Read Tulu ಮಾರ್ಕೆ 10 Bible Online

ಮಾರ್ಕೆ 10 - Tulu bible

ಮಾರ್ಕೆ 10

¹ಯೇಸು ಆ ಜಾಗ್‌ನ್ ಬುಡ್ದು, ಯೂದಾಯ ಸೀಮೆಗ್ಲಾ ಯೊರ್ದಾನ್ ತುದೆತ ಆಪೆದ ಮರ್ಗಿಲ್‌ಗ್ ಪೋಯೆ. ಅಲ್ಪ ಜನೊಕುಲು ಗುಂಪುಗುಂಪಾದ್ ಆಯನ ಕೈತಲ್‌ ಕುಡ ಬತ್ತೆರ್. ಆಯೆ ಅಕ್ಲೆಗ್ ಬೋಧನೆ ಮಲ್ಪೆರೆ ಸುರು ಮಲ್ತೆ.

²ಅಪಗ ಪರಿಸಾಯೆರ್ ಆಯನ ಕೈತಲ್‌ ಬತ್ತ್‌ದ್ ಆಯನ್ ಪರೀಕ್ಷೆ ಮಲ್ಪೊಡು ಪನ್ಪಿ ಯೋಚನೆಡ್, “ಒರಿ ಮದ್ಮೆ ಆಯಿ ಬೊಕ್ಕ ತನ ಬೊಡೆದಿನ್ ಬುಡ್ದು ಬುಡ್ಪಿನವು ನ್ಯಾಯನಾ?” ಅಂದ್‌ದ್ ಕೇಂಡೆರ್.

³ಯೇಸು ಐಕ್, “ಮೋಶೆ ನಿಕ್ಲೆಗ್ ವಾ ಅಪ್ಪಣೆ ಕೊರ್ತೆ?” ಅಂದ್‌ದ್ ಕೇಂಡೆ.

⁴ಐಕ್ ಅಕುಲು, “ತ್ಯಾಗಪತ್ರೊನು ಬರೆದ್ ಕೊರ್ದು ಆಲೆನ್ ಬುಡ್ದು ಬುಡೊಲಿ ಅಂದ್‌ದ್ ಮೋಶೆ ಒಪ್ಪಿಗೆ ಕೊರ್ತೆ,” ಅಂದ್‌ದ್ ಪಂಡೆರ್.

⁵ಆಂಡ ಯೇಸು ಅಕ್ಲೆಡ, “ಆಯೆ ನಿಕ್ಲೆನ ಹಟೊನು ತೂದು ನಿಕ್ಲೆಗ್ ಇಂಚಿತ್ತಿ ಅಪ್ಪಣೆನ್ ಬರೆದ್ ದೀತೆ.

⁶ಸೃಷ್ಟಿದ ಸುರುಟ್ಟೇ, ‘ದೇವೆರ್ ನರಮಾನಿನ್ ಆಣ್ ಪೊಣ್ಣಾದ್ ಉಂಡು ಮಲ್ತ್‌ದೆ.’

⁷‘ಈ ಕಾರಣೊಡ್ದು ಅಂಜೊವು ತನ ಅಪ್ಪೆಅಮ್ಮನ್ ಬುಡ್ದು ತನ ಬೊಡೆದಿನ್ ಸೇರೊನ್ವೆ. ಇರ್ವೆರ್‌ಲಾ ಒಂಜೇ ಜೀವ ಆಪೆರ್ ಪಂಡ್ದ್ ಬರೆತ್ಂಡ್.

⁸ಇಂಚ ಉಪ್ಪುನಗ ಅಕುಲು ನನ ಇರ್ವೆರತ್ತ್. ಒಂಜೇ ಶರೀರ ಆದುಪ್ಪುವೆರ್.’

⁹ಅಂಚಾಯಿನೆಡ್ದ್ ದೇವೆರ್ ಕೂಡಾಯಿನೆನ್ ನರಮಾನಿಲು ಬೇತೆ ಮಲ್ಪೆರೆ ಬಲ್ಲಿ,” ಅಂದ್‌ದ್ ಪಂಡೆ.

