗ್ “ಮಗಾ ಧೈರ್ಯೊಡು ಉಪ್ಪುಲ, ನಿನ ಪಾಪೊಲು ಮಾಪು ಆತ್ಂಡ್,” ಅಂದ್‌ದ್ ಪಂಡೆ.

³ಆಂಡ ಅಲ್ಪ ಇತ್ತಿನ ಶಾಸ್ತ್ರಿಲೆಡ್ ಕೆಲೆವೆರ್, “ಇಂಬೆ ದೇವದೂಷಣೆ ಮಲ್ತೊಂದುಲ್ಲೆ,” ಪಂಡ್ದ್ ತನ್ಕುಲೆ ಉಲಯಿ ಪಾತೆರೊಂದಿತ್ತೆರ್.

⁴ಯೇಸು ಅಕ್ಲೆ ಆಲೋಚನೆ ತೆರಿದ್, “ದಾಯೆ ನಿಕುಲು ನಿಕ್ಲೆ ಉಡಲ್‌ಡ್ ಬೊಡ್ಚಾಂದಿ ಆಲೋಚನೆನ್ ಮಲ್ತೊಂದುಲ್ಲರ್?

⁵ಒವ್ವು ಸುಲಭ? ‘ನಿನ ಪಾಪೊಲು ಮಾಪು ಆತ್ಂಡ್ ಪನ್ಪಿನವಾ,’ ಇಜ್ಜಿಂಡ, ‘ಲಕ್ಕ್‌ದ್ ನಡಪುಲ ಪನ್ಪಿನವಾ?’

⁶ಆಂಡ ಪಾಪೊಲೆನ್ ಮಾಪು ಮಲ್ಪೆರೆ ನರಮಾನಿ ಮಗಕ್ಕ್ ಭೂಲೋಕೊಡು ಅಧಿಕಾರ ಉಂಡು ಪನ್ಪಿನವು ನಿಕ್ಲೆಗ್ ತೆರಿಯೊಡು,” ಅಂದ್‌ದ್ ಪಕ್ಷವಾತದಾಯನ್ ತೂದು, “ಲಕ್ಕ್‌ದ್ ನಿನ ಪಜೆನ್ ದೆತ್ತೊಂದು ಇಲ್ಲಗ್ ಪೋ!” ಪಂಡೆ.

⁷ಆಯೆ ಲಕ್ಕ್‌ದ್ ಇಲ್ಲಗ್ ಪೋಯೆ.

⁸ಜನೊಕುಲು ಉಂದೆನ್ ತೂದು ಪೋಡಿದ್ ನರಮಾನಿಗ್ ಇಂಚಿತ್ತಿ ಅಧಿಕಾರೊನು ಕೊರಿನೆಕ್ಕ್ ದೇವೆರೆನ್ ಪುಗರಿಯೆರ್.

⁹ಯೇಸು ಅಲ್ತ್‌ಡ್ದ್ ಪೋವೊಂದುಪ್ಪುನಗ ಸುಂಕ ವಸೂಲಿ ಮಲ್ತೊಂದಿತ್ತಿ ಮತ್ತಾಯೆ ಪನ್ಪಿನಾಯನ್ ತೂದು, “ಎನ ಬೆರಿಯೆ ಬಲ,” ಅಂದ್‌ದ್ ಆಯನ್ ಲೆಪ್ಪುನಗ ಆಯೆ ಲಕ್ಕ್‌ದ್ ಆಯನ ಬೆರಿಯೆ ಪೋಯೆ.

¹⁰ಐಡ್ದ್ ಬೊಕ್ಕ ಆಯೆ ಆಯನ ಇಲ್ಲಡ್ ವಣಸ್‌ಗ್ ಕುಲ್ಲೊಂದುಪ್ಪುನಗ ಮಸ್ತ್ ಜನ ಸುಂಕದಾಕುಲುಲಾ ಪಾಪಿಷ್ಟೆರ್‌ಲಾ ಬತ್ತ್‌ದ್ ಯೇಸುನ ಬೊಕ್ಕ ಆಯ ಶಿಷ್ಯೆರೆ ಪಂತೆಡೇ ಕುಲ್ಲೊಂಡೆರ್.

¹¹ಪರಿಸಾಯೆರ್ ಅವೆನ್ ತೂದು ಯೇಸುನ ಶಿಷ್ಯೆರೆಡ, “ನಿಕ್ಲೆ ಗುರು, ಸುಂಕದಾಕುಲೆಡೊಪ್ಪಲಾ ಪಾಪಿಲೆಡೊಪ್ಪಲಾ ದಾಯೆಗ್ ವಣಸ್ ಮಲ್ಪುವೆ?” ಅಂದ್‌ದ್ ಕೇಂಡೆರ್.

