Read Tulu ಮಾರ್ಕೆ 14 Bible Online

ಮಾರ್ಕೆ 14 - Tulu bible

ಮಾರ್ಕೆ 14

¹ಪಸ್ಕ ಬೊಕ್ಕ ಪುಳಿದಾಂತಿನ ರೊಟ್ಟಿದ ಪರ್ಬ ಬರಿಯೆರೆಗ್ ನನಲಾ ರಡ್ಡ್ ದಿನ ಉಪ್ಪುನಗ ಪ್ರಧಾನಯಾಜಕೆರ್‌ಲಾ ಶಾಸ್ತ್ರಿಲುಲಾ ಯೇಸುನು ಉಪಾಯೊಡು ಪತ್ತ್‌ದ್ ಕೆರಿಯೆರೆ ಸಾದಿನ್ ನಾಡೊಂದಿತ್ತೆರ್.

²ದಾಯೆಗಂದ್ಂಡ, “ಪರ್ಬದಪಗ ಪತ್ತುನ ಬೊಡ್ಚಿ, ನಮ ಜನೊಕುಲೆಡ್ ಗೌಜಿ ಆವು,” ಅಂದ್‌ದ್ ಪಾತೆರೊಂಡೆರ್.

³ಆಯೆ ಬೇಥಾನ್ಯೊಡು ಕೊಷ್ಟದಾಯೆ ಆದುಪ್ಪು ಸೀಮೋನನ ಇಲ್ಲಡ್ ಇತ್ತ್‌ದ್, ವಣಸ್‌ಗ್ ಕುಲ್ಲುದುಪ್ಪುನಗ, ಒರ್ತಿ ಪೊಂಜೊವು ಮಸ್ತ್ ಬಿಲೆತ ಕಮ್ಮೆನದ ಜಟಮಾಂಸಿದ ಎಣ್ಣೆದ ಕುಪ್ಪಿನ್ ದೆತ್ತೊಂದು ಬತ್ತ್‌ದ್, ಅವೆನ್ ಪುಡತ್‌ದ್, ಎಣ್ಣೆನ್ ಯೇಸುನ ತರೆತ ಮಿತ್ತ್ ಮೈತಲ್.

⁴ಆಂಡ ಕೆಲೆವೆರ್ ಕೋಪೊಡು, “ಈ ಎಣ್ಣೆನ್ ಹಾಳ್ ದಾಯೆಗ್ ಮಲ್ತ?

⁵ಈ ಎಣ್ಣೆನ್ ಮುನ್ನೂದು ಕಾಸ್‌ಡ್ದ್ ಹೆಚ್ಚ್ ಬಿಲೆಕ್ ಮಾರ್ದ್, ಬಡವೆರೆಗ್ ಕೊರ್ತೊಲಿ ಅತ್ತಾ?” ಅಂದ್‌ದ್ ಆಲೆಗ್ ಕುಚ್ಚೊಂಡೆರ್.

⁶ಆಂಡ ಯೇಸು, “ಆಲೆನ್ ಬುಡ್ಲೆ. ಮೊಲೆಗ್ ದಾಯೆಗ್ ತೊಂದರೆ ಕೊರೊಂದುಲ್ಲರ್. ಮೋಲು ಎಂಕ್ ಎಡ್ಡೆಂತಿ ಬೇಲೆ ಮಲ್ತಲ್.

⁷ಬಡವೆರ್ ಏಪಲಾ ನಿಕ್ಲೆಡೊಪ್ಪ ಉಪ್ಪುವೆರ್. ನಿಕ್ಲೆಗ್ ಮನಸ್ ಬತ್ತಿನಪಗ ಅಕ್ಲೆಗ್ ಉಪಕಾರ ಮಲ್ಪೊಲಿ. ಆಂಡ ಯಾನ್ ಏಪಲಾ ನಿಕ್ಲೆಡೊಪ್ಪ ಉಪ್ಪುಜಿ.

⁸ಮೋಲು ತನ್ಕ್ ತೀರಿನಾತ್ ಮಲ್ತ್‌ದಲ್. ಸೈತಿ ಬೊಕ್ಕ ಮಲ್ಪು ಕ್ರಿಯೊಲೆನ್ ಇತ್ತೆನೇ ಎನ ಮೆಯಿಕ್ ಈ ಎಣ್ಣೆನ್ ಪೂಜಿಯಲ್.

⁹ಸುವಾರ್ತೆನ್ ಇಡೀ ಲೋಕೊಡು ಓಲೋಲು ಸಾರಿಯುಂಡಾ, ಅಲ್ಪಲ್ಪ ಮೋಲು ಮಲ್ತಿನೆನ್, ಆಲೆನ ನೆನೆಪುಗಾದ್ ಪನ್ವೆರ್, ಅಂದ್‌ದ್ ನಿಕ್ಲೆಗ್ ನಿಜಾದ್ ಪನ್ಪೆ.” ಅಂದ್‌ದ್ ಪಂಡೆ.

