Read Tulu ಮಾರ್ಕೆ 13 Bible Online

ಮಾರ್ಕೆ 13 - Tulu bible

ಮಾರ್ಕೆ 13

¹ಯೇಸು ದೇವಾಲಯೊನು ಬುಡ್ದು ಪೋವೊಂದುಪ್ಪುನಗ ಆಯನ ಶಿಷ್ಯೆರೆಡ್ ಒರಿ ಆಯಗ್, “ಗುರೂ ತೂಲ, ಏತ್ ಪೊರ್ಲುದ ಕಲ್ಲುಲು, ಏತ್ ಪೊರ್ಲುದ ಕಟ್ಟೊಣೊಲು,” ಅಂದ್‌ದ್ ಪಂಡೆ.

²ಯೇಸು ಆಯಗ್, “ಈ ಮಲ್ಲ ಕಟ್ಟೊಣೊಲೆನ್ ತೂಪರತ್ತಾ? ನೆತ್ತ ಒಂಜಿ ಕಲ್ಲ್‌ಲಾ, ಒಂಜೆತ್ತ ಮಿತ್ತ್ ಒಂಜಿ ಉಪ್ಪಂದ್, ಮಾತಲಾ ಮಗ್‌ರ್ದ್ ತಿರ್ತ್ ಬೂರ್ದು ಪೋವು,” ಅಂದ್‌ದ್ ಪಂಡೆ.

³ಬೊಕ್ಕ ಆಯೆ ಇಪ್ಪೆಗುಡ್ಡೆದ ಮಿತ್ತ್ ದೇವಾಲಯದ ಎದುರು ಕುಲ್ಲುದಿತ್ತಿನಪಗ ಪೇತ್ರೆ, ಯಾಕೋಬು, ಯೋಹಾನೆ, ಅಂದ್ರೆಯ ಮೊಕುಲು, “ಉಂದು ಏಪ ಆವು, ಅಂಚ ಆವನಗ ವಾ ಗುರ್ತ ತೋಜಿದ್ ಬರ್ಪುಂಡು ಎಂಕ್ಲೆಗ್ ಪನ್ಲ.” ಅಂದ್‌ದ್ ಆಯಡ ಪ್ರತ್ಯೇಕಾದ್ ಕೇಂಡೆರ್.

⁵ಯೇಸು ಅಕ್ಲೆಗ್ ಪಂಡಿನಿ ದಾನೆ ಪಂಡ, “ಏರಾಂಡಲಾ ನಿಕ್ಲೆನ್ ಮೋಸ ಮಲ್ಪಂದಿಲೆಕ್ಕ ತೂವೊನ್ಲೆ.

⁶ದಾಯೆ ಪಂಡ ಕೆಲೆವೆರ್ ಬತ್ತ್‌ದ್ ಎನ ಪುದರ್ ದೆತ್ತೊಂದು, ‘ಯಾನೇ ಕ್ರಿಸ್ತೆ,’ ಅಂದ್‌ದ್ ಏತೋ ಜನೊಕುಲೆನ್ ಮೋಸೊಡು ಪಾಡೆರ್.

⁷ಉಂದತ್ತಂದೆ ಯುದ್ದೊಲು ಆಪಿನೆನ್ಲಾ ಯುದ್ದೊಲು ಆಪಿಲೆಕ್ಕ ಉಂಡು ಪನ್ಪಿ ಸುದ್ಧಿಲೆನ್ಲಾ ನಿಕುಲು ಕೇನ್ನಗ ಗಲಿಬಿಲಿ ಆವೊಡ್ಚಿ. ಇಂಚಿನ ಪರಿಸ್ಥಿತಿ ಆಪಿನವು ಅಗತ್ಯ, ಆಂಡಲಾ ಉಂದು ಅಂತ್ಯಕಾಲ ಅತ್ತ್.

⁸ಜನಾಂಗದ ವಿರೋಧಾದ್ ಜನಾಂಗೊಲುಲಾ; ರಾಜ್ಯೊಗು ವಿರೋಧಾದ್ ರಾಜ್ಯೊಲುಲಾ ಲಕ್ಕುಂಡು. ಭೂಕಂಪೊಲು ಅಲ್ಪಲ್ಪ ಆಪಿನವುಲಾ ಬರಗಾಲ ಬರ್ಪಿನವುಲಾ ಉಂದು ಮಾತ (ಪೊಸ ಯುಗ ಪುಟ್ಟುನ) ಪೆದ್ದುನಪಗ ಆಪಿ ಸುರುತ್ತ ಬೇನೆಲು.