¹⁰ಅಕುಲು ಇಲ್ಲಡ್ ಉಪ್ಪುನಗ ಆಯನ ಶಿಷ್ಯೆರ್ ಈ ಸಂಗತಿಡ್ ಆಯಡ ಕುಡ ಕೇಂಡೆರ್.

¹¹ಆಯೆ ಅಕ್ಲೆಡ, “ತನ ಬೊಡೆದಿನ್ ಬುಡ್ದು ಬೊಕ್ಕೊರ್ತಿನ್ ಮದ್ಮೆ ಮಲ್ತೊನುನಾಯೆ ತನ ಬೊಡೆದಿಗ್ ವಿರೋಧಾದ್ ವ್ಯಭಿಚಾರ ಮಲ್ಪುನಾಯೆ ಆದುಲ್ಲೆ.

¹²ಬೊಕ್ಕ ಬೊಡೆದಿ ತನ ಕಂಡನಿನ್ ಬುಡ್ದು ಬೊಕ್ಕೊರಿಯನ್ ಮದ್ಮೆ ಆಯಲ್‌ಡ, ಆಲ್‌ಲಾ ವ್ಯಭಿಚಾರ ಮಲ್ಪುನಾಲ್ ಆದುಲ್ಲಲ್,” ಅಂದ್‌ದ್ ಪಂಡೆ.

¹³ಬೊಕ್ಕ ಕೆಲೆವೆರ್ ತನ್ಕುಲೆ ಎಲ್ಯ ಜೋಕುಲೆನ್ ಯೇಸು ಮುಟ್ಟೊಡು ಪಂಡ್ದ್, ಆಯನ ಕೈತಲ್‌ ಕನತಿನಪಗ ಶಿಷ್ಯೆರ್ ಅಕ್ಲೆನ್ ದಟ್ಟಿಯೆರ್.

¹⁴ಆಂಡ ಯೇಸು ಅವೆನ್ ತೂದು, ಕೋಪೊಡು ಅಕ್ಲೆಡ, “ಜೋಕುಲೆನ್ ಎನ ಕೈತಲ್‌ ಬರಿಯೆರೆ ಬುಡ್ಲೆ. ಅಕ್ಲೆಗ್ ಅಡ್ಡಿ ಮಲ್ಪಡೆ. ದೇವೆರೆ ರಾಜ್ಯ ಇಂಚಿತ್ತಿನಾಕುಲೆನವೇ.”

¹⁵ನಿಕ್ಲೆಗ್ ನಿಜಾದ್ ಪನ್ಪೆ, ಬಾಲೆದಲೆಕ್ಕ ಒರಿ ದೇವೆರೆ ರಾಜ್ಯೊನು ದೆತ್ತೊನುಜೆಡ, ಆಯೆ ಐತ ಉಲಯಿ ಪೋವಯೆ, ಅಂದ್‌ದ್ ಪಂಡೆ.

¹⁶ಐಕ್ಲೆನ್‌ ಅರ್ಂಟ್ ಪತ್ತ್‌ದ್ ಐಕ್ಲೆ ಮಿತ್ತ್ ಕೈ ದೀದ್ ಆಶೀರ್ವಾದ ಮಲ್ತೆ.

¹⁷ಅಲ್ಪಡ್ದ್ ಯೇಸು ಪಿದಾಡ್ದ್, ಸಾದಿಡ್ ಪೋನಗ ಒರಿ ಪಾರೊಂದು ಬತ್ತ್‌ದ್, ಆಯನ ಎದುರು ಅಡ್ಡಬೂರ್ದು ಆಯಡ, “ಎಡ್ಡೆ ಬೋಧಕಾ, ಯಾನ್ ನಿತ್ಯಜೀವೊಗು ಭಾದ್ಯಸ್ಥೆ ಆವೊಡಾಂಡ ದಾದ ಮಲ್ಪೊಡು?” ಅಂದ್‌ದ್ ಕೇಂಡೆ.