¹⁰ಐಡ್ದ್ ಬೊಕ್ಕ ಪದ್ರಾಡ್ ಶಿಷ್ಯೆರೆಡ್ ಒರಿ ಇಸ್ಕಾರಿಯೋತ ಯೂದೆ, ಯೇಸುನು ಪ್ರಧಾನಯಾಜಕೆರೆಗ್ ಪತ್ತ್‌ದ್ ಕೊರೊಡು ಪಂಡ್ದ್, ಅಕ್ಲೆನ ಕೈತಲ್‌ ಪೋಯೆ.

¹¹ಅಕುಲು ಕೇಂಡ್ದ್ ಸಂತೋಷೊಡು ನಿಕ್ಕ್ ಕಾಸ್ ಕೊರ್ಪ ಅಂದ್‌ದ್ ಪಾತೆರ ಕೊರಿಯೆರ್. ಅಪಗ ಆಯೆ, ಆಯನ್ ಎಂಚ ಪತ್ತ್‌ದ್ ಕೊರ್ಪಿನಿ ಅಂದ್‌ದ್ ಸಮಯೊನು ತೂವೊಂದಿತ್ತೆ.

¹²ಪುಳಿದಾಂತಿ ರೊಟ್ಟಿದ ಪರ್ಬದ ಸುರುತ್ತ ದಿನ ಅಂದ್ಂಡ ಪಸ್ಕದ ಕುರಿನ್ ಬಲಿ ಕೊರ್ಪಿನ ದಿನೊಟು ಆಯನ ಶಿಷ್ಯೆರ್, “ಪಸ್ಕದ ವಣಸ್ ಮಲ್ಪೆರೆಗಾದ್ ಎಂಕುಲು ಓಲು ಪೋದು ತಯಾರ್ ಮಲ್ಪೊಡು ಅಂದ್‌ದ್ ಕೇನ್ನಗ”

¹³ಆಯೆ ತನ ಶಿಷ್ಯೆರೆಡ್ ಇರ್ವೆರೆನ್ ಲೆತ್ತ್‌ದ್, “ನಿಕುಲು ಪೇಂಟೆದುಲಯಿ ಪೋಲೆ. ಅಲ್ಪ ಒರಿ ನರಮಾನಿ ನೀರ್ ದಿಂಜಿದಿ ಕೊಡಪಾನೊನು ತುಂಬೊಂದು ಪೋಪಿನಾಯೆ ನಿಕ್ಲೆನ ಎದುರು ಬರ್ಪೆ. ನಿಕುಲು ಆಯನ ಬೆರಿಯೆ ಪೋಲೆ.

¹⁴ಆಯೆ ವಾ ಇಲ್ಲಗ್ ಪೋಪೆನಾ ಆ ಇಲ್ಲದ ಯಜಮಾನಗ್, ‘ಎಂಕ್ಲೆನ ಬೋಧಕೆ ತನ ಶಿಷ್ಯೆರೆಡೊಪ್ಪ ಪಸ್ಕದ ವಣಸ್‌ನ್ ಮಲ್ಪರೆ ತನ್ಕ್ ಕೋಣೆ ಓಲು ಉಂಡು?’ ಅಂದ್‌ದ್ ಕೇನ್ವೆ ಅಂದ್‌ದ್ ಪನ್ಲೆ.

¹⁵ಆಯೆ ತಕ್ಕ ಸಾಮಾನ್‌ಲೆನ್ ತಯಾರ್ ಮಲ್ತ್‌ದ್ ದೀದಿತ್ತಿ ಮೇಲುಪ್ಪರಿಗೆದ ಮಲ್ಲ ಕೋಣೆನ್ ನಿಕ್ಲೆಗ್ ತೋಜಾವೆ. ಅಲ್ಪ ನಂಕ್ ವಣಸ್‌ಗ್ ತಯಾರ್ ಮಲ್ಪುಲೆ,” ಪಂಡ್ದ್ ಅಕ್ಲೆನ್ ಕಡಪುಡ್ದು ಕೊರಿಯೆ.

¹⁶ಶಿಷ್ಯೆರ್‌ ಪಿದಾಡ್ದ್ ಪೇಂಟೆಗ್ ಪೋದು ಯೇಸು ಪಂಡಿಲೆಕ್ಕನೇ ಮಾತೆನ್ಲಾ ತೂದು, ಪಸ್ಕದ ವಣಸ್‌ನ್ ತಯಾರ್ ಮಲ್ತೆರ್.

¹⁷ಬೈಯದಗ ಆಯೆ ಪದ್ರಾಡ್ ಶಿಷ್ಯೆರೆಡೊಪ್ಪ ಬತ್ತೆ.