⁹“ನಿಕುಲು ನಿಕ್ಲೆನ ಸಂಗತಿಡ್ ಎಚ್ಚರಿಕೆ ಆದುಪ್ಪುಲೆ. ಅಕುಲು ನಿಕ್ಲೆನ್ ನ್ಯಾಯಸಭೆಕ್ಕ್ ಒಯ್ತೊಂದು ಪೋವೆರ್; ಬೊಕ್ಕ ಸಭಾಮಂದಿರೊಲೆಡ್ ನಿಕ್ಲೆಗ್ ಹಾಕೆರ್. ಎನಡ್ದಾವರ ನಿಕ್ಲೆನ್ ಅಧಿಪತಿಲೆ ಬೊಕ್ಕ ಅರಸುಲೆ ಎದುರು ಕೊನೊವೆರ್, ಇಂಚ ಅಕ್ಲೆಗ್ ಸಾಕ್ಷಿ ಆವರ್.

¹⁰ಆಂಡ ಅವೆಡ್ದ್ ದುಂಬು ಮಾತ ಜನಾಂಗೊಲೆಗ್ ಸುವಾರ್ತೆ ಸಾರಿಯೊಡು.

¹¹ನಿಕ್ಲೆನ್ ನ್ಯಾಯಸಭೆಕ್ಕ್ ಪತ್ತೊಂದು ಪೋದು ಒಚ್ಚಿದ್ ಕೊರ್ನಗ ಎಂಚ ಪಾತೆರೊಡು, ದಾದ ಪನೊಡು ಅಂದ್‌ದ್ ಸುರುಟ್ಟೇ ಚಿಂತೆ ಮಲ್ಪಡೆ; ಪನೊಡಿತ್ತಿ ಪಾತೆರೊಲು ಆ ಗಳಿಗೆಡ್ ನಿಕ್ಲೆಗ್ ಕಾರಣ ಆಪಿ ಪಾತೆರೊನೆ ಪನ್ಲೆ. ದಾಯೆ ಪಂಡ ಅಪಗ ಪಾತೆರುನಾಕುಲು ನಿಕುಲತ್ತ್, ಪರಿಶುದ್ಧಾತ್ಮೆನೇ ನಿಕ್ಲೆಡ್ದ್ ಪಾತೆರುವೆ.

¹²ಉಂದತ್ತಂದೆ ಪಲಯೆ ಮೆಗ್ಯನ್, ಅಮ್ಮೆ ಮಗನ್ ಮರಣೊಗು ಒಚ್ಚಿದ್ ಕೊರುವೆರ್; ಜೋಕುಲು ಅಪ್ಪೆಅಮ್ಮಾಡ್ಲೆ ಮಿತ್ತ್ ತಿರ್ಗ್ ಬೂರ್ದು ಅಕ್ಲೆನ್ ಕೆರ್ವೆರ್.

¹³ಬೊಕ್ಕ ಎನ ಪುದರ್‌ಗಾದ್ ಮಾತೆರ್ಲಾ ನಿಕ್ಲೆನ್ ಪಗೆ ಮಲ್ಪುವೆರ್. ಆಂಡ ಕಡೆ ಮುಟ್ಟ ತಾಳೊನುನಾಯಗ್ ರಕ್ಷಣೆ ಆವು.

¹⁴“ಉಂದತ್ತಂದೆ ಹಾಳ್ ಮಲ್ಪುನ ಪೇಸಿಗೆ ವಸ್ತುಲು ಉಂತಂದಿ ಜಾಗ್‌ಡ್ ಉಂತುದಿನೆನ್ ನಿಕುಲು ತೂವನಗ, (ಉಂದೆನ್ ಓದುನಾಯೆ ತೆರಿಯೊನಡ್). ಯೂದಾಯೊಡು ಉಪ್ಪುನಾಕುಲು ಪರ್ವತೊಲೆಗ್ ಪಾರ್ದ್ ಪೋವಡ್.

¹⁵ಮಾಳಿಗೆಡ್ ಉಪ್ಪುನಾಯೆ ತಿರ್ತ್ ಜತ್ತ್‌ದ್ ಇಲ್ಲದುಲಯಿ ಪೋವಂದೆ, ತನ ಇಲ್ಲದುಲಯಿಡ್ದ್ ದಾದಾಂಡಲಾ ದೆತ್ತೊನಂದೆ ಉಪ್ಪಡ್.

¹⁶ಕಂಡೊಡು ಉಪ್ಪುನಾಯೆ ತನ ಪೊದೆಪುನು ದೆತ್ತೊನಿಯೆರೆ ಪಿರ ಪೋವಂದೆ ಉಪ್ಪಡ್.

¹⁷ಆಂಡ ಆ ದಿನೊಟು ಬಂಜಿನಾಕುಲೆಗ್ಲಾ ಬಾಲೆಗ್ ಮಿರೆ ಕೊರ್ಪಿ ಅಪ್ಯಾಡ್ಲೆಗ್ಲಾ ಬರ್ಪಿ ಕಷ್ಟೊನು ಪನಿಯೆರೆ ತೀರಂದ್.