¹²ಯೇಸು ಉಂದೆನ್ ಕೇಂಡ್ದ್, “ಸೌಖ್ಯೊಡು ಉಪ್ಪುನಾಕುಲೆಗ್ ವೈದ್ಯೆ ಬೊಡ್ಚಿ ಸೌಖ್ಯದಾಂತಿನಾಕುಲೆಗ್ ಮಾತ್ರ ಬೋಡು.”

¹³ಬೊಕ್ಕ ಅಕ್ಲೆಗ್, “ನಿಕುಲು ಪೋದು, ‘ಎಂಕ್ ಬಲಿ ಬೊಡ್ಚಿ ಕನಿಕರನೇ ಬೋಡು,’ ಪನ್ಪಿ ಪಾತೆರದ ಅರ್ಥೊನು ಕಲ್ತೊನ್ಲೆ ಯಾನ್ ನೀತಿವಂತೆರೆನ್ ಲೆಪ್ಪೆರೆ ಬೈದಿನಿ ಅತ್ತ್ ಪಾಪಿಷ್ಟೆರೆನ್ ಲೆಪ್ಪೆರೆ ಬೈದಿನಿ,” ಅಂದ್‌ದ್ ಪಂಡೆ.

¹⁴ಯೋಹಾನನ ಶಿಷ್ಯೆರ್ ಆಯನ ಕೈತಲ್‌ ಬತ್ತ್‌ದ್, “ಎಂಕುಲುಲಾ ಪರಿಸಾಯೆರ್‌ಲಾ ದಿಂಜ ಉಪವಾಸ ಮಲ್ಪುವ, ಆಂಡ ನಿನ ಶಿಷ್ಯೆರ್ ದಾಯೆಗ್ ಉಪವಾಸ ಮಲ್ಪುಜೆರ್?” ಅಂದ್‌ದ್ ಕೇಂಡೆರ್.

¹⁵ಯೇಸು ಅಕ್ಲೆಗ್, “ಮದ್ಮೆದ ದಿಬ್ಬಣದಾಕುಲು ತನ್ಕುಲೆಡೊಪ್ಪ ಮದ್ಮಯೆ ಉಪ್ಪ ಮುಟ್ಟ ದುಃಖ ಮಲ್ಪುವೆರಾ? ಆಂಡ ಮದ್ಮಯನ್ ಅಕ್ಲೆ ಕೈತಲ್‌ಡ್ದ್ ದೆತ್ತೊಂದು ಪೋಪಿನ ಕಾಲ ಬರ್ಪುಂಡು, ಅಪಗ ಅಕುಲು ಉಪವಾಸ ಮಲ್ಪುವೆರ್.

¹⁶ಏರ್ಲಾ ಪೊಸ ಕುಂಟುದ ತುಂಡುನು ಪರ ಕುಂಟುಗು ಪತ್ತೆ ಪಾಡುಜೆರ್, ಪಾಡ್‌ಂಡ ಪಾಡ್ದಿ ಪತ್ಯೆ ಕುಂಟುನು ಒಯ್ತ್‌ದ್ ಪರ್ತೆಲ್ ಹೆಚ್ಚಾವು.

¹⁷ಉಂದತ್ತಂದೆ ಪರ ಚರ್ಮದ ಚೀರವುಡು ಪೊಸ ದ್ರಾಕ್ಷಾರಸೊನು ದಿಂಜಾವುಜೆರ್. ದಿಂಜಾಂಡ ಚೀರವು ಪುಡಾದ್ ದ್ರಾಕ್ಷಾರಸ ಗುತ್ತುದು ಪೋಪುಂಡು, ಚೀರವು ಹಾಳಾಪುಂಡು. ಆಂಡ ಪೊಸ ದ್ರಾಕ್ಷಾರಸೊನು ಪೊಸ ಚರ್ಮದ ಚೀರವುಡು ಪಾಡ್ದ್ ದೀಪೆರ್. ಅಪಗ ರಡ್ಡ್‌ಲಾ ಒರಿಯುಂಡು.” ಅಂದ್‌ದ್ ಪಂಡೆ.