¹⁸ಅಕುಲು ಕುಲ್ಲೊಂದು ವಣಸ್ ಮಲ್ತೊಂದುಪ್ಪುನಗ, ಯೇಸು, “ಎನಡೊಪ್ಪ ವಣಸ್ ಮಲ್ಪುನಾಯೆ, ನಿಕ್ಲೆಡ್ ಒರಿ ಎನನ್ ಪತ್ತ್‌ದ್ ಕೊರುವೆ ಅಂದ್‌ದ್ ಯಾನ್ ನಿಕ್ಲೆಗ್ ನಿಜಾದ್ ಪನ್ಪೆ.”

¹⁹ಅಪಗ ಅಕುಲು ಬೇಜಾರ್ ಮಲ್ತ್‌ದ್, “ಯಾನತ್ತತ್ತಾ ಯಾನತ್ತತ್ತಾ,” ಅಂದ್‌ದ್ ಒರಿ ಒರಿ ಆಯಡ ಕೇನಿಯೆರೆ ಸುರು ಮಲ್ತೆರ್.

²⁰ಐಕ್ ಯೇಸು ಅಕ್ಲೆಡ, “ಎನ ಪದ್ರಾಡ್ ಶಿಷ್ಯೆರೆಡ್ ಒರಿ. ಬಟ್ಟಲ್ಡ್ ಎನಡೊಪ್ಪ ಕೈ ಪಾಡುನಾಯೆನೇ.

²¹ನರಮಾನಿ ಮಗೆ ಪಿದಾಡ್ದ್ ಪೋಪೆ ಸರಿ. ಅಂಚ ಆಯನ ಸಂಗತಿಡ್ ಬರೆತ್ಂಡತ್ತಾ. ಆಂಡ ಏರ್ ನರಮಾನಿ ಮಗನ್ ಪತ್ತ್‌ದ್ ಕೊರ್ಪೆನಾ ಆಯನ ಗತಿನ್ ದಾನೆಂದ್ ಪನೊಲಿ. ಆ ನರಮಾನಿ ಪುಟ್ಟಂದೆ ಇತ್ತ್‌ದ್ಂಡ ಆಯಗ್ ಎಡ್ಡೆ ಇತ್ತ್ಂಡ್,” ಅಂದ್‌ದ್ ಪಂಡೆ.

²²ಅಕುಲು ವಣಸ್ ಮಲ್ತೊಂದುಪ್ಪುನಗ ಆಯೆ ರೊಟ್ಟಿನ್ ದೆತ್ತೊಂದು, ದೇವೆರೆನ್ ಸುಗಿತ್‌ದ್, ಪೊಲ್ತುದು ಅಕ್ಲೆಗ್ ಕೊರ್ದು, “ದೆತ್ತೊನ್ಲೆ, ಉಂದು ಎನ ಶರೀರ,” ಅಂದ್‌ದ್ ಪಂಡೆ.

²³ಐಡ್ದ್ ಬೊಕ್ಕ ಪಾತ್ರೆನ್ ದೆತ್ತೊಂದು, ಸುಗಿತ್‌ದ್ ಅಕ್ಲೆಗ್ ಕೊರ್ದು, ಅಕುಲು ಮಾತೆರ್ ಐಟ್ಟ್ ಪರಿಯೆರ್.

²⁴ಬೊಕ್ಕ ಯೇಸು ಅಕ್ಲೆಡ, “ಉಂದು ಎನ ನೆತ್ತೆರ್, ಮಸ್ತ್ ಜನೊಕುಲೆಗಾದ್ ಗುತ್ತುದಿನ ಒಡಂಬಡಿಕೆದ ನೆತ್ತೆರ್.

²⁵ನಿಕ್ಲೆಗ್ ನಿಜಾದ್ ಪನ್ಪೆ, ಯಾನ್ ದೇವೆರೆ ರಾಜ್ಯೊಡು ಪೊಸತ್ತಾದ್ ಪರ್ಪಿನ ದಿನ ಮುಟ್ಟ ದ್ರಾಕ್ಷಾರಸೊನು ನನ ಪರ್ಪಿನೇ ಇಜ್ಜಿ,” ಅಂದ್‌ದ್ ಪಂಡೆ.

²⁶ಬೊಕ್ಕ ಅಕುಲು ಕೀರ್ತನೆ ರಾಗ ಮಲ್ತ್‌ದ್, ಇಪ್ಪೆಗುಡ್ಡೆಗ್ ಪಿದಾಡ್ದ್ ಪೋಯೆರ್.