¹⁸ಯೇಸು ಆಯಡ, “ಎನನ್ ಎಡ್ಡೆಂತಿನಾಯೆ ಅಂದ್‌ದ್ ದಾಯೆಗ್ ಪನ್ಪ? ದೇವೆರ್ ಒರಿಯೇ ಅತ್ತಂದೆ ಬೇತೆ ಏರ್ಲಾ ಎಡ್ಡೆಂತಿನಾಯೆ ಇಜ್ಜೆ.

¹⁹ಮಾನ್ಯ ಕೆರಿಯೆರೆ ಬಲ್ಲಿ, ವ್ಯಭಿಚಾರ ಮಲ್ಪೆರೆ ಬಲ್ಲಿ, ಕಂಡೊನಿಯೆರೆ ಬಲ್ಲಿ, ಸುಳ್ಳು ಸಾಕ್ಷಿ ಪನಿಯೆರೆ ಬಲ್ಲಿ, ಮೋಸ ಮಲ್ಪೆರೆ ಬಲ್ಲಿ, ನಿನ ಅಪ್ಪೆಅಮ್ಮನ್ ಸನ್ಮಾನ ಮಲ್ಪೊಡು ಪನ್ಪಿ ದೇವೆರೆ ಅಪ್ಪಣೆಲು ನಿಕ್ಕ್ ಗೊತ್ತುಂಡತ್ತಾ,” ಅಂದ್‌ದ್ ಪಂಡೆ.

²⁰ಐಕ್ ಆಯೆ, “ಬೋಧಕಾ, ಯಾನ್ ಎಲ್ಲಿಡ್ದಿಂಚಿಲಾ ಉಂದೆಕ್ಕ್ ಮಾತೆಕ್ಲಾ ಸರಿಯಾದ್ ನಡತೊಂದು ಬೈದೆ,” ಪಂಡ್ದ್ ಪನ್ನಗ,

²¹ಯೇಸು ಆಯನ್ ದೃಷ್ಟಿ ದೀದ್ ಪ್ರೀತಿಡ್ ಆಯಡ, “ನಿನಡ ಒಂಜಿ ಕಮ್ಮಿ ಉಂಡು. ಪೋದು ನಿನ ಆಸ್ತಿನ್ ಮಾತೆನ್ ಮಾರ್ದ್ ಬಡವೆರೆಗ್ ಕೊರ್ಲ. ಪರಲೋಕೊಡು ನಿಕ್ಕ್ ಆಸ್ತಿ ಉಪ್ಪುಂಡು; ಬೊಕ್ಕ ಎನ ಬೆರಿಯೆ ಬಲ,” ಪಂಡ್ದ್ ಪಂಡೆ.

²²ಆಂಡ ಆಯಗ್ ಮಸ್ತ್ ಆಸ್ತಿ ಇತ್ತಿನೆಡ್ದ್ ಈ ಪಾತೆರೊನು ಕೇಂಡ್ದ್ ಮೋನೆ ಬಾಡಾದ್ ದುಃಖೊಡು ಪಿರ ಪೋಯೆ.

²³ಅಪಗ ಯೇಸು ಸುತ್ತಲಾ ತೂದು ತನ ಶಿಷ್ಯೆರೆಗ್, “ಐಶ್ವರ್ಯವಂತೆ ದೇವೆರೆ ರಾಜ್ಯೊಡು ಸೇರುನವು ಏತೋ ಕಷ್ಟ,” ಅಂದ್‌ದ್ ಪಂಡೆ.

²⁴ಶಿಷ್ಯೆರ್ ಆಯನ ಪಾತೆರೊಲೆನ್ ಕೇಂಡ್ದ್ ಅಚ್ಚಿರ ಆಯೆರ್. ಆಂಡ ಯೇಸು ಕುಡ ಅಕ್ಲೆಗ್, “ಜೋಕುಲೇ, ದೇವೆರೆ ರಾಜ್ಯೊಡು ಸೇರುನವು ಏತೋ ಕಷ್ಟ.