¹⁸ಇಂಚ ಆಯೆ ಅಕ್ಲೆಡ ಪಾತೆರೊಂದುಪ್ಪುನಗ ಒರಿ ಅಧಿಕಾರಿ ಬತ್ತ್‌ದ್ ಆಯನ ಕಾರ್‌ಗ್ ಅಡ್ಡಬೂರ್ದು, “ಎನ ಮಗಲ್ ಇತ್ತೆ ಸೈತ್ ಪೋಯಲ್; ಆಂಡಲಾ ಈ ಬತ್ತ್‌ದ್ ಆಲೆನ ಮಿತ್ತ್ ನಿನ ಕೈ ದೀಯಡ ಆಲ್ ಬದುಕುವಲ್.” ಅಂದ್‌ದ್ ನಟ್ಟೊನ್ನಗ

¹⁹ಯೇಸು ಲಕ್ಕ್‌ದ್ ಆ ಅಧಿಕಾರಿನ ಬೆರಿಯೆ ಪೋನಗ ಶಿಷ್ಯೆರ್‌ಲಾ ಆಯನ ಬೆರಿಯೆ ಪೋಯೆರ್.

²⁰ಅಪಗ ಪದ್ರಾಡ್ ವರ್ಸೊಡ್ದಿಂಚಿ ನೆತ್ತೆರ್ ತಮೆಲು ಸೀಕ್‌ಡಿತ್ತಿ ಒಂಜಿ ಪೊಂಜೊವು, “ಯಾನ್ ಆಯ ಕುಂಟುನು ಮುಟ್ಟುಂಡ, ಎಂಕ್ ಗುಣ ಆವು,” ಅಂದ್‌ದ್ ಮನಸ್‌ಡ್ ಎನ್ನೊಂದು ಪಿರವುಡು ಬತ್ತ್‌ದ್ ಯೇಸುನ ಕುಂಟುದ ಗೊಂಡೆನ್ ಮುಟ್ಟಿಯಲ್.

²²ಯೇಸು ಪಿಜಿರ್‌ದ್ ಆಲೆನ್ ತೂದು, “ಮಗಲೇ! ಧೈರ್ಯಾದುಪ್ಪುಲ, ನಿನ ನಂಬಿಕೆನೇ ನಿನನ್ ಗುಣ ಮಲ್ತ್ಂಡ್,” ಅಂದ್‌ದ್ ಪಂಡೆ. ಆ ಕ್ಷಣೊಟೇ ಆ ಪೊಂಜೊವು ಗುಣ ಆಯಲ್.

²³ಐಡ್ದ್ ಬೊಕ್ಕ ಯೇಸು ಆ ಅಧಿಕಾರಿನ ಇಲ್ಲಗ್ ಬತ್ತ್‌ದ್ ವಾದ್ಯದಾಕುಲೆನ್ಲಾ ಬೊಬ್ಬೆ ಪಾಡೊಂದಿತ್ತಿನ ಜನೊಕುಲೆ ಗುಂಪುಲೆನ್ಲಾ ತೂದು

²⁴ಅಕ್ಲೆಗ್, “ನಿಕುಲು ಪಿದಯಿ ಪೋಲೆ. ಪೊಣ್ಣು ಸೈದಿಜಲ್, ನಿದ್ರೆ ಮಲ್ತೊಂದು ಉಲ್ಲಲ್.” ಇಂಚ ಪನ್ನಗ ಅಕುಲು ಆಯಗ್ ಗೇಲಿ ಮಲ್ತೆರ್.

²⁵ಜನೊಕುಲೆನ್ ಪಿದಾಯಿ ಕಡಪುಡಿ ಬೊಕ್ಕ ಯೇಸು ಉಲಯಿ ಪೋದು ಆಲೆನ ಕೈ ಪತ್ತಿನಪಗ ಆಲ್ ಲಕ್ಕಿಯಲ್.

²⁶ಈ ಸುದ್ಧಿ ಊರು ಇಡೀ ಪರಡ್ಂಡ್.

²⁷ಯೇಸು ಅಲ್ತ್‌ಡ್ದ್ ಪೋನಗ ಇರ್ವೆರ್ ಕುರುಡೆರ್, “ದಾವೀದ್ ಮಗಾ ಎಂಕ್ಲೆನ್ ಕರುಣೆ ಮಲ್ಪುಲ!” ಅಂದ್‌ದ್ ಬುಲ್ತೊಂದು ಆಯ ಬೆರಿಯೆ ಪೋಯೆರ್.

²⁸ಆಯೆ ಇಲ್ಲಡೆ ಬನ್ನಗ ಆ ಕುರುಡೆರ್ ಆಯನ ಒಟ್ಟುಗು ಇಲ್ಲದುಲಯಿ ಪೋಯೆರ್. ಯೇಸು ಅಕ್ಲೆಡ, “ಯಾನ್ ಉಂದೆನ್ ಮಲ್ಪೊಲಿಯಾ ಪಂಡ್ದ್ ನಂಬುವರಾ?” ಪಂಡಿನೆಕ್ಕ್, “ಅಂದ್ ಕರ್ತವಾ, ಎಂಕುಲು ನಂಬುವ,” ಪಂಡೆರ್.