²⁷ಅಪಗ ಯೇಸು ಅಕ್ಲೆಡ, “ನಿಕುಲು ಮಾತೆರ್ಲಾ ಪೋಡಿದ್ ಪಿರ ಜಾರುವರ್. ದಾಯೆಗಂದ್ಂಡ, ‘ಯಾನ್, ಕುರುಬಗ್ ಹಾಕುವೆ, ಕುರಿಕುಲು ಚಲ್ಲಾಪಿಲ್ಲಿ ಆವು,’ ಅಂದ್‌ದ್ ಬರೆತ್ಂಡತ್ತಾ.

²⁸ಆಂಡ ಯಾನ್ ಜೀವಾದ್ ಲಕ್ಕಿ ಬೊಕ್ಕ ನಿಕ್ಲೆ ದುಂಬು ಗಲಿಲಾಯೊಗು ಪೋವೆ,” ಅಂದ್‌ದ್ ಪಂಡೆ.

²⁹ಪೇತ್ರೆ ಆಯಗ್, “ಮಾತೆರ್ಲಾ ಪೋಡಿದ್ ಪಿರಜಾರಿಯೆರ್ಡಲಾ ಯಾನ್ ಪಿರಜಾರಯೆ,” ಅಂದ್‌ದ್ ಪನ್ನಗ,

³⁰ಯೇಸು, “ನಿಕ್ಕ್ ನಿಜಾದ್ ಪನ್ಪೆ ಇನಿತ ರಾತ್ರೆಡೇ ಕೋರಿ ರಡ್ಡ್ ಸರ್ತಿ ಕಿಲೆಪುನೆಡ್ದ್ ದುಂಬೇ ಈ ಎನನ್ ತೆರಿಯಯೆ ಅಂದ್‌ದ್ ಮೂಜಿ ಸರ್ತಿ ಪನ್ಪ,” ಪಂಡೆ.

³¹ಆಂಡ ಆಯೆ, “ಯಾನ್ ನಿನ ಒಟ್ಟುಗು ಸೈಯೊಡಂಡಲಾ ನಿನನ್ ತೆರಿಯಯೆ ಅಂದ್‌ದ್ ಪನಯೆ ಪಂಡ್ದ್ ಕಂಡಿತಾದ್ ಪಂಡೆ,” ಅಂಚೆನೇ ಮಾತೆರ್ಲಾ ಪಂಡೆರ್.

³²ಅಕುಲು ಗೆಥ್ಸೇಮನೆ ಪನ್ಪಿ ತೋಟೊಗು ಬತ್ತ್‌ದ್ ಆಯೆ ತನ ಶಿಷ್ಯೆರೆಗ್, “ಯಾನ್ ಪೋದು ಪ್ರಾರ್ಥನೆ ಮಲ್ಪುವೆ, ನಿಕುಲು ಮುಲ್ಪನೆ ಕುಲ್ಲುಲೆ,” ಅಂದ್‌ದ್ ಪಂಡೆ.

³³ಪೇತ್ರೆ, ಯಾಕೋಬು ಬೊಕ್ಕ ಯೋಹಾನೆರೆನ್ ಯೇಸು ತನಡೊಪ್ಪ ಲೆತ್ತೊಂದು ಪೋಯೆ. ಅವುಲು ಆಯೆ ದುಃಖ ಮಲ್ಪೆರೆಲಾ ವ್ಯಥೆ ಬುಡಿಯೆರೆಲಾ ಸುರು ಮಲ್ತೆ.

³⁴ಬೊಕ್ಕ ಯೇಸು ಅಕ್ಲೆಡ, “ಎನ ಪ್ರಾಣ ಸೈತ್ ಪೋಪಿನಾತ್ ದುಃಖೊಡು ದಿಂಜಿದ್‌ಂಡ್; ನಿಕುಲು ಮೂಲೇ ಇತ್ತ್‌ದ್ ಎಚ್ಚರಿಕೆ ಆದುಪ್ಪುಲೆ,” ಅಂದ್‌ದ್ ಪಂಡ್ದ್ ಒಂತೆ ದೂರ ಪೋದು

³⁵ನೆಲತ್ತ ಮಿತ್ತ್ ಅಡ್ಡಬೂರ್ದು, ಸಾದ್ಯ ಆಂಡ ಆ ಗಳಿಗೆ ತನಡ್ದ್ ದೂರ ಆಪಿಲೆಕ್ಕ ದೇವೆರೆಡ ಪ್ರಾರ್ಥನೆ ಮಲ್ತೆ.

³⁶“ಅಮ್ಮೆರೇ, ಎನ ಅಮ್ಮೆರೇ, ನಿಕ್ಕ್ ಮಾತಲಾ ಸಾದ್ಯ ಉಂಡು, ಈ ಕಷ್ಟ ಅನುಭವಿಪುನ ದುನ್ನೊನು ಎನಡ್ದ್ ದೆಪ್ಪುಲ. ಆಂಡಲಾ ಎನ ಚಿತ್ತದ ಲೆಕ್ಕ ಅತ್ತ್ ನಿನ ಚಿತ್ತದಲೆಕ್ಕನೇ ಆವಡ್,” ಅಂದ್‌ದ್ ಪ್ರಾರ್ಥನೆ ಮಲ್ತೆ.