²⁵ಐಶ್ವರ್ಯವಂತೆ ದೇವೆರೆ ರಾಜ್ಯೊಡು ಸೇರುನೆಡ್ದ್, ಒಂಜಿ ಒಂಟೆ ಸೂಜಿದ ಕಣ್ಣ್‌ಡ್ ನೂರುನವು ಸುಲಭ ಆದುಂಡು,” ಪಂಡೆ

²⁶ಶಿಷ್ಯೆರ್ ಈ ಪಾತೆರೊಗು ನನಲಾತ್ ಅಚ್ಚಿರ ಆದ್, “ಇಂಚಾಂಡ, ಏರೆಗ್ ರಕ್ಷಣೆ ಆವು,” ಅಂದ್‌ದ್ ತನ್ಕುಲೆಡ್ ಪಾತೆರೊಂಡೆರ್.

²⁷ಯೇಸು ಅಕ್ಲೆನ ಮಿತ್ತ್ ದೃಷ್ಟಿ ದೀದ್, “ಉಂದು ನರಮಾನಿಲೆಗ್ ಅಸಾದ್ಯದವು, ಆಂಡ ದೇವೆರೆಗ್ ಅತ್ತ್. ದೇವೆರೆಗ್ ಮಾತಲಾ ಸಾದ್ಯನೇ.” ಪಂಡೆ.

²⁸ಅಪಗ ಪೇತ್ರೆ ಆಯಡ, “ಇಂದಾ, ಎಂಕುಲು ಮಾತ ಬುಡ್ದು ನಿನ ಬೆರಿಯೆ ಬೈದ,” ಅಂದ್‌ದ್ ಪನಿಯೆರೆ ಸುರು ಮಲ್ತೆ.

²⁹ಐಕ್ ಯೇಸು, “ನಿಕ್ಲೆಗ್ ನಿಜಾದ್ ಪನ್ಪೆ, ಏರ್ ಎಂಕಾದ್ ಸುವಾರ್ತೆಗಾದ್ ಇಲ್ಲ್‌ನಾವಡ್, ಮೆಗ್ಯೆಪಲಯನಾವಡ್, ಮೆಗ್ದಿಪಲಿನಾವಡ್, ಅಪ್ಪೆನಾವಡ್, ಅಮ್ಮೆರೆನಾವಡ್, ಜೋಕುಲೆನಾವಡ್, ಆಸ್ತಿನಾವಡ್ ಬುಡ್ದು ಬುಡ್ತೆನಾ,

³⁰ಆಯಗ್ ಇತ್ತೆದ ಕಾಲೊಡು ಇಲ್ಲ್, ಮೆಗ್ಯೆಪಲಯೆ, ಮೆಗ್ದಿಪಲಿ, ಅಪ್ಪೆ, ಜೋಕುಲು, ಆಸ್ತಿ ಉಂದು ಮಾತಲಾ ಕಷ್ಟದೊಟ್ಟುಗು ನೂದೆದಾತ್ ತಿಕ್ಕುಂಡು. ಬೊಕ್ಕ ಬರ್ಪಿ ಯುಗೊಟ್ಟು ನಿತ್ಯಜೀವಲಾ ತಿಕ್ಕುಂಡು.

³¹ಆಂಡ, ಮಸ್ತ್ ಜನ ಸುರುತ್ತಾಕುಲು ಕಡೆತ್ತಾಕುಲು ಆಪೆರ್, ಕಡೆತ್ತಾಕುಲು ಸುರುತ್ತಾಕುಲು ಆಪೆರ್,” ಅಂದ್‌ದ್ ಪಂಡೆ.