²⁹ಅಪಗ ಆಯೆ ಅಕ್ಲೆ ಕಣ್ಣ್‌ಲೆನ್ ಮುಟ್ಟುದು, “ನಿಕುಲು ನಂಬಿ ಲೆಕ್ಕನೇ, ನಿಕ್ಲೆಗ್ ಆವಡ್,” ಅಂದ್‌ದ್ ಪಂಡೆ.

³⁰ಅಪಗನೆ ಅಕ್ಲೆಗ್ ಕಣ್ಣ್ ತೋಜ್ಂಡ್. ಬೊಕ್ಕ ಯೇಸು ಅಕ್ಲೆಡ, “ಉಂದು ಏರೆಗ್ಲಾ ತೆರಿಯೆರೆಗೇ ಬಲ್ಲಿ ಅಂದ್‌ದ್ ಕಂಡಿತಾದ್ ಪಂಡೆ.”

³¹ಆಂಡ ಅಕುಲು ಅಲ್ಪಡ್ದ್ ಪಿದಾಡ್ದ್ ಪೋದು ಆ ಸೀಮೆಡ್ ಇಡೀ ಆಯನ ಸುದ್ಧಿನ್ ಪಂಡೆರ್.

³²ಅಕುಲು ಪಿದಾಡ್ನಗ, ಒರಿ ದೆವ್ವ ಪತ್ತ್‌ದಿ ಪೊಟ್ಟನ್ ಯೇಸು ಕೈತಲ್‌ ಕನತೆರ್.

³³ಆಯೆ ದೆವ್ವೊನು ಪಿದಯಿ ಪಾಡಿ ಬೊಕ್ಕ ಪೊಟ್ಟೆ ಪಾತೆರಿಯೆ. ಐಕ್ ಜನೊಕುಲು, “ಇಂಚಿತ್ತಿನೆನ್ ಎಂಕುಲು ಇಡೀ ಇಸ್ರಾಯೇಲ್ ಜನೊಕುಲೆಡ್ ತೂತಿನೆ ಇಜ್ಜಿ,” ಅಂದ್‌ದ್ ಅಚ್ಚಿರ ಆಯೆರ್.

³⁴ಆಂಡ ಪರಿಸಾಯೆರ್, “ಇಂಬೆ ದೆವ್ವೊಲೆ ಮುಖ್ಯಸ್ಥನ ಸಹಾಯೊಡ್ದು ದೆವ್ವೊಲೆನ್ ಬುಡ್ಪಾವೆ,” ಅಂದ್‌ದ್ ಪಂಡೆರ್.

³⁵ಯೇಸು ಮಾತ ಪಟ್ಟಣಲೆನ್ಲಾ, ಹಳ್ಳಿಲೆನ್ಲಾ ತಿರ್ಗ್‌ದ್ ಅಲ್ಪದ ಸಭಾಮಂದಿರೊಲೆಡ್ ಬೋಧನೆ ಮಲ್ತೊಂದು ಪರಲೋಕ ರಾಜ್ಯದ ಸುವಾರ್ತೆನ್ ಸಾರಿದ್ ಮಾತ ತರತ ಸೀಕ್‌ಲೆನ್ ಮಾತ ತರತ ಬೇನೆಲೆನ್ ಗುಣ ಮಲ್ತೊಂದು ಬತ್ತೆ.

³⁶ಆಂಡ ಜನೊಕುಲೆ ಗುಂಪುಲೆನ್ ತೂದು ಅಕುಲು ಕುರುಬೆದಾಂತಿ ಕುರಿಕುಲೆ ಲೆಕ್ಕ ಬೆಂಗ್‌ದ್ ಬಚ್ಚಿದ್ ಪೋತೆರತ್ತಾ ಅಂದ್‌ದ್ ಅಕ್ಲೆ ಮಿತ್ತ್ ಕನಿಕರ ಪಡೆಯೆ.

³⁷ತನ ಶಿಷ್ಯೆರೆಡ, “ಬುಲೆ ಮಸ್ತ್ ಉಂಡು, ಆಂಡ ಬೇಲೆದಾಕುಲು ಕಮ್ಮಿ.

³⁸ಅವೆಡ್ದಾವರ ಬುಲೆತ ಯಜಮಾನಡ, ಆಯೆ ತನ ಬುಲೆಕ್ ಬೇಲೆದಾಕುಲೆನ್ ಕಡಪುಡೊಡು ಅಂದ್‌ದ್ ನಟ್ಟೊನ್ಲೆ,” ಅಂದ್‌ದ್ ಪಂಡೆ.