³⁷ಐಡ್ದ್ ಬೊಕ್ಕ ಆಯೆ ಬತ್ತ್‌ದ್ ಅಕುಲು ನಿದ್ರೆ ಮಲ್ಪುನೆನ್ ತೂದು ಪೇತ್ರಗ್, “ಸೀಮೋನಾ, ನಿದ್ರೆ ಮಲ್ತೊಂದುಲ್ಲನಾ? ಒಂಜಿ ಗಳಿಗೆ ಆಂಡಲಾ ಎಚ್ಚರಿಕೆ ಆದುಪ್ಪೆರೆ ತೀರುಜಾ?”

³⁸“ನಿಕುಲು ಶೋಧನೆಗ್ ಬೂರಂದಿಲೆಕ್ಕ ಎಚ್ಚರಿಕೆ ಆದಿತ್ತ್‌ದ್ ಪ್ರಾರ್ಥನೆ ಮಲ್ಪುಲೆ; ಆತ್ಮ ತಯಾರುಂಡು ಸರಿ, ಆಂಡ ಶರೀರ ಬಲದಾಂತಿನವು,” ಅಂದ್‌ದ್ ಪಂಡೆ.

³⁹ಕುಡ ಪೋದು ಅವ್ವೇ ಪಾತೆರೊನು ಪನೊಂದು ಪ್ರಾರ್ಥನೆ ಮಲ್ತೆ.

⁴⁰ಯೇಸು ಕುಡ ಬತ್ತಿನಪಗ ಅಕುಲು ನಿದ್ರೆ ಮಲ್ಪುನೆನ್ ತೂಯೆ, ಅಕ್ಲೆನ ಕಣ್ಣ್‌ಲು ದುನ್ನ ಆದಿತ್ತ್ಂಡ್. ಕುಡೊರ ಕೇಂಡಿನೆಕ್ಕ್ ದಾದ ಉತ್ತರ ಕೊರೊಡು ಅಂದ್‌ದ್ ಅಕ್ಲೆಗ್ ತೆರಿಜಿ.

⁴¹ಆಯೆ ಮೂಜನೆ ಸರ್ತಿ ಬತ್ತ್‌ದ್ ಅಕ್ಲೆಗ್, “ನಿಕುಲು ನನಲಾ ನಿದ್ರೆ ಮಲ್ತೊಂದು ಬಚ್ಚೆಲ್ ದೆತ್ತೊಂದುಲ್ಲರಾ? ಯಾವು, ಗಳಿಗೆ ಕೈತಲ್‌ ಬತ್ತ್ಂಡ್. ತೂಲೆ, ನರಮಾನಿ ಮಗನ್ ಪಾಪಿಷ್ಟೆರೆ ಕೈಕ್ ಒಚ್ಚಿದ್ ಕೊರುವೆರ್.

⁴²ಲಕ್ಕ್‌ಲೆ, ನಮ ಪೋಯಿ. ಎನನ್ ಪತ್ತ್‌ದ್ ಕೊರ್ಪಿನಾಯೆ ಕೈತಲ್ ಬೈದೆ ತೂಲೆ,” ಅಂದ್‌ದ್ ಪಂಡೆ.

⁴³ಆಯೆ ನನಲಾ ಪಾತೆರೊಂದುಪ್ಪುನಗನೇ ಪದ್ರಾಡ್ ಶಿಷ್ಯೆರೆಡ್ ಒರಿ ಯೂದೆ ಪನ್ಪಿನಾಯೆ ಬತ್ತೆ. ಆಯಡೊಪ್ಪ ಪ್ರಧಾನಯಾಜಕೆರೆ, ಶಾಸ್ತ್ರಿಲೆ, ಹಿರಿಯೆರೆ ಮೊಕ್ಲೆ ಕಡೆಡ್ದ್ ಒಂಜಿ ಗುಂಪು, ಕತ್ತಿ ಸೋಂಟೆಲೆನ್ ಪತ್ತೊಂದು ಬತ್ತೆರ್.

⁴⁴ಉಂದತ್ತಂದೆ ಆಯನ್ ಪತ್ತ್ ಕೊರ್ಪಿನಾಯೆ ಅಕ್ಲೆಡ, “ಯಾನ್ ಏರೆಗ್ ಮುತ್ತು ಕೊರ್ಪೆನಾ ಆಯೆನೇ ಆಯೆ. ಆಯನ್ ಪತ್ತ್‌ದ್ ಜಾಗ್ರತೆಡ್ ಪತ್ತೊಂದು ಪೋಲೆ,” ಅಂದ್‌ದ್ ಗುರ್ತ ಪಂಡ್ದ್ ಕೊರ್ದಿತ್ತೆ.