³²ಅಕುಲು ಯೆರೂಸಲೇಮುಗು ಪೋವೊಂದುಪ್ಪುನಗ ಸಾದಿಡ್ ಯೇಸು ಅಕ್ಲೆನ ದುಂಬುಡೇ ಪೋಯೆ, ಶಿಷ್ಯೆರ್ ತೂದು ಅಚ್ಚಿರ ಆಯೆರ್, ಬೊಕ್ಕ ಆಯನ ಬೆರಿಯೆ ಪೋಪಿನಾಕುಲು ಪೋಡಿಯೆರ್. ಅಪಗ ಆಯೆ ಕುಡ ತನ ಪದ್ರಾಡ್ ಶಿಷ್ಯೆರೆನ್ ಲೆತ್ತ್‌ದ್ ತನ್ಕ್ ಆಪಿನೆನ್ ಪನಿಯೆರೆ ಸುರು ಮಲ್ತೆ.

³³ತೂಲೆ, “ನಮ ಯೆರೂಸಲೇಮುಗು ಪೋವೊಂದುಲ್ಲ. ನರಮಾನಿ ಮಗನ್ ಪ್ರಧಾನಯಾಜಕೆರೆ ಬೊಕ್ಕ ಶಾಸ್ತ್ರಿಲೆನ ಕೈಕ್ ಪತ್ತ್‌ದ್ ಕೊರುವೆರ್. ಆಯಗ್ ಮರಣ ದಂಡನೆ ಆವು. ಆಯನ್ ಪಿದಯಿದ ಜನೊಕುಲೆ ಕೈಕ್ ಒಚ್ಚಿದ್ ಕೊರುವೆರ್.

³⁴ಮೊಕುಲು ಆಯಗ್ ಗೇಲಿ ಮಲ್ತ್‌ದ್, ಆಯನ ಮಿತ್ತ್ ಉಬ್ಬಿದ್, ಆಯಗ್ ಚಾಟಿಡ್ ಹಾಕ್‌ದ್, ಕೆರ್ದ್ ಪಾಡ್ವೆರ್, ಬೊಕ್ಕ ಆಯೆ ಮೂಜನೇ ದಿನೊಟು ಜೀವಾದ್ ಲಕ್ಕ್‌ದ್ ಬರ್ಪೆ,” ಅಂದ್‌ದ್ ಪಂಡೆ.

³⁵ಅಪಗ ಜೆಬೆದಾಯನ ಜೋಕುಲಾಯಿ ಯಾಕೋಬು, ಯೋಹಾನೆ ಆಯನ ಕೈತಲ್‌ ಬತ್ತ್‌ದ್ ಆಯಗ್, “ಗುರೂ, ಎಂಕ್ಲೆನ ಒಂಜಿ ಆಸೆನ್ ನಡಪಾದ್ ಕೊರೊಡು” ಅಂದ್‌ದ್ ಕೇನೊಂಡೆರ್.

³⁶ಯೇಸು ಅಕ್ಲೆಡ, “ನಿಕ್ಲೆಗ್ ದಾದ ನಡಪಾದ್ ಕೊರೊಡು?” ಅಂದ್‌ದ್ ಕೇಂಡೆ.

³⁷ಅಕುಲು, “ಈ ನಿನ ಮೈಮೆದ ಪಧವಿನ್ ಪಡೆನಗ, ಎಂಕ್ಲೆಡ್ ಒರಿ ನಿನ ಬಲತ್ತ ಮರ್ಗಿಲ್‌ಡ್ ಬೊಕ್ಕೊರಿ ನಿನ ದತ್ತ ಮರ್ಗಿಲ್‌ಡ್ ಕುಲ್ಲುಲೆಕ್ಕ ಮಲ್ಪೊಡು,” ಪಂಡೆರ್.