¹⁸ಆ ದಿನೊಕುಲು ಸಂಕಟದ ದಿನೊಕುಲು ಆಯಿನೆಡ್ದ್ ಉಂದು ಮಾತ ಚಳಿಕಾಲೊಡು ಆವೆರೆ ಬಲ್ಲಿ ಅಂದ್‌ದ್ ಪ್ರಾರ್ಥನೆ ಮಲ್ಪುಲೆ. ಅಂಚಿನ ಸಂಕಟ ದೇವೆರ್ ಈ ಲೋಕದ ಸೃಷ್ಟಿದ ಆರಂಭದ ದಿನೊಡ್ದು ಇನಿ ಮುಟ್ಟಲಾ ಆತಿಜಿ. ನನ ಮಿತ್ತ್‌ಗ್ಲಾ ಆವಂದ್.

²⁰ಕರ್ತವೆ ಆ ದಿನೊಕುಲೆನ್ ಕಡಿಮೆ ಮಲ್ತ್‌ಜೆಡ, ಒಂಜಿ ನರಪ್ರಾಣಿಲಾ ಬದ್‌ಕಂದ್. ಆಂಡ ತಾನ್ ಅಜತ್ ದೆತ್ತೊಂಡಿನಾಕುಲೆಗಾದ್ ಆ ದಿನೊಕುಲೆನ್ ಕಡಿಮೆ ಮಲ್ತ್‌ದೆ.

²¹“ಅಪಗ ಏರಾಂಡಲಾ ನಿಕ್ಲೆಗ್, ‘ಇಂದಾ, ಕ್ರಿಸ್ತೆ ಮೂಲು ಉಲ್ಲೆ,’ ಇಂದಾ, ‘ಅಲ್ಪ ಉಲ್ಲೆ,’ ಅಂದ್‌ದ್ ಪಂಡೆರ್ಡ ನಂಬಡೆ.

²²ದಾಯೆಗಂದ್ಂಡ, ಸುಳ್ಳು ಕ್ರಿಸ್ತೆರ್ಲಾ ಸುಳ್ಳು ಪ್ರವಾದಿಲುಲಾ ತೋಜಿದ್ ಬರ್ವೆರ್. ಸಾದ್ಯ ಇತ್ತ್ಂಡ, ದೇವೆರ್ ಅಜತ್ ದೆತ್ತೊಂಡಿನಾಕುಲೆನ್ಲಾ ಮೋಸೊಡು ಪಾಡಿಯೆರೆಗಾದ್ ಗುರ್ತೊಲೆನ್ಲಾ ಕಾರ್ನಿಕೊಲೆನ್ಲಾ ಮಲ್ತ್‌ದ್ ತೋಜಪಾವೆರ್.

²³ನಿಕುಲು ಜಾಗ್ರತೆಡ್ ಉಪ್ಪುಲೆ, ಉಂದೆನ್ ಮಾತೆನ್ಲಾ ಸುರುಟ್ಟೆ ಪನ್ತೆ.

²⁴“ಉಂದತ್ತಂದೆ ಆ ದಿನೊಕುಲೆಡ್ ಆ ಸಂಕಟ ತೀರಿ ಬೊಕ್ಕ, ಸೂರ್ಯೆ ಕತ್ತಲೆ ಆದ್ ಪೋವು, ಚಂದ್ರೆ ಬೊಲ್ಪು ಕೊರಂದ್,

²⁵ನಕ್ಷತ್ರೊಲು ಬಾನೊಡ್ದು ತಾಲ್ದ್ ಬೂರು ಬಾನದ ಬಲೊಲು ಪಂದ್‌ದ್ ಪೋವು.

²⁶ಅಪಗ ನರಮಾನಿ ಮಗೆ ಬಾರಿ ಬಲೊಟ್ಲಾ ಮೈಮೆಡ್ಲಾ ಮುಗಲ್‌ಲೆಡ್ ಬರ್ಪಿನೆನ್ ತೂಪರ್.

²⁷ಬೊಕ್ಕ ಆಯೆ ತನ ದೂತೆರೆನ್ ಕಡಪುಡ್ದು, ಭೂಮಿಡ್ದ್ ಬಾನದ ಕೊಡೀಕಡೆ ಮುಟ್ಟ, ದೇವೆರ್ ಅಜತ್ ದೆತ್ತೊಂಡಿನಾಕುಲೆನ್ ನಾಲ್ ದಿಕ್ಕ್‌ಲೆಡ್ದ್ ಒಟ್ಟು ಕೂಡಾವೆರ್.