⁴⁵ಅಂಚೆನೇ ಯೂದೆ ಅಡೆಗ್ ಬತ್ತಿ ಕೂಡ್ಲೆ, ಆಯೆ ಯೇಸುನ ಕೈತಲ್‌ ಬತ್ತ್‌ದ್, “ಗುರೂ,” ಪಂಡ್ದ್ ಆಯಗ್ ಮುತ್ತು ಕೊರಿಯೆ.

⁴⁶ಅಕುಲು ಆಯನ ಮಿತ್ತ್ ಕೈ ಪಾಡ್ದ್ ಆಯನ್ ಪತ್ತಿಯೆರ್.

⁴⁷ಯೇಸುನ ಕೈತಲ್‌ಡ್ ಉಂತುದಿನಾಕುಲೆಡ್ದ್ ಒರಿ ತನ ಕತ್ತಿ ಬೇರ್ದ್ ಪ್ರಧಾನಯಾಜಕನ ಬೇಲೆದಾಯಗ್ ಹಾಕ್‌ದ್ ಆಯನ ಕೆಬಿನ್ ಕಡ್ತ್‌ದ್ ಬುಡಿಯೆ.

⁴⁸ಅಪಗ ಯೇಸು ಅಕ್ಲೆಗ್, “ಒರಿ ಕಲ್ವನ್ ಪತ್ತಿಯೆರೆ ಬತ್ತಿಲೆಕ್ಕ ಕತ್ತಿನ್ಲಾ, ಸೋಂಟೆನ್ಲಾ ಪತ್ತೊಂದು ಎನನ್ ಪತ್ತಿಯೆರೆ ಬತ್ತರಾ?

⁴⁹ಯಾನ್ ದಿನಾಲ ದೇವಾಲಯೊಡು ಬೋಧನೆ ಮಲ್ತೊಂದುಪ್ಪುನಗ ನಿಕುಲು ಎನನ್ ಪತ್ತ್‌ಜರ್; ಆಂಡ ಶಾಸ್ತ್ರೊಡು ಬರೆತಿನವು ಪೂರ್ತಿ ಆಪಿಲೆಕ್ಕ ನಡತ್ಂಡ್,” ಅಂದ್‌ದ್ ಉತ್ತರ ಕೊರಿಯೆ.

⁵⁰ಅಪಗ ಶಿಷ್ಯೆರ್ ಮಾತೆರ್ಲಾ ಆಯನ್ ಬುಡ್ದು ಪಾರ್‌ಪೋಯೆರ್.

⁵¹ಒರಿ ಜವನೆ ಬಜೀ ಮೆಯಿಕ್ ನಾರ್‌ಮಡಿತ ಕುಂಟುನು ಪೊದೆತೊಂದು ಯೇಸುನ ಬೆರಿಯೆ ಬರೊಂದಿತ್ತೆ. ಸಿಪಾಯಿಲು ಆಯನ್ ಪತ್ತ್‌ನಗ,

⁵²ಆಯೆ ಆ ನಾರ್‌ಮಡಿತ ಕುಂಟುನು ಬುಡ್ದು ಬಜೀ ಮೆಯಿಟ್ ಬಲ್ತ್ ಪೋಯೆ.

⁵³ಬೊಕ್ಕ ಅಕುಲು ಯೇಸುನು ಪ್ರಧಾನಯಾಜಕನ ಕೈತಲ್‌ ಲೆತ್ತೊಂದು ಪೋಯೆರ್. ಅವುಲು ಪ್ರಧಾನಯಾಜಕೆರ್‌ಲು, ಹಿರಿಯಾಕುಲು, ಶಾಸ್ತ್ರಿಲು ಮಾತೆರ್ಲಾ ಸೇರ್ದ್ ಬತ್ತೆರ್.

⁵⁴ಬೊಕ್ಕ ಪೇತ್ರೆ ದೂರೊಡ್ದು ಯೇಸುನ ಬೆರಿಯೆ ಪೋವೊಂದು ಪ್ರಧಾನಯಾಜಕನ ಮಠತ ಜಾಲ್‌ದ ಉಲಯಿ ಬತ್ತ್‌ದ್ ಪಾರದಾಕುಲೆಡೊಪ್ಪ ತೂತ ಎದುರುಡು ಕುಲ್ಲೊಂದು ಚಳಿ ಕಾಯ್ತೊಂದಿತ್ತೆ.