³⁸ಆಂಡ ಯೇಸು ಅಕ್ಲೆಡ, “ನಿಕುಲು ನಟ್ಟೊಂಡಿನವು ದಾನೆಂದ್ ನಿಕ್ಲೆಗ್ ತೆರಿಯಂದ್. ಎನ ಕಷ್ಟೊಡು ಪಾಲ್‌ದಾರೆರಾವೆರೆ ನಿಕ್ಲೆಗ್ ಸಾದ್ಯನಾ? ಎಂಕ್ ಆಪಿನ ದೀಕ್ಷಾಸ್ನಾನೊನು ಪಡೆಯೆರೆ ನಿಕ್ಲೆಗ್ ಸಾದ್ಯನಾ?” ಪಂಡೆ.

³⁹ಅಕುಲು ಆಯಡ, “ಆವು,” ಪಂಡೆರ್. ಅಪಗ ಯೇಸು ಅಕ್ಲೆಗ್, “ಎನ ಕಷ್ಟೊಡು ನಿಕುಲು ಪಾಲ್‌ದಾರೆರ್ ಆವರ್ ಸರಿ. ಎಂಕ್ ಆಪಿನ ದೀಕ್ಷಾಸ್ನಾನ ನಿಕ್ಲೆಗಾಪುಂಡಲಾ

⁴⁰ಎನ ಬಲತ್ತ ಮರ್ಗಿಲ್ಡಾವಡ್, ದತ್ತ ಮರ್ಗಿಲ್ಡಾವಡ್ ಕುಲ್ಲಾವುನ ಎನ ಬೇಲೆ ಅತ್ತ್. ಅವು ಏರೆಗ್ ತಯಾರ್ ಮಲ್ತ್‌ದುಂಡಾ, ಅಕ್ಲೆಗ್ ತಿಕ್ಕುಂಡು,” ಅಂದ್‌ದ್ ಪಂಡೆ.

⁴¹ಒರಿದಿ ಪತ್ತ್ ಶಿಷ್ಯೆರ್ ಉಂದೆನ್ ಕೇಂಡ್ದ್, ಯಾಕೋಬು, ಯೋಹಾನನ ಮಿತ್ತ್ ಕೋಪ ಮಲ್ತೆರ್.

⁴²ಯೇಸು ಅಕ್ಲೆನ್ ಕೈತಲ್‌ ಲೆತ್ತ್‌ದ್ ಅಕ್ಲೆಗ್, “ಪಿದಯಿದ ಜನೊಕುಲೆನ್ ಆಳುನಾಕುಲು ಅಕ್ಲೆನ ಮಿತ್ತ್ ಅಹಂಕಾರೊಡು ನಡಪಾವೆರ್ ಬೊಕ್ಕ ಮಲ್ಲಾಕುಲು ಬಲತ್ಕಾರೊಡ್ದು ಅಧಿಕಾರ ನಡಪಾವೆರ್ ಅಂದ್‌ದ್ ನಿಕುಲು ತೆರಿದರತ್ತಾ?

⁴³ಆಂಡ ನಿಕ್ಲೆಡ್ ಅಂಚ ಉಪ್ಪೆರೆ ಬಲ್ಲಿ. ನಿಕ್ಲೆಡ್ ಮಲ್ಲಾಯೆ ಆವೊಡುಂದು ಉಪ್ಪುನಾಯೆ ಚಾಕ್ರಿದಾಯೆ ಆದುಪ್ಪೊಡು.

⁴⁴ಆಂಡ ನಿಕ್ಲೆಡ್ ಸುರುತ್ತಾಯೆ ಆವೊಡು ಇನ್ಪಿನಾಯೆ ನಿಕ್ಲೆ ಅಡಿಯಾಳ್ ಆದುಪ್ಪೊಡು.

⁴⁵ನರಮಾನಿ ಮಗೆಲಾ ಚಾಕ್ರಿ ಮಲ್ಪಾವೊನ್ರೆ ಅತ್ತ್, ಚಾಕ್ರಿ ಮಲ್ಪೆರೆಲಾ ತನ ಪ್ರಾಣೊನು ಮಸ್ತ್ ಜನೊಕುಲೆನ ಬುಡುಗಡೆಗಾದ್ ಕೊರಿಯೆರೆ ಬತ್ತೆ.” ಅಂದ್‌ದ್ ಪಂಡೆ.