²⁸“ಅಂಜೂರದ ಮರತ ಉಪಕತೆಡ್ದ್ ಬುದ್ಧಿ ಕಲ್ತೊನ್ಲೆ. ಐತ ಗೆಲ್ಲ್ ನನಲಾ ಲತ್ತ್ ಇತ್ತ್‌ದ್ ಇರೆ ಬುಡ್ನಗ ಅರೆಗಾಲ ಕೈತಲಾಂಡ್ ಅಂದ್‌ದ್ ತೆರಿಯೊನ್ವರ್.”

²⁹ಅಂಚೆನೇ ನಿಕುಲುಲಾ ಉಂದು ಮಾತ ಆಪಿನೆನ್ ತೂನಗ, ಗಳಿಗೆ ಕೈತಲುಂಡು, ಬಾಕಿಲ್‌ದಲ್ಪನೇ ಉಂಡು ಅಂದ್‌ದ್ ತೆರಿಯೊನ್ಲೆ.

³⁰ಉಂದು ಮಾತ ಆಪಿನೆಟ್ಟ ಈ ಸಂತಾನ ಆಳಿದ್ ಪೋಪಿನೇ ಇಜ್ಜಿ ಅಂದ್‌ದ್ ನಿಕ್ಲೆಗ್ ನಿಜಾದ್ ಪನ್ಪೆ.

³¹ಬಾನಲಾ ಭೂಮಿಲಾ ಆಳಿದ್ ಪೋವು, ಆಂಡ ಎನ ಪಾತೆರೊಲು ಆಳಿದ್ ಪೋಪಿನೆ ಇಜ್ಜಿ.

³²“ಉಂದತ್ತಂದೆ ಆ ದಿನತ ಬಗೆಟಾವಡ್ ಆ ಗಳಿಗೆದ ಬಗೆಟಾವಡ್ ಎನ ಅಮ್ಮೆರೆಗ್ ತೆರಿಯು ಅತ್ತಂದೆ ಬೊಕ್ಕ ಏರೆಗ್ಲಾ ತೆರಿಯಂದ್. ಪರಲೋಕೊಡುಪ್ಪು ದೂತೆರೆಗ್ಲಾ ತೆರಿಯಂದ್, ಮಗಕ್ಲಾ ತೆರಿಯಂದ್.

³³ಆ ಕಾಲ ಏಪ ಬರ್ಪುಂಡು ಅಂದ್‌ದ್ ನಿಕ್ಲೆಗ್ ಗೊತ್ತಿಜ್ಜಾಂದಿನೆಡ್ದ್ ಎಚ್ಚರಿಕೆ ಆದಿತ್ತ್‌ದ್ ಪ್ರಾರ್ಥನೆ ಮಲ್ಪುಲೆ.

³⁴ಒರಿ ನರಮಾನಿ ತನ ಇಲ್ಲನ್ ಬುಡ್ದು ಬೇತೆ ಒಂಜಿ ದೇಶೊಗು ಪೋನಗ, ತನ ಬೇಲೆದಾಕುಲೆಗ್ ಇಲ್ಲದ ಅಧಿಕಾರೊನು ಒಪ್ಪಿಯಾದ್ ಕೊರ್ದು, ಪ್ರತಿ ಒರಿಯಗ್ ಆಯಾಯನ ಬೇಲೆನ್ ನೇಮಕ ಮಲ್ತ್‌ದ್, ಬಾಕಿಲ್ ಕಾಪುನಾಯನ್ ಲೆತ್ತ್‌ದ್, ಈ ಎಚ್ಚರಿಕೆ ಆದುಪ್ಪೊಡು ಅಂದ್‌ದ್ ಅಪ್ಪಣೆ ಕೊರಿ ಲೆಕ್ಕ ಆದುಂಡು.

³⁵ಇಲ್ಲದ ಯಜಮಾನೆ ಬೈಯಡಾವಡ್, ಮದ್ಯ ರಾತ್ರೆಡಾವಡ್, ಕೋರಿ ಕಿಲೆಪುನಗಾವಡ್, ಪುಲ್ಯ ಕಾಂಡೆಡಾವಡ್ ಏಪ ಬರ್ಪೆನಾ ನಿಕ್ಲೆಗ್ ಗೊತ್ತುದಾಂತೆ ಉಪ್ಪುನೆಡ್ದ್ ಎಚ್ಚರಿಕೆ ಆದುಪ್ಪುಲೆ.

³⁶ಆಯೆ ಪಕ್ಕನೆ ಬತ್ತೆಡ, ನಿಕುಲು ನಿದ್ರೆಡ್ ಉಪ್ಪುನೆನ್ ಆಯೆ ತೂವೆರೆ ಬಲ್ಲಿ.

³⁷ಯಾನ್ ನಿಕ್ಲೆಗ್ ಪಂತಿನೆನೇ ಮಾತೆರೆಗ್ಲಾ ಪನ್ಪೆ, ಎಚ್ಚರಿಕೆ ಆದುಪ್ಪುಲೆ,” ಅಂದ್‌ದ್ ಪಂಡೆ.