⁵⁵ಅಪಗ ಪ್ರಧಾನಯಾಜಕೆರ್‌ಲಾ, ಹಿರಿಸಭೆತಾಕುಲುಲಾ ಯೇಸುನು ಕೆರ್ಪಾವೊಡು ಅಂದ್‌ದ್ ಆಯ ಮಿತ್ತ್ ಸುಳ್ಳು ಸಾಕ್ಷಿನ್ ನಾಡಿಯೆರ್. ಆಂಡ ದಾಲಾ ತಿಕ್ಕ್‌ಜಿ.

⁵⁶ಮಸ್ತ್ ಜನ ಬತ್ತ್‌ದ್ ಆಯನ ಮಿತ್ತ್ ಸುಳ್ಳು ಸಾಕ್ಷಿ ಪಂಡೆರ್ಡಲಾ ಅಕ್ಲೆನ ಸಾಕ್ಷಿ ಒಂಜೇಲೆಕ್ಕ ಇತ್ತ್‌ಜಿ.

⁵⁷ಕೆಲೆವೆರ್ ಲಕ್ಕ್‌ದ್ ಉಂತುದು, “ನರಮಾನಿನ ಕೈಡ್ದ್ ಕಟ್ಟ್‌ದಿನ ಈ ದೇವಾಲಯೊನು, ‘ಯಾನ್ ಮಗ್ತ್ ಪಾಡ್ದ್, ನರಮಾನಿನ ಕೈಡ್ದ್ ಕಟ್ಟಂದಿನ ಬೊಕ್ಕೊಂಜಿ ದೇವಾಲಯೊನು ಮೂಜಿ ದಿನತ ಉಲಯಿ ಕಟ್ಟುವೆ,’ ಪಂಡ್ದ್ ಪನ್ತಿನೆನ್ ಎಂಕುಲು ಕೇಂಡ್ದ.” ಅಂದ್‌ದ್ ಆಯನ ಮಿತ್ತ್ ಸುಳ್ಳು ಸಾಕ್ಷಿ ಪಂಡೆರ್.

⁵⁸

⁵⁹ಎಂಚಿನ ಪಂಡ್‌ಂಡಲಾ ಅಕ್ಲೆನ ಸಾಕ್ಷಿ ಒಂಜೇಲೆಕ್ಕ ಇತ್ತ್‌ಜಿ.

⁶⁰ಅಪಗ ಪ್ರಧಾನಯಾಜಕೆ ಲಕ್ಕ್‌ದ್ ನಡುಟು ಉಂತುದು, “ಈ ದಾಲಾ ಉತ್ತರ ಕೊರ್ಪುಜನಾ? ಮೊಕುಲು ನಿನ ಮಿತ್ತ್ ಪನ್ಪಿನ ಈ ಸಾಕ್ಷಿ ಎಂಚಿನವು?” ಅಂದ್‌ದ್ ಯೇಸುಡ ಪ್ರಶ್ನೆ ಮಲ್ತೆ.

⁶¹ಆಂಡ ಯೇಸು ಮನಿಪಂದೆ ಇತ್ತ್‌ದ್, ದಾಲಾ ಉತ್ತರ ಕೊರ್ಜೆ. ಕುಡ ಪ್ರಧಾನಯಾಜಕೆ ಆಯಡ, “ಈ ಕ್ರಿಸ್ತೆನಾ, ಪುಗರ್ತೆಗ್ ತಕ್ಕಾದುಪ್ಪು ದೇವೆರೆ ಮಗೆನಾ?” ಅಂದ್‌ದ್ ಕೇನ್ನಗ,

⁶²ಯೇಸು, “ಯಾನ್ ಆಯೆನೇ, ಉಂದತ್ತಂದೆ ನರಮಾನಿ ಮಗೆ ಸರ್ವಶಕ್ತನ ಬಲತ್ತ ಮರ್ಗಿಲ್‌ಡ್ ಕುಲ್ಲುದುಪ್ಪುನೆನ್ಲಾ ಬಾನದ ಮುಗಲ್‌ದೊಟ್ಟಿಗೆ ಬರ್ಪುನೆನ್ಲಾ ತೂವರ್,” ಪಂಡೆ.

⁶³ಉಂದೆನ್ ಕೇಂಡ್ದ್ ಪ್ರಧಾನಯಾಜಕೆ ತನ ಅಂಗಿನ್ ಪರ್ತೊಂದು, “ನಂಕ್ ಸಾಕ್ಷಿಲು ನನ ದಾಯೆಗ್ ಬೋಡು?

⁶⁴ಆಯೆ ಮಲ್ತಿನ ದೂಷಣೆನೆನ್ ಕೇಂಡರತ್ತಾ? ನಿಕ್ಲೆಗ್ ಎಂಚ ತೋಜುಂಡು,” ಪಂಡಿನಪಗ, ಅಕುಲು ಮಾತೆರ್ಲಾ, “ಉಂಬೆ ಮರಣ ದಂಡನೆಗ್ ತಕ್ಕದಾಯೆ,” ಅಂದ್‌ದ್ ತೀರ್ಪು ಮಲ್ತೆರ್.