⁴⁶ಐಡ್ದ್ ಬೊಕ್ಕ ಅಕುಲು ಯೆರಿಕೊಗು ಬತ್ತೆರ್. ಯೇಸುಲಾ ಆಯನ ಶಿಷ್ಯೆರ್‌ಲಾ ಮಸ್ತ್ ಜನೊಕುಲೆ ಗುಂಪುಲಾ ಆ ಊರುಡ್ದು ಪಿದಾಡ್ದ್ ಪೋವೊಂದುಪ್ಪುನಗ, ತಿಮಾಯನ ಮಗೆ ಕುರುಡೆ ಬಾರ್ತಿಮಾಯೆ ಇನ್ಪಿ ನಟ್ಟುನಾಯೆ, ಸಾದಿದ ಬರಿಟ್ಟ್ ಕುಲ್ಲುದಿತ್ತೆ.

⁴⁷ಆ ಕುರುಡೆ ಸಾದಿಡ್ ಪೋಪಿನಾಯೆ ನಜರೇತ್‌ದ ಯೇಸು ಅಂದ್‌ದ್ ಆಯೆ ತೆರಿದ್, “ಯೇಸೋ ದಾವೀದ ಮಗಾ, ಎನನ್ ಕರುಣೆ ಮಲ್ಪುಲ!” ಅಂದ್‌ದ್ ಬೊಬ್ಬೆ ದೀಯೆ.

⁴⁸ಕೆಲೆವೆರ್, ಮನಿಪಂದೆ ಉಪ್ಪು ಅಂದ್‌ದ್ ಆಯನ್ ದಟ್ಟಿನಗ ಆಯೆ ದಾವೀದ ಮಗಾ, “ಎಂಕ್ ಕನಿಕರ ತೋಜಾಲ,” ಅಂದ್‌ದ್ ಬೊಕ್ಕಲಾತ್ ಬೊಬ್ಬೆ ದೀಯೆ.

⁴⁹ಅಪಗ ಯೇಸು ಉಂತುದು, “ಆಯನ್ ಲೆಪ್ಪುಲೆ.” ಅಂದ್‌ದ್ ಪನ್ನಗ ಅಕುಲು ಆ ಕುರುಡನ್ ಲೆತ್ತ್‌ದ್, “ಧೈರ್ಯೊಡುಪ್ಪುಲ, ಲಕ್ಕ್‌ಲ, ನಿನನ್ ಲೆಪ್ಪುವೆ,” ಅಂದ್‌ದ್ ಪಂಡೆರ್.

⁵⁰ಆಯೆ ತನ ಕುಂಟುನು ದಕ್ಕ್‌ದ್, ದಿಡ್ಕ ಲಕ್ಕ್‌ದ್, ಯೇಸುನ ಕೈತಲ್‌ ಬತ್ತೆ.

⁵¹ಯೇಸು ಆಯಡ, “ಯಾನ್ ನಿಕ್ಕ್ ದಾದ ಮಲ್ಪೊಡು?” ಅಂದ್‌ದ್ ಕೇನ್ನಗ, ಆ ಕುರುಡೆ “ಗುರೂ, ಎಂಕ್ ಕಣ್ಣ್ ತೋಜುಲೆಕ್ಕ ಮಲ್ಪೊಡು,” ಪಂಡೆ.

⁵²ಯೇಸು ಆಯಗ್, “ಪೋಲ, ನಿನ ನಂಬಿಕೆನೇ ನಿನನ್ ಗುಣ ಮಲ್ತ್ಂಡ್,” ಪಂಡ್ದ್ ಪಂಡೆ. ಅಪಗನೆ ಆಯಗ್ ಕಣ್ಣ್ ತೋಜ್ಂಡ್. ಆಯೆ ಆ ಸಾದಿಡ್ ಆಯನ ಬೆರಿಯೆ ಪೋಯೆ.