⁶⁵ಐಡ್ದ್ ಬೊಕ್ಕ ಕೆಲೆವೆರ್ ಆಯನ ಮಿತ್ತ್ ಉಬ್ಬಿದ್, ಮೋನೆಗ್ ಮುಸ್ಕು ಪಾಡ್ದ್ ಗುದ್ದುದು, “ನಿಕ್ಕ್ ಗುದ್ದಿನಾಕುಲು ಏರಂದ್‌ದ್ ಪ್ರವಾದನೆ ಪನ್ಲ.” ಬೊಕ್ಕ ಪಾರದಾಕುಲು ಆಯನ್ ಲೆತ್ತೊಂದು ಪೋದು ಆಯನ ಕೆಪ್ಪೆಗ್ ಪೆಟ್ಟ್ ಹಾಕ್‌ದ್ ತನ್ಕ್‌ಲೆ ವಶೊಕು ದೆತ್ತೊಂಡೆರ್.

⁶⁶ಇಂಚಿಡ್ದ್ ಪೇತ್ರೆ ತಿರ್ತ್ ಜಾಲ್‌ಡ್ ಇತ್ತಿನಪಗ ಪ್ರಧಾನಯಾಜಕನ ಚಾಕ್ರಿದಾಲ್ ಒರ್ತಿ ಬತ್ತ್‌ದ್

⁶⁷ಪೇತ್ರೆ ಚಳಿ ಕೈತೊಂದಿತ್ತಿನೆನ್ ತೂದು, “ಈಲಾ ನಜರೇತ್‌ದ ಯೇಸುಡೊಪ್ಪ ಇತ್ತಿನಾಯೆ ಅತ್ತಾ?” ಅಂದ್‌ದ್ ಪಂಡಲ್.

⁶⁸ಆಂಡ ಆಯೆ, “ಇಜ್ಜಿ, ಈ ದಾದ ಪನೊಂದುಲ್ಲನ ಎಂಕ್ ತೆರಿಯಂದ್, ಅರ್ಥಲಾ ಆವೊಂದಿಜ್ಜಿ” ಅಂದ್‌ದ್ ಪಿದಯಿದ ಜಾಲ್‌ಗ್ ಪೋಯೆ. (ಅಪಗ ಕೋರಿ ಕಿಲೆತ್ತ್ಂಡ್).

⁶⁹ಅಲ್ಪ ಚಾಕ್ರಿದಾಲ್ ಆಯನ್ ತೂದು, ಕೈತಲ್‌ಡ್ ಉಂತುದಿನಾಕುಲೆಗ್, “ಉಂಬೆಲಾ ಅಕ್ಲೆಡ್ ಒರಿ ಅಂದ್‌ದ್ ಪನಿಯೆರೆ ಸುರು ಮಲ್ತೊಲು,”

⁷⁰ಆಯೆ ಕುಡ ಆರೆಂಜಿಯೆ. ಒಂತೆ ಪೊರ್ತುಡ್ದು ಬೊಕ್ಕ ಅಲ್ಪ ಉಂತುದಿನಾಕುಲು ಪೇತ್ರಗ್, “ಕಂಡಿತಾದ್ ಈಲಾ ಅಕ್ಲೆಡ್ ಒರಿ, ಈ ಗಲಿಲಾಯದಾಯೆನೇ.” ಅಂದ್‌ದ್ ಪಂಡೆರ್.

⁷¹ಆಂಡ ಆಯೆ, “ನಿಕುಲು ಪನ್ಪಿನ, ಆ ನರಮಾನಿನ್ ಯಾನ್ ತೆರಿಯಯೆ,” ಅಂದ್‌ದ್ ಶಾಪಿಯೊನಿಯೆರೆಗ್ಲಾ, ಆಜ ಪಾಡೊನಿಯೆರೆಗ್ಲಾ ಸುರು ಮಲ್ತೆ.

⁷²ಅಪಗನೆ ಕೋರಿ ರಡ್ಡನೆ ಸರಿ ಕಿಲೆತ್ತ್ಂಡ್. ಅಪಗ ಪೇತ್ರೆ, “ಕೋರಿ ಕಿಲೆಪೊಡ್ದು ದುಂಬು ಮೂಜಿ ಸರ್ತಿ ಎನ ಬಗೆಟ್, ಆಯನ್ ತೆರಿಯಯೆ ಅಂದ್‌ದ್ ಅರೆಂಜುವ,” ಪಂಡ್ದ್ ಯೇಸು ತನ್ಕ್ ಪನ್ತಿನ ಪಾತೆರೊನು ನೆನೆಪು ಮಲ್ತ್‌ದ್ ಆ ಬಗೆಟ್ ಎನ್ನ್‌ದ್ ಬುಲ್ತೆ.